Sant Mitier

L'altro día fayé L'Entremont, un camín que m'encanta. Per qüestions horarias me quedé con las ganas de puyar ta la Ermita e Torre de Sant Mitier e Sant Celedonio. Hue, que no querebe arribar gauire tarde, me i he puesto acercar, estoi que feba 5 anyos que no i yere. Envista espectacular, perque ye tot verde primaveral a rabentar.
Bell día me faría goyo d'ir-ie de tardes pa veyer las zagueras luces sobre Cotiella, antes que se'n vaya tota la nieu.
Dende la torre:

 Parte final d'el camín de L'Entremont:

 E la ermita e la torre, sobre el cillo, con Cotiella al fundo:

Ibón de Plan, més primaveral

Fa uns días estié en l'Ibón de Plan, que presentaba un aspecto medio primaveral, medio hibernal (perque la superficie yera chelata). Hue, aprofitando que i heba un ciel que prometeba buenas luces encara que quasi siempre promete pero no se concreta, he aprofitato pa ir-ie. Ye una foto que tiene tot quisqui, pero ye una pena no aprofitar-lo tenendo-lo a'l canto de casa. Amés, i puedo ir de mutas trazas: se quiero fer deporte, andando dende Plan u Saravillo, e se quiero ir tranquilament, como hue dimpués d'una fartera, l'acceso en auto ye muit comodo. E ixo ye lo malo, que como l'acceso ye tant sencillo, i arriba tota mena de chent, e asinas ye l'entorno, plen de papels, colillas de fumarros e altros desperdicios. Hue que ye el día de la Tierra, cuidemos-la, que no'n tenemos soque una.

E un selfie d'ixes :-)

Per Espierba

Llevo quantos días, sin que me vague de procesar las pocas, e malas, fotos que voi fendo. E amés a tot ixo se le ha chuntato que la tronata d'el sabado m'abrasó el router e dica esta tarde no'n he tenito uno nuevo. Pareix mentira cómo se puede trobar falta a esto d'internet. perque sí, con el móbil puedo mirar-me-lo, pero ni puedo troballar, ni penchar fotos, ni cosa d'ixo que goso fer con el talabarte d'ordenador de sobremesa que tiengo.
Pos ixo, que entre unas cosas e altras i hai una nieta de cosas per fer per internet, e una ye mirar d'actualizar el blog. Dende la zaguera entrata soi estato fotografiando bel·la orquidia, en l'Entremont (un puesto fantastico, pero an que ye difícil de fer buenas fotos de paisaches e la unica foto decent me pilló revelando-la quan se'n fue la luz e no he puesto tornar a ubrir-la) e en Espierba.
Tos deixo una orquidia e bel·la foto d'Espierba, a veyer este puent se me cunde més.
Panoramica de quatre fotos:

 E diferents envistas:

 Mallo Chico:

E la orquidia, no sé se ye una Barlia robertiarum, de la tierra baixa:

Ibón de Plan (unaltra vegata)

Gracias a una foto que me ninvía un amigo (gràcies, Jep), el chueves de tardes decido de puyar a veyer l'Ibón de Plan. Como tiengo ganas de castigar-me una miqueta, puyo per lo camín que remonta el barranco de l'Ibón e no per la pista, per an que ya quasi se debe de poder arribar dica Lavasar. Puyatón e sudata, pero en valió la perque l'Ibón yera precioso, con la suya superficie quasi chelata de tot e un ciel e unas colors de tardes que feba tiempo que no pillabe (este hibierno i soi puyato dos vegatas e siempre nuble).
Feba días que no tornabe contento con las fotos, dende este hibierno con la nieu e el chel no hebe conseguito una foto de la que podés decir: "Me fa goyo".
Aquí el podetz veyer:

 E, tot baixando, el precioso lugar de Chistén en la hora azul:

Lierga

He vivito un anyo e poco més debaixo d'era. la he visto quasi totz es días dende fa 14 anyos... e nunca no i hebe puyato. Soi charrando de Penya u Punta Lierga, la estribación més occidental d'el macizo de Cotiella, e inedita oa yo dica este Lunes de Pasqua.
Intuyibe que i habría muit buenas vista, pero quan puyé ta la punta yere rodiato per la boira e a una temperatura per debaixo de 0. Me saqué la mochila, me fotié el forro e saliño el sol. Pensé: "A'l menos no me chelaré mientres almuerzo". Conforme almorzabe a'l sol iban salindo las tucas més altas per dencima de la boira: Treserols, Fulsa, Suelza, Lardana, Espadas, Movisón, Cotiella, Penya Montanyesa... Mesmo per un ratet veyé Tella. Quan arribé ta l'auto, ya yera raso de tot, pero ixo m'obliga a tornar-ie (total, i hai una miqueta més de media hora) a disfrutar de la inmensa envista que ha d'ahaber-ie.
Tos deixo bel·la foto, como siempre.
Luna plena dende Santa Isabel e cillos de Lierga:

 S'ubre un claro en las boiras, se i veye Saravillo, La Comuna, Chuistén, Plan, Plandescún...:

 Vista enta la valle Bielsa: Fulsa e Suelza:

 Treserols e abaixo Tella (quasi 2000 metros de desnivel):

 E, tot baixando, una panoramica:

Punchatz sobre las fotos pa poder veyer-las bien.

La Pella Roda

D'hibierno, quan torno ta casa, siempre pienso que he de fer bel·la foto a Fulsa perque pilla unas colors bien mahas de tardes. Ahier no llevabe intención, pero quan tornabe ta casa dimpués de mirar e no trobar narcisos veyé las uellas de Roda e m'acordé d'esta foto d'un amigo (ya sabe er que le'n copiaré malas que tienga oportunidat) e miré de fer bel·la cosa pareixita, pero integrando paisache. No ye que sía la hostia, pero tampoco no me desagrada. Cómo se nota el rango dinamico de la 6D...

Quan el día ye de No, per demés...

Ahier tenebe quasi tot el día pa yo solo. Hebe deixato a's fillos con es suyos tíos e podebe fer el que querés. El plan (a veyer qué día puedo decir yo ixo que deciban en el Equipo A de "m'encanta que es plans salgan bien") yera ir a mirar orquidias de maitins e puyar ta bell puesto de tardes a veyer se pillabe un buen atardeixer.
De maitins estié mirando per quantos puestos, e no'n trobé, d'orquidias, soque dos especies: la Ophrys fusca y la Sphegodes, que ya tenebe fotografiatas d'altros anyos. No i hai traza de trobar la Apifera, con las ganas que le tiengo... Amés feba una miqueta d'aire, e ixo pa fer macro de flora ye d'el pior que te puede pasar. Bien se vale que la 6D se traga ISO 800 e el que le metas, cosa que con la 40D no podebe fer. Aquí tenetz una muestra, como fondo metié el reflector e lleva un flashazo:

De tardes puyé ta un tozal an que querebe ir feba días: Toronzué. M'heban dito que teneba muit buena envista, e la verdat ye que sí, pero no la que esperabe. Pero ixo rai, malas que pasé d'es 2000 metros d'altitud, prencipió a bufar un aire que m'emplastaba (e con la mochila faré, se fa u no fa, uns 90 kg.). Imposible aguantar en la punta, de l'aire e d'el frío que feba (con la calor que heba feto...). Asinas que quatre fotos mal fetas a pulso e cara abaixo a las quatre suelas, a veyer quí yera el guapo que i aguantaba, amés que habría salito volando tripode, camara e tot el coponario. Pincho fotos testimonials: yo i estié e me clavé 900 metros de desnivel per demés.
Enta Treserols, astí querebe pillar las zagueras luces:

 Enta Guara, buena envista tamién:

 E enta l'oeste, se i veye Yesero, Penya uruel, etc.

E ixo, que quan el día diz que no vas a fer cosa, per més que mires de conseguir bel·la cosa, ye per demés.