Río Lalarri

Encara que ya sé qu ea l'agüerro le falta encara uns días, esto maitín no m'he puesto aguantar e como m'he despierto luego me'n soi puyato enta Pineta, a veyer cómo iba. Ye evident que encara le falta, e per ixo m'he entretenito con el río Lalarri, que no se filtra e fa uns churros bien pinchos e elegants. He mirato de trobar enquadres ineditos, encara que per falta de tiempo he habito de tornar ta casa luego sin ixulufrar e tafaniar tot el que yo querebe. I tornaré, a'l menos abuscar novedatz.

Cuello Viceto

Habe mutos anyos treballé en el sector de Tella-Escuaín, pero nunca no hebe puyato ta Cuello Viceto. Hue, un de tantos días en es zaguers meses en que ubro un uello e no puedo tornar a dormir-me, he pensato que yera un buen día pa ir a veyer amaneixer dende astí e asians cremar las pocas toxinas de la feria ganadera d'ahier (tenebe previsto salir hue ta la montanya e no me querié pasar). Asinas que a las 4.15 (ya llevabe una hora despierto) he pillato es trastes e enta Escuaín que soi marchato. Ya m'ha salito un chabalín en la carretera, en Cabianzuelo, pero ye que dimpués, a la fin de la pista d'A Valle, pareixebe un can de caza: notabe la pudor d'el chabalín e decamín saliban a las quatre suelas ronyando. Me han fotito uns espantos qu epa qué. El caso ye que a las 7:30 ya yere en Cuello Viceto, una hora antes de las luces que yo querebe e m'ha tocato de pasar frío, asinas que per astí yere correndo a ratos como un fato pa dentrar en calor (nota: ficar es guants e el gorro en la mochila YA) dica que a las 8:30 ha prencipiato a royiar la Punta Treserols, dimpués el pico Anyisclo e a la fin Las Solas. He estato fendo fotos un buen rato e, per no baixar per lo mismo camín, he decidito de tirar cerro-cerro dica Cuello Ratón pa tornar enta Escuaín.
Mama mía se n'he visto de trencauesos: adultos, subadultos, chovens... per totz es puestos. Pero, sobre tot, i heba un vacumen d'impresión e an que i hai tantas vacas, pos encara més plafaratas. Ye una cursa muit pincha, pero no i vayatz a estrenar botas nuevas perque las plenaretz de fiemo.
Prou d'estroliquiar.
Priemras luces sobre Treserols (encara que no se i veye el Cilindro de Marmorés) :

 Enta la valle d'el Yaga (Tella e Puertolás), con una luz preciosa sobre Castillo Mayor:

 Dende un d'es tozals, Anyisclo a's pietz:

 A valle e en l'altra ladera el Circo de Currundué, t'an que caldrá tornar bell día d'estes:

 Uns caballos con el Mondoto dezaga:

 E ya un par de barrangos que baixan a'l canto de la carretera d'Escuaín:

Aquí la cursa e el mapa:

Plever e plever

Ahier se fotió tot el maitín plevendo a tot meter, como se no hes plevito nunca. DE tardes me'n fue ta Espierba con la filla a replegar fuellas e frutos de l'agüerro, que es emplega pa'l cole. Contabe conque s'habrío feto esta basa en bell medio d'el Plan, e fa tiempo que persigo una foto como esta, pero con l'agüerro abanzato e nieu en las puntas. Pero siempre, per una cosa u altra, se m'escapa.
A veyer se ye l'anticipo e la consigo estianyo.

Tafaniando, chafardiando, ixolomando...

Ahier, como que no feba día d'ir ta la montanya e, como siempre, hebe maitinato sin rebell per medio, decidié d'ir a fer una vesiteta ta la comarca vecina per l'oeste, perque aora con la carretera nueva  fa goyo d'ir-ie (no pas como ixe curso que treballé en Samianigo, t'an que ibe per A Guarguera).
Querebe tafaniar pa conoixer quantos puestos que tenebe en es pendients: el flysch d'el barranco d'Os Lucars , Sant Bartolomé de Gavín e ixolomar bell puesto de cara a fotografiar l'agüerro.
Es dos primers obchectivos se cumplioren, l'altro no me convenció, pero encara no el descarto.
O barranco d'os Lucars, mirando de dimensionar con la mía figura, d'una miqueta més de 1'80 (retardo de disparo de 10 segundos, carrereta e firme pa posar):

Un detalle. Yo i veigo un uello ploroso, cuento que como quasi totz, pero ye que no tiengo alma de poeta:

E Sant Bartolomé. M'encantó, e ye que ixe arte de Sarrablo ye la hostia:

Per an fue dimpués no fayé fotos perque yere d'investigación, ixo sí, rematé banyato como una chopa.

Erosión

Per fin, dimpués d'un mes sin salir ta la montanya e sin fer una sola foto (qué mono tenebe de las dos cosas) este domingo podié salir un ratet. No querebe fer una cosa con guaires complicacions fisicas (u sía, no guaire desnivel ni kilometros) per una "lesión" que arrociego dende fa uns días (bueno, el confesaré: me fotié un chaquetazo d'es gordos chugando a'l fútbol con es críos d'el mío lugar, e ye que ya no tiengo edat pa ixas cosas).
Como totz es días, me desperté a las 6 d'el maitín sin rebel, e me fotié una hora pensando qué podebe fer, sin que se m'ocurrís garra sitio atractivo. A la fin me decanté per fer el camín de Montaspro, t'an que no ibe dende que treballabe en el Parque. Una miqueta menos de 700 metros de puyata e una miqueta més de 10 km. de largo, ideyal pa'l mío maltreto cuerpo.
Total, que a la fin, an més tiempo perdié fue en es churros de Lalarri, aprofitando que baixa muit poqueta augua. Me fa goyo de chugar con es detalles, e pa ixo emplego un tele que no'n tiengo, con el 100 macro fayé el que podié.

Ya no fayé més fotos en la resta de la excursión, perque el tiengo muit visto, pero se bel·laún tiene curiosidat, aquí tiene el track (i hai bel·la zona an que no i heba recpción de satelite, pero no i hai problema perque ye en las zonas més sencillas). Las envistas de la valle Pineta son bien pinchas, per se nunca tos animatz a ir-ie.

Esparveras, pasavelas, paixarelas, palometas...

Mutos son es nombres que reciben estes animals en aragonés.
Voi a estar dos semans sin poder salir ta la montanya. Mientres ploro de pena, tiro d'archivo d'el zaguer día que fue a visitar las Parnassius apollo.
Las principals protagonistas:

Una Papilio machaon dencima d'una Epipactis rubra. Encara que son més comuns, son preciosas e nunca no hebe puesto fer-les una foto  en condicions :

E una Melitea ssp. (u sía ni puta ideya u n.p.i) :

Las Pardas

Feba días, anyos, que querebe fer el camín de las Pardas, pero siempre el ibe deixando dica trobar un acompanyant, perque diz que ye un camín muit perigloso. E la verdat ye que en ye, pero el sabado pasato el tenebe como segunda alternativa se no podebe fer la primera e, como ya habretz intutito per lo nombre de la entrata, a la fin no me'n quedo altra soque fer el camín de las Pardas. E ye que tenebe ganas de meter-me un buen sobo e probar-me el chenullo izquierdo, que el tiengo tocato d'un chaquetazo que me fotié fa dos semanas, quan fue a fer las fotos de Lardana/Posets. E pa ixo, una buena opción yera fer un 3000, con un buen desnivel e veyer se me respondeba bien. La ideya inicial yera puyar dende Barrosa ta Liena, pasar ta Sobresplucas, rodiar per dezaga e puyar ta Robinyera, sobre tot per fer-lo per un camín inedito pa yo. Pa ixo m'informé bien en Parzán, e con las indicacions que me dioren me decidié a fer-lo. Pero no hebe previsto la boira que m'iba a tapar el puesto per an que hebe de puyar, e pa no ficar-me en un chardín, e ya que ib'yere, marché a fer el camín de las Pardas, estando conscient de que talment m'hes de dar media vuelta.
Ye un camín con fama de perigloso, e la verdat ye que en ye se tiens vertigo u no yes feto a caminar per mals terrenos. No ye tant aerio como la Feixa de las Flors, per meter un exemplo, pero un trepuzón trayería nefastas conseqüencias. La verdat ye que disfruté como un chabalín en un basetón de bardo, e ixo que no podié disfrutar guaire bien de las vistas per la boira que las tapaba a vegatas.
Hue, encara menos que altras vegatas, no importa la calidat fotografica perque no gosan tener-ne; encara que disfruté d'un amaneixer bien pincho, a la parte final no yere cansato, el siguient: remallato, e no yere pa pensar en parametros. Sobre tot tos voi a mostrar fotos de per án pasa el camín per se queretz ir-ie. Ixo sí, se tenetz vertigo no i vayatz e se i hai chel u nieu ni se tospase per la capeza ir-ie.
Diferents momentos de l'amaneixer:

Una envista enta l'oeste. Aquí ya veye que probablement ya tendrí que desistir de Robinyera, que ye el que  ye a la dreta tapato per las boiras:

 E las fotos "documentals" de bells trozos d'el camín.
Este ye el principio d'el camín, quasi fa miedo d'entrar-ie:

 E aquí diferents muestras d'el trazato:

 Esta ye baixando ya de Barroseta:

E aquí tenetz el track con el recorrito. I hai bell troz en el camín de las Pardas an que el GPS perdeba recepción pero no i hai problema perque no i hai guaires puestos per an ir: