El Cuezo II

¿U será Qüezo? La verdat ye que como que desconoixco la etimolochía (i hai un Tozaler de Cueso en Erisué `caixón alargato´, d'orichen indoeuropeu, pero no sé se tienen relación per lo seseo e demés) no me meto a esbarafundiar sobre ixo.
Pos ixo, que l'altro día, veyendo el potencial que teneba este tozal per la envista a 360º que tiene, decidié que puyaría a fer las primeras luces, unaltra vegata (e qué cansino soi). E ye que las 12 d'el mediodía no son horas pa fer fotos, como me pasó la semana pasata.
A las 5 salibe d'Espierba e a las 7:10 ya yere en la punta a esperar a que se metesen las luces. N'ha valito la pena, encara que he trobato falta a bel·la boira que das una miqueta de atractivo a'l ciel (e ixo que las esperabe seguntes la previsión, pero no n'he visto garra). Pos ixo, que aquí tenetz la preba de que i soi estato.
Enta L'Almunia, Robinyera e la Mot, abaixo se veye casa Agustín de Chisagüés:

 Anvista enta Pineta e Robinyera:

Suelza, Fulsa e Cotiella:

 La misma pero quan saliba el sol:

 En esta se veye Diera e el fundo de la valle 800 metros més t'abaixo:

Con un tele me'l habría pasato millor, pero no'n tiengo :-(
E una panoramica. Con totas las fotos ye millor se i punchatz dencima, pero con las panoramicas ye quasi obligatoria. Tamién ye una pena no tener una rotula especial pa panoramicas pa poder fer-las millor:

P.S. El track, que ye diferent a l'altro perque baixé enta Diera per Orébel. Se nunca tos deciditz a seguir-lo, he de decir-tos que la baixata no va per camín dica abaixo, asinas que se no tenetz costumbre no tos la aconsello.

El Cuezo

Nunca no hebe puyato ta esta montanyeta (pasa per poco d'es 2000 metros) e la verdat ye que he descubierto (pa yo s'entiende, que ya lleva días descubierto) una atalaya muit buena pa tota la valle Bielsa. L'anvista enta es 360º ye buenisma perque no tiens altra montanya debant que te tape: L'Almunia, Robinyera, Chinipro, Astazus, Treserols, tota la Man Pacina, Cotiella, Maristás, Suelza, Fulsa... Un puesto pa repetir buscando millors luces (no ibe solo e i arribemos a las doce d'el mediodía con una luz malisma). A la espera de trobar ixas luces, tos deixo una chicota muestra como testimonio.
Enta Suelza e Fulsa:

 Enta Cotiella:

 Treserols, Astazus, Robinyera, L'Almunia, etc:

 Astí abaixo ye Chisagüés:

 Enta Pineta:

Aquí el track, no fayatz guaire caso a l'horario, se puede fer en menos tiempo.

Primeras flors

En diferents pachinas e foros de fotografía que goso visitar a menuto fa días que i veigo fotos de flors (mismo prous orquidias) e tenebe mono d'usar el macro con flors. Como que aquí en la valle Bielsa encara no n'i hai (bel·la violeta, pero encara falta pa la explosión floral encara que es pseudonarcisos ya son a punto de salir) ahier de maitins marché una miqueta enta abaixo, ta Badaín, a veyer qué i trobabe per astí. Tampoco no ye que i hes gran cosa, pero més que no aquí sí: romero, hepaticas, l'aliaga quasi a punto, primulas e poqueta cosa més. Amés, como heba plevito ixa nuet, las gotetas les dan un plus a las flors.
Esta ye de las pocas que he visto per Bielsa, no sé quál ye, pero n'i hai blancas (menos) e  moratas (més) :

El romer (Rosmarinus officinalis), barroco como er solo e muit fotochenico quan ha plevito:

Un narciso que no hebe visto dica ahier. el Narcissus alpestris:

Ya arribará mayo e chunio e seré yo qui de envidietas en ixes foros con la flora d'aquí.

Per Ordesa

Ahier, como totz es sabados se l'orache u altras circumstancias no el impiden, marché ta la montanya un ratet de maitins. No sabebe guaire bien t'án pegar (Tringonier, unaltra vegata ta Comodoto, Barrosa...) pero charrando el viernes con un amigo me dio la ideya e me tentó con una foto que me ninvió per correu: Ordesa.
I fue pero las condicions no yeran las mismas que las de la foto que m'heban ninviato. La calor d'el viernes heba feto que se'n is muto chel, pero ya que ib'yere, hebe d'aprofitar. La cursa ye conoixita per quasi totz, asinas que poco he de contar.
Tos deixo una pila de fotos, e las que se me quedan per no cansar. Poca presentación precisan.
Es churros d'el principio:

 Las famosas Gradas:

 E la "Cola de Caballo":

  

 Una gollata enta abaixo:

E un visitant quan me metié a almorzar. La foto ye feta con el 100 macro e tiene un chicot recorte, conque poco miedo me teneba (le podeba més la fambre a la pobra gralla):

Un nuevo prochecto

Fa días que m'ibe mirando l'archivo e tenebe ganas de reeditar (revelar u rawelar) pero que ya hebe pinchato en el blog.
Afortunatament, per cada día voi revelando una miqueta millor (e ixo que no soi garra estraleta de man pa ixo, pero voi sabendo una miqueta el que toco) con un programa que m'instaloren fa bell mes. U sía que no tos pensetz que pillo Photoshop, per citar el més conoixito, e i meto cosas que no ib'yeran u en saco altras que ib'yeran, que ixo no ye revelar, ixo -en la mía opinión- ye unaltra cosa diferent de la fotografía que a yo no me va.
E, como diz bell fotografo que conoixco, cal deixar-las reposar. Pos ixo, que con el tiempo las veyes con altros uellos e las puetz editar millor. Ye per ixo que he feto un blog nuevo e hue tos lo presiento. I hai pocas parolas, asinas que este el deixaré pa recentar las mías aventuretas montanyeras e pa ir puyando fotos sin deixar-las reposar guaire, e l'altro será pa ir recuperando cosas viellas de la falsa (que ixo ye el mío disco dur externo he he).
Se diz Imáchens d'el Pirineu-Imágenes del Pirineo (el tenetz astí a'l canto, a la dreta, en la lista de blogs) e espero que tos faya goyo.
Salut.

Ibón de Plan

Cuenta la leyenda que en l'Ibón de Plan las personas con l'alma pura pueden veyer-ie una mora... pero será quan torne d'Africa, como las voletas, perque aora se chelaría.
Ahier, como ya podretz contar, me'n puyé ta l'Ibón de Plan, no pas a veyer-ie moras se no a veyer-lo con aspecto hibernal.
U la mora ha mutato a esquimal, u cuento que aquí no ibi'ye.

Pa yo ye d'un puestos més pinchos de tot el Pirineu, e me recuerda a las Rocosas. I hebe estato mutas vegatas de verano, pero nunca d'hibierno. E andando feba quasi 15 anyos que no i puyabe (tempus irreparabile fugit, que dirían es clasicos). Asinas que con ixa ideya en la capeza i fue, sin amaitinar guaire perque las luces buenas en ixe puesto son de tardes e no tenebe esperanzas de fer grans fotos, solo de disfrutar. La vista disfrutó, no pas el cuerpo, perque una vegata que cruzas per segunda vegata el barranco, ixa costera se mete dreta como un campanal, e mismo con raquetas m'afundibe dica es chenullos u més alto (leiga-se es collons). Me costó una hora larga fer es zaguers 100 metros de desnivel dica arribar a la crucillata con el camín que viene de Lavasar e Saravillo. Pero mereixió la pena. Yo solo en un puesto immillorable, un paquetón de nieu e un friki, yo mismo, con una camara de fotos.  La pena que el sol e la nieu m'encenegaban e no viyebe mica bien es resultatos, quasi ni an enfocar podebe e per ixo no han salito las fotos que yo habrí quiesto. Como podetz comprebar, tot son desincusas :-D
A veyer se i puedo tornar fendo nuet en Lavasar pa pillar las zagueras luces.
P.S. Edito pa incluyir el track, que se m'heba olvidato, dos semans dimpués :-)

Capezuto, pero per demés

Ahier torné ta Comodoto per segundo sabado consecutivo. Mientres que l'anterior arribé ta la punta e habié a marchar a las quatre suelas per l'airaz que feba, ahier que l'atmosfera yera en calma (encara que feba prou frío. ixo sí) las luces no acompanyoren. Mutas vegatas que soi puyato a fer las primers luces sobre Treserols (dende la Estiva, dende la Plana Fonda u mismo dende el Cargadué, debaixo de la Cruz de Guardia) he tenito suerte perque se meteba tot royo que feba goyo de veyer-lo; pero altras vegatas es amaneixers yeran sosos, sin que podés columbrar ixas luces tant pinchas de quan sale el sol. E ahier fue un día d'ixes. Dimpués de puyar-ie, abrigar-me bien (e perque no tenebe més ropa), plantar el tripode, mirar es enquadres e tot el copón, fayó la transición sin pena ni gloria.
Me'n baixé per la Plana Fonda (an que i hai més de tres metros de nieu) pa pillar la pista de la Estiva e tornar ta Espierba per astí. En total, una miqueta més de 17 km. sin deixar d episar nieu, menudo sobo.
Ya que i fue, bel·la foto cayó, encara que no son guaire buenas (no sé se cal recordar qu epunchetz dencima de las fotos pa veyer-las millor).
D'una cosa de la que m'alegré prou ye de veyer que, encara que i hai bel·la peste entre es chizardz, en veyé quasi un ciento e bien sanos per las zonas an que la nieu ya se'n yera ito per l'aire.
La hora azul, quan se i veye pero encara no ha salito el sol:

Ya con es primers rayos en las puntas:

 Enta'l sol, a pesar del flare (el siento, no conoixco garra parola pa privar el xenismo) me fa goyo ixa luz:

 Baixando enta la Plana Fonda:

 En la Plana Fonda (an que i hai més de tres metros de nieu) quan veyé esto m'acordé d'ixa faloria que diz que quan el saputo sinyala la luna el fato se mira el dedo:

 Dende el paso Fornos enta Pineta:

 E una panoramica dende la Collata Anyisclo dica Robinyera:

 Au, salut.
Post Scriptum. Quasi una semana dimpués, tos deixo el track he he.