Continamos con las Cypris

Aprofitando que ahier venió l'amigo que m'ensenyó esta población, i torné un ratet ahier de maitins, aprofitando amés un fratet sin plever (pero hibo qué frío que feba). Estianyo no sé qué les ha pasato, pero pareix que es corzos les han pillato gusto e n'i hai mutas mosegatas, en trobas pocas "fotochenicas". E per ixo mesmo fuemos ta'l puesto an que l'anyo pasato trobé la Convallaria majalis e n'i heba  aembute. Esta son difícils, per es blancos, per chicotas e perque salen en un ronar... La camara me tornó a deixar tirato, pide relevo, pero no i hai diners.
Tos deixo con las fotos que facié antes de que la camara decís prou.

Ya son aquí. Cypripedium calceolus 2014

Pos ixo,q ue estianyo como ha feto calor, s'han adelantato. L'anyo pasato a estas alturas yera nevando. Una escapateta rapida perque estianyo no puedo fer gran cosa, debaixo d'el batiauguas e mirando el reloch pa arribar a replegar a's fillos a la salita d'el cole. L'anyo que viene espero poder fer-ne més cosas d'estas preciosidatz.
En meto quatre, per se queretz fer la favor de decir quál tos fa més goyo de cada par (de cerca e de leixos).

Unas floretas

Quasi sin que me vague ni an en pensar en fer fotos. E el pior ye que viene el tiempo de las orquidias :-(
Una escapateta, de menso de una hora e media, d'el domingo de maitins.
Una violeta:

Dryas octopetala:

Ophrys lutea (creigo), la primer vegata que la veyebe, foto feta a'l canto d'A Buerda:

 

 

Castillo Mayor

La verdat ye que me faría goyo de titular-la Castiello Mayor, que ye como correspondería a la nuestra fonetica (e i hai exemplos de toponimos, en Bielsa, sin ir-nos-ne més leixos, tenemos Feixa Castiecho), pero siempre el he sentito asinas a la chent d'el país...
Pos ixo, que ahier de tardes, dimpués de fartar-me a comer e fer-me una clucateta, i puyé a veyer cómo yeran las zagueras luces sobre Treserols dende esta magnifica atalaya. Se i veye la Valle Tella (a que tiengo una especial querencia) muit bien, Escuaín, Penya Montanyesa, Treserols, Sobrarbe, Sestrals... de luxo. La pena ye que me pareix que no ye el millor puesto pa fer zagueras luces, sí primeras, encara que yo me pensabe que se veyerían millor perque dende A Espunya se veyen unas luces sobre Treserols espectaculars de tardes. En fin, que a'l menos me fayé una cursa per una montanya a la que feba tiempo que le tenebe ganas. Una menos de las que me'n queda per esforicar :-D
Las fotos no son gran cosa, la verdat ye que llevo una mala temporada perque no consigo garra foto que me ilusione, pero ya que ibi'ere, tos ne amuestro bel·launa.
Treserols con el 50mm:

Fendo el fato enta'l sol:

Treserols con l'angular:

E dos enta La Penya Montanyesa, quan ya me'n ibe enta abaixo; ixa sí que tiene luces chulas de tardes:

Aquí el track, pero no tiene perdida (bueno, i hai un esbarre que baixa dreto -cuento- enta la carretera de Bestué, talment sirva pa sacar-te bell kilometro):

Mirando ta zaga

Una curiosidat que he trobato per ixes mundos d'internet: un reportache de la televisión francesa sobre la construcción d'el "frato" feto en aqueras envueltas

Penya las Once

Per fin he puesto fer montanya de verdat. Dimpués de dos meses, u més, en es que m'hebe limitato a fer bel·la cursa curteta e a tota vitesa, ahier marché a fer montanya de verdat. E la verdat ye que el día anterior no sabebe ta ón pegar. Yere per ir ta Anyisclo,a veyer se trobabe una floreta que fa días que miro e que no trobo, pero de nuet, pensando-ie, m'acordé que con esta calor, més propia de mayo que d'abril, el mayenco habría d'ir a tota vitesa per ixes ibons, e que n'i heba un, d'ibóm, d'el que hebe visto fotos e que querebe conoixer. Yera l'Ibón d'Armenya, dencima de Barbaruens, e amés feba días que querebe conoixer-lo. Asinas que la cursa yera pa investigar, pero como l'insomnio que pateixco bel·la cosa buena ha de tener, a las 5 salibe de casa enta Barbaruens, e a la hora de las luces que me fan goyo, astí yere. Como yera luego, me proponié d'arribar ta'l refuchio, a tafaniar, e ya que ib'yere, pensé que no estaría mal arribar dica la collata que da enta l'Ibón de Plan. Asinas que pensé que 400 més de puyata bien en valdrían la pena. E quan i arribé, pensé que ya que dende astí no se veyeba l'Ibón de Plan, no estaría mal de puyar dica la Penya las Once, que me marcaba el hipi ixe (GPS), asinas que 300 metros més de puyata, ixo sí, deixando abaixo el tripode, es fierros u grampons e las raquetas , d'es quals no hebe emplegato soque el tripode :-( Pero prou que en valió la pena, l'anvista ye espectacular, pos i veyes tot: Treserols, es lugars de la Val de Chistau, Posets, Aneto, Ibón de Plan, Cotiella, Turbón... Aquí tos deixo qualques fotos. No perdié guaire tiempo con eras menos en la primera, pa las altras yere tant remallato, per tanto tiempo sin fer montanya, que tenebe prou con aguantar la camara. He notato tanto tiempo sin mover el cul, pero la verdat ye que precisabe foter-me un buen sobo per estas montanyas.
Le'n quiero dedicar a un amigo, que ye pasando un mal trago d'es que da la vida. Un abrazo e animo.
L'Ibón con las primeras luces:

 El refuchio, un buen puesto t'an que ir con es borches a fer nuet e sesión de nocturnas:

 Dende la Collada de l'Ibón:

 La Val de Chistau:

 L'Ibón de Plan:

 Un "selfie" d'ixes sin móbil, Papa Francho u Obama:

 Enta la Vall de Benás:

E aquí el track. Sale una miquetatrafucato perque habié a cambiar las pilas baixando de la Penya las Once :-(

Per fin

Quasi dos meses dimpués d'a zaguera entrata, per fin he puesto fer bel·la foto. E ye que este cabo de semana, d'orache primaveral, he puesto escapar-me dos ratetz. Ya perdonaretz l'abundancia d'imachens, pero estoi que cal celebrar-lo. Quasi se m'heba olvidato cómo funcionaba la camara he he.
El sabado hebe quedato per la zona de Boltanya e aprofitando que me vagaba una miqueta, fue a fotografiar orquidias a'l canto de Morillo de Tou. Estoi que esta ye una Ophrys sphegodes, pero ixas fuelletas rosas me fan dubdar.
Chugando con el 50 mm a f/1'8

A la tornata aturé a'l canto de l'embalse de Mediano. Las luces yeran duras pero i heba un refleixo bien pincho:

E el domingo marché ta Fornos, como tantas altras vegatas. Ye un puesto espectacular e el tiengo cerca de casa, asinas que quan no tiengo guaire tiempo ye un d'es destins fixos. Se amés tiengo la suerte de pillar-lo quan sale augua per lo Chorro, l'espectaculo ye d'agradeixer. Se en puesto de decir-se Fornos e d'estar en Sobrarbe se decís Förnösgronsend e estás en Finlandia, i habría colas de fotografos. Per suerte, encara que ye un lugar conoixito, no ye guaire freqüentato. Encara que a la tornata me trobé con una pila de chent que i iban, entre es que se trobaba Santialpino, con qui coincidié en la punta de Turbón.
Bueno, aquí tenetz las fotos. Prencipiamos per las Fuents de Fornos:

E aquí ya qualques fotos d'el barranco que baixa quan mana O Chorro. Me fue imposible de cruzar-lo. No he puesto pasar ta l'altra man so que una vegata:

 

 

 

E unas floretas, Hepatica nobilis, quan tornabe ta casa:

 

Ya veyeremos quán puedo tornar a salir...