Plomazo

Las previsions, per fin, s'han cumplito. I hai plomazo de nieu. No pas en Bielsa, an que lleva nevando més de 24 horas e no cuento que arribemos a's 10 cm. de nieu, pero sí en Pineta, an que en ha caito més de medio metro de nieu. Sí, un paquete. Asinas que quan m'he despierto, a las 6 e pico d'el maitín, m'he asomato a la finestra e he visto estrelas. He pillato totz es trastes e me'n soi ito ta Pineta. Pero en la vuelta d'Ixabierre m'he meso a fer comedia con l'auto, perque no quereba puyar nian con las ruedas de nieu. Bien se vale que el tracto de l'Ayuntamiento pasaba en ixe inte enta Ixabierre e he puesto puyar. Perque ha durato poco rato e no me podebe mover guaire bien, pero i ha habito 10 minutos que s'ha ubierto el ciel per l'este e he puesto disfrutar d'unas luces estupendas. No he puesto refleixar la belleza d'ixe inte, pero se tos puedo dar una miqueta d'ixe rato, me foi contento.

Per Ordesa II

L'altro día no querebe saturar con tanta foto, asinas que decidié de trestallar la entrata en dos. En esta tos muestro es churrros de la parte baixa d'Ordesa, per totz conoixitos, asinas que no descubriré America ni cosa pareixita. Pero estes días soi estato mirando fots d'Ordesa hibernals e la verdat ye que se'n veye bien pocas. Pero, con e con ixo, tiengo un problema. No sé se ye per la emoción d'el día u qué, pero me fan goyo las fotos que foi quan son recients, con el paso d'es días ya no me'n fan tanto. Ye normal? Solo me pasa a yo?
En fin,q ue aquí las tenetz. No podié dedicar-les guaire rato perque quan fue conscient de la hora que yera me die prisa per arribar ta l'auto, e ye que m'estimo més d'arribar ta casa a la hora de comer, e a las tres e media ya yere en Bielsa (contatz que i hai hora e media de viache entre Ordesa e Bielsa).
Las Gradas:

 Estoi que esta no ye guaire conoixita:

 La d'el "Estrecho" dende alto. No m'atrivié a salir de la baranna per lo chel, no yera pa fer bromas e yo tiengo dos fillos...

 Dende abaixo, tampoco no podebe acercar-me-ie més per no llevar grampons:

E esto ye prou. Pa este cabo de semana dan muta nieu, a veyer se puedo salir a fer una curseta, pero caldrá parar cuenta con las litz.

Per Ordesa I

Dimpués d'el chasco que me llevé el martes quan, en bell medio d'el camín de Suaso paré cuenta de que hebe cacegato la rotula d'el tripode, el sabado torné ta Ordesa con el viello, pesado pero fiable manfrotto a fer las fotos que habrí quiesto fer el sabado.
Endrecé el camín de nuet, con la idea de puyar primer ta la "Cola de Caballo" e dimpués baixar fendo fotos tranquilament. Per ixo trestallo esta entrata en dos: en las fotos que fayé tranquilament (la de hue) e las fotos que fayé con prisa e rodiato de chent. Como no tiengo criterio, tiengo una pila de fotos, pero miraré de no fer-me guaire cansino.
Prou que son puestos muit conoixito e fotos muit vistass, pero estoi que d'hibierno tienen una machia especial, per la nieu e el chel. Pos ixo, hue las fotos son de la parte d'alta de la cursa, quan quasi se me lleva l'aire (e ixo que soi cerca d'es 80 kg. e con tot l'equipo a la chepa debo estar entre 85 e 90).
Circo de Suaso, el puerto fa revolbins de nieu en la Punta Treserols e poca nieu queda en tierra, perque se la llevata l'aire. ixo sí, i hai unas cheleras d'el copón. L'aire quereba foter-me en l'augua e veyé salir volando una molatiera, bien se vale que s'aturó cerqueta:

Cola de Caballo, qué diferiencia con fa dos semanas, quan no i heba mica chel:

 Con una temperatura de color més fría:

 Dimensionando:

 E ya de baixata, el primer churro que i hai baixando enta las Gradas. Aquí ya m'hebe trobato las dos priemras personas que puyaban:

Una tarde per el Cuezo II

Fa poco, quais dos semanas, me'n puyé ta'l Cuezo perque l'atardeixer prometeba. No fue mal la cosa, pero feba una miqueta de pena de veyer la montanya tant pelata de nieu. Hue la tarde tamién prometeba: i heba boiras per lo ciel no guaire pretas, per lo que podeba haber buenas luces de tardes. E, sobre tot, aora i hai un paquete de nieu, que biena falta le feba. Asinas que dimpués de comer me'n soi puyato ta Espierba e dende astí china-chana dica la Sierra d'Espierba. No he foniato guaire perque i heba tranya feta de chent que heba puyato con raquetas (yo no llevabe soque molatieras), pero dende La Collata enta Sarratillons e ta'l Cuezo he habito de fer tranya yo e m'he meso un buen sobo. Suerte que he trobato recompensa (se fues creyent dirí que la Providencia m'ha recompensato) e m'he trobato con un atardeixer d'ixes que pillas cada 3 u 4 anyos. No he feto fotos soque enta Cotiella, perque enta Treserols e Fulsa saliba la gabacha e no dexiba veyer es picos. Ixo sí, tamién he de decir que feba buen frío, perque se m'ha chelato l'augua que llevabe. Tot baixando, bolismiaba e, de vez, se veyeba un ciel sin luna e plen d'estrelas. Yo ya sé que soi muit rar, pero i hai cosa millor que ixo?
Hue solo dos fotos, perque l'enquadre yera ixe e no m'atrevito a cambiar d'obchectivo perque llevabe es dedos encheberditos e me feba miedo que se me'n cayés bel·laún ta la nieu. Llevan un revelato rapido, estoi que cal adedicar-les una miqueta més de tiempo.

Susín

El sabado yera un día de mutos plans. Hebe d'ir ta la comarca vecina per occident perque hebe quedato pa conoixer a dos personas con qui tenebe contacto "virtual". El plan yera fer las priemras luces sobre Telera e dimpués ya adedicar-me a la vida social, pero como gosa pasar a menuto, es plans per A u per B se trencan. Asinas que, mientres febe tiempo, decidié d'ir ta Susín, an que hebe pasato fa muuutos anyos e an m'enamoré d'ixa finestra cheminata de la ilesia. Astí podié veyer la fuesa d'Angelines de casa Mallau, qui fa mutos anyos e sin conoixer-nos de cosa nos convidó a pasar ta ixa preciosa casa e nos dio café e unas galletas dimpués d'una larga e fría chornada montanyera.
Torné ta Biescas a la primer "cita" d'el día e me prenié el café con Pol e con José Miguel.

 E dimpués ya quedé con Óscar, un fotografo pa yo muit fino, a qui le soi muit agradeixito per deixar-me un obchectivo sin conoixer-me de cosa e le ensenyé un puesto que le heba feto goyo. La pena que habiemos de marchar quasi correndo perque cayeba piedras per tot arreu.

E ya el domingo me'n fue a foniar per Pineta, e esto ye el que trayé. Se va acercando a la foto soniata, pero encara le falta muto.

E hue que tiengo fiesta torno ta Ordesa quan deixe a's críos en el cole, a veyer cómo s'ha vestito con las galas d'hibierno.
P.S. Pos sí, soi ito ta Ordesa e ye precioso, pero no sé cómo ni aón he cacegato la rotula d'el tripode, asinas que se puedo i tornaré el sabado con el tripode gran, a veyer se no se'n ha ito guaire chel.

Per Ordesa

El sabado tenebe pensato de puyar ta l'Ibón de Plan. Pero quan tre despiertas a las 3 de la nuet, te vaga de pensar prous cosas, entre altras posibilidatz fotograficas que no tiens. E a'l talle i pensé en una a la que le tenebe ganas dende feba tiempo: las primeras luces en Ordesa dende el mirador de Calcilarruego (qué toponimo més pincho, per cierto). En la Pradera d'Ordesa yere a las 6:50, an que feba frío pero no pas el que heba a fer (5:45 en Bielsa 3'5º C; 6:15 L'Aínsa -3'5ºC; 6:45 Torla 6'5ºC, Pradera -1'5ºC, entalto la inversión termica). Prencipié a puyar a tota vitesa perque yo hebe baixato per ixe camín, pero no pas puyar, asinas que no sabebe guaire bien quánto desnivel i heba. Total que i arribé a tiempo e podié fer las primeras luces, pero yo esperabe bel·la cosa més espectacular.

Una vegata fetas, decidié de fer la Faixa Pelai, que d'hibierno gosa estar impracticable, pero con esto d'el cambio climatico yera como a principios de verano. Asinas que fayé es 5 km e pico de faixa pa salir ta la "Cola de caballo". Ye un puesto que ye més visto que el TBO, pero con tot e con ixo ye irresistible. Amés, aprofitando la wifi de la camara e que la puedo controlar con el móbil, me i metié pa dimensionar:

 Un recorte de l'anterior:

 Ya baixé quasi correndo (se no per lo chel que i heba en las Gradas de Soaso) perque se m'heba feto tarde e no querebe tornar tarde ta casa. Prou que i hai lugars irresistibles, pero esperaré a veyer se viene una ola de fredo de las de verdat pa chugar con el río chelato:

 E ixo ye tot per aora.

Una tarde en El Cuezo

El chueves, quan tornabe de treballar, veyé que el ciel s'iba esgarrinyando una miqueta, e pensé que talment se metesen unas luces interesants. Ta ón ir? Ta'l Cuezo. En poco menos d'hora e media te i clavas e i hai muit buenas vistas, encara que ye un 2000 e poco. Quan i arribé la cosa no yera el que yo me pensabe perque s'iba nublando més per l'oeste. Bien se vale que a la fin i trobé bel·la luz interesant.
Sobre el macizo de Cotiella:

 Enta Treserols:

 Zagueras luces sobre Fulsa e Suelza:

 Fulsa, Suelza e Cotiella:

 E ya quan lusquiaba, me fayoren goyo ixas luces enta l'oeste

Hue soi ito ta Ordesa a foter-me un sobo, pero ixe será unaltro día.

Torna la burra ta Barrosa

Bueno, no pas la burra, un servidor. E ye que el día 3 fue ta Barrosa pensando que el 4 irinos ta bell altro puesto, e resulta que no, que la decisión final (a yo rai, a lo cabo e a la fin la cosa ye pasar un buen rato) fue ir ta Barrosa. Yo le querebe deixar el mío enquadre a Javier, pero er, que tiene més gusto e més conoiximientos fotograficos que no yo, decidió de fer-ne unaltro e yo me i quedé. Como ya i hebe estato el día anterior no me motivaba guaire, pero ya que ibi'ere...

 Dimpués con el macro m'entretenié un rato con el (poco) chel que i trobé:

 Chugando con la temperatura de color:

E con ixe ciel tant hauto sin una boira, fuemos mirando diferents puestos e a Javier le fayó goyo este enquadre. A yo no me motivaba guaire, pero aora he visto que funciona. Pero como en aquer momento no le veyé la gracia, no me treballé guaire la foto e se nota l'efecto d'es filtros que me deixó.

Se rematan las vacacions, en las que he feto menos monte d'el que habrí quiesto, pero tampoco no me'n queixo.

Qualques cosetas

El sabado fue un día intenso. De buen maitín me'n fue enta Barrosa a fer las primeras luces sobre Robinyera e L'Almunia. No feba guaire frío, pero con tot e con ixo a la mesma hora que puyabe yo i heba escaladors de chel aprestando-se, encara que a yo no me pareix gauire segur con las condicions que i hai, ers sabrán. El puesto t'an que goso ir siempre yera quasi sin augua, con tot e con ixo, repitié el mesmo enquadre d'altras vegatas.

Tot baixando, estié fendo fotos per lo río, pero  estié chugando con una baseta con chel:

 Torné luego ta casa, e de tardes quedé con l'amigo Javier Vecino (con qui llevo la pachina de facebook Fotos de Sobrarbe, per se quertez pasar a veyer las mías fotos e es suyos fotons) pa fer las zagueras luces sobre Treserols. El millor de tot, amés de la companyía de Javier e las luces que i podiemos veyer, fue que m'acompanyó la mía filla mayor, qui va a heredar la mía camara viella e a la espera de que es Reis le traigan esta nuet un 18-55 pa acompanyar-la, le deixé el mío 100 macro pa que podés fer las fotos. Como no me fa goyo de pinchar fotos d'es fillos, las que le fayé en plena fayena se quedan pa consumo interno. A veyer se pilla la afición e m'acompanya en las mías salitas fotograficas.

Quan se fayó de nuet podié fer unas fotos a la luna quasi plena que i heba con un focal de 1000 mm (500+x2), pero con tot e con ixo e habito de recortar-la una miqueta.

E ahier repitié Barrosa, pero no sé quán me vagará de veyer-las.

Primer amaneixer de 2015

A yo rai chitar-me a una hora u altra. La nuet de fin d'anyo no fue la més marchosa de la mía vida, pero entre pon-te e esta-te quieta se me fayoren quasi las dos. Ixo arrai, a las 7 ya yere despierto, asinas que pillé es cataticos e marché enta Pineta a fer las primeras luces d'el nuevo anyo. Qurebe cambiar d'enquadre, per no fer el tipico dende el puent, asinas que pensé en la Inglatas. No me faltaba soque trobar un buen primer plan, e este barranquet chelato me venió de perlas. Ixo, e las buenas mans de l'amigo Javier pa fer-me un buen procesato.

  Dimpués ya m'entretenié con el chel una miqueta, antes de tornar ta casa.

Despedindo l'anyo 2014. Feliz anyo nuevo.

Es dos zaguers días de l'anyo 2014 aprofité que no duermo pa fer dos escapatetas rapidas a fer bel·la foto. No tenebe guaire tiempo, asinas que habié d'ir a tiro feto.
El primer día, aprofitando la inversión termica (3'5ºC positivos en Bielsa e -6ºC en Fiscal) fue a veyer una cascada a la que el tiengo ganas con una ola de frío polar. No yera pa tanto, pero contabe que i habría chel, pero como somos de sequera, no n'i heba tanto como m'habría feto goyo. Unaltra vegata habré a tornar-ie, a veyer se trobo el que quiero.

 E el zaguer día de l'anyo, cómo no, puyé ta Pineta, a fer el zaguer amaneixer. Per no repetir enquadre, miré de puyar una miqueta per lo río pa trobar unaltra perspectiva, pero quasi me pilla con es pantalons per es tobillos, e habié de fer-lo dende aquí, encara que no me convence guaire.

Ya que yere en Pineta, fue dica el camín d'es churros de Lalarri, pero no i heba guaire chel.

E hue, como soi de poco dormir, soi tornato ta Pineta unaltra vegata, a fer el primer amaneixer de 2015, pero ixo será unaltra entrata. Que teniatz un buen 2015.