Primeras flors

En diferents pachinas e foros de fotografía que goso visitar a menuto fa días que i veigo fotos de flors (mismo prous orquidias) e tenebe mono d'usar el macro con flors. Como que aquí en la valle Bielsa encara no n'i hai (bel·la violeta, pero encara falta pa la explosión floral encara que es pseudonarcisos ya son a punto de salir) ahier de maitins marché una miqueta enta abaixo, ta Badaín, a veyer qué i trobabe per astí. Tampoco no ye que i hes gran cosa, pero més que no aquí sí: romero, hepaticas, l'aliaga quasi a punto, primulas e poqueta cosa més. Amés, como heba plevito ixa nuet, las gotetas les dan un plus a las flors.
Esta ye de las pocas que he visto per Bielsa, no sé quál ye, pero n'i hai blancas (menos) e  moratas (més) :

El romer (Rosmarinus officinalis), barroco como er solo e muit fotochenico quan ha plevito:

Un narciso que no hebe visto dica ahier. el Narcissus alpestris:

Ya arribará mayo e chunio e seré yo qui de envidietas en ixes foros con la flora d'aquí.

Per Ordesa

Ahier, como totz es sabados se l'orache u altras circumstancias no el impiden, marché ta la montanya un ratet de maitins. No sabebe guaire bien t'án pegar (Tringonier, unaltra vegata ta Comodoto, Barrosa...) pero charrando el viernes con un amigo me dio la ideya e me tentó con una foto que me ninvió per correu: Ordesa.
I fue pero las condicions no yeran las mismas que las de la foto que m'heban ninviato. La calor d'el viernes heba feto que se'n is muto chel, pero ya que ib'yere, hebe d'aprofitar. La cursa ye conoixita per quasi totz, asinas que poco he de contar.
Tos deixo una pila de fotos, e las que se me quedan per no cansar. Poca presentación precisan.
Es churros d'el principio:

 Las famosas Gradas:

 E la "Cola de Caballo":

  

 Una gollata enta abaixo:

E un visitant quan me metié a almorzar. La foto ye feta con el 100 macro e tiene un chicot recorte, conque poco miedo me teneba (le podeba més la fambre a la pobra gralla):

Un nuevo prochecto

Fa días que m'ibe mirando l'archivo e tenebe ganas de reeditar (revelar u rawelar) pero que ya hebe pinchato en el blog.
Afortunatament, per cada día voi revelando una miqueta millor (e ixo que no soi garra estraleta de man pa ixo, pero voi sabendo una miqueta el que toco) con un programa que m'instaloren fa bell mes. U sía que no tos pensetz que pillo Photoshop, per citar el més conoixito, e i meto cosas que no ib'yeran u en saco altras que ib'yeran, que ixo no ye revelar, ixo -en la mía opinión- ye unaltra cosa diferent de la fotografía que a yo no me va.
E, como diz bell fotografo que conoixco, cal deixar-las reposar. Pos ixo, que con el tiempo las veyes con altros uellos e las puetz editar millor. Ye per ixo que he feto un blog nuevo e hue tos lo presiento. I hai pocas parolas, asinas que este el deixaré pa recentar las mías aventuretas montanyeras e pa ir puyando fotos sin deixar-las reposar guaire, e l'altro será pa ir recuperando cosas viellas de la falsa (que ixo ye el mío disco dur externo he he).
Se diz Imáchens d'el Pirineu-Imágenes del Pirineo (el tenetz astí a'l canto, a la dreta, en la lista de blogs) e espero que tos faya goyo.
Salut.

Ibón de Plan

Cuenta la leyenda que en l'Ibón de Plan las personas con l'alma pura pueden veyer-ie una mora... pero será quan torne d'Africa, como las voletas, perque aora se chelaría.
Ahier, como ya podretz contar, me'n puyé ta l'Ibón de Plan, no pas a veyer-ie moras se no a veyer-lo con aspecto hibernal.
U la mora ha mutato a esquimal, u cuento que aquí no ibi'ye.

Pa yo ye d'un puestos més pinchos de tot el Pirineu, e me recuerda a las Rocosas. I hebe estato mutas vegatas de verano, pero nunca d'hibierno. E andando feba quasi 15 anyos que no i puyabe (tempus irreparabile fugit, que dirían es clasicos). Asinas que con ixa ideya en la capeza i fue, sin amaitinar guaire perque las luces buenas en ixe puesto son de tardes e no tenebe esperanzas de fer grans fotos, solo de disfrutar. La vista disfrutó, no pas el cuerpo, perque una vegata que cruzas per segunda vegata el barranco, ixa costera se mete dreta como un campanal, e mismo con raquetas m'afundibe dica es chenullos u més alto (leiga-se es collons). Me costó una hora larga fer es zaguers 100 metros de desnivel dica arribar a la crucillata con el camín que viene de Lavasar e Saravillo. Pero mereixió la pena. Yo solo en un puesto immillorable, un paquetón de nieu e un friki, yo mismo, con una camara de fotos.  La pena que el sol e la nieu m'encenegaban e no viyebe mica bien es resultatos, quasi ni an enfocar podebe e per ixo no han salito las fotos que yo habrí quiesto. Como podetz comprebar, tot son desincusas :-D
A veyer se i puedo tornar fendo nuet en Lavasar pa pillar las zagueras luces.
P.S. Edito pa incluyir el track, que se m'heba olvidato, dos semans dimpués :-)

Capezuto, pero per demés

Ahier torné ta Comodoto per segundo sabado consecutivo. Mientres que l'anterior arribé ta la punta e habié a marchar a las quatre suelas per l'airaz que feba, ahier que l'atmosfera yera en calma (encara que feba prou frío. ixo sí) las luces no acompanyoren. Mutas vegatas que soi puyato a fer las primers luces sobre Treserols (dende la Estiva, dende la Plana Fonda u mismo dende el Cargadué, debaixo de la Cruz de Guardia) he tenito suerte perque se meteba tot royo que feba goyo de veyer-lo; pero altras vegatas es amaneixers yeran sosos, sin que podés columbrar ixas luces tant pinchas de quan sale el sol. E ahier fue un día d'ixes. Dimpués de puyar-ie, abrigar-me bien (e perque no tenebe més ropa), plantar el tripode, mirar es enquadres e tot el copón, fayó la transición sin pena ni gloria.
Me'n baixé per la Plana Fonda (an que i hai més de tres metros de nieu) pa pillar la pista de la Estiva e tornar ta Espierba per astí. En total, una miqueta més de 17 km. sin deixar d episar nieu, menudo sobo.
Ya que i fue, bel·la foto cayó, encara que no son guaire buenas (no sé se cal recordar qu epunchetz dencima de las fotos pa veyer-las millor).
D'una cosa de la que m'alegré prou ye de veyer que, encara que i hai bel·la peste entre es chizardz, en veyé quasi un ciento e bien sanos per las zonas an que la nieu ya se'n yera ito per l'aire.
La hora azul, quan se i veye pero encara no ha salito el sol:

Ya con es primers rayos en las puntas:

 Enta'l sol, a pesar del flare (el siento, no conoixco garra parola pa privar el xenismo) me fa goyo ixa luz:

 Baixando enta la Plana Fonda:

 En la Plana Fonda (an que i hai més de tres metros de nieu) quan veyé esto m'acordé d'ixa faloria que diz que quan el saputo sinyala la luna el fato se mira el dedo:

 Dende el paso Fornos enta Pineta:

 E una panoramica dende la Collata Anyisclo dica Robinyera:

 Au, salut.
Post Scriptum. Quasi una semana dimpués, tos deixo el track he he.

5 anyetz de blog

Hue fa 5 anyos que prencipié a fer el fato con esto de blogger. Como mutas de las cosas que foi, el fayé sin plantiar-me-lo guaire per no decir cosa. Yere prencipiando con esto de la fotografía réflex con una Olympus 510 e pensé que yera un buen puesto pa amostrar el que yo pensabe que yeran las mías obras d'arte (aora las veigo e sé reconoixer que son malismas, las d'aora no ye que sían una marabilla, pero sí que son millors e espero continar millorando), pero el ibe barrechando con una miqueta de tot, sobre tot el tema de las luengas. E charrando de luengas, en bel·la ocasión m'han dito que se me cambiás ta'l castellano tendrí més acceptación. No el sé, pero ixo rai.
Amés de las fotos pa mirar de trayer chent que quiera fotografiar las cosas que fotografío yo en este Sobrarbe nuestro, una de las pocas cosas que tenebe clara yera que utilizarí l'aragonés (e la grafía, igual como las fotos, tamién ha amillorato en estes 5 anyos), que estoi que tampoco no ye tant difícil d'entender pa's charradors de qualsequier luenga romanica.
El numeor d'entratas ye ito baixando tarqual, e cuento que arribará bell día, talment no guaire leixano, en que me'n canse e tos canse e plegue. No el sé, ya se verá.
Pero bai, que no foi soque estroliquiar e es pocos que encara m'aguantatz e me visitatz sabetz que no goso escribir guaire.
Asinas que paso a las fotos dimpués de recordar que el blog fa cinco anyos. Este cabo de semana, a pesar d'el frío siberiano que ha feto, he puesto salir ta la montanya. Sobre tot el sabado.
Como tos digo, el sabado miré de fer las primeras luces sobre Treserols (unaltra vegata) pero cambiando el mirador. Asinas que me desperté a las quatre, e a las 5 prencipiabe a caminar dende Espierba. I heba luna plena pero a escape s'amaó dezaga de Treserols e habié de tirar de frontal. Llevabe las raquetas a las costiellas, manimenos no las fayé servir encara que i hai un paquetón de nieu d'el copón. La nieu yera chelata e no m'afunibe brenca. Millor m'habrían venito uns crampons en bel·la costereta antes d'arribar ta la punta Comodoto.
Feba frío pero tampoco no excesivo perque encara ye hibierno, e con buena ropa e es quasi 1000 metros de desnivel mismo sudabe. Quan arribé ta Comodoto yeran las 7:30 e ya faltaba poco pa que l'aurora de rosatos dedos que deciba Homero fes acto de presencia. Me minché l'almuerzo perque tenebe muta fambré, metié el tripode estudiando las fotos que farí, me metié el gore-tex e en ixe inte arribó la ola de frío siberiano, bufando un puerto que fayó volar el tripode de carbono e baixando la temperatura muto,e la sensación termica més (tanto que se me cheló l'augua que llevabe en la mochila). No me'n quedó altra soque brincar d'astí perque yera imposible fer fotos con el tripode levitando e las mías mans a punto de chelar-se per més guants de gore-tex que llevás.
Asinas que cara abaixo cagando-me en Dios per el sobo e el madrugón que m'hebe fotito per demés. Baixando enta el Due (que toponimo més bonico) miré enta zaga e, como i feba menos aire, m'asomé ta un cerro per no baixar-me-ne con la tarcheta vacía e astí fayé qualques fotos, que son estas. Arribé ta Espierba a las 9:30 d'el maitín, e l'auto me marcaba -4'5ºC, uno menos que quan hebe prencipiato a caminar.
Aquí tos deixo bel·la foto d'el sabado.
Enta Treserols:

Rubinyera royo como un carrón:

Enta Comodoto:

E enta el Mallo  Gran:

E hue tenebe curiosidat per saber se es Churros de Lalarri s'habrían chelato con este frío como l'anyo pasato. Asinas que, sin prisa, soi puyato ta Pineta. La verdat ye que encara que ha feto frío, no'n ha feto tanto e i heba una combinación d'augua e chel bien bonica. I hai un paquetón de nieu d'el copón, e he tornato a llevar las raquetas de paseo perque la nieu yera chelata. Soi puyato per lo camín d'es Churros fendo fotos e a escape ta casa. Aquí tenetz una muestra en orden ascendent.

 

  

Qué manera d'estraliar, ya ye prou.Salut p'altros 5 anyos como poco.
P.S. Tos deixo el track de la puyata ta Comodot, encara que no tiene posibilidat de perdida.

Buixaruelo d'hibierno

Mama mía, quasi un mes sin fer cosa, Pero ye que entre la nieu, l'aire, bell cabo de semana que he tenito el borche malo e el carnaval (e prou que no voi a salir ta la montanya en carnaval), no he puesto fer cosa dica hue.
Es pocos que encara seguitz este triset blog. sabetz que fa un par d'anyos descubrié Buixaruelo d'agüerro, e que fue un flechazo he he. Pero hue querebe ir a veyer-lo con nieu, asinas que m'he meso el rebel bien luego, he pillato molatieras, raquetas e tot el coponario e i soi ito a repetir la cursa que foi totz es anyos dende que el conoixco. No ye tant bonito como d'agüerro, pero tamién tiene la suya cosa.
Aquí yere fendo una foto a'l churro medio chelato quan he visto que la luz d'el sol prencipiaba a iluminar la punta d'ixe albar, creyando-se un contraste frío-calient intresant:

Dimpués soi ito puyando per lo GR con nieu dica es collons (bien se me'n ha valito de las molatieras e las raquetas), fendo fotos.

No son las millors que he feto en la mía vida, pero como he puesto quitar resultatos "potables" con una sola toma, no me'n queixo. Bell día habré d'aprender a fusionar.

Pos ixo.