Lardana

Més conoixito como Posets, la denominación de Lardana (Chistau) u Llardana (Benás) ye la propia.
Pos resulta que fa dos cabos de semana miré de puyar-ie. La previsión yera de frío e gabacha, pero la realidat s'impone e yera nuble, frío, e me prencipió a nevar a 2400 metros. Quan veyé que la punta yera cubierta per las boiras e que i heba nieu e, probablement, chel, ya sabié que no i puyaría.
Pero l'anyo pasato, quan en baixabe, se m¡ocurrió una foto en la lit de Lardana (la poca que en queda), e pa ixo m'i hebe llevato totz e sbartulos. Querebe dimnesionar con la mía figura la grandeza d'ixe puesto e ixas estrías que recorren la parte. Se he encertato u no, ya no el sé.

Treserols III

Quan tiengo un ratet voi editando més fotos d'el día de Treserols. Ya que no consigo material nuevo (e buen), voi sacando tararainas de l'archivo.

De nuevo ta Tella

Unaltra vegata avisos de tronatas que a la fin no deixan cosa (puta sequera, pareix que per fin a metat de la semana que viene cambea) e unaltra vegata ta Tella, perque astí tiens una buena envista de 360º e siempre podrás pillar bel·la luz, u a'l menos tiens més posibilidatz que en Bielsa.
Asinas que asinas marché acompanyato per un zagal que troballa en Bielsa e con qui tenebe pendient una salida fotografica. E estes son es resultatos:

Treserols (e II)

Pos astí yere yo, en la Punta Treserols (3355 msnm) veyendo pasar chent e esperando a que se fes de tardes e de nuet a veyer se febe fotos.
Las luces de tardes fueren muit buenas enta l'oeste, pero malismas enta l'este. Con tot e con ixo, no esperab fer las fotos que fayé.
A la fin, i durmiemos quatre personas, un francés (bien se vale que charraba espanyol) e yo en el bivac que i hai en la mesma punta e una parella en una tendeta de campanya una miqueta més abaixo. Me durmié decamín perque yere rabentato. A las dos ubrié un uello e i heba un ciel espectacular, sin luna, veyendo-se totas las estrelas e con una Carrera de Sant Chaime brutal, pero me dio galvana de salir d'el saco e pensé que la proxima vegata que me despertás (e fueren quantas a'l largo de la nuet) farí bel·la foto nocturna. pero las altras vegatas ya yera nuble e quasi no se'n veyeba, d'estrelas.
L'amaneixer fue pareixito a la tardada. I heba boiras enta l'este e me pensabe que no podrí fer cosa, pero a la fin i habió buenas luces enta el sol e no pas ta l'altra man.
En definitiva, que estoi que repetiré la experiencia. Tos deixo con las fotos de la tardada e d'el maitín.

 E ya de maitins:

Treserols I

Como totz es anyos, pa cabo verano foi una escapateta en solitario ta la montanya antes de prencipiar a troballar. Per un regular goso marchar enta altras zonas que no tiengo oportunidat d'ir-ie mientres l'anyo. Pero estianyo decidié de quedar-me en·n'o país e fer nuet en la Punta Treserols (Monte Perdido seguntes es mapas actuals).
No ye per fer-me l'heroe, perque dengún m'obliga a ir-ie, pero puyar per Pineta con buena parte de l'equipo fotografico més tot el menister pa fer nuet, ye un sobo d'es buens. Pero como me gosan repetir: "Sarna con gusto...".
Pos ixo, que a las 7:15 a.m., dimpués de prener-me un café en el Refuchio de Pineta, emprendié cara la Collata Anisclo, d'astí ta la Punta de las Solas per la feixa e, ya dende astí,  pasar per debaixo d'el Pico Anyisclo (Soum de Ramond) e a'l canto d'es Baudrimonts (Puntas Rabadá e Navarro) pa puyar ta la Punta Treserols, t'an que arribé a las 15:30.
Altras vegatas que i hebe puyato m'heba costato 12 horas de puyar e baixar, pero l'altro día ibe sin prisa e con peso, asinas que no fue mal la cosa. Total, que astí estié esperando a veyer se i heba buenas luces, perque con este verano tant mierdoso de ciels azuls e sequera no las tenebe totas con yo. E sí, i habió suerte, pero ixas fotos las deixo pa unaltra entrata. Hue només deixo las de la tarde, antes de las luces interesants:
Dendel el Cuello entre el pico Anyisclo e la Punta Treserols:

 Enta l'oeste, con el Cilindro en primer plan e l'ibón:

 Enta el sur:

 Un servidor en la punta:

 Enta l?ibón de Marmorés:

 Anyisclo, Castillo Mator e Penya Montanyesa:

 Sestrals e Castillo Mayor:

 Enta Ordesa:

 Dende el Pico Anyisclo dica Ordesa:

 E el Cilindro, con el glaciar de Coma Chibosa u Vignemale a'l fundo:

Unaltro día la tardada e l'amaneixer :-)