Buen cabo de semana

En l'aspecto fotografico ye estato este un buen cabo de semana. Dos días salindo a fer fotos e tornando ta casa con la tarcheta plena de píxels d'agüerro.
Ahier de maitins me'n fue ta Pineta, mirando de trobar nuevos enquadres de l'archiconoixito barranco de Lalarri. Una pena que baixaba muta augua, pero i tornaré. El día salió nuble, pero s'iba despasando enta part de l'este e i habió un ratet (uns 5 minutos, u una miqueta menos) que salió el sol, las boiras fayoren de reflector e se metió una luz roya que feba goyo de veyer-la.
En esta foto se puede veyer ixa luz roya:

 

Aquí el famoso trallo,  dende unaltra perspectiva:

 

La Engrota, preciosa:

E esto maitín soi marchato enta Buixaruelo, e encara que no son las colors tant saturatas como estes dos anyos ta zaga, nunca no defrauda.

El barranco d'Os Gabietos:

Pa que dimpués charren de l'Urederra:

E el puesto que més goyo me fa de Buixaruelo (a falta de conoixer la parte alta):

E en Pineta tamién ye agüerro

Encara no ye a tope, pero en una semana cal veyer el cambio que ha fotito. Aprofitando que hue entrabe tarde a troballar e yera nuble, no m'he puesto resistir e soi puyato a veyer cómo iba l'agüerro per es churros de Lalarri, pero como siempre a las quatre suelas. Una pena.
En fin, aora  a esperar el cabo de semana, que pinta bien perque dan augua tota esta semana.
El d'alto, que tiene tota la chent que ha pasato per ixe puent:

 

 Una miqueta més t'abaixo:

 M'encanta ixe puesto:

 Ya abaixo, enta la valle:

 E una fatera, una extracción de la segunda foto:

Me fan més goyo las de l'altro día d'Anyisclo, pero entre semana el tiengo bien complicato :-(

Que sí, que sí, que ya ye aquí

Per cada anyo viene més tarde (per mutos puestos encara ye asomando la pateta), pero esta semana, veyendo que es fabolars de la Penya Montanyesa ya iban pillando color, pensé en acudir t'Anyisclo, que se fa u no fa ye a la misma altitut, e tenedo en cuenta la inversión termica talment tenés suerte. Asinas que, como siempre, aprofitando que me despierto antes de que metan las carreras, a las 6 d'el maitín ya yere en l'aparcamiento de Sant Úrbez. Quan arribé t'aquí encara no se i veyeba e no sabebe de qué color serían es faus. Mientres s'iba fendo la luz, la mía cara se plenaba d'una sonrisa de fato, perque ya hebe trobato l'agüerro. la pena ye que, como siempre, tenebe prisa per tornar ta casa e no podié cremar las tarchetas como habrí quiesto.
Sé que no deberí meter tantas fotos, pero como ye la primer sesión, no me puedo resistir.

Primers simptomas

El martes, encara que no daban augua, salió plevendo tot el maitín. Ya quan baixabe a treballar, veyé ixa boireta en la presa de la Enfortunada e ixes albars con una miqueta de color. Ya lamenté no llevar la camara de fotos, encara que no ibe vestito ni calzato pa baixar a fer la foto. Quan puyabe veyé que continaba, asinas que aprofitando que de tardes hebe a ir t'A Espunya, comié a tota vitesa, me cambié, pillé l'equipo e fue a fer bel·la foto èr astí. Me pueden més las ganas d'agüerro que el que n'i hai (e la verdat ye que estianyo ye venindo bien tarde), pero puyé ta La Comuna a veyer cómo iban es chopos (fotografos de naturaleza, astí tenetz un buen puesto pa fer fotos de paisache humanizato) e encara que i heba una brinquerrina de color, faltaba una miqueta.

Dimpués, ya de baixata, perdié una miqueta de tiempo per la presa de La Enfortunada, antes que salís el sol e se perdés tota la machia d'el día nuble. Ixo sí, arribé ta la reunión que tenebe con bardo dica es chenullos.

Río Lalarri

Encara que ya sé qu ea l'agüerro le falta encara uns días, esto maitín no m'he puesto aguantar e como m'he despierto luego me'n soi puyato enta Pineta, a veyer cómo iba. Ye evident que encara le falta, e per ixo m'he entretenito con el río Lalarri, que no se filtra e fa uns churros bien pinchos e elegants. He mirato de trobar enquadres ineditos, encara que per falta de tiempo he habito de tornar ta casa luego sin ixulufrar e tafaniar tot el que yo querebe. I tornaré, a'l menos abuscar novedatz.

Cuello Viceto

Habe mutos anyos treballé en el sector de Tella-Escuaín, pero nunca no hebe puyato ta Cuello Viceto. Hue, un de tantos días en es zaguers meses en que ubro un uello e no puedo tornar a dormir-me, he pensato que yera un buen día pa ir a veyer amaneixer dende astí e asians cremar las pocas toxinas de la feria ganadera d'ahier (tenebe previsto salir hue ta la montanya e no me querié pasar). Asinas que a las 4.15 (ya llevabe una hora despierto) he pillato es trastes e enta Escuaín que soi marchato. Ya m'ha salito un chabalín en la carretera, en Cabianzuelo, pero ye que dimpués, a la fin de la pista d'A Valle, pareixebe un can de caza: notabe la pudor d'el chabalín e decamín saliban a las quatre suelas ronyando. Me han fotito uns espantos qu epa qué. El caso ye que a las 7:30 ya yere en Cuello Viceto, una hora antes de las luces que yo querebe e m'ha tocato de pasar frío, asinas que per astí yere correndo a ratos como un fato pa dentrar en calor (nota: ficar es guants e el gorro en la mochila YA) dica que a las 8:30 ha prencipiato a royiar la Punta Treserols, dimpués el pico Anyisclo e a la fin Las Solas. He estato fendo fotos un buen rato e, per no baixar per lo mismo camín, he decidito de tirar cerro-cerro dica Cuello Ratón pa tornar enta Escuaín.
Mama mía se n'he visto de trencauesos: adultos, subadultos, chovens... per totz es puestos. Pero, sobre tot, i heba un vacumen d'impresión e an que i hai tantas vacas, pos encara més plafaratas. Ye una cursa muit pincha, pero no i vayatz a estrenar botas nuevas perque las plenaretz de fiemo.
Prou d'estroliquiar.
Priemras luces sobre Treserols (encara que no se i veye el Cilindro de Marmorés) :

 Enta la valle d'el Yaga (Tella e Puertolás), con una luz preciosa sobre Castillo Mayor:

 Dende un d'es tozals, Anyisclo a's pietz:

 A valle e en l'altra ladera el Circo de Currundué, t'an que caldrá tornar bell día d'estes:

 Uns caballos con el Mondoto dezaga:

 E ya un par de barrangos que baixan a'l canto de la carretera d'Escuaín:

Aquí la cursa e el mapa:

Plever e plever

Ahier se fotió tot el maitín plevendo a tot meter, como se no hes plevito nunca. DE tardes me'n fue ta Espierba con la filla a replegar fuellas e frutos de l'agüerro, que es emplega pa'l cole. Contabe conque s'habrío feto esta basa en bell medio d'el Plan, e fa tiempo que persigo una foto como esta, pero con l'agüerro abanzato e nieu en las puntas. Pero siempre, per una cosa u altra, se m'escapa.
A veyer se ye l'anticipo e la consigo estianyo.