La Estiva, de nuevo

Sabado, 4:15 a.m. Ubro un uello, ubro es dos, sé que no me tornaré a dormir. T'án pego? Pos ta Comodoto, a veyer l'amaneixer. Como feba días que no nevaba e heba feto calor, contabe con que podrí puyar ta La Estiva en auto e dende astí ya ta Comodoto.
Prencipio a puyar e primer problema: un bolo en bell medio de la pista. Per suerte, debo d'estar més fuerte que no me pienso perque consigo mover-lo e deixar-lo a un canto de la pista.
Segundo problema: prencipia a pareixer nieu més abaixo d'el que esperabe.
Tercer e zaguer problema: antes d'arribar ta'l vación la nieu ya prencipia a cubicar. he de deixar l'auto e tirar de calcetín, e encara me queda dos kilometros largos foniando.
Bueno, rai, soi venito a caminar, no? Me calzo las botas e arreo pista-pista dica que arribo a'l paso Fornos a las 6:30. Como no me va a vagar de puyar ta Comodoto, decido quedar-me per astí a veyer se i hai suerte con las luces.
E l'amaneixer no fue el que esperabe. Suerte que a'l fondo de la valle i heba boira e qualquecosa podié fer :-)
Fendo tiempo a que amaneixés:

 Ya clarea enta l'este:

 Prencipian a iluminar-se las paretz de Pineta:

 Sale el sol:

 Las boiran pillan ixa tonalidat calida d'es primers rayos:

 E 5 fotos que fayé pensando en componer una panoramica e que me ha chuntato el mío amigo Javier Vecino (gracias mil), perque el mío PSno me deixa chuntar fotos, a saber per qué:

Punchatz dencima de las fotos pa veyer-las millor, especialment en la zaguera pa veyer-la tota.

De nuet

Dende fa anyos me fa muto goyo la fotografía nocturna. Unaltra cosa ye que la practique tot el que querrí. Amés, tanto la camara como l'angular que tiengo son buenas ferramientas pa ixes menesters.
Este cabo de semana, con visita a la ciudat entre medio, he feto un poder vencendo a la mandria e soi salito ta la montanya a aprofitar la luna plena e la (poca) nieu que i hai.
El viernes marché ta la Sierra Espierba e ahier ta Barrosa, pa no tardar guaire a tornar ta casa perque hue hebe de troballar. Pa la de febrer, que cuento que ya m'habré recuperato d'es excesos de carnestutas, me faría goyo de puyar a fer nocturnas ta bell pico. Quí se i apunta?
Dende la Sierra d'Espierba:

E en Barrosa.
Pareixco un hombre-lupo, no me falta soque otular a la luna:

Enta Robinyera (3003 metros) e L'Almunia (3132); es dos puyatos, a veyer quan torno ta L'Almunia, que me fayó muto goyo:

 Punta Robinyera e una constelación que veyé en la foto anterior, a simple vista no se veyeba tant bien:

Frío, pero no pas tanto

Ha feto, per fin, frío. Pero no pas tanto. Dos días de frío no son prou pa que el chel se faya en duenyo e sinyor d'es ríos pirenaicos. la mía esperanza yera que el frío hes pegato fuerte en Ordesa, e no me'n queixo, pero habría calito bell día mes.
Con tot e con ixo, ya que i fue, pos fayé fotos, que yera un d'es obchectivos d'el día (l'altro yera recuperar la forma e baixar bell kilet producto d'es excesos nadalencos).
Aquí las tenetz. Como siempre, una pila, perque cuento que el día que sía una miqueta buen sabré trigar-ne solo una, como fan es profesionals :-)
Amaneixer a Las Gradas:

 El Circo de Soaso:

 No cal presentación, cuento:

 Siempre miro de fer una compo con estes bolos, pero garra me convence:

 Las Gradas, més vistas que el TBO:

 E la Cascada de la Cueva, como veyetz, le falta muto pa chelar-se de tot, e no sé se el veremos este hibierno:

 Detalle tirando de tele:

Flors en el cul u insistencia?

Dimpués d'el paso d'un frent de plevia e nieu, a punto día gosan fer-se unas boiras muit interesants en Pineta. Ahier plevió e nevó, asinas que hue, a las 6 d'el maitín, soi puyato unaltra vegata ta la Estiva. I heba 10 cm. de nieu que no yeran ahier, asinas que la montanya feba unaltra cara, anque fa falta un buen paquete encara. Quan i soi arribato, i heba més posibilidatz de baixar con las mans vacías que altra cosa, pero en esta vida mutas cosas dependen de la suerte, e, ya que no me toca la primitiva, he decidito d'esperar a veyer qué ocurriba.
A la fin ye estato estresant: boiras t'aquí, luces t'allá, mete el tele, saca-lo pa meter l'angular, ves t'allá, torna t'aquí perque aora i hai buenas luces... En fin, que pensabe que tornarí ta casa sin cosa e a la fin he feto una buena cullita. Tos ne deixo quantas, espero no cansar.
7:15 se veye la luna, pero va puyando la boira e només s'intuyen una miqueta las paretz de la man pacina:

8:15 Queda 10 menutos pa que la luz de en las tucas e saca mala pinta:

 Calla, que prencipia a ubrir-se la boira. Asoma el Cilindro mientres va pillando una miqueta de color:

 Como dé el sol en el Garién e el Felqueral triunfo. Pos toma:

La boira s'ilumina quan el sol pilla una miqueta més d'altura. Chulo contraste con es pins en uembra:

 Pineta s'ilumina:

 E tres menutos dimpués se torna a zarrar quedando-se una luz fría:

E ixo ye tot, me pareix una buena forma de prencipiar l'anyo fotografico :-)

La primera de 2016

Como ya ye tradición dende que soi pai e deixato de fer el golagután las nuetz de cabo d'anyo, me fa goyo de prencipiar l'anyo en la montanya. Ahier, vencendo a la mandria, salié a puyar ta Comodoto e mirar de fer baixar es gambons, la dorada, el vin e es hordios de la nuet anterior. Quan baixé d'el coche el día no feba guaire buena cara, perque yera nuble e mesmo nevusquiaba, pero per un rato i veyé una mica de color a'l ciel. Asinas que, oficialment, esta ye la primer foto de l'anyo:

A veyer se el 2016 se porta bien, e nusaltros tamién con el planeta.