Tornarán las auguas ta'l suyo cauce

Ahier de tardes teniemos suerte que se'n deixó de plever, e encara que esta nuet ha plevito (a'l menos a las 3:30 quan el borche m'ha pedito augua, me cago en su pai) pareix que es ríos ya no medran més. Las auguas tornarán ta'l suyo cauce, pero quan baixen. El Cinca pasa aora per bell medio d'el Plan (ixes pratos tant grans que i hai puyando enta Pineta dimpués de pasar la presa) e en Pineta i hai churros d'augua per tot, ye precioso, pero el barranco Lalarri ye imposible de fotografiar, amés de que baixa marrón, sale una polvina d'augua que te ducha.
Animo a's benasquesos e a's aranesos, que recuperen la normalidat quanto antes.
El Cinca ahier per lo Plan:

E Pineta de maitins:

Fan miedo

Sin que haya feto tanto el bruto como per la Vall de Benás u per la Vall d'Arán, la verdat ye que es ríos fan miedo.
Ya baixaban de mayenco estes días ta zaga per la calor, pero aora s'ha chuntato el mayenco (a metat de chunio!!) con la plevia, e de verdat que es dos ríos que pasan per Bielsa, Barrosa e Cinca, fan miedo. E amés no se'n deixa de plever.
Hue soi baixato dica las Devotas, e soi puyato parando en bells puntos a fer fotos. Las fotos son de recuerdo, que no i heba condicions pa mirar de fer-las como cal :-)
En las Devotas, no le faltaba guaire a'l río pa entrar per lo tunel viello, se contina plevendo asinas talment esta tarde ya i pase:

El puent que i hai en Sant Marzal. A veyer quí ye el pincho que s'atrive a pasar-ie. No se veye guaire perque el tapa una rama, pero en un pilar ya brincaba l'augua per dencima d'el puent:

El puent de Salinas, an que s'esbarra la carretera enta la Vall de Chistau:

Es puents que se llevó el río en l'anyo 82, quan Bielsa se quedó incomunicata menos con Francia:

E el Barrosa en Bielsa. Se me vaga esta tarde puyaré un ratet ta Pineta a veyer cómo ye la cosa per astí, perque m'han dito que el Refugio el han tenito que desaloxar:

 

Mientres puyabe las fotos ha prencipiato a tronar, cuento que esta tarde pleverá més recio.

Torna la burra ta'l trigo

E ye que no me sé resistir e i torno e torno a tornar-ie, perque m'encantan estas floretas. Pero tamién n'i hai tiempo, encara que no guaire, pa fer-ne bel·launa més, como estas orquidias d'el viernes de tardes, mientres en la plaza de Bielsa feban jotas (que a yo no me fan brenca goyo e fuigo d'eras), me'n puyé a la entrata de Pineta e astí m'entretenié fendo bell paisache con flors a contraluz:

E el sabado de maitins m'escapé un ratet, tampoco no guaire, a veyer las Cypripedium, pero tamién me trobé con esta Platanthera bifolia:

 E ya con las cypris. Como soi un fotografo mediocre siempre foi el mismo :-D (e per ixo puyo tantas, perque no'n foi garra que pueda presentar sola e quedar bien):

 Unas floretas con un escarabaixo:

 Torné ta esta parelleta que sababe que teneba l'aranya:

 E aquí contravenindo las reglas de fotografías que conoixco: elementos que distrayen un fondo que se no aisla el motivo principal, etc., pero no me'n podebe ir sin fer-les una foto a estas quatre, e asinas se veye una miqueta aón creixen e per qué nunca no foi un fondo como cal (a no estar que sía artificial, que ye una qüestión que yo considero licita se s'indica):

En fin, que cuento que per estianyo ya ye prou de cypripedium per no cansar, pero no sé se el podré evitar he he. Salut.

Cypripedium calceolus, més

Mientres duren, cal aprofitar-las. D'esto maitín, dimpués d'es batilazos e tronatas d'ahier.
Aquí las teenmos con bichos, concretament una aranya de la familia Thomisidae, me pienso. Son tant espabilatas que adoptan el color de la flor que habitan pa poder cazar es insectos:

 Una soleta:

 Dos de perfil:

 E aquí fendo el fato con las tapas translucidas que llevo como difusors, asinas podebe zarrar el diafragma de tot:

E per aora ixo ye tot.
P.S. He puyato las fotos a tamanyo gran, punchatz-ie dencima pa veyer-las completas, se no apareixen retallatas.

Convallaria majalis e Cypripedium calceolus

Quan floreixen las Cypripedium ye el pistoletazo de salita d'altras flors espectaculars, pero que no tienen -per fortuna para eras- ixo tant especial de las Cypripedium (perque las pobras son en serio periglo d'extinción). Con tot e con ixo, siempre acudo a veyer cómo van e a pasar-me un buen rato fendo-les fotos. Ahier le tocaba el turno al Lilium pyrenaicum, que gosa salir pa estas fechas. Pero como ye fendo la primavera que ye fendo, i fue per demés (encara que dimpués tenié una miqueta de suerte), pos ye salindo la planta pero flors no n'i heba ni una, nian las felqueras que gosan acompanyar-las. Caldrá esperar uns días.
Como decibe antes, tenié una miqueta de suerte, pos quan tornabe enta l'auto veyé de bislai unas boletas blancas chiquirrinas que saliban en bell medio d'unas ramas cortadas: yera el muguet u Convallaria majalis. Ya feba anyos que ibe mirando -sin perder guaire tiempo he de decir- a veyer se la trobabe. Miré d'acondicionar una miqueta el puesto, apartando bel·la ramota cortata, pero tot el que febe yera mover la planta, e pa rematar se metió a plever como se no hes plevito prou esta primavera, se levantó una miqueta d'aire e yera imposible quitar un buen fondo. Asinas que tocó ubrir diafragma e puyar la sensibilidat pa mirar de ganar una miqueta de velocidat, e esto ye el que consiguié.

Pero como ya sé aón n'i hai, pos caldrá tornar en millors condicions.
De tornata enta casa, fue a veyer a las mías Cypris, perque no puedo resistir-me, eras son las mías sirenas e yo soi el suyo Ulises, perque plevendo como pleveba hebe d'ir-ie. Astí yeran, bien pinchas, mientres que Ulises se meteba chupito como una rana:

Hue contina plevendo, con tot e con ixo no m'importaría brenca de tornar-ie.

Redomas d'esencia

Diz que la millors esencias se guardan en redomas chiquininas. Qué millor pa ilustrar-lo que con estas redometas, tamién conoixitas como Cypripedium calceolus.

Ibón de Plan

Dende que i puyé d'hibierno querebe tornar-ie a fer las zagueras luces. El charré con un buen amigo fotografo e nos habría feto goyo de poder ir-ie con més nieu. Pero quantos problemas d'achenda el impidioren dica el cabo de semana pasato. Un puesto que, encara que ye muit visto, no deixa indiferent, una buena companyía (que amés me deixa parte d'el suyo equipo), una buena cena e una buena pudor a fumo dimpués de pasar la nuet en una caseta an que el fogaril no tira bien... e unas fotos buenas. He de ninviar-le-ne bel·launa a este amigo pa que me las procese, perque yo no sé fer-lo bien e er sí. Dica hue no m'ha vagato de meter-me a procesar-las.
Pensaretz, son totas muit pareixitas, pues sí, pero i hai diferents intes de luz, chicotz matices d'enquadre... e me fan goyo, sobre tot.
Con la camara d'es míos suenyos humedos e un angular manual (tot amprato):

 Esperando a veyer se despasaba e nos deixaba bell inte de luz:

 Pareix que el ciel se quiere ubrir:

 Encara teniemos una miqueta de suerte a zaguera hora. No son las millors luces d'atardeixer que he visto d'este puesto, pero millor ixo que cosa:

Una miqueta antes de fer-se de nuet, a punto de replegar e con es frontals ya en la capeza:





 
Tos recomiendo que punchetz dencima, las camaras con las que fayé estas fotos tienen prou més resolución que no la mía (pobra vielleta, snif) .