Feliz anyo nuevo

Pos ixo, que espero que l'anyo 2016, encara que la vida ye "hit and miss", tos vienga plen de felicidat. E, como he leito per astí, teniatz més sexo que problemas he he.

Un video

A veyer qué tos pareix

https://www.youtube.com/watch?v=J_ax3bhXuGU

Amaneixer

El lunes fue unaltro día d'ixes en es que ubro un uello, e a l'inte l'altro, a las 5 d'el maitín. Como que no hebe feto plans el día anterior no sé ta ón pegar, pero més que caminar tiengo ganas de fer fotos. Asinas que decido d'ir ta La Estiva, un d'es míos miradors favoritos de tot el Pirineu, con una envista bien maha de Pineta e de totas las montanyas que la rodían, en especial de Treserols.
Salgo de casa e el ciel yera engallinato, se veyeba la luna plena pero esbafata, sin detalle. Me pienso que no tendré guaire suerte pero, ya que he movito, dica el zaguer inte no se sabe nunca cómo puede ir.
Quan arribo ta'l paso Fornos ya i hai una miqueta de claridat enta l'este. I hai boiras pero tot indica que i habrá luces, e como amés ye una miqueta nuble no quedará un ciel raso e hauto. Prencipio a fer fotos perque las boiras feban de reflectors de las primeras luces rosas. Quasi no me queda batería; rai, en tiengo uanltra plena.
Sí, en tiengo unaltra e plena, pero no pas en la mochila se no en casa. Me cago en la pena negra, e quan me quedo sin batería de tot, no me queda soque veyer l'espectaclo de las primeras luces sobre Treserols, que no ye poco.
Luna plena sobre la punta Treserols:

 Primeras luces enta l'este:

 Pocos en he visto como este...

 Una de las millors vistas de Pineta, a'l menos pa yo:

 2000 metros de puyata per sedimentos marinos:

 Unaltra envista cheneral:

E el amaneixer queda en la smías neuronas, no pas en forma de píxels, cagüen tot...

Atardeixer

Tres días e medio en Zaragoza aguantando l'espritu de Nadal e veyendo boira preta cansan a qualsequiera, u a'l menos a yo. Asinas que ahier de tardes, a'l poco d'arribar, ya tenebe ganas de salir a dar una vuelta e prebar el chuguete nuevo (70-200) que me compré yo, perque Papa Noel m'ha traito unaltra cosa, amés de pisar una miqueta de montanya. Asinas que marché a veyer se l'atardeixer en valeba la pena, como pareixeba quan puyabe enta Bielsa.
Yera nuble e dica la fin no i habió una miqueta de color, pero bel·la foto salió.

Amaneixer

Domingo 20 d'aviento. Despierto dende las 2:30 de la nuet. Qué foi?, perque dormir-me sé que no me voi a dormir dica las 7 u 8 d'el maitín. Bai, pos me'n voi ta Marmorés, que i hai poca nieu. Espero un rato e marcho enta Pineta.
A partir de 1700 m. prencipia a apreixer la nieu, toca foniar, perque no n'i hai guaire per m'afundo. Se prencipia a ralentizar la puyata perque caminar asinas ye una mierda.
Una miqueta més t'alto ya i hai costra e van alternando zonas con nieu blanda e altras con nieu dura: cal meter-se las fierras en es pietz. I hai costra e quan clavo tot el mío peso (es míos 82 més uns 8 de mochila con material) se trenca e me i clavo dica es chenullos. la marcha se ralentiza encara més, e el riesgo d'ir con es grampons en ixas condicions. No llego a l'ibón con las priemras luces ni de conya.
 Puyo més, la nieu ya ye dura e se puede abanzar bien con es fierros, ya no se me trenca. Con la luz d'el frontal veigo quatre uellos de chizartz que se me quedan mirando. Con ixa manía que tenemos de personalizar, deben d'estar pensando que qué conyo fa un tío a estas horas per aquí.
Contino puyando una miqueta més. Arribo en un paso malo: nieu combada, se se me'n va un piet l'hostión ye d'es que no el cuentas. Pos no paso, no quiero deixar popiellos.6:15, prencipio a baixar e veigo enta l'este que i hai boiras. Puede estar que i haya buenas luces. No fa guaire frío asinas que almuerzo e espero. Pasa media hora e la espera no defrauda. Primero royo, dimpués amarillo e dimpués unaltra vegata royo. Foi fotos e fotos e a'l rato marcho enta casa. No s'ha dato mal el día, encara que a vegatas calga improvisar un plan B.

E, per se no nos veyemos dica l'anyo que viene, que pasetz unas buenas vacacions (Nadal, Saturnals, Equinoccials, que la fuerza t'acompanye... trigatz la vuestra).

Ordesa (unaltra vegata)

El cabo de semana pasato marché enta Ordesa a veyer cómo iba el tema de chel (perque ya sé que nieu no n'i hai) pa ir pensando ya fotos hibernals, que per cada anyo me fan més goyo.
No ibe con guaires esperanzas e estas no se cumplioren: chelata buena a'l canto de la Pradera e malas que puyas una miqueta ni rastro de frío.
En fin, que espero que bell día se'n vaya d'una puta vegata l'anticiclón e faya l'orache que ha de fer. Hue he visto floreixer una Hepatica nobilis, e no ye buen sinyal.
En fin, que tos deixo con bel·la foto perque i fue. Ixo sí, me faría goyo de no tener que comentar que tot el camín yera plens de papels, plasticos, codetas de fumarro... mal per la chent que emporca, pero estoi que el Parque tamién habría a fer qualque cosa a'l respecto.

Cullita 2015

Diz que Ansel Adams, un d'es gurús de fotografía de paisache, especialment en Yosemite, dició qualque cosa como "Conseguir 12 fotos buenas en un anyo ye una buena cullita". Yo no'n he replegato tantas, pero sí que se m'ocurrió l'altro día, antes que facebook me'l recordase, de chuntar las que considero millors fotos conseguitas en estianyo 2015. N'i hai buenas e regulars, pero ye el que he conseguito. L'anyo fotografico el doi ya per zarrato perque con esta mierda d'orache que tenemos (per qué no se'n va l'anticilón de las Azores uns días de vacanzas?) doi ya per perdito el mes d'aviento, que querebe haber destinato a fotos con nieu e chel. Asinas que astí va la mía selección. Ye largo, el digo per se el queretz dosificar :-)

Chiner

El mes de chiner prencipió como este mes d'aviento, mica nieu e poco chel, pero la situación cambió con una ola de frío polar. Aprofité pa ir ta Ordesa, puesto que m'encanta pero que miro d'evitar en epocas  de masificacions, especialment el verano e l'agüerro fotografico. Rabosiando per astí veyé estas piedras que prencipiaban a chelar l'augua que teneban arredol con ixe churro de fundo. Me costó un buen rato de quadrar la composición, sobre tot perque yere de piet sobre una piedra en las mesmas condicions e me'n podebe ir ta l'augua per lo chel. Encara que només hes estato un piet, m'habría supuesto un problema perque m'esperaba buen rato de baixata a mutos graus baixo cero e sin veyer el sol.
Esta foto me valió el primer premio d'el Centro Excursionista de Ribagorza.

Febrer

Unaltra ola de frío e yo que torno enta Ordesa, a veyer se conseguibe la "Cola de Caballo" chelata de tot. No'n yera de tot, pero quasi. De tornata paro en es miradors, quasi me muerde un can gran como un caballo (e quasi le clavo el tripode en la capeza) e veigo la "Cascada de la Cueva" chelata. Foi fotos con l'angular e me da per quitar el 100 macro (en ixe momento no tenebe garra focal més larga) e me da per quitar ixas fuellas de l'agüerro con el chel dezaga. Una larga exposición de las mías, per falta de luz principalment, e unaltra alegría en forma d'accesit d'es premios Felix de Azara de la Diputación Provincial de Uesca.

Marzo

Ixe mes no fue guaire productivo. Poca nieu e la Naturaleza aquí revilca a finals de mayo, asinas que cal buscar luces aveyer se i hai suerte. Una tarde salgo de troballar e me'n voi cara Nerín. Quan i arribo, me falta poco més d'una hora pa que sía la hora buena de las luces sobre Treserols. Puyo a tota vitesa enta Mondoto, an que me planto en una hora. Dimpués de puyar a las quatre suelas, per l'oeste unas boiras me privan de veyer ixas luces, pero ya que ibi'ere... Ye de las fotos que menos goyo me fan, pero como m'he propuesto puyar-ne una de cada més, pues en marzo toca esta...

Abril

Unaltro mes floixet. Abril se salvó per una puyata enta el castiello e ermita de Sant Mitier, an que tiengo pendient unaltra sesión pero en millors condicions. Un fotografo vasco que conoixebe de foros de fotografía m'heba deixato un tele, un 200-400 (eskerrik asko, Óscar, una persona bien chenerosa, perque no me conoixeba de cosa, te'l tornaré quan viengas per aquí) e ixe día me'l llevé. me dio per aleixar-me una mqiueta de la ermita e astí veyé la foto. Torno a repetir que la tiengo pendient con millors condicions, pero dica que l'hibierno no tienga a bien de venir per aquí, ye per demés.

Mayo

mayo, quan rechita la vida en el Pirineu. M'encanta en este mes la floración de las Cypripedium e la color verde electrica d'es faus. Se i ha habito nieu es ríos baixan plens d'augua, per lo que no puedo fer las mías sinyaleras largas exposicions he he. Qualsequier fabolar me vale, pero Anyisclo tiene un no se qué que el fa especial, e en este puesto tiengo pendient de fer una serie con un enquadre pareixito en las quatre estacions. Per aora me falta l'hibierno e el verano, perque l'agüerro e la primavera ya es tiengo: O Puent.
Bendita wifi.

Chunio

En este mes no he dubadato mica. Sé quál ye la mía foto favorita d'este mes e tamién en ye de tot l'anyo. Ixa tarde puyé ta Pineta. Una tronata me fayó entrar a prener-me una cerveza en el Refugio de Pineta e charrar con Jaime, un d'es guardas e qui me dio las primeras lecciones de fotografía. Como se feba tarde me'n fue enta casa, e per lo retrovisor ya ibe veyendo que podeba haber posibilidatz de buenas luces. Las luces d'atardeixer en Pineta son excepcionals, només las he vistas, e en contats ocasions, dimpués de las tronatas. La primer vez que las veyé yere aprendendo e no puedo salvar ni una sola foto; la segunda la tenetz en la foto de capecera d'el blog, e la tercera ye esta. Un espectaculo de la naturaleza en forma de color de la valle que més goyo me fa de tot el Pirineu:

Chulio

Vacacions, pero ixo no significa tener més tiempo libre, e es que tiengan fillos m'entenderán. E ixo que yo tiengo la suerte de compartir quasi a'l 100% el periodo vacacional d'es míos fillos. Pero bell ratet cal escapar-se, e con quí millor que con amigos, como Javier Vecino, a qui considero el mío maestro en esto de la fotografía e qui me lelva d'excursión per la Val de Chistau ensenyando-me-la como er bien la conoix. Unaltra tarde de tronatas e decidimos d'ir ta un puesto espectacular, pero més visto que el TBO. Con tot e con ixo, yo no tenebe fotos de Viadors, e per suerte trobemos unas luces buenas.

Agosto

Per un regular, agosto ye d'es meses menos productivos. Goso fer més montanya (picos), i hai poca flora, chent per tot arreu e no ye d'es míos preferitos. per fortuna, dende fa uns anyos goso fer una escapateta en soltario a dormir ta la montanya e combinar en un puesto leixos d'el mío radio d'acción habitual (Sobrarbe) la fotografía e, se ye posible, la montanya. Estianyo me'n fue ta la Val de Tena, que m'encanta, e an que i voi muit poco. Dimpués d'estudiar mapas e opcions, me decidié per es Ibons Azuls pa fer fotos e asinas a l'altro día podrí puyar ta's Infiernos (estianyo m'ha dato per coleccionar tresmils) e baixar enta Sallent en una minitravesía. Esta ye la foto que he trigato, la de las luces de l'amaneixer sobre es Infiernos:

Setiembre

Setiembre, como en agosto, poco motivador ye pa yo. Ya tiengo la capeza pensando en las colors de l'agüerro e ye un mes que quiero que pase decamín. Manimenos, esta especie d'hiperactividat que tiengo me priva de quedar-me en casa plorado per que el tempus irreparabile fugit dica octubre (la resta de l'anyo quiero que se detenga pa no fer-me mayor) e contino salindo a fer montanya. Una tarde i habió una tronata e, con la vana esperanza de repetir luces como las de chunio, me'n fue a una atalaya que me fa muto goyo de la Valle de Pineta. No trobé las luces que querebe, pero menos da una piedra. Uns rayetz de sol se filtroren per la Collata Anyisclo e per uns segundos, menos d'un minuto, bel·la luz entró. No ye que me mate, ni muto menos, pero estoi que ye la millor d'ixe mes tant hauto.

Octubre

Oe, oe; oe, oe... Es fotografos de naturaleza aplaudimos con las abrellas quan arriba este mes. Se nos cayen glarimas como el punyo pensando en las colors de las caducifolias, especialment es faus. Estianyo venió antes el colorito, e como siempre, el primer puesto a on voi a mirar-lo ye Anyisclo. Estianyo no he conseguito, ixo creigo yo, garra foto d'ixas que dices: la imprimiré. Per tampoco no me'n queixo. Tot e que no he tenito tanto tiempo como altros anyos, las vesitas obligatas han caito. He trigato esta d'Anyisclo, mientres cientos de fotografos fan cola pa plantar el tripode en Ordesa, yo m'estimo més de cacegar-me per puestos talment menos espectaculars, pero muto més tranquilos e no pas tant vistos.

Noviembre

Este gosa estar un mes en el que encara se puede fer fotos de fabolars coloritos. Manimenos, como en 2015 s'adelantó, caleba mirar alternativas. E estianyo per fin podié fer una foto que feba anyos que tenebe en la capeza (talment millor, perque quan la pensé ni tenebe este equipo ni sabebe guaire bien qué tenebe entre las mans). Me tocó de despertar-me a las 2:30, prencipiar a caminar a las 3:15, puyar-me es 1200 metros de desnibel dica Marmorés, calzando-me es grampons a metat d'Embudo, estar a orillas de l'Ibón a las 6:30 e estar pasando frío. Pa que dimpués te pidan per astí las fotos regaladas... Pero bueno, ye d'ixes días que baixas sabendo que tiens muit buen material en la tarcheta e con una sonrisa d'idiota en la cara :-)

Abiento

Este mes d'aviento no he puesto quasi salir a fer fotos. Per cada anyo me fa més goyo de fer fotografía hibernal, perque se consiguen fotos que no son guaire vistas (sobre tot perque cal estar una miqueta barrenato, e yo en soi, pa salir a fer fotos a punto día a temperatura a mutos graus baixo cero). Pero no sé se ye cosa d'el calentamiento global u que estianyo ye excepcional (me gustaría de pensar esto), el caso ye que l'hibierno encara no ha asomato la pateta. De momento, l'unico material que tiengo ye de la "Cola de Caballo", pero l'unico aspecto que marca que ye hibierno ye que llevo ropa d'abrigo. A veyer se cambia esto.

Este ye el mío resumen de 2015, encara que quede quasi medio mes d'aviento. Espero que el 2016 me vaya, se no millor, a'l menos como este. Espero no haber-tos aburrito guaire e que tos hayan feto goyo las fotos.

Per fin

Per fin he puesto estar un cabo de semana en Bielsa. En un mes soi estato no sé quántas vegatas en Zaragoza e en uesca, amés de Madrid, Barcelona e París. E no digo que sía mal, especialment París, que m'encantó, pero tanta concentración urbanita pa un moregón como yo no ye buena. Per ixo precisabe salir ta la montanya a estar con yo mesmo ("y en mala compañía, me deja a mí conmigo a solas", que canta Extremoduro), e este cabo de semana he aprofitato una miqueta.
Ahier estié en l'Ibón de Plan e, a falta de nieu, buen ye el chel.
Probando con diferents balances de blancos, a veyer quál tos convence més.

 E las montanyas de Bielsa dende Lavasar.

Hue soi ito ta Ordesa, pero ixo ye pa unaltro día.

Accesit en el Felix d'Azara

Tiengo la satisfacción, e una miqueta d'argüello, en decir que m'han concedito un accesit en el concurso de fotografía d'es Premios Félix de Azara, de la Diputación Provincial de Uesca. Ye con esta foto que meto abaixo, feta en febrer d'este anyo en una de las olas de frío que teniemos (no voi a decir sufriemos perque yo las espero he he). Ixe día puyé dica la Cola de Caballo e, tot baixando e encara que arribabe tarde, me paré en el mirador de la "Cascada de la Cueva", per totz conoixita, pa fer esta foto con el 100 macro aprofitando las fuellas d'ixe fau que tapa el churro.
Amés, encara que no sía guaire, tamién foi visible l'aragonés con el nombre que le metié a la foto: Agüerro/Hibierno.
Quiero aprofitar e felicitar dende aquí a'l ganador, David G. Malo, e l'altro ganador de l'accesit, Pedro Montaner, per las suyas estupendas fotos.

Marmorés

Ya fa a'l menos 6 u 7 anyos que charro con Jaime, un d'es guardas d'el Refuchio de Pineta e qui me dio las  primeras nocions basicas de fotografía quan me compré la primera réflex, d'una fotografía a l'amaneixer con las primeras nevatas de l'agüerro de la cara norte de Treserols. E este cabo de semana per fin he puesto fer-la, perque me rondaba per la capeza dende que nevó fa dos semanas e, como soi pro capezuto, pos ixo...
Que el sabado me desperté a las 2:30, me clavé ropa d'hibierno, metié en la mochila es punchos pa's pietz e cara Pineta. A las 3:10 a acometer enta alto, a metat d'"embudo" mete-te las fierras e las 6:15 yere en el Balcón presto pa acometer enta l'ibón.
L'ibón de Marmorés ya yera a medio chelar, pero debaixo de Tucarroya, la parte més solana de Marmorés, encara no'n yera, e astí podié pillar es reflexos que querebe. No feba guaire frío, encara que yera chelando, e podié estar la media hora que faltaba dica que s'iluminasen las cumbres fendo fotos e disfrutando de la experiencia d'estar-ie solo, en silencio, mirando-me una de las millors envistas de tot el Pirineu, se no la millor (ya perdonaretz este arranque de chovinismo).
Dimpués ya arriboren es primers rayos de sol, me concentré en fer fotos e en pasar-me-lo qual chabalín en barducal e torné ta casa bien contento, de la experiencia sobre tot pero tamién de las fotos, perque yera d'ixes escasos días que tornas ta casa sabendo que, se no has feto garra cagata important con es parametros de la camara, tiens foto.
E aquí tos las muestro. Primer de tot la seqüencia temporal, dende la hora azul, las priemras luces e dica que da el sol de plen, ya sin luces especials:

El Cilindro tiene muta més presencia que el Perdido, amés d'un millor reflexo e le da la luz més directament:

E ya un par de panoramicas:

 Torno a insistir en que punchetz dencima de las fotos pa veyer-las millor.

A Fraga

El lunes, festivo en Aragón y amenazando con fuertes batilazos d'augua, me'n baixé t'A Fraga antes que se metés a plever como se no i hes maitín. I hebe estato la semana anterior, pero encara le faltaba una miqueta e pensé que ya podría estar a punto. No yera mal per lo que fa a las colors, pero el que més goyo me feba de tot yera l'ambient: poqueta luz. I heba unas boiras negras como el fullín que amenzaban plevia (de feto, m'estió plevendo quasi tot el rato que i estié, e se'n deixó quan marché, cagüen), que daban un aire tetrico e una luz muit uniforme. Per ixo, quasi totas las fotos tiran enta subexpuestas, pa reflexar cómo el veyebe.
Tos deixo la colección:

O Puent d'as Crabas

El sabado s'encertó a que estás con José María Satué, de casa Ferrer d'Escartín e a qui tiengo la fortuna de conoixer dende fa ya quantos anyos e qui ye una de las personas que més ha feto pa que Sobrepuerto no caiga en l'olvido. Pos ixo, que charrind-charrand salió el tema de las fotos, e le dicié que este agüerro no hebe puesto ir t'O Puent d'as Crabas, que me tiene enamorato dende que lo conoixié ya fa tiempo. Ixe charrazo me fayó ir-ie el domingo, e encara que l'agüerro ya yera pasato, ixe puesto nunca no defrauda.
E per ixo, tos deixo aquí las fotos d'ahier. Las de hue pa unaltro día.
Con bicho:

 Sin bicho:

 En vertical:

Chugando con es detalles: