Fornos, unaltra vegata

Dimpués de dos cabos de semana sin poder salir a fer una miqueta de mont, hue de maitins m'ha importato igual que plevés, perque ya no podebe més. Como lleva dos u tres días plevendo sin parar, hebe pensato que es ríos e barrancos normals irían plens d'augua, e que talment fues una buena idea ir ta Fornos a veyer quánta augua baixaba per lo frato e se podebe cruzar el río (feba días que pensabe en ir ta A Fraga, en Revilla, aprofitando que es caixicos son bien chulos con la color amarilla, pero el desestimé perque baixaría muta augua per lo río Yaga). E amés, plevendo como pleveba,el de Fornos ye un camín que puetz fer con lo batiauguas, e he penasto que d'ixa forma no me banyarí guaire. Asinas que enta astí soi ito, e miratz-os que i soi estato buena cosa veces, pero nunca no hebe visto baixar tal cantidat d'augua. Yera espectacular, pero las condicions no yeran las millors, perque no feba soque plever e i heba muta humedat en l'ambient e en el filtro...
Con tot e con ixo, s'ha feto el que s'ha puesto (en esta primera i hai dos gotetas, pero yera quasi imposible evitar que l'augua en polvo que saliba d'O Chorro manchás el polarizador):

Las buenas luces

A ón serán? Perque yo nunca no las veigo quan voi ta la montanyan; me fuyen como se putís :-D
Anteahier unas luces estupendas, marabillosas, con boiras espectaculars. Ahier, que podebe escapar-me un ratet, ciel raso como el uello d'un paixarico. Pero el que la sigue la consigue, e bell día las trobaré.
Torné enta l'Ibón de Plan, la semana pasata nuble preto e esta demasiato raso...

 Estes enquadres son muit pareixitos. No sé quál funciona millor, se queretz deixar la vuestra opinión será bienvenita:

Hibierno

Una vegata que se pasa la deleria de l'agüerro, como debo d'estar una miqueta masoquista, tiengo ganas de pasar frío e prencipiar a fer fotos con nieu.
Ahier de maitins i habió un amaneixer d'ixes espectaculars con boiras de colorins; bai, d'ixes que siempre me pillan en casa mirando-me per la ventana e maldecindo e preguntando-me per qué conyo no es veigo es días que salgo a fer primeras luces. Como la previsión yera la que yera (pocas boiras), pensé que talment de tardes se repetisen ixas luces. Asinas que salié de treballar, me cambié, comié en l'auto e me planté en Saravillo a puyar ta l'Ibón de Plan per lo GR (qué le imos a fer, es pobres no tenemos pa 4x4). Mientres puyabe ya veyebe que no ibe a tener luces: mutas boiras per l'oeste e s'iban zarrando las boiras en el circo. Pero rai, ya que ib'yere...
L'Ibón, per més visto que el tienga e per més fotos que se'n veiga per Internet, m'encanta. Esta vegata decidié que deixaría es trallos en paz (son d'es árbols més fotografiatos d'el mundo, me pienso) e chugarí con las formal d'el chel. El que no sé ye se el he conseguito.

Puent d'as Crabas e Escartín

Feba mutos anyos, talment 9, que no pasiabe per Sobrepuerto, e ixo que ye una zona que m'encanta dende que la descubrié de la man de José María Satué e es suyos libros que miran que no caiga en l'olvido (a lo que ayudó tamién Julio Llamazares con la suya famosisma La lluvia amarilla).
Nunca trobabe el día de tornar-ie dica el sabado pasato,quan un cambio de plans a zaguera hora truncó la ideya inicial e fayó que me decantás per ir ta O Puent d'as Crabas, un puesto que quan me preguntan quáls son es míos lugars favoritos d'el Pirineu, siempre digo entre es primers.
Aquí en tenetz quantas fotos:

 Aquí m'entretenié con estas fuellas de fau:

 E ya que ib'yere, no podebe tornar ta casa sin puyar encara que fues un ratet ta Escartín. Siempre que voi per ixe camín pienso en es pobres zagals quan les decisen "Baixa t'o huerto e puya-te bella col". Pero en arribar ta Escartín se m'imple l'espritu de tristeza. No quiero estar melancolico con es lugars abandonatos, pero me fan muta pena, qué le imos a fer. Pensar en la chent qu ei vivió, que fochó de firme pa fer ixas bordas, ixes paretons, ixas feixas... E que aora sía tot espaldato u quasi. En fin... I fayé mutas fotos, pero con prisas perque no querebe tornar guaire tarde enta casa. Per lo camín fue pillando lans (se n'i hai estianyo, mama mía) pa plantar-los. Un caixico provenient de Sobrepuerto servirá de recordatorio de mi pai.

 Una de l'interior de la ilesia aprofitando que con la camara nueva puedo tirar d'ISO (10000 e sin flash). No cuento que dure guaire, perque i hai una crepa pro gran en la paret dezaga de l'altar.

E pa rematar

Pos ixo, pa rematar este largo puent tant intenso en lo fotografico (gracias, familia) el lunes, per fin con un día d'agüerro (heba plevito la nuet anterior, yera nuble e la temperatura no puyó d'es 12ºC), marché per la carretera d'Anyisclo enta Fanlo e d'astí baixar enta Sarvisé. La carretera d'Anyisclo goso fer-la de nuet quan voi a fer montanya, e l'altro día la disfruté bien, perque yera muit bonita e quasi no pasaba autos (e es que veyé yeran d'el país). M'entretenié més que no pensabe e dimpués per la selva entre Fanlo e Sarvisé (que yera preciosa) no podié fer la idea que llevabe. M'encanta ixa selva, pero siempre me'n torno con la sensación de que no le sé quitar el suco, talment perque sin un tele me pierdo mutas fotos buenas.
Pro de retolica, aquí van las fotos:

Dinamica de fluitos:

 Aora con elementos arquitectonicos:

 Ya per o Chate:

 Per cada vegata més miro de fixar-me en es chicotz detalles:

 Fuellas varatas:

 Refleixos:

Per fin ha arribato la nieu, no cuento que quede cosa de l'agüerropa'l cabo de semana que viene.

Os Vivers d'o Campillón

Ixe ye el nombre que sintié a's d'el país. Dimpués le han meso un nombre més scientifico, pero a yo me fa més goyo el popular. Qué recuerdos quan viengo t'aquí. Fue el mío primer puesto de treballo en el Parque e el disfruté muto.
Pero bueno, que astí fuemos Javier Vecino, Javier Camacho (no tos perdiatz las suyas fotos de l'Himalaya, son impresionants) e un servidor a veyer cómo iba l'agüerro per astí. E como per tot arreu, bell troz bien, atros pelato e atros quasi verdes. pero cal bailar con la que toca, asinas que nos metiemos en fayena. Desgraciatament Javier Camacho habió de marchar luego e nos deixó astí soletz. Quan ya arribaba la hora d'ir marchando baixaban dos fotografos més con es que estiemos charrando. Yo prencipié a fer el descenso río-río, pero a la segunda gorga, no que me trobo un vutre! Despaciet, quito l'angular e meto el 100 macro perque ye el més largo que tiengo (no pensetz mal) e me voi acercando poquet a poquet dica quasi poder tocar-lo, asinas que quito el macro e torno a meter l'angular. E no que m'acometeba eme quereba picar. Debeba llevar pro tiempo astí e teneba buena cosa de fambre el pobre. Avisé a's atros dos fotografos pa que podesen fer-le fotos e puyé per lo camín "normal" (perque no ye mica fácil, abstener-se chent con vertigo) perque ya no me vagaba de baixar río-río. E ya en Escuaín avisé a la guardería d'el Parque. Aquí tenetz quantas fotos.
Os Vivers d'o Campillón:

 Dimensionando:

 Chugando con es refleixos:

 Fuellas e uembras:

 El que se me quereba comer

 Intimidando:

 E un par de casas d'Escuaín:

E ahier, per fin dia d'agüerro de tot, torné a salir, pero ixo ya pa unaltro día.

Anyisclo

Ahier, escurruchando este zaguer cabo de semana d'agüerro-verano, tocó d'ir a fer las primeras luces sobre Treserols (encara que una no se veye dende astí) con el mío amigo Javier Vecino (miratz-os las suyas fotos, ya me faría goyo a yo de fer-las como er). Saliemos a las 4:30 de Bielsa con ixa idea, e encara que ni las luces ni el ciel nos acompanyoren, veyer la dimensión d'Anyisclo dende alto sobreix de belleza que no sé se he sabito llevar-me enta casa.

 Una preciosa capan·na, medio espaldata. Ya podeba mirar de refer-la el Parque.

 Quan tornanos, veyemos la boira enta la Tierra Baixa.

 Penya Montanyesa, a baixo a la dreta, Bestué,

Hue ha tocato unaltro puesto, pero ixe pa unaltro día.

Sequera

Estas fotos cuento que son las zagueras que puedo fer en Pineta de l'agüerro 2014, que ye estato un d'es piors que yo recuerdo per la calor e per la sequera. Ahier d etardes, sin esperar-lo, a la fin podié fer una escapateta rapida de poco més de dos horas ta Pineta, e fue enta'l río Lalarri, a fer el que foi quasi siempre quan no me vaga: puyar como es chabalins e baixar como las personas, per lo camín. Quan ya yere quasi alto en la pista, veyé que gracias a esta sequera, podebe acceder ta un puesto an que no yere estato nunca, una anvista nueva.
Las de siempre. El monolito:

 M'encanta cómo baixa el río per aquí, he quiesto integrar el poco agüerro que i quedaba:

 Unaltro churro:

 El d'el trallo e el d'alto, que per un regular gosa baixar con un paquetazo d'augua:

 Me fayó goyo esta salita d'augua enta es faus:

 E aquí la zaguera antes de la pista, a veyer quán pillo a bel·laún en ixe mirador pa dimensionar:

 E la mesma dende abaixo, t'an que podié arribar perque baixaba muit poco caudal:

Hue soi estato en Plana Canal fendo primeras luces, pero ixo ya el deixo pa unaltro día.