miércoles, 30 de abril de 2008

E la solución ye...


Dimpués d'el poco exito que ha tenito la entrata -només Onset s'ha mirato de trobar la respuesta- aquí va la solución de la que ye estata la primera -e estoi que zaguera, vista la respuesta de la chent- adivinalla.
La respuesta ye: BOLETA (Neophron pernopterus), que ya ye tornata de pasar el hivierno d'Africa e ya la tenemos altra vez per aquí. No sé cuál ye el nombre en catalán, pero en castellano ye alimoche.
La coda en forma de rombo la tiene pareixita a'l trencagüesos (Gypaetus barbatus), d'el que n'i hai una buena colonia per este país.

martes, 29 de abril de 2008

Adivina adivinalla


¿Qué paixarico ye éste? S'aceptará el suyo nombre en cualsequier de las luengas d'es Pirineus. Qui el encierte pueeeeeeeees... no i hai premios, pero podrá fer-se bamba debant de tota la chent que vesita este blog.
La solución maitín

lunes, 28 de abril de 2008

Baixo Penyas



Un par de fotos d'esta zona tan desconoixita e tan bonica, baixo la gollata de San Veturián e la Penya Montanyesa. La luz no acompanyaba guaire, pero s'ha feto el que s'ha puesto.

viernes, 25 de abril de 2008

Cudiando el patrimonio

http://www.youtube.com/watch?v=iggEXGjFLW4
I hai chent que en puesto de tener capeza tiene cinco quilos de mierda dencima d'es güembros. Estes subnormals han espaldato la espadanya de la ilesieta de Torre de Buira, en la Ribagorza aragonesa (Bonansa)
El enlaz ta la noticia d'el Periodico d'Aragón aquí: http://www.elperiodicodearagon.com/noticias/noticia.asp?pkid=404651
Lastima no les es pillato debaixo. E tot per fer-se es ¿graciosos? Perque a yo no me'n fa mica, de gracia

miércoles, 23 de abril de 2008

Ya arriba la primavera





Pareix que aora sí, e que ye pa quedar-se-ie, encara que bufa un poquet de puerto que fa que no s'esté bien de tot.
Güe, día de Sant Chorche e festivo, no he puesto salir ta'l monte a fer garra foto. Pero ayer, antes de baixar-me-ne ta Zaragoza e puyar di nuet, sí que me fayé una escapata enta Pineta, per viyer se cayeba litz. No tenié suerte con las litz, pero sí con un ziel azul que feba goyo de viyer-lo. Cuento que güe que ha feto buen día se'n será ita muta nieu, pero ayer de maitins encara en quedaba buena cosa.
Sobre tot per alto, que a'l menos n'i hai dos metros (e igual me quedo curto), perque tota l'augua que ha caito aquí estes días (mismo bel ratet nevar) a partir d'es 1.300 yera nieu, que chunto a la que cayó la semana pasata, pos ya podetz contar. Ansinas per ixemplo ye el pantano de Mediano, que ha medrato buena cosa e encara espera es mayencos.
Mientres vas baixando enta la Villa, s'aprezeya més la primavera, es paixaricos encorrendo-se (qué querrán fer es marranos), las flors de las chicoinas en es pratos, es artos e zereseras en flor... menos muixardinas, que encara no'n ha salito garra.
El caso ye que como tos decibe de tardes me'n baixé ta Zaragoza perque hebe a fer cualques recaus e podié disfrutar d'el Somontano tan verde per el trigo e amarillo per las allagas. A una color le trobé falta: a color roya. ¿Ya s'ha pasato el tiempo d'es ababols u encara ye luego?, perque en viyé mui poquetz. Ya nos dirá l'amigo Onset cuánd ye el tiempo d'ixas flors que no abundan guaire per aquí (sí per A Fueba e la Tierra Buixo, que astí tienen almendreras, oliveras, trigo...). Con tot e con ixo, es Pirineus como telón de fondo bien cargatos de nieu, e mismo en i heba en Guara, feban que es güellos se'n isen de cabo ta cuand enta l'anvista.
Ya pa ir rematando este rollo, entrando ta Zaragoza me i trobé la famosa e dica alabez desconoixita pa yo entrascada de la rotonda de la MAZ. Entre que arribabe tarde e la calorota que i feba fayé mui mala folla, e més encara acordando-me que feba poquetas horas yere per Pineta més solo que la una. E pa rematar-la de joder, cuan tornabe enta casa un accident a l'altura de Zuera que obligó a esbarrar el trafico per la carretera viella e me fayó perder més tiempo encara.
En fin, d'ixes días que me fan estresar pero que miro d'olvidar mirando-me estas fotos como las que tos i meto.

lunes, 21 de abril de 2008

Liz II




Güe soi tornato a puyar ta Pineta. ¡Jolio, qué paquetazo nieu ha caito estes días! A biyer se el miércols, San Chorche, fa buen e podemos ir-ie con la familia. Bueno, pa ir fendo boca aquí tos deixo cualques fotos que he feto güe. Salut.
P. S. Esta nuet, se me vaga, en meteré més.

Güellos



Güe ye estato un día, pa yo, mui especial. Cuan soi entrato ta'l cuarto de Zilia, la mía filla, dimpués de la clucata m'ha señalato un güello e m'ha dito: bue-llo. Fa poquetz días que cumplió es 17 meses, e ye la primer parola adscribible a'l aragonés en exclusiva, perque las que iba decindo dica aora yeran comuns entre el castellano que le charra su mai e l'aragonés que le charro yo: buaubuau `can´, aba `augua´, ca `vaca´, alleta `galleta´, tete `chupete´ e cualcunas més (calculo que sobre 40 u 50, perque ademés emplega el diminutivo -eta pa cuasi totas las cosas femeninas: zapatilletas, manteta,etc.).
Ademés cal parar cuenta que el 80% u més de las cosas que sienten son en castellano (con su mai, en·n'a guardería, con la mayor parte de la chent d'el lugar... como podetz viyer mal futur tiene l'aragonés), e se no ye a yo e a bel·laún més cuasi no siente charrar belsetán.
Pos ixo, tiengo las mías esperanzas e esfuerzos mesos en que Zilia sía bilingüe, e per aora las cosas marchan enta debant.
¡¡Pero que altra cosa podeba decir con es güellos que gasta era!!
P.S. Su mai m'ha feto cambiar la foto per esta altra, pero pa yo que se le veyeban millor es güellos en l'altra

viernes, 18 de abril de 2008

Nieu d'abril

Esta foto ye de la basa que siempre se fa salindo d'A Buerda, que bel día d'estes bel·laún saldrá volando per el aqua-planning
Las Devotas (II Parte), güe pareix que baixaba més augua que l'altro día


E per fin, dende la finestra casa, cuan levaba un ratet plebendo

Encara que ayer daban nieu a 1.400, sobre las 9:30 ha prenzipiato a nevar a la Villa, pareix que se les ne ye ita un poquet la romana a's d'el orache, perque nusaltros somos a un poquet més de 1.000 m. Un ratet dimpués me'n soi baixato ta L'Aínsa e mientres que aquí nevaba con ganas, una miqueta més t'abaixo pleveba de firme. Ademés baixaban es barrangos, canals e canaluzos con buena cosa d'augua. El Cinca per debaixo d'el puent de L'Aínsa tamién feba goyo de viyer-lo, e cuento -perque no'l he visto- que el Ara tamién baixaría grand. Total que m'he llevato la camara fotos e aquí tos ne i metobel·launa.


Fa un rato se'n ha deixato de nevar e pleve, pero t'alto debe d'haver un paquet d'el copón. Ixo ye buen, que se faya sazón e que se vayan plenando es pantanos, que buena falta les fa, e que per Barcelona e la cuenca d'el Llobregat les ne caiga tamién, ansinas no habrán a foter-les l'augua a dengún.

jueves, 17 de abril de 2008

Dimpués de mutos días...


Dimpués de cuasi una semana sin escribir res, güe torno con cuantos comentarios -a vuela pluma, que diría aquer- de tot el que ha pasato estes días.


La primer cosa que me trobo a'l liyer el Periodico de Aragón per internet ye, dica la fecha, el supuesto escandalo de Gran Scala, a'l que per aora només le fa caso el susodito diario. En esta "tierra noble" se desconoix el significato de la parola dimisión, n'i hai bel·laún que no s'en ba d'el despacho ni con fumo.


Ixo pa almorzar, e pa comer el trasvase d'el Ebro ta Barcelona, se supone que temporal, ¿pero bel·laún se crei que dimpués van a sacar es tubos? Pos hombre, ya que i son mesos es aprofitaremos cuand calga. Yo soi en contra d'es trasvases (conyo, que tienen el mar a'l canto, que desalinicen), pero no m'estranya mica que valencians e murcians pidan tamién pa ers el augua. Tant e mientres, es politicos d'el Gobierno d'Aragón no han dito encara ni piu (menos escudar-se en informes tecnicos que aclareixcan se ixo ye un trasvase u qué po**as ye).


Pero no tos pensetz que aquí en Bielsa no ha pasato cosa, ni muto menos. El cabo semana estiemos grabando un documental pa Aragón Televisión sobre el 70 cabo d'anyo de la Bolsa de Bielsa, cuan la 43 división d'el ixercito republicán aguantó rodeyato per el ixercito faixista de Franco (qui quiera més información que se pase per http://www.bielsa.com/ u millor encara, que se'n vienga ta'l museu de Bielsa a viyer-lo), conque astí estiemos fendo de milicians (yo només el domingo, que el sabado no podebe).


E tamién el lunes saliemos per la tele, en el programa de La magia de viajar, ademés de las anvistas que tenemos, i salió el amigo Barré charrando un poquet en belsetán. ¿Qué tos pareix?. La semana que viene fan el programa dende Calaceit, a viyer se tienen pilotas de sacar a la chent charrando en catalán. ¿Apostamos cosa? Yo m'achugo 20 eurazos a que no.


E pa rematar ya, güe tamién he leito en el periodico que se chuzgaba a Artur Quintana per defender que la tierra ye redonda. U sía, traducito pa's que no saben de qué va el tema, se tiene que presentar a'l chuzgato de Fraga perque le han meso un pleito uns que dicen que el que se charra en la zona oriental d'Aragón no ye catalán seno aragonés oriental (el que viene a ser similar a decir que la tierra ye plana) . ¡Mama mía, es inquisidors actuals!.


Dende este blog el refirme a'l profesor Quintana e a la resta de la chent a qui ha demandato la FACAO.

P.D. La foto ye que estié l'altro día en Ruego e per meter-ne bel·launa. Podetz biyer en la borda la loseta roya que se feba servir d'antes més en es tellaus de la valle. De RUBEU ye més que posible que vienga Ruego

viernes, 11 de abril de 2008

Las Devotas




Dimpués d'estar plevendo dende el lunes (no'l sé exactament, pero cuento que habrá caito sobre 150 l per metro cuadrato e el que ha caito esta nuet yera nieu dende es 1.500 m.), güe soi baixato ta Las Devotas a viyer cómo baixaba el río Cinca. No ye que sía una gran creixita, pero ya feba días que no se viyeba tan gran.


Total, que i soi tenito que baixar dos veces. La primer vez soi ito con la réflex, pero en arribar-ie m'he quedato sin batería, con que torna-te-ne enta casa a pillar el chuguete (la compacta). Ya con la compacta e con las pilas plenas soi tornato a baixar e he feto cuantas fotos d'el churro que baixa per dencima el tunel (d'ibierno se chela e ye majismo). E dimpués me'n soi puyato per el camín de las escaleras (el viello, el que s'emplegaba d'antes más pa salvar el paso de Las Devotas) e he feto cualques fotos dende alto. No i heba garra puesto buen e no s'apreceya bien l'altura, pero pa que tos fayatz una ideya ye feta, se fa u no fa, a l'altura d'el tunel. Ixe camín no ye recomendable pa chen con vertigo, perque se te i quiers asomar impresiona.


Bueno, pro d'estroliquiar, a veyer se tos fan goyo e salut.

martes, 8 de abril de 2008

Arnals




Dimpués de cuantos días sin escribir cosa, perque yere a Zaragoza que se casaba mi chirmana, güe torno ta'l "tajo" con un par de fotos viellas (e pa días n'i hai nuevas, perque gasté la batería de la camara e el cargador me'l deixé a Zaragoza).



Las dos chiran arredol de las abelletas, e sirven pa viyer las diferiencias de construcción entre unas zonas e altras. La una ye la que metié en el zaguer post, pero de zerqueta. L'altra ye d'un arnal u arnero altoaragonés, concretament de A Fueba, con las arnas tradizionals (se puede viyer detalladament el suyo proceso constructivo en el libro José. Un hombre de los Pirineos).



De la parola arna diz en Coromines que tamién ye propia d'el catalán occidental e d'el italiano dialectal, probablemente designaba el material vechetal con que se feba e, dimpués, ya pasó a designar el habitaclo de las abelletas.

miércoles, 2 de abril de 2008

Asturies


Abe ya cuatre años que estié de primabera uns días en Asturies, en un lugar que se deziba Oballo (astí deziban Obacho, con -ch- vaqueira), en la redolada de Cangas del Narcea, bien zerqueta de la Reserba de la Biosfera de Muniellos (un puesto mui majo, an que no i pueden entrar-ir so que 20 personas cada día).

Ye una zona d'onsos, e me fayó goyo de biyer cómo protegeban es arnals pa que es onsos no les fotesen la miel. A'l canto d'esta estrutura i eba una escalera que emplegaban es paisanos pa aczeder-ie.