¿Chinchipera?

En castellano ye mito, aquí en Bielsa n'i hai pero no conoixco el nombre en belsetán, asinas que he recurrito a'l libro de Rafel Vidaller e asinas ye como le dicen per ixe país de la Vall de Benás. Yo conoixebe la voz chinchipera pa referir-se a la familia d'es carboneros (en castellano). Bueno, caldrá aclarir ixe tema...
Las fotos no son fetas en Bielsa, ye feta en un lugar cerqueta de Zaragoza, aón he pasato estes días de Navidat. Las he fetas con l'obchectivo d'un amigo e en el hide d'un altro. Que rematetz e prencipietz bien l'anyo que se'n va e el que viene, a veyer se el 2010 ye l'anyo de l'aplicación de la lei de luengas. Salut.

Ayer de nuet dende Espierba

Ayer yere troballando a l'ordenador e me dició la muller: "i hai una pila d'estrela·las, se veyen mismo dende la finestra la cocina".
Pro a fes que yo ixo ya el sabebe, pa ixo hebe estato la nuet anterior garimboliando per Sobrarbe fendo fotos. No tenebe previsto salir, pero como me dició ixo m'animó a salir un ratet cara Espierba. No i estié guaire rato perque feba un frío que se chelaban las parolas, no fayé més de 20 fotos e de poca duración. Ixa yera la mía intención, fer fotos con alta sensibilidat e de poco tiempo con el 50 mm 1'8. Ixe 50 mm se convierte en la mía camara en un 80 mm, asinas que poco angular ye (per no decir mica).
Pero ixo rai. Ayer pensabe en lo bien que s'está de nuet, en medio el monte, sentindo cantar es craberetz, sentir cómo se mueven las buixeras perque i pasa animals, escutar cómo cruix la hierba chelata cuan la pisas... Ixo ye muto bien, pero poco rato, perque torné ta l'auto con las mans encheberditas de frío he he
Tos deixo tres fotos d'ayer de nuet. Totz es fins de semana que pueda iré salindo pa prebar con diferents lunas, e qué conyo, perque m'estimo més ixo que estar de bars.
La primera ye mirando enta el sudoeste (el digo perque sé que bel·laún que se mira este blog le da importancia a estas cuestions tecnicas), se i vei -per decir bel·la cosa- el macizo de Treserols, més concretament la Punta las Solas, el pico Anyisclo e el Perdido:
Esta ye endrezata enta el sur, se i vei la carrera Sant Chaime:
E esta ye enta el Mallo Grand, como no i hai guaire angular con el 50 mm, pos no puede salir grand cosa:

Torno a fer fotos

Per fin, dimpués d'un mes y medio con la camara arreplegando polvo, ayer de nuet salié a fer fotos una altra vegata. Como ya somos en luna nueva i heba un ciel que feba goyo de veyer-lo, con la Carrera Sant Chaime preciosa. Encara que i hai poqueta chent per estas montanyas, i hai contaminación luminica, pero mica comparable a la que n'i hai en las ciudatz.
La mía intención yera mirar de fer una foto circumpolar arredol de la estrel·la polar, pero el mío temporizador chinorri no se lleva guaire bien con la mía camara, ademés que no debié de programar-lo bien. Asinas que desisitié e pillé el 50mm f/1'8 per la suya luminosidat, pa sacar buena cosa d'estrelas. Viyendo las fotos a traviés de la pantalleta de la camara pareixeban bien, pero hue en casa no m'han feto guaire goyo, i hai muto ruido e el foco no ye guaire bien. De totas trazas, reducindo-las no se veyen tant mal, per ixo m'animo a puyar-las. A veyer cuán aprendo a fer fotos nocturnas como cal
Bueno, per mirar de conseguir-las que no quede. A'l menos se i vei fauna, perque tornando enta casa viyé un corzo, dos liepres, un teixón e ya a 100 metros de casa un ciervo que cuasi me'l meto en drento el coche.

Esta ye feta dende el mirador enta Anisclo que i hai pasato Buerba, se i vei La Punta las Solas con nieu:
Esta ye feta dende el mismo puesto enta la Penya Montanyesa, se i apreceya pro bien la contaminación luminica de A Espunya e es suyos adosatos:
La Carrera Sant Chaime:
Esta la fayé baixando per lo desfiladero de As Cambras (u Anyisclo baixo), iluminé una miqueta l'árbol con el frontal:
E esta ye feta pensando en una canción de la Ronda de Boltanya que diz, charrando d'es lugars de Sobrarbe, "luciérnaga entre montañas / no te dejes apagar / si los hombres permanecen / los dioses ya volverán":
P. S. Pareix que en poquetz días tendremos, 30 anyadas tarde, una lei de luengas d'Aragón. M'he abstenito d'escribir sobre el tema viyendo la cantidat de rebuznos que se sueltan en foros como el d'el Periodico de Aragón, que ye el que goso leyer per internet. A veyer en qué para tot.

De cul

Voi de cul, no adubo a fer cosa en el blog, e el poco tiempo libre que tiengo el adedico a la familia. Entre el troballo nuevo e que no me vaga de fer fotos no foi res. Cuan le pille la maranya a la nueva fayena (ya le'n voi pillando, pero estes días son de muto quefer) e pueda tornar a fer bel·la foto i tornaré. No tos pensetz que he abandonato el blog (a'l menos per ahora), encara que sía pa decir-tos adiós tos enteraretz.

Soniando

Le foi mutas fotos a la mía filla, con tot e con ixo no soi guaire de retratos, no me salen bien. Pero éste que le fayé l'altro día mientres se feba la clucateta me fayó muto goyo; talment perque era no sabeba, obviament, que le yere fendo la foto. Tampoco no soi guaire de publicar fotos personals, pero qué pai no presume d'es suyos fillos.
Ademés, a yo me tresmina una paz enorme esta foto. Estoi que me la miraré muto cuan sía adolescent , alavez trobaré falta a esta nin·na :-)
No me vaga de salir ta'l monte, per tanto no foi fotos (tiengo mooooooooonoooooooooo). E el que ye pior, encara no sé cuán me podré escapar encara que sía un ratet.

El primer nevazo

Diz, yo no el sé perque a ixas horas yere dormindo, que ha prencipiato allá a las 6 d'esto maitín. Sí que sé que ye ahora cuan pareix que se'n deixa, que ya ye pro. S'ha pegato nevando tot el día, e per se i heba dudas sobre se la TDT aguantaría més es nevazos que el sinyal analochico, ya no'n queda: cuan nieva se'n van es dos sinyals, l'analochico e el dichital.
M'han dito a las 15:00 que en Pineta i heba sobre 50 cm., e aquí no'l sé perque la nieu ye muto grasa (u sía, que lleva muta augua) e se'n caye de camín per lo peso. Las litz son cayendo que fa goyo de sentir-las cayer, pobres coches que sían debaixo d'es tellaus... espero que es míos se'n libren, ya es he aparcatos mirando que no les ne cayés, pero no ye fácil d'aparcar en un día como hue. Ya veremos cómo amaneix maitín, se con un pander de chel, con més nieu u con bonanza.
Una cosa curiosa, d'agüerro se viyeban mutas viespas, e diz que cuan n'i hai mutas ixo marca un hivierno de nieu, se este nevazo marca el hivierno que encara no ha prencipiato, ya nos podemos ligar las abarqueras. Tos deixo tres fotos de hue, pro a fes que no miran d'estar ni artisticas ni un prodichio de tecnica fotografica, deixemos-las en testimonials ;-)
Esta ye de cuan soi salito de casa con la filla (que se'l ha pasato de pistón chugando con la nieu), cuan prencipiaba a plegar en la carrera:

Esta ye feta dende el puent d'entrata, aquí nevaba con ganas:E esta ye de fa un ratet, cuan ya pareix que se'nquiere deixar:
Salut.

Navatiando per la gáritz d'el Yaga

Una cursa muto maja ye baixar dende Escuaín dica "Os Vivers d'o Campillón", més conoixitos, cómo no, per lo suyo nombre inventato: La surgencia de escuaín. Ye un d'es sistemas d'esplucas integrals més grands d'Europa, e la baixó er primer vegata el club d'espeleolochía de Badalona.
Abe mutos anyos ficié este camín, e no recordabe lo majismo que yera. Ixo sí, cal brincar como es chizartz de pen·na en pen·na brincando gorgas e chugando-te un banyo en ixas badinas con augua de color turquesa que convidan a'l banyo se no fues perque en parte ye parque e no te i puetz banyar e per altra perque encara que no fa frío no yera cuestión de foter-se un banyo en estas alturas de l'anyo.
Total que se va río río dica A Fraga, an que una vegata abe mutos anyos fendo el barrango brinqué es 12 metros que i hai dica la gorga (qué miedo, pero qué sensación), que tamién ye un puesto majismo e torna a puyar cara Escuaín per un puyatón muto costeruto a arreplegar es coches. Per aora me despido per un tiempo d'el mont per es compromisos que tiengo. Le trobaré muta falta pero qué le imos a fer, cal ganar-se la pitanza. Salut.

Os vivers d'o Campillón:

Una de las zonas de la gáritz, m'ha feto goyo ixa ringlera de piedras:
Como ibe dezaga d'el sol (deixando qu em'adelantás pa chugar -fotograficament charrando- con l'agua) es faus se refleixaban en l'augua deixando una color preciosa:
E per fin el churro e gorgas dencima de A Fraga, el brinco de 12 metros (se fa u no fa) ye a la dreta d'el churro d'augua:

Un día per la valle Tella

Este puent son venitos uns amigos, e pa amostrar-les el país ayer fuemos ta'l camín d'es miradors de Reviella. Pasemos el maitín astí, e dimpués de comer puyemos ta Tella (casi 1400 m. sobre el ran de la mar) perque yo querebe fer fotos con l'atardeixer, ya que de verano sabebe que el sol s'amagaba per dezaga de la ermita de Faixanillas. D'agüerro no se'n va el sol per lo mismo puesto, pero ya que ibi'ere aprofité pa fer cualque foto, e ixo que no llevabe so que l'angular e no podié fer garra detalle de cerqueta de la ilesieta, un altro día será.
Dende la curva d'el caixico antes d'arribar ta Reviella, una anvista de la valle enta la Penya Montanyesa, abaixo se i vei Miraval. Ixa boira anunciaba l'augua que cayó di nuet:

Dende un d'es miradors enta Os Vivers d'O Campillón:
L'ocaso, Faixanillas ye abaixo:
Una altra anvista, se vei tamién (se sabes án ye) la ermita de la Penya:
Una anvista dende Lo Tenetuero (qué majo ye ixe toponimo):

Anyisclo II

L'altra vegata que i fue t'Anyisclo yera luego perque l'agüerro encara no i yera arribato e yera tot muto verde, e hue i soi tornato a mirar l'agüerro con dos colegas fotografos, pero talment ya yera una miqueta pasato, con tot e con ixo m'ha feto muto goyo de tornar-ie. Hemos prencipiato a caminar tarde e somos tornatos ta'l coche ya de nuet zarrata, yera escur como una lupatera. Pero bueno, somos puyatos t'A Ripareta que yera el nuestro obchectivo e ya baixando no hemos puesto fer garra foto. A veyer qué tos pareixen las fotos de hue.
Este debe d'estar el fau més fotografiato d'Anyisclo, en meto tres encuadres diferents:
Esta ye una anvista d'el camín, que yera majismo de tot:

Uns potrecons que i heba dencima d'un trallo de fau:Un puent de roca antes d'arribar t'A Ripareta:
Cuantas imáchens de las gorgas e gáritz que fa el río antes d'A Ripareta:



E ixo ye tot, que no ye poco, per hue. Salut.

Les llums de la nit / Las luces de la nuet

es que viviatz en Barcelona, u cerca, u podiatz asistir, no tos podetz perder la exposición e conferencia d'el cartel d'alto.
Yo no podré ir-ie, e ya me jode -cagondiós mira que m'escapo, ¿eh?-, pero es que podiatz asistir a ixa prochección e conferencia d'un grandismo fotografo de naturaleza e millor persona (tenié la suerte de conoixer-lo este verano e fer fotos con er e con altro amigo e fotografo en la Basa la Mora) no tos podetz permitir el luxo de perder-tos-la.
Un zaguer consello, pasatz-os per lo suyo blog pa veyer una grand foto nocturna . Ye la hostia.

Més fotos d'agüerro

Como ya he tornato el 100-400 que m'heban amprato e no'n vale la pena que mire de fer paixaricos con el mío 70-300 que ye muto mal, me toca de fer fotos a l'agüerro de Pineta, que esti anyo ye tardán, pero majismo. Es fabolars royos, la nieu e el ciel azul fan una combinación buenisma. La verdat ye que fa una calor que no ye normal, e asinas se'n va de rapida la nieu de l'altro día. Hue soi puyato ta's 1800 u més e de manga curta, encara me tornaré a meter moreno. Per cada día que pasa me queda menos días pa plegar, una pena.
Hue he feto el camín de Montaspro (el nombre el tiene mui bien meso), e tos las meto per orden:

Dende Lalarri, encara no i arriba el sol, pero m'ha feto goyo el refleixo d'el Cilindro en la baseta:

Dende el mismo puesto, pero enta el Perdido, Pico Anyisclo e Punta las Solas:
La Capilla e el Mallo Royo:

Dende la labacera d'el camín de Montaspro enta abaixo:
La selva la Bispeta, un fabolar con unas colors royas majismas:
Una altra de la Bispeta:
Arribando una altra vez ta Lalarri, es Esparrets, Cilindro, un poco del Perdido, es churros de Marmorés...:
E una anvista d'el cul de Pineta, fa una mica d'efecto barrilete el obchetivo, pero tos podetz fer una idea:
Au, ya n'i hai cuantas. Salut.

La tipica foto feta dende Espierba

pero esta la he feta yo. Dimpués n'he feto altras con filtros de densidat neutra u de degradatos neutros, ahora no me'n acuerdo, que m'ha deixato un amigo. Esta ye feta con el obchetivo d'el kit (que no ye mica buen) e con el mío polarizador, dimpués ya m'han deixato el 100-400 (con el que fayé las fotos del trencauesos, pa días el torno a tener) e hemos prencipiato a fer lo fato con es paixariquetz. A partir de hue se torno a fer paixaricos habrá a estar con el mío malismo sigma 70-300, que ye lentismo e muto fosco, se fará el que se pueda dica que pueda cabidar pa fer-me con el 100-400 u el 400 fixo, que pa días i hai caldo.

Una tregüeta entre la plebita e la nieu

Esta tarde m'han dito en el Refugio de Pineta que heban medito 230 l/m2 e que no sabeban cuánto heba sobreixito, perque en·n'o traste que i tienen pa medir-la no i cabeba més. E bien se les n'ha valito que alto, sobre es 1800-1900 metros yera nieu, que se no igual se les lleva el río. Ye curioso, totz es barrangos de la man pacina baixaban fartos d'augua que no'n podeban més, el barrango de La Estiva tamién ha movito bien, el de Lalarri e el de Montaspro tamién, menos el Cinca cuan baixa de Marmorés, cómo se nota que ha nevato, se no baixaría un río enorme.
Pos como diz el titulo, hue hemos tenito una tregüeta, perque cuasi no ha plevito dende esto maitín, pero aora en cai a cabazos una altra vegata, a veyer qué fa maitín. E como l'orache nos ha deixato mismo veyer una brinquerrina el sol, he aprofitato pa fer bel·la foto.
Esta ye feta a zaguera hora, cuan ya lusquiaba, pero me fa muto goyo ixa luz entre es faus:
Una altra d'el tunel, e cuento que no serála zaguera, encara falta una miqueta de color e que las fuellas tapen la pista:
Este ye el barrango de La Cueva (como podretz veyer ye un nombre modern), que no baixa so que de mayenco e cuan i hai temporal u tronata grand:
El río Lalarri, que ha medrato buena cosa (podetz veyer en una entrata anterior cómo baixaba fa tres días):
Es picos con nieu, Treserols no s'ha arribato a despasar de tot, no més s'han visto el Garién, el Pineta e La Capilla, como podetz veyer, la nieu ye pro baixa:
Un pinchán en un liroler, no tot ha a estar anvistas e churros. Pa días torno a fer fotos de paixaricos, ya me toca de tornar el teleobchetivo a l'amigo que me'l deixó:
E esta zaguera -encara que ye la primera que he feto hue- ye de cuan le daba el sol a'l embalse e se refleixaban es árbols caducifolios:
Au, per hue ya ye pro. Salut.