Feliz anyo 2017

He feto un chicot video con 50 fotos mías fetas este 2016. Con er quiero desear-tos un feliz 2017 e, a's fotografos, amés buenas luces.
Feliz anyo nuevo.
Feliz año nuevo.
Feliç any nou.

Ibón de Plan

Feba meses que no i puyabe e le tenebe una vesita pendient. Pero no i habió buenas luces e, amés yera tot plen de galochas de turistas. Habré de tornar-ie quan torne a nevar, que de momento se veye leixos. Puta mierda de comienzo d'hibierno...
La foto no m'agrada mica, pero ye la unica potable que podié fer.

Samitier

Aprofitando el chueves d'ixe no-puent de la Constitución?, la Purisma? Ixo rai, el caso ye que tenebe fiesta, decidié d'ir a veyer se i heba boira. En Bielsa nunca no n'i hai, e totz es días anteriors, baixando a troballar, veyebe que de L'Aínsa ta abaixo n'i heba. Yo entiendo que la chent que viva en puesto an que la boira se i queda días e días... pos ye un incordio. Pero a yo me pareix un buen motivo fotografico, e se amés la tiens a's tuyos pietz, pos encara millor. Asinas que ta Sobrarbe que fue, més concretament ta la ermita e Castiello de Samitier:

Quasi 200.000 vesitas

Pos ixo, que este blog ya ye, quan escribo estas línias, a punto de tener 200.000 vesitas. E como que ye un numero redondo, pareix que cal fer una miqueta de celebración, u mirar-se entazaga e ixas cosas. De momento, m'espero bell tiempo, quan el blog cumpla 10 anyatas, pa fer sesudas reflexions sobre la historia d'el blog e ixas cosas, el suyo (incierto futur) e ixas cosas.
Hue ye día de celebrar que un bloguet chiquinín, en una lengua chiquirrina, haya superato la cifra de 200.000 vesitas. Cal reconoxier que dende que tiengo facebook e i comparto las entratas, el numero de vesitas ha puyato considerablement, encara que es blogs son pasatos de moda, ya no se i deixan comentarios e ixas cosas.
Pero bueno, m'alegro de que muta chent haya puesto conoixer Sobrarbe, e en especial la Valle Bielsa, a través de las mías fotos e haya puesto conoixer l'aragonés a través d'es míos textos (sin mica intención literaria, tot cal perque siempre he improvisato).
Asinas que salut e mutas gracias a totz es que tos deixatz cayer per aquí, bien sía de traza cutiana, habitual, esporadica u casual. Mersi a totz.

Tardadas

El sabado d'ixe no-puent tant rar, puyé cara la Sierra d'Espierba a fer el Comodoto encara que no i arribe como contabe en la entrata anterior. Pos bien, tot tornando se me debió de cayer el casco quan me sacabe las molatieras. Paré cuenta quan yere en la puerta casa, pero malas que baixás hebe de salir de viache e no me vagaba de tornar a mirar-lo.
El domingo de tardes, malas que tenié un ratet, puyé ta la Sierra a mirar de trobar-lo, pero sin guaires esperanzas. Como yera de dar, perque se m'heba caito a'l canto d'el camín, no ibi'era pero como m'hebe llevato el equipo, aprofité pa fer bel·la foto...

P.S. Sin mica esperanza, comenté que hebe cacegato el casco en dos collas de facebook de montanya e, cosas de la vida, encara i hai chent honrata. Un zagal, que amés tiene casa en Espierba, se'l heba trobato e se metió en contacto con yo e me'l tornó. Mutas gracias, David, se nunca leyes esto. Te debo bell hordio unaltro día que no haya a salir correndo.

Sierra d'Espierba

Este sabado, antes d'ir-me-ne ta la gran ciudat (cosa que es que me conoixetz, se bel·laún d'es que me conoix contina leyendo este blog, sabetz que no me fa mica goyo) aprofité pa salir un rato a fer las primeras luces. Ya sabebe que el ciel iba a estar hauto, sin una sola boira, pero asinas estirabe las piernas.
La idea yera fer las fotos dende Comodoto, e pa ixo me i llevé grampons, picoletas e casco, perque con las chelatas que yera cayendo, contabe con que la nieu estaría dura. Bien, no fayé soque foniar fotendo la garra, en ocasions, dica la rodilla. Total, un sobo per no llevar raquetas, e con tot e con ixo no sé se habrí puesto abanzar més perque yera nieu polvo. E, como conseqüencia, veyé que no i arribarí.
Amés, estes dos meses de fotografía d'agüerro han rematato con la mía forma fisica que me toca de recuperar este hibierno. E, amés, cacegué el casco quan paré a sacar-me las molatieras. Asinas que se conoixetz a bel·laún que s'haya trobato un casco en la sierra d'Espierba, decitz-le que ye mío.
Pos ixo, las fotos.
Esta pano en gran ye brutal per lo detalle que tiene. La fayé antes que las primeras luces tocasen las puntas, quan la luz ye més equilibrata.

 

El sol ya arriba ta las puntas de Treserols:

 Tornando ta casa, el producto de la inversión termica: -3ºC a 2100 e -8ºC a 1200.

Tot u cosa. La flor en el cul.

Es chueves de tardes, dimpués de troballar, goso salir ta'l mont a fer bel·la foto u dar-me una vuelteta (no pas hue, que tenebe fayena).
La semana oasata decidié de puyar ta Plana Canal, e ixo que m'entroren ganas dir ta Guaso perque el ciel per abaixo feba buena cara. Pero ya que m'hebe baixato ta L'Aínsa el 4x4, pos hebe d'aprofitar-lo.
Mientres puyabe ya veyé que no m'iba a vagar de poder puyar ta'l tozal t'an que puyo siempre, perque i heba nieu en la pista e no podebe correr mica. Tamién se me metió la boira e estié a punto de chirar el morro cara abaixo a veyer se arribabe ta Puertolás, perque pensabe que con ixa boira no ibe a poder fer cosa. Pero bien se vale que decidié de no fer-lo e achugar-me-la a tot u cosa, perque quan yere ya quasi en la barrera de Plana Canal, salié de la boira e podié veyer un espectaclo que feba anyos que no veyebe. E aquí tos deixo la muestra:

Valle de Pineta

Dende pocos puestos de puede veyer la Valle de Pineta asinas. E yo ya le tenebe ganas dende este verano.
Fa goyo de veyer cómo va cambeando la luz conforme pasan es minutos.

Tardada en Espierba

Pos ixo, una tarde que prometeba buenas luces e només me vagó d'arribar en Espierba, encara que querrí haber quiesto puyar ta la Sierra.

Quasi Marmorés

L'anyo pasato puyé ta Marmorés, a primers de noviembre, a fer las luces de l'amaneixer con las primeras nieus e chels per ixas alturas. Podié puyar bien dica metá de l'embudo (u una miqueta més abaixo), an que habié de clavar-me es fierros en es pietz pa poder continar puyando. Estianyo la intención yera la mesam, pero con una semana de diferiencia e con la circumstancia de que i heba més nieu. Pero con tot e con ixo, quan se me mete una ideya en la capeza, ye difícil que, a'l menos, no mire de fer el que me propongo. Asinas que astí yere yo, a las 3 de la nuet, acomentendo enta Marmorés. Dica es 1900 metros puyé de pistón: rapido, quasi sin parar. A partir d'es 2000 metros la nieu ya yera contina e, el que ye pior, blanda. De cosa me serviban es fierros en es pietz, pero la picoleta me venió pro bien. Me costaba d'abanzar e habié de parar cuenta en un par de pasos una miqueta expuestos, fendo tranya pa clavar-ie bien es pietz e no foter-me un eslisón t'abaixo. A la fin arribé ta l'Embudo ya con una miqueta de preocupación, me clavabe en la nieu e me costaba d'abanzar. Quan arribé ta un paso con una canal dreta an que, se me cayebe, podebe baixar a tombos dica l'auto, decidié que ya yera pro: yere chugando-me el tipo e no ibe a arribar a la hora buena. Asinas que, con el criterio, prudencia u miedo que te dan es anyos, decidié de tornar-me-ne enta abaixo.
Pasé es dos pasos una miqueta expuestos e, ya en buen terreno, decidié d'esperar a veyer qué me deparaba l'amaneixer, encara que i heba boiras enta l'este, feba frío e tenebe es guants chelatos. Bien se vale que, diz que, es aragoneses somos tozudos e no me rindié, perque tenié unas luces como feba tiempo que no veyebe, mientres que se hes puesto arribar ta l'Ibón probablement no habrí puesto fer cosa.
Se hetz aguantato dica aquí leyendo este tocho, tos aliviará saber que ya ye pro, que meto ya las fotos :-)

Os Vivers d'o Campillón

Tamién conoixitos como Surgencia de Escuaín. Se tracta d'un puesto magnifico, an sale un viver (manantial) que conforma un d'es sistemas karsticos més grans d'Europa, conoixito como integral B2 e que m'encantaría de veyer per dentro. Pero como no se puede, e la espeleo que he feto podemos definir-la como "bizarra" en el millor d'es casos (La Cueva del Moro, habe mutos anyos en Nigüella, con sogas e mica equipación), me conformo con ir-ie a fer fotos. Estianyo, que no m'ha vagato de fer guaires cosas, no he puesto fer la baixata de tota la Garona superior d'Escuaín, pero no pas per falta de ganas.

Man pacina de Pineta

Fa un par de semanas le dio per plever. E quan pleve de sur se mete a plever en Pineta como si no i hes un maitín. Ye normal que caiga per dencima de 150 litros per metro quadrato en un día, se no més. Claro, quan caye tanta augua baixan totz es barrancos fartos d'augua, e se s'achunta con l'agüerro, encara que ya sía una mica pasato, l'espectaclo ye asegurato. Es ríos que llevan agua de contino estes días en llevan demasiata e quasi no se puede fer fotos, pero es barrancos de la man pacina de Pineta pillan el caudal chusto pa pasar un buen rato con el tele (70-200, con un més largo encara millor).

Río Lalarri

No sé qué tiene ixe río que exerce una fuerza d'atracción enta yo. Será que ye a'l canto de casa e que ye espectacular ´veyer cómo baixa 300 metros de churro en churro.

Anyisclo

Mientres que d'agüerro perdono Ordesa per la sobresaturación de chent e fotografos, no perdono garra anyo la vesita ta un d'es puestos que més goyo me fan de tot el Pirineu: Anisclo, concretament ta este cado an que torno una e altra vegata.

La Comuna

Este Puent de Totz es Santos ye estato rar. El ciel raso como el uello d'un paixarico, chent per tot arreu (totz fendo las mesmas fotos) e mirando de conciliar totz es intereses...
Un día cundió pro: de maitins fue ta al Comuna a fer fotos d'ixes chopos tant mahos que tienen per astí. Estoi que estas dos fotos son las unicas que se pueden presentar...

Per Pineta (again)

Escapateta rapida ta Pineta dimpués de troballar. Dimpués de las fuertes plevias d'el cabo de semana anterior a'l puent de Totz es Santos, puyé a veyer cómo baixaban es barrancos de la Man Pacina de Bielsa. Una pena que no m'haya vagato de fer més fotos este agüerro.