Pos ixo, que el sabado, de buen maitín, me'n fue ta Ordesa a fer la Feixa de las Flors (encara que el suyo nombre tradicional seguntes el mapa d'el Parque ye Faixeta de Coma Barrau, pero pocos el conoixen asinas). Feba tiempo que querebe fer-la, perque d'el sector Ordesa no hebe feto soque la tipica cursa per lo fondo de la valle dica la conoixita Coda de Caballo, e siempre con nieu.
Me desperté a las quatre e media d'el maitín pa poder pillar el primer autobús que sale de Torla a las 6 e las 6:15 prencipiabe a caminar dende casa Oliván. Con la lampa frontal e la luna plena asomando entre es árbols, fue fendo la puyata veyendo el Mallo. Dimpués m'esbarré pa pasar per la Faixeta pa arribar ya ta'l planerón -reino d'el karst- que da acceso a la Faixa de las Flors, d'es Cardos u de Coma Barrau. Quan la veyes dende el principio te dices: "¿pero per esta faixanga se i puede pasar?, ¿m'enfaixonaré?". Se veye muit estreta, pero una vegata que i yes en dentro, no'n ye tanto e no se corre garra risque (ixo sí, un trepuzón enta difuera e te vaga de cagar-te en tot quantas vegatas dica que arribas t'abaixo). Malas que i entré me trobé con un precioso pintaparetz, pero como el maximo de mm. que tiengo ye un 100, se me quedó a tomar per..., pero me deleité un ratet la gollata mirando-me-lo cómo comeba per las crepas de las rocas (prou esbrozolatas, per cierto, que no febe soque mirar-me entalto pa que no me'n cayés garra). Tamién i heba prou flor de nieu ya una miqueta pasata, pero no les fayé garra foto perque ya yeran pasatas e, sobre tot, perque feba un aire furacanato que quasi me tira largo en salir d'un sarrato. N'i heba mutas, pero n'he visto tantas u més en altras zonas d'el Parque, asinas que no será pa tanto he he. Antes d'arribar-ie hebe visto una pila de chizartz, con crapitos de l'anyo, d'el que m'alegré prou.
Adinas que china-chana fue recorrendo la faixa e quan salié veyé una envista de Treserols e la Breca que no coinoixebe, lastima de l'aire e d'el frío que feba (mismo i heba chel en bel·la fontaneta) que no me deixó nian poder plantar el tripode (se quasi me vulca a yo, ya podetz contar ta ón m'habría ninviato la camara e el tripode). E per fin arribé ta las temitas Clavillas de Cotatuera. Qué collons teneba el ferrer de Torla, pa que dimpués charren d'el de Sant Felices. Yo llevabe l'arnés con un par de mosquetons pa asegurar-me en la sirga, e con tot e con ixo ibe espantato (se me quedaba encara garra dubda, ya no'm tiengo: la escalata no ye lo mío), como pa pasar sin asegurar-me, cuento que m'habrí dato la vuelta, perque a yo ixo d'estar sin posar es dos pietz en tierra firme no me va mica.
E ya cara abaixo tranquilament con la satisfacción d'haber puesto pasar-las (cuento que i tornaré, e tamién l'arnés :-D).
Pos ixo, una buena cursa se no tenetz miedo a las caitas verticals.
Luna plena (segunda d'el mes, e la silueta d'el Tozal d'el Mallo):
E aquí el track:
Os cardos también en son de flors ¿no? Ye d'as cursas más politas qu'en bi-ha en o Pirineo. Sin denguna duda. No sapeba o suyo nombre pero dende agora, me referiré a ixe puesto como Faixeta de Coma Barrau. Y os claus de Cotatuero, tampoco i-son pa tanto, hombre. Cuan triballaba de guía por ixos paraches pasé muitas begadas con chen que no heba feito cosa de montaña. Y entonces no i yera a sirga...bi-eba dos o tres spits en os que montaba un pasamán y luego se acarrazaban a er, pero sin de arnés ni cosa dixas. De todas formas, yeran atros tiempos. Antonces, o que lebaba casco escalando u yera mariquita u se meteba en un berenchenal ¿pasar as clavijas con arnes????? ¿Te yes tornando biello u que???? Agora, no salgo de casa sin o casco y o arnés...si b'estar que me i-soi tornando biello.
ResponderEliminarSalú.
Sí, sí, tamién son flors es cardos :-D
ResponderEliminarYa sabebe que no trobarí guaires flors, caldrá tornar-ie en a finals de chunio u prencipios de chulio. E cuento que la proxima vegata no me farán tanto miedo es claus, pero ye que a yo me sacas es pietz de tierra (se no ye a rapelar) e ya no el paso bien, pero ixo nunca no he feto escalada...
E la edat cuento que influyirá tamién, con 20 anyos e sin fillos me's habrí miratos d'unaltra traza he he
Salut.
Me gusta mucho la de la vista hacia Bujaruelo. Sitio espectacular, sin duda.
ResponderEliminarArneses, cascos, clavijas !!!! uf, me dan "respeto" las alturas o me debi hacer viejo, ya hace un tiempo, pero creo que me atreveria a acompañarte para la próxima.
Un abrazo. Hablamos de cara a l'agüero.
Te consello que fagas as faixas Escuzana y de Mondarruego, dende Buxaruelo enta Ordesa, menos chent que en As Flors (u Os Cardos), pero, pa yo, encara més maja.
ResponderEliminarGracias, Ángel, espantan pero asegurato no i hai problema.
ResponderEliminarAnonimo, me miraré ixas feixas que me dices. Casualment, cosas de septiembre, no me trobé con dengún dica que no baixé las clavillas de Cotatuero, astí ya me trobé rabanyos de turistas. A veyer quán me vaga de tornar a salir ta la montanya e me miraré ixas que me dices. Mersi.