Pineta

Pareix que la diosa Fortuna ye decidita a quedar-se uns días con nusaltros vestita de royo e amarillo. No sé quánto durará, perque a partir d'el sabado dan un aire de puerto fuerte e chelador que talment no deixe ni una fuella en es árbols.
Esta tarde he visto que yeran las boiras baixas, e como no pleveba, me'n soi puyato un ratet a veyer Pineta vestita de gala. Yera precioso, como soi de pocas parolas, pocas me'n viene ta la capeza pa poder describir-lo: augua, colors e boiras. Un conchunto espectacular. Diz que una imachen més que mil parolas, e las que voi a meter-ne no fan chusticia. Asinas que ya ye prou d'estraliar.

E estas son d'ahier, quan no pleveba, que marché con la filla a plegar castanyas no no m'adubié a llevar-me la camara.

Una vuelteta per Anyisclo

Como tiengo mono de fabolars coloritos, m'arrisgué a puyar t'Anyisclo el sabado. L'anyo pasato i fue tal día como hue e me trobé con el fabolar d'A Ripareta en tot el suyo esplendor. Ya contabe con que estianyo veniba més rezagato (e ixo que las condicions d'augua e temperatura son pareixitas a la de l'anyo pasato), pero la cosa yera salir e mirar de trobar a la diosa Fortuna vestita de royo e amarillo. Ixa diosa ha de campar per altros puestos, perque en Anyisclo no ibi'era (ni en Pineta, t'an que puyé el viernes con la familia a veyer cómo iban es faus d'aquí). Pero rai, despierta-te a las 5 d'el maitín, puya con el frontal dica Selva Plana e a veyer se tiens suerte con las primeras luces. Pos no n'i habió, de suerte...
La parte baixa d'Anyisclo yera verde como una ensalada, e en la d'alto se veyeba bell fau abanzato, pero le falta encara prou. A veyer se con este orache prencipeya a cambiar una miqueta la cosa. La pena ye que el fin de semana que viene no podré ir ta'l mont perque he de salir de viache. A veyer se aguanta dica el zaguer cabo de semana d'octubre e el primer de noviembre.
Encara que no trobé el que mirabe, qualque foto i fayé, pero mientres que l'anyo pasato baixé bien contento, estianyo no yere brenca satisfeto.

Per cierto, esta ye la entrata numero 300, quí me'l iba a decir a yo...

Unaltra vegata ta Ordesa

Quasi un mes sin escribir cosa. E no ye que no haya salito ta la montanya (un sabado fue dende Bielsa ta Tella per Portiello e torné ta Bielsa per lo camín d'el canal; e a l'altro me'n fue dende Revilla ta'l Puent d'os Mallos, baixando ta's Vivers d'o Campillón -u Surgencia de Escuaín´- e río-río dica A Fraga, an que sale el camín que torna ta Revilla), pero no consiguié fotos presentables. Es dos zaguers cabo de semana no podié salir per problemas tecnicos en el mío auto.
Pero el sabado me retrobé con la fotografía, fue a fer fotos en exclusiva e se m'acompanyaba l'horario a fer una miqueta de montanya. Asinas, despertando-me a las 5, marché enta Ordesa a veyer cómo iba l'agüerro per ixa latitutz, puyando per lo camín d'es dominguers e tornando per la Faixa Pelai. El camín dica Soaso quasi totz el conoixeretz, perque bien mereix una visita encara que sía plen de dominguers, pero la Faixa de Pelai ye preciosa (no la conoixebe) e tiene unas anvistas excepcionals. Se a yo me fayó muto goyo, la chent que no sía tant feta a veyer estas montanyas han de tener un orgasmo visual. Muit recomendable ixa cursa. Se puede fer en es dos sentitos, pero se no tenetz mal es chenullos yo recomiendo fer-lo en el sentito que siguié yo, perque vas ganando altura china-chana entretenendo-te con es churros que fa l'Arazas e no te clavas es 600 metros de puyatón dende la Pradera dica Calcilarruego, an que prencipia la Faixa. Pero vusaltros mismos.
¿E l'agüerro? Pos ya prencipia a asomar la pateta, sobre tot per la man pacina. M'esperan uns cabos de semana, como totz es anyos, d'ir encorrendo l'agüerro per es fabars que conoixco, e se tienen ríos e barrancos millor :-)
Aquí tos deixo quantas fotos, diez pa estar exactos, a veyer se tos animatz. En uns días fará goyo de veyer es fabolars con las colors de l'agüerro.
O Chordonal. Yeran arribando las primeras luces e precisabe una larga exposición. Amés feba aire e per ixo salen ixes camals movitos.

 L'Estrcho dende el río:

La misma dende alto, no apto pa personas con vertigo:

 Chusto antes de las Gradas:

 Las archiconoixitas Gradas:

 E dencima de las Gradas, indo ya enta la "Cola de Caballo"

 Aquí la tenetz:

 Anvistas dende la faixa de Pelai:

Faixa de las Flors

Se el que le metió el nombre de las flors i hes ito a primers de septiembre, el suyo nombre sería Feixa d'es cardos, que suena muto menos lirico, pero yera la flor més abundant en el primer día de septiembre.
Pos ixo, que el sabado, de buen maitín, me'n fue ta Ordesa a fer la Feixa de las Flors (encara que el suyo nombre tradicional seguntes el mapa d'el Parque ye Faixeta de Coma Barrau, pero pocos el conoixen asinas). Feba tiempo que querebe fer-la, perque d'el sector Ordesa no hebe feto soque la tipica cursa per lo fondo de la valle dica la conoixita Coda de Caballo, e siempre con nieu.
 Me desperté a las quatre e media d'el maitín pa poder pillar el primer autobús que sale de Torla a las 6 e las 6:15 prencipiabe a caminar dende casa Oliván. Con la lampa frontal e la luna plena asomando entre es árbols, fue fendo la puyata veyendo el Mallo. Dimpués m'esbarré pa pasar per la Faixeta pa arribar ya ta'l planerón -reino d'el karst- que da acceso a la Faixa de las Flors, d'es Cardos u de Coma Barrau. Quan la veyes dende el principio te dices: "¿pero per esta faixanga se i puede pasar?, ¿m'enfaixonaré?". Se veye muit estreta, pero una vegata que i yes en dentro, no'n ye tanto e no se corre garra risque (ixo sí, un trepuzón enta difuera e te vaga de cagar-te en tot quantas vegatas dica que arribas t'abaixo). Malas que i entré me trobé con un precioso pintaparetz, pero como el maximo de mm. que tiengo ye un 100, se me quedó a tomar per..., pero me deleité un ratet la gollata mirando-me-lo cómo comeba per las crepas de las rocas (prou esbrozolatas, per cierto, que no febe soque mirar-me entalto pa que no me'n cayés garra). Tamién i heba prou flor de nieu ya una miqueta pasata, pero no les fayé garra foto perque ya yeran pasatas e, sobre tot, perque feba un aire furacanato que quasi me tira largo en salir d'un sarrato. N'i heba mutas, pero n'he visto tantas u més en altras zonas d'el Parque, asinas que no será pa tanto he he. Antes d'arribar-ie hebe visto una pila de chizartz, con crapitos de l'anyo, d'el que m'alegré prou.
Adinas que china-chana fue recorrendo la faixa e quan salié veyé una envista de Treserols e la Breca que no coinoixebe, lastima de l'aire e d'el frío que feba (mismo i heba chel en bel·la fontaneta) que no me deixó nian poder plantar el tripode (se quasi me vulca a yo, ya podetz contar ta ón m'habría ninviato la camara e el tripode). E per fin arribé ta las temitas Clavillas de Cotatuera. Qué collons teneba el ferrer de Torla, pa que dimpués charren d'el de Sant Felices. Yo llevabe l'arnés con un par de mosquetons pa asegurar-me en la sirga, e con tot e con ixo ibe espantato (se me quedaba encara garra dubda, ya no'm tiengo: la escalata no ye lo mío), como pa pasar sin asegurar-me, cuento que m'habrí dato la vuelta, perque a yo ixo d'estar sin posar es dos pietz en tierra firme no me va mica.
E ya cara abaixo tranquilament con la satisfacción d'haber puesto pasar-las (cuento que i tornaré, e tamién l'arnés :-D).
Pos ixo, una buena cursa se no tenetz miedo a las caitas verticals.
Luna plena (segunda d'el mes, e la silueta d'el Tozal d'el Mallo):

 Camín de la Faixa:

 Un testimonio d'el Pintapartez:

 Envista enta Buixaruelo:

 Ordesa:

 Enta Treserols:

La Breca:

P.S. Prou que llevabe la camiseta verde d'Educación, pero debaixo d'un polo e d'el forro :-)
E aquí el track:

Ibons d'Anayet

Como fa dos anyos, e con un pase pernocta, soi marchato a fer nuet ta's Ibons d'Anayet, en la valle Tena. Manimenos no teni´ñe la misma suerte con las luces de fa dos anyos, como me gosa pasar este verano, que nunca trobo buenas luces. I arribé tarde, con el tiempo chusto de montar la tienda de campanya antes que se fes de nuet de tot. Quan i arribé yera nuble (mismo cayó quatre gotiafinas),a ratos se veyeba un ciel estrelato que feba goyo de veyer-lo, pero altros ratos se meteba un gallín que feba que no se veyesen las estrelas como cal. Bai, que fotograficament no'n valió la pena, pero como ixo de las luces son cosas que no son en las mías mans de cosa sirve lamentar-se. Amés tota la nuet estió bufando l'aire, asinas que ni reflexos ni hosti... ni cosa
Con tot e con ixo fayé qualque foto, a'l menos pa demostrar que i estié :-)

Neouvielle

El sabado, chunto con dos cinqüentons (he he), me'n puyé ta'l Pico Neouvielle (nieu viella en gascón, mismo en la toponimia se nota el cambio climatico, perque nieu n'i heba bien poca), que tiene 3091 metros. Nunca no i yere estato en ixa zona d'el Neouvielle, plena d'ibons represatos, pero ye bien pincha pa pasar-ie un día en familia rodiando es ibons, ibonetz e selvas que i hai per astí. Ye prou humanizato, pero mereix la pena d'ir-ie.
La puyata ta'l pico nos costó un buen rato, sobre tot perque en primeras tenenos prous dubdas de quál yera el millor camín pa ir-ie, e ixo nos fayó perder muto tiempo. Amés, per an prencipiemos a puyar ye prou incomodo, perque i hai caos de bolos graniticos per tot, mismo a ratos caleba ir entadebant fotendo blincos per dencima d'es bolos. Dende es lagos no i hai guaire denivel (uns 800 metros), per lo que fa que sía un 3000 no guaire dur en ixe sentito, pero cal estar feto a mover-se per ixes ambients, perque i hai bell paso que se no i yes feto te puede dar un mal, sobre tot baixando.
Aquí me tenetz en la cima, escapezato :-)

 Amaneix quan prencipiamos a puyar:

 En la punta, con un mar de boiras enta el norte

 Enta el punto de partita:

 La misma anvista, pero ya baixando

Prou de retolica, aquí tos deixo el track.

Chugando con Photoshop

Pos ixo, que poquet a poquet voi descubrindo cosas que conoixebe pero que no sabebe fer. E aquí tenetz el mío primer HDR (High Dinamic Range u Alto Rango Dinamico). No me fa guaire goyo ixa tecnica, pero quan i hai tantismo contraste de luces, te permite fer qualque cosa. Se tenetz ganas ya me diretz qué tos pareix (artificial, natural, una mierda, fa goyo...).
En este caso ye l'atardeixer dende la Estiva, chuntando dos fotos, la una medindo en el ciel e l'altra en las rocas d'el primer plan. Mal día pa estar en Marmorés con la gabacha.