Parnassius apollo e altras pasavelas

Esta tarde he sacato un ratet pa poder escapar-me e tenebe clar qué querebe fer: ir a mirar la Parnassius apollo, una preciosidat con alas. E més perque tiengo un amigo que ye un cabrón  que m'heba dito que ya la heba vista e m'ha ninviato bell par de fotos. Asinas que soi ito t'an que voi a visitar-las dende fa ya bell anyo e ya las he vistas esvolustriando, perque se deixan veyer ya que son grans como eras solas, mismo sientes el ruido que fan quan te pasan volando a'l canto. Pos ixo, que ibe a investigar e ya he visto Inachis io e Papilio machaon, pero no he puesto fer-les fotos bien (las que les hebe feto las he borratas perque saliban movitas), pero quan ha baixato una miqueta el sol ya he puesto prencipiar a treballar con eras.
N'i heba de mutas especies, como estas que tos presiento.
Una Lycaenidae, pero a saber de qué especie perque n'i hai mutas, pareix la Lysandra hispana, pero no tiengo ni ideya:

Esta estoi que ye una pasavela d'el liroler u Aporia crataegi:

Esta ni ideya, pareix de la familia Nymphalidae, pero no m'atribo a identificar-la:

E per fin la protagonista, la polida Parnassius apollo:

E aquí ya fendo prebatinas antes de marchar, con un contraluz extremo:

Habré a ir-ie de buen maitín antes que levanten el vuelo, a veyer este cabo de semana.
P. S. Traduzco aquí el que diz d'esta pasavela la wikipedia, per se fa honra a bel·laún:
L'apollo (Parnassius apollo) ye una especie de lepidopteroditrisio de la familia Papilionidae propia d'es macizos montanyosos de las zonas templatas e frías d'Eurasia, incluita la Peninsula Iberica.
Descripción:
Ye una pasavela relativament gran, que puede alcanzar una envergadura d'uns 8 cm. Ye inmediatament reconoixible per la color predominantment blanca de las suyas alas, de textura apergaminata e translucidas (hialinas) en las suyas partes marguinals, an que careixen d'escamas. L'ala anterior lleva una serie de grans manchas negras e l'ala posterior poseye dos grans ocelos royos con nuclio blanco e cercatos per un aniello negro. La forma e color d'ixes ocelos varian enormement d'una población t'altra.
El cuco ye negro de tot, con filas de manchas amarillas u anaranchatas a cada man, e poseye chicotz pels negros que naixen de chicotas vorrucas. Puede arribar a medir uns 5 cm.
Ária de distribución.
L'aria de distribución d'esta especie ye amplisma e cubreix practicament totas las zonas templatas e frías d'Eurasia. Se trata, manimenos, d'un ária muit dischunta, habendo-se descrito numerosismas subespecies e variedatz en es diferents sistemas montanyosos an que viven las suyas poblacions. Presienta, en a-saber-los puestos, un caracter relicto, debendo-se la suya presencia a's grans movimientos faunisticos inducitos per las glaciacions quaternarias. De confirmar-se las previsions d'es expertos en relación a'l calentamiento global  observatas estas zagueras decadas, mutas d'ixas poblacions relictas podrían desapareixer definitivament d'es macizos més meridionals en un futur no guaire leixano, de vez que vayan desapareixendo es habitats que precisa pa vivir (colonizatos per una vechetación muto més densa e zarrata). El numero de subespecies ye mayor en las partes meridionals de la suya aria de repartición, an que es procesos d'espaciación no se veyoren interrumpitos per las glaciacions. Se'n ha descrito, asinas, 22 subespecies en la Peninsula Iberica, estando las poblacions de Sierra Nevada las més clarament diferenciatas de las demés poblacions (presientan la particularitat de tener es ocelos de l'ala posterior de color amarilla-anaranchata en vez de roya).
Habitat.
L'apolo precisa, pa poder completar el suyo ciclo vital, de zonas ubiertas, con una vechetación predominantment herbacia, an que creixcan las suyas plantas nutricias de las que s'alimentan las larvas. En entornos naturals, ixas condicions son esencialment espratos de montanya, salpicatos de zonas pedregosas, an que abundan ixas plantas. la ganadería ha propiciato que se fesen ixas zonas con ixas caracteristicas a altitudes inferiors, pero l'abandono d'ixas practicas ha conducito, manimenos, a la desapareixión de la especie en mutas d'ixas zonas, recolonizatas per una vechetación més densa e zarrata. Ixa ye, amés de l'uso indiscriminato d'insecticidas en qualques puestos, la explicación més probable de la suya desapareixión  u rarefacción en macizos de mediana altura, como en es Volgos (Francia), an que s'amortó la subespecie que i viviba.
Ciclo vital.
A'l vivir esta pasavela en es ecosistemas més elevatos d'es macizos montanyosos,  no s'observa soque una unica cheneración que vuela de chunio ta agosto, coincidindo con el curto periodo vechetativo d'ixas zonas. Pasa l'hibierno como larva, protechita en el uevo, d'an que sale en arribar la primavera.Se fa la crisalida en mayo-chunio, podendo durar de 10 días a quantas semanas el proceso de metamorfosis.
Plantas nutricias.
Es cucos s'alimentan de diferents especies de crasulacias, més que més d'es cheneros Sedum e Sempervivum.

Per fin el martagón II

Per un regular, se salgo es sabados ta'l monte no goso ir-ie es domingos. pero dende el miércols me rondaba per la capeza una mata de martagón que veyemos e que yera pa ubrir-se. E como no me la sacabe de la capeza, hue soi ito a veyer-la como plan B. Perque el plan A yera ir a veyer se ya i heba actividat de la Parnassius apollo. Asinas que a las 6 soi salito de casa, soi ito t'an que las goso fotografiar pero no'n he visto ni una; la mayoría salen d'agosto, pero estianyo como es ciclos de la naturaleza no i hai qui es entienda, ibe a prebar suerte.
E como no i ha habito suerte (ya i tornaré més entadebant) m'he lanzato a per lo plan B. A las 7:15 yere en Pineta, pero antes he parato en el Plan perque i heba unas luces muit buenas. Pero entre que he aparcato, soi ito, he sacato el tripode, he meso l'angular, etc., las luces ya no yeran las mismas :-(

Ya en Pineta he trobato la mata de martagón, e dimpués de fer las fotos canonicas de la flor, he prencipiato a fer-ne altras. Per un regular yo fotografío las flors como se isen ta una guía de flors con una miqueta d'acercamiento, el que fa quasi tot el mundo; pero i hai vegatas que veigo "altras fotos" que se'n van de representar la flro e foi abstraccions. Curiosament, en Pere Soler en charra d'esto en el suyo blog e han coincidito las mías prebatinas con la suya reflexión.
 Aquí las tipicas:

 Las no tant tipicas, chugando con claus altas e desenfoques:

El que ya no ye coincidencia con Pere Soler, seno inspiración u plachio, ye esta foto de martagón, er sabe per qué:

Ibons d'el Sen

Esto maitín m'han llevato ta's Ibons d'el Sen, en la val de Chistau (he de reconoixer, e me'n pena, que la conoixco poco). La verdat ye que mereix la pena, e més se te fas la mitat d'el camín en auto e te sacas la mitat d'el desnivel. El puesto yera muit pincho e vale la pena d'ir-ie. Pero entre que llevo tota la semana dormindo poquismo e mal, feba muto aire e las luces no yeran buenas, ye estato un d'ixes días que sabes que per més que t'esfuerces no vas a fer garra foto decent. Asinas que no m'he esforzato guaire :-)
Pos ixo, que ye bien majo encara que las fotos o fayan chusticia a'l lugar.
Un trallo en un churro puyando:

 El segundo Ibón d'el Sen (la verdat ye que he de consultar es mapas, talment tienga un altro nombre):

 L'Ibón d'el Sen, u a'l menos bell cacho:

 El primer basetón qu ete trobas puyando, encara que yo el he fotografiato de baixata, con el macizo de Cotiella a'l fundo:

 E una Inachis io que hemos trobato en uns pratos arribando ya ta l'auto. Estoi que ye la primer vegata que la veigo, e ye preciosa, encara que no yera ni la hora buena (la una e quarto) e bufaba muto aire:

.

Per fin el martagón

Ahier de tardes per fin podié fer una foto a'l martagón. El sabado me'n fue ta la montanya e veyé mutas matas encara sin ubrir (manimenos a la Val de Chistau m'han dito que ya se son pasatos). Las condicions yeran malas, poqueta luz e aire, pero dimpués que llevabe semanas mirando-lo per astí, pa una flor que me trobo no la podebe deixar pasar. Més tarde, ya baixando, me'n salié d'el camín e me trobé una mata que yera pa ubrir-se, a veyer se la sé trobar quan i torne perque ixa sí que promete.
Un guardafuents, con una apertura de 2'8 pa sacar-lo desenfocato:

Una anvista enta abaixo, con las boiras que descargarían de nuet:

E el martagón. Sé que la foto ye mala, pero prometo que miraré de trayer millor material quan i torne:

La esencia de Pineta

De cabo ta quan, Pineta regala un ciel espectacular, como el de ahier de tardes dimpués de la tronata que cayó. No podebe creyer el que veyeban es míos uellos.

Lilium martagon frustrato e Epipactis palustris

De buen maitín he emprendito enta Pineta a veyer se ya yera en flor el Lilium martagon, pero no sé qué les pasa estianyo que encara no han floreixito, e llevan ya una semana igual, que no van entadebant. Amés, la mata que fotografiabe totz es anyos ya no i ye, e la hebe vista, asinas que cuento que bel·laún se la habrá llevata.
Las condicions yeran regulars: ahier plevió e i heba gotetas pero bufaba una miqueta d'aire, que pa flora flore (un buen chuego de parolas en aragonés he he). Con tot e con ixo m'he pasato a veyer el Lilium pirenaicum, que ya ye quasi tot pasato e m'he entretenito con altras flors antes d'ir enta la Epipactis palustris a que se me minchasen es repetels, la puta que es va parir qué mala folla tienen e como fizan es putos bichos. E ye que en el puesto an que creixen i hai una densidat de población de repetels, chibosos e tabans como de chinos en Pekín, u més.
Un Lilium pirenaicum una miqueta pocho ya:

Aquí integrato en el paisache :

Un Anthericum lliago:

Un Iris latifolia, que son comenzando a ubrir-se pero que no me dicen cosa perque n'i hai mutos:

Gymnadenia conopsea:

E la protagonista d'el día a falta d'el martagón e con permiso d'es repetels, la Epipactis palustris:  

Me'n soi ito quan unas 500 fornigas puyaban per una pata d'el tripode, 50 per la mía garra e unas 3000 conspiraban pa furtar-me la mochila. E ye que quan yere chicot me marcó la peli ixa de La marabunta (mismo tenié pesadillas) e es suyos muesos me fan bailar la polka.

Phyteuma orbiculare e més

Ahier de tardes tenié una horeta pa escapar-me e me'n puyé enta La Fuent B...., a veyer cómo iban las Epipactis palustris. Como el suyo nombre indica, creixen en una paúl (no existe ya el termino en luenga viva, prou que en toponimia) an que i hai chibosos, que ye el nombre que reciben es mosquitos que t'enclavillan (asinas voi), tabans, repetels e altros bichos que se deleitan e fartan con la mía sangre e epidermis. Les falta muit poquet pa salir, bell par de días (el sabado i tornaré con repelent) pero ya que ibi'ere m'entretenié con la numerosa flora que i hai. La verdat ye que el mont ye aora que fa goyo, perque con la caloreta d'estes días i hai multitud de flors e ye tot verde que rabia.
Las primeras, que me pareixen muit fotochenicas, son las Phyteuma orbiculare, de la familia de las campanulacias encara que no'n pareixcan:

Ixa paúl ye plena de Dactyloriza majalis, bel·launa con proteinas d'orichen animal:

E una Digitalis lutea con el río como fundo:

Prou que n'i heba mutas més (ya i hai tuera floreixita), pero hebe de tornar ta casa e no me vagó de fer guaires cosas.

Liliaceas

Hue tocaba Lilium pyrenaicum. E ye que chunto con las orquídias, pa yo son de las flors més agradeixitas pa fotografiar, encara que te fan trencar-te la capeza con la profundidat de campo.
Contabe que ya serían quasi totz en flor e asinas yera. No'n he trobato garra con el que podés fer una buena compo, amés fa días que no pleve e la millor vegata que es he vistos fue dimpués d'una tronata, plens de gotetas d'augua. Con tot e con ixo caleba aprofitar que m'hebe despierto a las 6 e i hebe puyato.

Aquí ya se me'n ha ito la capeza mirando de fer contraluces e zarrando diafragma pa quitar el sol estrelato, prebatinas que fa un per cambiar una miqueta l'estilo de fer fotos. Una cheneral, mostrando l'ambient:

E una de detalle (estoi que caldría que limpiás el polarizador d'el macro):

Ya baixando m'he trobato (bueno, he de reconoixer que la ibe mirando) la Paradisea liliastrum, que seguntes una guía que tiengo, ye rara, pero a'l menos en Pineta n'i hai prous.

E ya arribando ta l'auto, una Pyrola minor (n'i hai prous en un pinar pacín a'l canto de Bielsa) con una aranya:

La semana que viene le tocará el turno a'l Martagón. Salut.

No me vaga

Llevo dos semanas que no me vaga de fer quasi cosa. Fa dos cabos de semana ta la ciudat, el pasato ta la Valle Tena pero sin poder ir ta ixa montanya tant chula que i tienen. Bien se m'ha valito que la semana pasata podié escapar-me tres ratetz, pero deprisa e correndo e mirando-me la hora.
El primer e el zaguer día a veyer cómo iban es Lilium pyrenaicum; el primer yeran zarratos e el tercer solo n'i heba quatre floreixitos. Pocas opcions tenebe, pero m'habié a adaptar a las circumstancias:

Dimpués trobé esta flor que no sé quál ye:

E més t'abaixo una cephalantera con bicho:

E el segundo día puyar un ratet ta Barrosa, pero sin fer guaires fotos perque la luz yera muit dura. Ixo sí, yera precioso, con augua per tot:

A veyer este cabo de semana se puedo plantiar-me-lo millor. Salut.