Puyata frustrata

Cagondiós, no que tot l'hibierno veyendo la Penya Montanyesa sin nieu, e el día que decido de puyar-ie, yera tot "parejo", el día que més n'i heba. Dende aquí no se veye, e yo me pensabe que i habría nieu en la cara norte, pero tamién n'i heba en la sur. Ya el veyé quan paré en A Buerda a prener-me el café (sin ixe café no soi persona), pero como ya el tenebe enn'a capeza (dura como una penna) pensé que no perdebe cosa per fer la prebatina. La ideya inicial yera de puyar dende Oncins t'O Picón d'o Libro, baixar enta A Collada Ceresa e dende astí ta Oncins per O Tozal d'os Pozos. A partir de 1700 m. d'altitut ya pisabe una miqueta de nieu, e a partir d'es 1800 ya n'i heba un buen paquete. Pero como yera luego encara yera dura e no foniabe. Ya no puyé per ixo per A Faixa o Toro, perque hebe leito que con nieu u chel yera fura.
Pa cruzar A Canal Mayor ya habié de perder altura perque no m'atrevié a seguir el camín que llevabe (sin nieu garra problema, pero nieu chelata se se te'n va un piet baixas sin saber cómo t'A Torrolisa), e quan me faltaba 50 metros de desnivel ya veyé que yere metendo-me en una embarcata de las buenas, perque ibe sin piolet ni crampons, només con el tocho d'abellanera (e bien se vale que me'l llevé). Asinas que me die la vuelta, perque me faltaba la zaguera pala que ye prou costeruta.
E baixando hebe de clavar el tocho més de medio metro e calciar pa poder clavar la punta de las botas e ir baixando china-chana.
Total, que habré a tornar-ie unaltra vegata, perque me quedé sin poder veyer las vistas dende la punta, sobre tot enta la cara norte. Pero rai, me veyé bien piyando, e ixo que no caminabe dende l'agüerro, se veye que no he perdito tota la forma, a veyer se la puedo recuperar dentro de poco.
Ya tos contaré quan i torne e pueda fer el que tenebe previsto, con track e tot :-)
Con tot e con ixo, qualque foto fayé, pero no guaires perque yere més per la seguridat...
L'anvista enta Mediano:
E ya quan decidié de baixar sin fer cima. Se i veye A Tuca, e yo salié per dencima d'ixe cillo, e baixé a empalmar con el camín que pasa per debaixo perque el veyé més segur:
Pos ixo, unaltra vegata será.

Yaba

El chueves hebe visto que i habría un ratet de buen orache de maitins, deciban que no plevería dica las dos. Asinas que amaitiné e marché enta el monasterio de Sant Veturián a puyar enta la Penya Montanyesa. En Bielsa pleveba, e prou, pero como i hai vegatas que aquí fa un orache e per abaixo unaltro, decidié prebar suerte. No n'i habió, tamién i pleveba asinas que alborté la puyata e m'adediqué a paixiraquiar per buena parte de Sobrarbe. Dimpués de recorrer Baixo Penyas, enfilé cara t'Anyisclo. Quan pasabe per Fanlo mismo nevusquiaba una minquirrina. Baixé dica Broto, an que fue a veyer el churro d'el Sorrosal, que no nunca no hebe visto de cerca, an que quasi me cayó un penyón dencima (faltó bien poco, e salié d'astí a las quatre suelas). No i fayé garra foto perque pleveba e i heba un polvín d'augua desfeta d'el churro que m'habría salito la foto malament. Ya me'n tornabe enta casa quan m'acordé que feba anyos que querebe visitar el lugar de Yaba, d'el que m'heban dito que yera un lugar bien pincho. E en ye, no podié disfrutar de l'anvista perque pleveba e las boiras yeran baixas, asinas que no se i veyeba guaire. Habré a tornar-ie quan no pleva.
De tornata veyé las feixas replantatas con pins e pensé que talment i hes orquidias. E n'i heba, una especie que no hebe visto nunca en persona. E ye esta.
Total, que maitín miraré de puyar enta la Penya, aprofiando que tiengo fiesta, e se no me fallan las fuerzas (ye la primer cursa que foi en meses), miraré d'alargar-la una miqueta. Ya tos contaré.
Unas anvistas de Yaba:

Una chaminera, n'i hai muit guapas:
E aquí la orquidia, estoi que ye la Ophrys sphegodes, yeran quasi totas prou pochetas per la cantidat d'augua que i heba, e yo clavato en el bardo con es chenullos e es codos, rematé bien farto d'augua:

Hetz a tener en cuenta que no feba soque plever, e fer fotos quan pleve ye una mierda (per exemplo, cal agarra el batiauguas entre el cuello e el huembro e asinas no i hai qui mantienga el libel, se mancha el filtro polarizador, no puetz emplegar filtros ND perque te falta mans, etc.), asinas que no son fotos pa tirar codetes.

Primavera

Dimpués d'un hibierno tant atipico, la primavera va amostrando la pateta. A'l menos per aquí, perque en L'Aínsa ya fa días que la ha amostrata. Per abaixo ya fa 10 días que he visto las voletas, mismo un par de volandrinas. E el reino vechetal encara va més abanzato, perque ya he visto especies floreixitas como el romero, l'aliaga (quan l'aliaga floreix, la fambre creix, e quan bachoca pa totz en toca) u Muscari neglectum.
Ahier me deciba una companyera que el sabado ya le heba pareixito sentir cantar el cucut, asinas que no tardará guaire en arribar t'aquí (Se pa semana santa no canta el cucut, u ye mort u ye perdut). Pero ya se sabe que en montanya estas cosas van més despacio, asinas que, amés de bell chito e que ya prencipian a espuntar es narcisos, per aora de flor l'unico que se vei ye la Hepetica nobilis. E la veyé no pas perque pueda salir ta a montanya, pero como anteahier feba buen, me llevé a's críos a fer una gambateta per aquí cerca d'el lugar, a'l chicot en dinya en las costiellas en una mochila d'ixas pa borches (cómo pesa el tío he he). E astí en veyé mutas, asinas que ahier de tardes i fue con la mayor e con la camara e fayé qualque foto a las hepaticas. Aquí tos ne deixo un par.
Poquet a poquet irá salindo més especies, a veyer se me vaga de salir a buscar-las.

Chel

Estianyo pareix que toca fer una entrata a'l mes, e gracias. Fa un par de cabos de semana torné ta Barrosa a veyer se pillabe millor las primers luces, pero como que no cambiaba guaire la cosa pos no puyé garra foto d'ixe día.
Dimpués de tanto aciso per fenomenos atmosfericos, pos cal decir que sí, que ha feto frío e que ha nevato una miqueta. Pero bai, no ye una novedat en este país. La novedat ye que este hibierno i hai muit pòqueta nieu. En el cul de Pineta n'i hai la misma cantidat que te podrías trobar qualsequier abril normal, e ixo que somos a metat de febrer (febrer, barbas de mal caballer, que matores a tu pai en el lenyer e a tu mai en el lavade).
Sí que i heba chel a embute, que yera per lo que i puyabe esto maitín. Entre el Plan e Las Cortes me marcaba el termometro de l'auto -11ºC a las 8 d'el maitín, e soi puyato per lo camín d'es Churros de Lalarri pa veyer-los chelatos.



Au, dica marzo.
E paratz cuenta estes carnavals.

Primeras luces en Barrosa

Mama mía se feba días que no escribibe cosa. La verdat ye que en tot este tiempo no he salito mica, menos pa'l Puent de la Constitución que puyé ta La Estiva pero no i fayé grans cosas. Pero esto maitín per fin m'he decidito. Feba días, en estas vacacions, que querebe ir ta Barrosa a fer qualque foto nocturna, pero entre la galbana e el aire de puerto que no nos abandona, uns días més calient, altros -como hue- més fredo (¿quán nos deixará este puto anticiclón?) no m'animabe a ir-ie. Asinas que ahier decidié que hue farí las primeras luces. Soi salito de casa a la 5:45 d'el maitín (demasiato luego, podrí haber puesto dormir una horeta més) e ta Barrosa que soi marchato. Pro a fes que quan i soi arribato ta'l cul encara yera nuet preta, asinas que a esperar. No i hai nian una lermeta de nieu, ye tot raso e l'unico que pisas, e només en bell trocet, ye chel. Alto sí que n'i hai, pero pa estar a l'altura que somos de l'hibierno, habría a estar tot plen de nieu, e las fotos habrían ganato prou. En he feto bel·launa quan no i heba encara luz, pero como ni i heba luna (yera amagata per la man de Ruego) no han salito bien, asinas que las borraré. Asinas que m'ha tocato d'esperar-me una hora a que arribasen las primeras luces. La temperatura no yera mala, pero l'aire de puerto feba mal estar, creyando una sensación termica prou per debaixo de la que realment n'i heba. El caso ye que ixa luz dura bien poco, asinas que en un quarto d'hora ya yera tot feto e cara abaixo.



U ixo me pensabe yo, perque quan ya yere a'l canto el coche, me miro entazaga e veigo estas preciosas colors, asinas que la proxima vez que i vaya (a veyer se nieva e i puedo ir con las raquetas) habré a tener una miqueta més de paciencia. Podetz veyer es volturnos que i heba con l'aire.
No ye que sía baixato encantato de la vida con las fotos, pero a'l menos m'he sacato el mono que tenebe, dimpués de tantismo tiempo sin fer cosa, ni de montanya ni de fotografía (que no sía a's fillos, prou que sí).

Bueno, deixo d'estraliar ya, espero poder dar-le una miqueta de vida a'l blog, pero como no salgo perque es fillos e el treballo me tienen prou aqueferato, no puedo dar-le la vida que querrí.

Las fotos inaccesibles

Quánto tiempo feba que no escribibe cosa. Pero ye que no me vaga de salir ta'l mont. Entre el treballo (estianyo tiengo més fayena, a veyer se en uns días se relaixa una miqueta), es críos (sobre tot el borche) e altros compromisos como viaches, bell examen e demés, fa días -talment un mes- que no he feto una sola foto a l'aire libre, e en interiors bien poquetas.
E ye que pa yo aora mismo las fotos son inaccesibles, como esta de Buixaruelo. La veyé dende el camín, e miré de baixar-ie pero i heba un costerizo dreto como un campanal, e me fayó miedo d'ir-ie (¿m'estaré fendo viello? :-D), perque se se me'n iba un piet, astí ya no el contabe. I heba bardo, fuellas banyatas per la plecia de la nuet anterior e mica confianza en no baixar a vueltas u a redolons dica el río. Asinas que habié a aconhortar-me con fer-la dende el camín. E, en tot caso, ye una alegoría de la mía situación actual: querrí ir a fer la foto, pero no puedo.
En fin, dica unaltra.

S'emplirá Mediano?

No pas tanto, pero hue ha plevito con ganas, e aora torna a fer-lo con tronata. Esta maitinata, quan le dabe el biberón a'l borche a las quatre e media, m'heba pareixito sentir el río. Pero como a ixas horas no sé se soi yo u soi unaltro, el mío cerebro no ha procesato ixa información. Quan m'he levantato a las 7 ya pleveba de firme, cosa que ha feto mientres tot el día dica las 5 de la tarde. A ixa hora se veye que ya heba caito en Pineta 250 l/m2 e el Cinca baixa que fa miedo. Asinas que he pillato la camara e soi baixato a veyer cómo yera la cosa per Las Devotas, e ya veyetz que per Tella tamién ha plevito con ganas, perque ixes churros baixan de la montanya d'ixe lugar:

E el río baixaba tarqual. Aquí ya lleva l'augua d'el Cinca e d'el Cinqueta, dica L'Aínsa encara replegará l'augua de ríos como el Yaga, l'Irués u el Bellos, e de centenars de barrangos e barrangueras:
Quan tornabe enta casa, he cruzato el tunel pa dar vuelta en un apartadero qu ei hai antes d'arribar en La Enfortunada, e chusto antes de tornar a entrar en el tunel, baixa dos barrancos bien pinchos. Este ye A Canal de Rebudet, seguntes m'ha dito un de Badaín que me i he trobato:
E d'unaltra de la que no sabeba el nombre:
E ya el Cinca en Bielsa, antes de chuntar-se con el Barrosa. Ya yera de nuet (las seis e quarto, e ixo que encara no ye hibierno), asinas que le he meso una exposición larga de 30" sin saber se el foco yera bien u no, pero m'ha feto goyo el resultato:
E este cabo de semana estoi que se remata l'agüerro, fotograficament charrando. Dan augua a pozals e nieu a cotas baixas, de 1500-1600. E yo no podré ir a despedir-me d'er :-(
No s'emplirán es pantanos cn esta augua, pero una miqueta amillorará la situación, ¿que no?.