Selva d'Oza (Val d'Echo)

Dende fa mutos anyos soi enamorato de la Val d'Echo. Soi enamorato de la suya montanya e d'el suyo aragonés, lo cheso, que sintié per primer vegata con 9 anyos en la boca d'un golet de Siresa. Hue tiengo la suerte de contar entre las mías amistatz con la una parella de chesos d'es que he aprendito muto aragonés. Dende que tiengo fillos no i voi tan a menuto como me faría goyo, pero quan puedo me i escapo.
Hue s'ha dato una d'ixas circumstancias per las que he puesto ir-ie de visita, encara que rapida. Hebe d'ir ta Chaca  a fer-le una coseta a l'auto e he aprofitato la buena disposición d'un familiar (gracias Santi per lo tiempo e per la vuelta) pa que i acercás a fer-ie bel·la foto. No he quiesto perder guaire tiempo per no fer desesperar a este familiar, pero m'he quedato encantuchato: nunca no ib'yere estato d'agüerro. Un puesto pa tornar con muuuuta tranquilidat, me'l apunto en es debes.

 A yo me fa goyo l'efecto seda, pero reconoixco que i hai vegatas que me paso con el tiempo d'exposición. Con la 6D no i hai problema, subo l'ISO e en foi una a 0'3" e altras con la que quiero. Aquí tenetz un exemplo d'el que digo. Se queretz decir quál preferitz, millor ;-)

Buixaruelo 2014

Dende que fa tres anyos fue per primer vegata ta Buixaruelo (e amés d'agüerro), miro d'ir-ie per cada anyo. Estianyo pensabe que no podrí ir-ie (talment pa yo ya i hai pro agüerro, sniff), pero el martes, aprofitando un ratet que tenebe libre en el troballo, decidié ir-ie. No tenebe soque tres horetas (una pa ir-ie, unaltra d'estar-ie e unaltra pa tornar). Amés m'heba dito una companyera de Torla que el cabo de semana yera espectacular, asinas que no pdoebe per-me-lo. Como tenebe poco rato e no me vagaba de rabosiar per astí, fue ta'l mío puesto fetiche. No hebe quiesto recargar la batería perque sabebe que se no no me'n irí d'astí dica que se fes de nuet, e per ixo me'n fue: ya no podebe fer més fotos he he.
Aquí tos ne deixo una muestra:

Per Anyisclo II

El domingo i torné. Ya perdonaretz la cantidat. En vale la pena d'ir-ie, en qualsequier epoca de l'anyo.

 Autorretrato :-)

Agüerro rar

Ye estando un agüerro rar, pro extranyo. Cuento que será per estas altas temperaturas, que encara no ha chelato e que dende fa una semana no ha caito una gota d'augua. E tamién que no tiengo el tiempo que me faría goyo pa poder salir. Pero sobre tot estoi que ye l¡orache. E ye que a yo no me fa mica goyo de fotografiar l'orache con estes ciels azuls anticiclonicos. Pero ye el que i hai. El sabado puyé un rarto ta Pineta, e me trayé esto.
Primeras luces en el circo:

 Per un inte i habió una estupenda luz calida sobre es fabolars de la man pacina:

 Mutos pasos de diferiencia, bien se vale de la camara nueva e d'el suyo rango dinamico:

 Es faus no yeran como yo querebe:

 Més contraluces, pareix qu em efan goyo es retos:

 Nunca no apareix una persona en el mirador que permita dimensionar, será que i paso muit luego:

 Millor color en este tramo:

 E el mío tusco fetiche :-)

Estianyo no soi conseguindo fotos que me fayan goyo. Talment l'anyo pasato deixé el listón demasiato alto quan se m'apareixió la virchen; quiero decir, l'arco de Sant Chuan. Encara quedan las d'el domingo quan marché ta Anyisclo unaltra vegata. Pa unaltro día.

E Pineta

Pa rematar la serie d'el Puent d'el Pilar, el lunes, que no me vagaba de marchar leixos perque tenebe cosas a fer, me'n puyé un ratet de maitins ta Pineta. I heba un ambient d'agüerro bien buen, e ixo que encara le queda uns días pa meter-se a tope. Sobre tot perque el domingo heba plevito a tot meter, me dició Kike, el guarda d'el Refuchio de Pineta, que uns 120 l/m2 (tampoco no una barbaridat, perque altros anyos ha caito més de 200) e baixaban totas las partez d'el Cul de Pineta con churros per tot arreu. Ixo yera bien pincho, la parte negativa ye que quan baixa augua per ixas canals, el río Lalarri baixa como l'Amazonas, privando de fer fotos perque sale una plafarata blanca sin mica textura.
Bueno, prou d'estraliar:

Efecto Föhn

El domingo amaneixió plevendo con ganas: muta augua e aire fuerte. Prou que no yera día pa fer cosa: ni fotos ni montanya. Pero como veniba de sur decidié de pasar ta l'altro coté a veyer se l'efecto föhn feba de las suyas. Quan salié d'el frato continaba plevendo a tot meter, e el río d'el puerto baixaba como totz es barrancos de la man nuestra: fartos d'augua. Manimentos, de l'esbarre de Piau enta abaixo iba plevendo menos, asinas que qualque cosa se podió fer, encara que mutas fotos se'n son itas ta la papelera perque i heba gotetas d'augua en el filtro. Asinas que una chicota selección de l'agüerro gabacho :-)

  

La mesma, pero con ISO 10000, una marabilla :-)

 

Per Anyisclo

Puent d'el Pilar, sin marchar ta garra cabo, e mirando de trobar l'agüerro estes días. Ahier fue a veyer se ya yera arribato enta Anyisclo. Como totz es anyos, a las 6 e poco salgo de l'aparcamiento de Sant Úrbez, enchego el frontal e entalto. Encara que fa més d'un mes que no camino en condicions, me trobo bien, encara que la bota dreta me fa una miqueta de rozadura en el calcanyo (a quí se le ocurre estrenar botas con ixa puyata? Pos a yo). Mientres puyo, con la escasa luz d'el frontal, es temors de totz es anyos me vienen ta la capeza: será muit luego? será encara verde? Amés, siento el río gramar abaixo perque el viernes no fayó soque plever, e con muta augua las posibilidatz se reducen, e muto.
Quan arribo ta Selva Plana, mato el frontal, ya se i prencipia a veyer. Per suerte, mientres abanzo enta A Ripareta, veigo es faus que van amarilleando; a'l menos no i soi puyato per demés. En O Puent ya veigo que baixa demasiata augua, qué le imos a fer. En ixe tramo de río, an que l'augua gosa baixar azul turquesa, el río baixa gran e no i foi garra foto que mereixca la pena; amés, s'han caito qualques faus que cruzan el cauce e que el fan una miqueta més fiero (siempre seguntes el mío escaso gusto). Foi qualque foto e endrezo enta el Churro d'alto, tampoco no foi garra foto en ixa gorga tant pincha con bolos debaixo. "Qué foi?"m me digo, "Me'n torno ta casa?". Decido de puyar una miqueta més, pos siempre me quedo en ixe puesto e encara ye luego. Veigo que soi perdendo-me mutos puestos perque siempre miro de no tornar guaire tarde ta casa. bell día podré dedicar-le tot el día e disfrutaré més.
A veyer qué tos pareixen, soi trastiando con una versión nueva de Photoshop e no sé cómo me van quedando, se queretz deixar la vuestra opinión, siempre será bienvenita.

 A partir d'aquí la zona que nunca no hebe visto d'agüerro:

E hue soi ito ta la Francia, pero ixo ye unaltra entrata.