Reconoixendo el terreno

Esto maitín no tenebe guaire tiempo pa ir ta la montanya, per tanto hebe de plantiar-me un obchectivo rapido pa poder estar en casa a las 10:30 como muit tarde. la primer idea yera d'ir ta Barrosa a fer las primeras luces sobre Robinyera e L'Almunia, pero quan he salito de casa he visto que esta nuet heba plevito e yera nuble, asinas que soi puyato ta Pineta, dimpués de dos meses din ir-ie, a veyer se i heba suerte con las boiras. Soi puyato per lo camín d'es Churros de Lalarri per se se despasaba e podebe veyer las primeras luces sobre Treserols, e bel·la cosa s'ha puesto fer:

La verdat ye que el río Lalarri ye muit agradeixito en este tramo: 300 metros de desnivel de churro en churro, la color e textura de la roca, tarda en entrar-ie el sol e ye rodiato de faus: immillorable d'agüerro. Asinas que soi ito a reconoixer el terreno que ya va pa un anyo que no pasabe per astí pensando en las fotos que miraré de fer este agüerro, baixando per l'altra man d'el río (atención, no i hai camín e ye perigloso, per ixo no aconsello a dengún que se i clave).
Per cierto, ya se nota cambio en l'ambient, y i hai cambio en el verde d'es perennes, talment s'adebante estianyo. Ya veyeremos.
Qualques cados poco conoixitos d'este río:

 E una piedra a la que tiengo muto carinyo, perque con una foto d'era gané un primer premio de fotografía (600 lereles, que no ye mica mal), a la que i he llevato a una pila de chent. Pa que tos fayatz una idea de cómo ye, yo le calculo uns 5 metros d'altura:

Ibons de Barruda

Seguindo con el costumbre, el martes de nuet marché a fer la mía escapateta en solitario a dormir una nuet en la montanya. No sabebe se pegar enta es Gorgos de Lalarri (u Ibons de L'Almunia) u ta's Ibons de Barruda (Lacs de Barroude), en l'altra man de Barrosa. A la fin me decidié per esta zaguera opción, perque la verdat ye que el puesto ye muit pincho e per es Gorgos de Lalarri hebe pasato recientment quazn puyé ta L'Almunia.
La cosa prometeba, daban una miqueta nuble (siempre va bien bel·la boira pa que el ciel no sía plan), no i heba luna pa poder fer nocturnas con la vía lactia sobre l'ibón, etc., etc. Pos bien, encara que las piernas me pesaban como quintals d'haber puyato el domingo 1900 metros de desnibel, i arribé ta las zagueras luces pero yera nuble de tot, como quasi tota la nuet. Asinas que, de la idea que llevabe, cosa... Unaltra vegata será. Bien se vale que a'l menos tenié buena suerte con las primeras luces, e ixo que quasi no me despierto perque me fotié buena parte de la nuet en vela (per cada anyo me cuesta més de dormir en tierra, e més en ixas tiendas individuals claustrofobicas he he).
Enta Robinyera baixando enta es Ibons:

Que no pareix Islandia?:

El mío hotel de 0 estrelas :-(:

L'amaneixer:

Una panoramica quan tornabe enta casa (punchatz en la foto pa veyer-la completa):

E la curiodidat d'el día: la mía aurea :-D Me resultó curioso perque nunca no hebe visto este fenomeno, seré un santo encara que yo creiga que soi ateu?:

Punta es Verdes

El domingo, despierto dende las 6, no se me ocurrió unaltra cosa que ir-me-ne ta Punta es Verdes, entre la montanya de Revilla e Pineta, dimpués d'haber estato tot el día anterior de fiesta en Chisagüés. No se me fayó tarde, pero uns vinetz comendo e bell pacharán en el guinyote posterior me pasoren factura. Tenebe ixa idea dende feba días, e el plan yera baixar enta el Mallo Gran e per la Man Pacina dica tornar a empalmar con el camín que puya ta Portillo, pero quan arribé en la punta, yere remallato (el vin, bell pacharán e 1900 metros de desnivel positivos me deciba el GPS) e decidié de tornar per lo mesmo camín. Ya i tornaré, quan no haya salito el día anterior, e faré el plan inicial. Tant e mientres, tos deixo bel·la foto testimonial, perque ni me llevé el tripode ni tenebe fuerzas pa pensar guaire en composicions e demés he he, asinas que la unica pretensión ye que tos fayatz una idea de las anvistas que i hai ;-)
 Dende Portillo enta Bielsa:

 Dende Portillo enta Tella e Penya Montanyesa:

 Debaixo de la Punta Blanca enta el Cuezo, Suelsa e Fulsa:

 Dende Punta es Verdes enta Treserols:

 Enta L'Almunia (i estié l'altro día, pero no me funcionó la camara), se i veye tamién la Estiva:

 Enta Castillo Mayor:

 E dende Faixeta Lans (m'encanta este toponimo), el Circo de La Sarra, an que naix el barranco d'Angonés:

E esto ye tot per hue :-)

Río Real

Dimpués de la celebración de las 100.000 visitas (de nuevo mutas gracias a totz), tornamos ta la rutina.
Esto maitín m'he escapato enta Ruego, a veyer el Río Real (que poco ha de veyer con la monarquía, yo el relaciono con RIVALEM < RIVUM, encara qu eme quiero asegurar d'el nombre propio), perque fa días que se me metió en la capeza d'ir-ie a ixolomar e veyer se i heba rincons pinchos. Asinas que he deixato l'auto en la borda Brunet, soi baixato dica el cauce (i hai uns quantos metros) e río-río soi ito puyando, a ratos millor e a ratos pior dica que un tronazil m'ha feto tener que hopar d'astí. Soi arribato ta l'augua como se m'hes clavato en bell medio el río...
Bel·la foto de hue.
Una Parnassius chupita, como he rematato yo:

E bell cado d'el río:

 Aquí ya pleveba a tot meter:

Dica la proxima.

100.000 e pico

Hue el blog ha blincato de las 100.000 vesitas. La verdat ye que ye una cifra gran pa un humilde blog como este, escrito en una chicota luenga e con unas humildes fotos. Quan prencipié a escribir-lo no contabe con que le darí tanta continidat, pero aquí contino seis anyos e pico dimpués con una periodicidat regular e contina, quí me'l iba a decir a yo, pa dar a conoixer con las mías fotos (en ixo, afortunatament, estoi que he evolucionato a millor) la valle de Bielsa e el suyo aragonés. En bel·la ocasión m'han dito qu etendrí més acceptación se escribís en una luenga mayoritaria (espanyol, cuento), pero esta ye la mía chicota aportación a que l'aragonés contine vivo, e especialment la suya variedat belsetana.
No puedo fer altra cosa soque dar-tos las gracias a totz es que pasatz per aquí, ya sía de forma regular, esporadica, ocasional u accidental, asinas como a totz es que hetz ito deixando bell comentario.
E como que no tiengo fotos recients (el domingo pasato puyé ta L'Almunia pero la camara no querió funcionar), en repito las que més goyo m'han feto en el zaguer anyo.

Mutas gracias a totz.

15 d'agosto

Pero como me foi mayor e ahier no salié de nuet encara que son fiestas en Bielsa, de buen maitín a veyer estas preciosidatz:

E ya que ib'yere, me'n he baixato dica el río, a veyer de cerca este churro que siempre hebe visto de leixos:

Una borda:

E tot puyando, he visto esta aranya, que feba una curiosa tararina, con forma de bola:

La rosada (asinas m'he meso, chupito como una chopa, que pareixeba que m'hebe fotito a'l río):

Vacacions a 0 metros slm.

Soi estato uns días de vacacions. Quasi sin fer fotos de naturaleza (d'es fillos e urbana sí, pero no me veigo yo en ixas especialidatz).
Aquí una d'un atardeixer en Portugal, improvisando, perqu em'esperaban a cenar e no conoixebe el puesto:

E bien se vale que a la fin podié quitar-me la espineta en Barrika (Bizkaia, Euskadi) gracias a'l mío amigo Joseba, qui me i llevó, me prestó la suya camara, me deixó filtros e me dio buens consellos, perque este no ye el mío medio :-) Mila esker, Joseba.
Barrika ye espectacular, hebe visto cientos de fotos d'esta placha, pero con tot e con ixo no te puetz resistir a ixas línias.
Una larga exposición, con dominat fría. Mientres febe estas fotos s'encertó a pasar per astí un fotografo de Laluenga, creigo qu eyera, e i estiemos charrando una miqueta:

 Ixe flysch curvato ye d'es més fotografiatos d'el mundo, e no m'extranya mica:

 Deixando el puesto d'antes a unaltro fotografo, e ixo que ixe día i yenos pocos. Aora con temperatura de color calida:

 E més fría, a veyer quál tos fa més goyo:

E ixo ye tot, no cuento qu etorne a veyer la mar dica dentro d'un anyo... Aora a fer montanya, que ya toca mover el cul :-D

Faixa d'as flors (II)

El chueves, veyendo que l'orache pa hue yera malismo, como en efecto ye, e que el viernes podebe escapar un rato perque de mediodía daban tronatas. Como no sabebe ta ón ir (me pilló con es calzons per es tubillos), m'acordé de que hebe visto en el blog santialpino que heban feto la Faixa d'as Flors, en Ordesa, e encara que la hebe feta fa dos anyos, tenebe ganas de repetir-la pa veyer flor de nieu, perque l'altra vegata la fayé en septiembre en quedaba biena pocas e ixutas.
Conque a las 6 yere en Torla pa poder pasar es fierros de Cotatuero antes que tronás. Chustó me fue, fue prencipiar a baixar la canal con fierro, prencipiar a sacr-me l'arnés e sentir el primer truen. Cara abaixo a totavitesa, bien se vale que no'n cayó soque quatre gotas.
Puyé per Carriata e baixé per Cotatuero, yera tot plen de flors: lirios, siemprevivas, aster alpinus, arnica (no sé se la verdadera u la falsa), flor de nieu, el brizón amarillo, etc. E de fauna i veyé chizarces (pocos, no pas tantos como se'n veyeba habe tres u quatre anyos), marmotas, grallas e, el que més goyo me fayó de tot, dos gorrions alpinos.
Como siempre, tos deixo qualques fotos.
Puyando enta Carriata, el Tozal d'o Mallo:

 Anvista enta Tendenyera e val d'Otal:

 Mosquito sobre arnica:

 Vista enta la parte superior de Cotatuero dende A Faixa:

 Ya qu eib'yere, hebe de fer bel·la foto a las flors de nieu, encara que en he visto més en altras zonas de la montanya de Bielsa:

  

 E el barranco que dimpués caye per lo Churro de Cotatuero:

 

Unaltra:

 

E ya habié de baixar a tota vitesa...