Debaixo d'el Dolmen de Tella...

se siente chirar e chirar el planeta...
He mirato la canción de la Ronda en Youtube pa meter-tos el enlaz, pero no la he trobata (aora sí, miratz un poquet més abaixo); es que tos la sepiatz podetz cantar-la. E ye verdat que se i siente chirar el planeta, se no miratz-os como en només 8 menutos se mueve e se vei el efeuto en las estrelas. Comparato con uns 4000 anyos que se calcula que fa que ibi'e el dolmen, 8 menutos no pareixen res.

La foto tiene una miqueta de trampa, ya que he iluminato un ratet el dolmen con el frontal, perque no i heba mica luna. Espero que tos faya goyo.
Punchatz aquí que i amaneix el prencipio de la canción (de la pachina de la Ronda), pa es que siatz pais como yo ye una buena nana, pos no'n he feto de quilometros con Zilieta per el corredor cantando-le-la.

Per la lei de luengas d'Aragón

A pesar de que el vicepresident de la DGA estió a punto de convencer-me (vid. post infra) con uns argumentos lingüisticos irrefutables, como la crapa siempre tira enta las faixangas t'astí que i torno yo. Hue m'he trobato per el rete una replega de firmas demandando la lei de luengas con una argumentación de tipo legal e apolitica (que ixo ye, seguntes la mía modesta opinión, como cal fer las cosas en el tema lingüistico).
Aquí tenetz el enlaz.

Chugando con Photoshop

Pos ixo, que me faría goyo d'aprender a trastiar-lo bien, pero que no me vaga pobretz. Por ixo bel rato m'adedico a chugar con er e fer el fato. Hue l'ha tocato a'l bombolón, a qui he descapezato fendo-le un recorte important a la imachen orichinal. No tos ne fayatz que éstes no fizan.

Asinas d'este tamanyo encara se i vei bien, pero en grand pierde muto.

Dende Espierba (Es Morés)

E vuelta la burra ta las cols, ayer con tot el frío que feba (dica -8ºC) torné a salir con la camara. Salié de casa a las 23:15 de la nuet e i torné a las 2:45. Ayer estié calculando el tiempo que costaba de fer cada foto, e son 8 minutos con la camara en marcha e altros tantos mientres procesa la imachen; en total més d'un cuarto d'hora. Pro que cambea dependendo de las circunstancias, ayer i heba mingua, per ixo le podebe meter tot el tiempo que permite la camara en Bulb, e le ubrié més el diafragma (f/3'5), ya que la luna no yera tant fuerte como l'altro día, que yera plena, ademés bel ratet la tapaban unas boiretas. Las primers fotos que fayé dende la presa de Pineta no valen pa cosa perque la luna no heba salito encara per Suelza. Dimpués me'n fue cara Espierba e ya podié aprofitar més la luz de luna. E éstes son es resultatos. Apa, salut.

Més nocturnas

Como ya tos decibe, m'ha feto goyo esto d'ir a fer fotos di nuet e creigo que he millorato un poquet la tecnica: més tiempo d'exposición (modo BULB con el mando a distancia), no emplegar garra filtro, ISO més baixa pa que no i amannixca tanto ruido e tirar en RAW, ademés de chugar un poquet con el Photoshop (no guaire: brillo, contraste, mascara d'enfoque e retallar-la pa dar-le formato panoramico). Pa bel·la cosa ha de servir el insomnio. Ayer me'n fue cara Tella, e fayé 9 fotos en 2 horas, pa que veigatz que cal estar un ratet pa cada foto, perque entre que la maquina ye en marcha el tiempo que tú quiers (en·n'a mía el maximo son 8 minutos, pero i hai altras marcas que puede estar tot el tiempo que quieras) e dimpués la maquina procesa es datos pos se te'n va una pila tiempo.
Como en bel·launa i sale la Penya Montanyesa, Zagal, se te fa goyo ya quedaremos e t'en pasaré una copia per se te la quiers imprimir, a truca de l'achenda que me diores.
La primera ye de la Punta Lierga e d'el macizo que va cara la valle de Chistau, la segunda ye d'el Perdido e las Zucas, e la tercera de Penya Montanyesa e Penya Solano.
Salut.

Fendo fotos de nuet, u cómo ir per gusto a pasar frío

Cuan le'n he dito a la muller se m'ha quedato mirando como decindo: "tú yes barrenato". ¿Que qué l'he dito?, pues a las 12 de la nuet he pensato que yera una ocasión inmillorable pa iniciar-me e fer prebas de fotografía nocturna. M'he mirato la luna plena (cuan yere fendo las fotos feba uembra), e con la nieu que i hai que refleixa como un mirallo i heba unas condicions -a'l menos teoricas- perfeutas pa fer fotos de nuet, conque m'he meso ropa pa las circunstancias, las botas (no las millors, asinas llevo es pietz aora) , la camara e el tripode e me'n soi puyato cara ta Pineta a -4ºC, a'l menos hue no ha feto tanto frío como estes días ta zaga, que i ha habito minimas de -11ºC. Estes son es resultatos, espero que tos fayan goyo, e tos prometo que estudiaré més sobre esta tecnica e iré fendo més prebas. Con tot e con ixo, pa estar la primer vez m'he feto contento d'es resultatos.

Esta ye feta dende la presa de Pineta:

E esta dende El Plan:

¿Feliz anyo nuevo?

No tos pensetz que soi maniaco-depresivo, no; es interrogants van per el de nuevo, perque ya somos a 9 de chiner e pareix que ya no toca de felicitar-se l'anyo.
Ufff, cuantismos días sin escribir cosa, e no será perque no m'haya vagato, pero ye que no trobo cosa sobre qué escribir. Pero he prencipiato l'anyo en plan deportista (ixo sí, no he deixato de fumar) perque he feto un par de quedadas con uns companyers de www.fotonatura.org e m'he feto un par de cursas per la montanya. La primera estió per la zona de Viu e Campo e la zaguera hue mismo en Pineta. En es dos días no ha feto mica buen día pa fer fotos, pero a'l menos te conoixes con chent con qui compartes afición e, sobre tot yo que soi un pardal en fotografía réflex, siempre aprendes cualque cosa.
La d'el día 2 de chiner estió bien, no i heba buena luz como ya tos he dito antes, pero sobre tot nos esmeliquemos a la hora de cruzar el río L'Aigüeta de Viu con l'augua per dencima de las rodetas, mama mía que chelata yera l'augua. La de hue nos ha salito nevando, e nos hemos meso las raquetas no pas pa no foniar per la nieu, se no pa tener bel agarre con es claus de fierro que tienen, perque més que nieu yera chel per las baixas temperaturas que tenemos estes días (-8º a las 7:30 en Bielsa, e enPineta sobre -15º). Bueno, pos ixo, que espero continar en este 2009 fendo dos cosas que me implen: la montanya e la foto.
E encara que sía tarde tos quiero deseyar un feliz anyo nuevo.

Cascadeta en l'Aigüeta de Viu:

Churro de Lalarri con chel e nieu:

Pa rematar, un par de refrans d'esta epoca e que ya tiengo ganas de que se cumplan:
Pa Sant Antón de metat chiner, anda una hora més l'arrier
En pasar Sant Antón, carnestutas son (e cal ir amanando el carnaval)