Cypripedium calceolus

En Bielsa tenemos la suerte de contar con quantas poblacions d'esta preciosa orquídia. Es que m'aguantatz dende fa anyos, sabetz que siempre le dedico quantas sesions, e estianyo no iba a estar menos. En tiengo una pila de fotos, pero miraré de no cansar-tos guaire :-)

Fornos II

El sabado pasato puyé ta Cotiella, pico que feba tiempo que tenebe en la capeza. Pero 'obchectivo no yera fotografico, asinas que me i llevé la compacta e las fotos que i fayé son testimonials e de recuerdo.
Pero el domingo, pa estirar las piernas dimpués d'el primer sobo de la temporata, fue a veyer el Chorro Fornos, an sale tota l'augua que se filtra d'el Macizo de Cotiella (e quan digo tota, ye tota) e saliba un mangazo impresionant, tota la que no veyemos el sabado en la puyata, e ixo que en precisanos. Encara queda un paquetón de nieu important en altura, asinas que se queretz e podetz, encara podretz ir a veyer-lo.

Ibón de Plan II

Se gosatz seguir este blog, habretz visto que fa poco puyé una entrata de l'Ibón de Plan. Pos bien, a's pocos i torné. Per qué? Pos perque pareixeba que el ciel feba millor cara que la semana anterior, asinas que el miércols de tardes i torné. Amés, hebe quedato en trobar-nos-ie con Pedro Montaner, fotografo de Uesca a qui veyé quan yo ya me'n ibe. En fin, que estió bien pero pintaba millor d'el que dimpués fue.
Tos deixo con las fotos.

Cuento que encara i tornaré bel·la vegata més, pero será entre semana, perque ahier quan baixemos de Cotiella yera Lavasar plen de coches.
Problemas de fer-se famoso, cuento :-(

Primavera en Pineta

Encara que no podié dedicar-le guaire tiempo (de feto, quasi totas las fotos son a'l canto de la carretera) estes días pasatos que no feba soque plever baixaban es barrancos plens d'augua, sobre tot es de la Man Pacina de Pineta. Asinas que bel·la escapateta tocó de fer.

Ibón de Plan

L'Ibón de Plan estoi que ye un d'es puestos més fotografiatos de Sobrarbe. El suyo acceso sencillo dende Saravillo fa que i vienga chent a muntons: respetuosa e menos.
Estar tant conoixito, e de tant fácil ir-ie, planteya problemas. La un ye la masificación e el que conlleva (sobre tot, la mierda que i trobas per tot arreu). L'altro ye que se'n veye tantas fotos que pueden arrobar a cansar.
Con tot e con ixo, tener-lo tant cerca de casa ye una tentación constant, e antes que no se plene de chent, miro d'aprofitar-lo.
La semana pasata i fue el miércols de tardes. Ib'yere yo solo, e tot e que no veyé las luces que esperabe e querebe, siempre ye un placer estar con tú mesmo en un puesto machico como ixe.

Fornos

El de mes de mayo ye ideal pa ir a fer una vesiteta a Fornos. Se i hai nieu en las puntas (como ye el caso d'estianyo) e i hai mayenco, tiens l'espectaclo asegurato. Ye una excursión tant sencilla e bonita que en un ratet te i plantas, e en vale la pena.
La lastima ye que, de totas las vegatas que i soi ito, no he puesto cruzar ta l'altra man d'el río a veyer el Chorro (l'augua que sale per un frato en la paret) so que una. Per tanto, siempre me quedo con las ganas de fer-le na foto (e ixo contando con que i hai augua en suspensión que deixaría la lent de l'obchectivo banyata como un chop). Pero bueno, bien vale ir-ie a veyer-lo:

Penya Surta

L'altro día, en Facebook, me recomendaban de puyar ta Penya Surta a veyer una buena envista de Sobrarbe. La verdat ye que, encara que las tucas quedan una miqueta leixos, teneba razón la persona que me fayó ixa recomendación.
Tot e que el ciel no yera el millor (raso de tot, como el uello d'un paixarico) i estié bien a gusto mientres que muta chent veyeba el fútbol (estoi que ixe día chugaba el Madrid la semifinal de la Champions). El que més goyo me fayó de tot fue tornar a pasiar per la Tierra Buixo, u Viello Sobrarbe, que ye espectacular estes meses d'abril e mayo. Tos recomiendo la suya vesita, e més con tota l'augua que ye cayendo.
Bueno, que no escribo més, que tos deixo con las fotos.
Penya Montanyesa e Cotiella:

 Treserols:

 Més Treserols:

 E l'skyline de Sobrarbe :-)

Anyisclo

Encara que siempre me queixo perque remata l'hibierno, ye cierto que la primavera ye una epoca bien bonita. Ye verdat que gosa haber-ie un par de meses (marzo e abril) que se no i hai nieu en la montanya no me fan mica goyo. Pero estianyo he puesto aprofitar-los e soi més contento con es resultatos, a'l menos més que no l'anyo pasato.
Con tot e con ixo, ya ha arribato mayo, es caixicos e fabolars han sacato la fuella nueva, es campos son verdes, las aliagas en flor... ye un placer pa's uellos mirar-se el país. E se amés encara queda nieu a las puntas, como pasa estianyo, encara millor.
Pos ixo, que me'n voi d'el tema. Dimpués d'un cabo de semana veyendo bufar el cierzo en Zaragoza, per fin el lunes, puent de l'1 de mayo, me'n fue ta Anyisclo, en una especie de ritual primaveral perque i voi totz es anyos. E estes son es resultatos.

 E aora a esperar las floretas, a veyer se foi servir el macro que tiengo a'l pobre abandonato de tot.