Impresionant

Yo tiengo una lista de puestos que, personalment, me fan muto goyo d'el Pirineu. A partir d'el domingo he d'anyadir-ne un més. Ye un puesto an que te sientes chiquinín, d'una belleza excepcional, e ixo que m'he recorrito quasi tot el que se vei.
I estiemos buena cosa d'horas dica que la luz s'uniformás, perque i heba mutos pasos de luz de diferiencia entre las zonas en sol e las zonas de brempa, pero, con tot e con ixo, m'estié buena cosa de ratos solo mirando, admirando la grandeza e la belleza d'estas monyanyas.
Una pena que las fotos no fayan chusticia a la inmensidat que se i veye
Amaneix, se veye una miqueta de royo en el Pico Anisclo:

 Enta abaixo:

 Enta Treserols, mecago en es avions:

 Forcallo:

 Inmensidat:

 De retirata enta l'auto, Comodoto:

 Comodoto e Sestrals:

Punchatz dencima de las fotos pa veyer-las sobre fondo negro.
En tiengo mutas, pero que mutas, més, e no sé se he acertato con la triga...

Ibons de Mener

No adubo, e bien se vale que ye perque no paro. E, como conseqüencia, se me van chuntando fotos e més fotos e no me vaga d'ir revelando-las. E ye que el cabo de semana ye estato plen d'actividatz (qué goyo que me fa de poder decir esto).
El viernes de tardes, con la desincusa d'ir a minchar martuels e chordons, me llevé a'l fillo ta un puesto an que i hai Parnassius apolo, e mientres miranos ixes lamins (a's míos fillos les encantan) tamién inos mirando esparveras, veyemos una culebra, limacos, cucos... Ixas cosas que les fan goyo a's críos. E bueno, encara qu eye difícil de fer fotos perqu ehe d'estar con un uello per lo visor e l'altro cosirando-lo, podié fer bel·la esparvera:

E el sabado marché enta es Ibons, u ibonetz, de Mener, per Tringonier. Un par de fotos d'el Marcatiecho:

Ya que ib'yere, e per ir recuperando la forma, decidié de puyar per la cresta que da vista enta Urdiceto (e me´s puestos: Treserols, Penya Montanyesa, L'Almunia, Rubinyera, Posets, Neouvielle...) e arribar en la Punta Mener, que ye muit discreta pero que tiene muit buena anvista. Miré de fer una panoramica de 360º, pero el sol ya yera alto e no me fa goyo el resultato:

Aquí enta Fulsa, sale cosas raras de flares e altras cosas, asinas que ye documental:

E enta es Ibons e el pico L'Ibonet t'an que puyé l'anyo pasato:

Dende astí baixé per la lera ta's Ibons, el d'alto:

e el d'abaixo:

e ya ta Bielsa, a prener el vermut.
Aquí tos deixo el track (no sale parte de la baixata, en total son 18 km.), se bel·laún s'anima a fer-lo dos cosas: millor pillar la cresta dende el collau que da ta Urdiceto, yo el decidié tarde e puyé per una canal, quan ye muto més comoda l'altra opción. E se la fetz e i trobatz una pera d'aire que uso pa limpiar las lents de la camara, me la tornatz, que se me quedó en bell picacho d'ixes :-D


E el domingo un amigo me llevó ta un puesto que me deixó con la boca ubierta, e que ya ye admeso en la mía lista de lugars imprescindibles d'el Pirienu. Pero ixo será unaltra entrata perque el mereix.

Epipactis palustris

Ya feba días que tenebe ganas d'ir a veyer las epipactis palustris, pero per unas cosas u altras no he puesto ir-ie. Hue, dimpués d'un tronacil que ha caito sobre las 11, soi puyato ta'l puesto an que salen. Son bien bonicas, pero tienen un problema: creixen en un prato an que i hai una colonia de fornigas mincha-fotografos, tipo repetens; per ixo las mías visitas son breus, perque per cada vegata que m'acuerdo d'es muesos que me foten se me meten es pels dretos. E quan m'he visto una pernera d'el pantalón plena de repetens, e decidito que yera la hora de hopar d'astí, asinas que secutita pa sacar-me-las de dencima sin guaires muesos (bel·laún m'he llevato per es brazos) e aquí tos amuestro un par de las poquetas que he feto.

A pars

Dos fotos de dos lilium diferents, a qual més guapo. Tienen bel·la semaneta de diferiencia e en la primera consiguié una foto més limpia, pero es martagons m'encantan, a pesar d'es defectos, qué le imos a fer...
Pirenaicum:

Martagón:

El Cau

La idea inicial yera puyar ta Fulsa dende Ordiceto e tornar ta Bielsa per lo camín d'el Cau. Quan asomé el morro per la cresta quasi m'espalda l'aire. Sabendo que ye un terreno mal, la millor decisión fue de no puyar-ie -ya i habrá més oportunidatz- e marchar cara abaixo.
Una panoramica de l'ibón d'el Cau. No ye la millor hora ni la millor anvista, pero ya que ib'yere...
Tos aconsello punchar dencima de la foto pa veyer-la completa.

Floretas d'el Pirineu

Qué goyo fa de pasiar per la montanya e veyer-lo tot verde e plen de flors. Ya faré montanya quan no quede flors, perque el macro no puede parar quieto.
Ahier de tardes, sin caminar guaire, fue a veyer el martagón.
Aquí con una zygaena que querió salir en la foto:

Sin bicho:

Una siempreviva, chugando con es desenfoques d'el 2'8:

 Encara nos trobemos con dos Lilium pirenaicum medio sanos:

E una orquidia que no conoixebe, Coeloglossus viride. Bien se vale que la enciclopedia con patas e barba que m'acompanyaba la conoixeba. La cuqueta s'ofreixió amablement a posar pa yo:

E ixo ye tot per aora, caldrá fer-les una visita a las palustris bell rato.

Moonrise

Ahier de tardes, veyendo salir la luna dende El Cuezo. Dimpués ta casa. Pareixco nuevo, ni forro ni comida, e tenebe una fambre que la veyebe correr he he.
Ibe a recortar per debaixo, pero si tos miratz bien, se i veye una cuqueta de luz (e no ye un hotpixel, que veyebe ixe punto verde sin mirar per lo visor).

Macreando

Ahier domingo la mía intención yera de puyar ta l'Ibón d'el Cau, que siempre he visto dende las alturas pero no i soi estato nunca. Pero como esto de recuperar la forma me lelvará uns días e la tarde-nuet d'antes hebe estato de fiesta en Ixabierre, por quan me desperté no tenebe guaires f¡ganas de foter-me ixe sobo. Asinas que marché con el macro a veyer cómo va la eclosión de las Parnassius apolo e de paso enredar con el macro. No'n veyé guaires e amés feba aire, asinas que las fotos no son d'el millor. Ya i habrá més e millors oprtunidatz.
La unica a la que podié fotografiar una miqueta bien:

Un barranco per an que he pasato mutas vegatras e nunca no le heeb feto una foto:

Chugando con el B&W:

Les toca el turno a las flors de nieu:

Orchis ustulata:

E ya, indo a veyer cómo iban es martagons (les falta una miqueta), con un solazo d'el copón, l'ababol amarillo (Meconopsis cambrica):

A veyer se se para l'aire e se puede fer macros en condicions.

PARADISUS

Dimpués de quatre meses sin mover quasi el cul, per fin el sabado podié fer montanya, una miqueta de verdat, con quasi 1000 metros de desnivel, pa ir desenrobinando-me e ir pillando forma pa poder recuperar ixe costumbre tant rar que tiengo de puyar montanyas con mutos kg. de material fotografico en las costiellas. E qué millor forma de celebrar-lo que en un puesto an que poder combinar fotografía macro (millons de flors) con paisache. Un autentico paraíso floral con buenas anvistas enta una de las valles més bonicas d'el Pirineu.
Drylas octopetala encara en flor:

 Nigritella:

 Leontopodium alpinum:

 Una esparvereta:

 Un alto en el camín pa almorzar:

 Una de las litz, encara queda nieu, asinas que paratz cuenta e llevatz grampons e picoleta se itz a puyar t'alto:

 Enta abaixo:

Pos ixo,a veyer se el cabo de semana que viene torno a salir, que el cuerpo ya me'l pide.