Primavera

Le cuesta, pero ya va arribando, e ixo que cuasi somos ya en Mayo. L'orache no acompanya guaire, estes días mismo ha nevato un poquet més alto que la Villa, sobre 1300 u 1400 metros, pero esto ya ye imparable. Ya va salindo flors: chicoinas (en son es pratos plens), narcisos e mutas altras de las que no conoixco el nombre. A finals de mayo ya vendrá l'artillería pesata floral como las Cypripedium e es diferents tipos de liliáceas. Tant e mientres, pa ir ubrindo boca, tos deixo estas, son totas fetas esto maitín a'l canto Boltanya, menos la zaguera que la he feta de tardes en Bielsa:

Bombolón "yonkie", se vei que les fan goyo es opiácios e ls flors verenosas como la tuera

Un ababol entre flors amarillas

Un milano, no es he vistos "enredar" guaire entre ers, talment ya haya pasato el celo e no el haya visto. La foto no ye grand cosa perque el mío obchectivo ye més lento enfocando que el caballo d'el malo de las pelis, pero ye el mío primer milano en vuelo dende cerqueta.

E esta preciosidat que no sé cuál ye, pero que m'ha feto goyo el contraluz. Per se bel·laún me podetz aduyar a identificar-la, ye muit chiquirrineta e las fuellas se pareixen a'l prexil u a la cecuta.

Una altra vez, es estultos tornan a acometer

Tos deixo el enlaz con la noticia d'el Periódico de Aragón. A esta chent les fa goyo d'estar payasos. Penible, no m'importaría mica tener ixe debate que reclaman.
Actualizo, muit breument, pa informar a Frikosal:

En Aragón dende fa mutos sieglos se i charran tres luengas: aragonés, catalán e castellano (este dende zaguers d'el s. XV). I hai una chent que con "argumentos" acientificos de tot niegan la existencia d'el catalán, decindo que ye aragonés oriental (e fa uns anyos deciban que yera lemosín). D'el que se trata aquí ye de negar la realidat, yo estié una temporada troballando per La Llitera, e se ixo no ye catalán occidental, que baixe Dios e el niegue. No ye que el diga yo, totas las tesis doctorals que s'han feto en ixas zonas (la Francha oriental d'Aragón) arriban ta la misma conclusión: se i charra catalán occidental, muit pareixito a'l de las zonas gogatizas de Lleida.
A esta chent lo unico que les mueve ye el anticatalanismo baturrista, s'han creyato una Plataforma denominata No hablamos catalán (se la hesen feta en ixe supuesto aragonés oriental habría de decir-se "No parlem català", e ixo no queda bien), ye como se yo digo que en la mayor parte d'Aragón se charra "aragonés meridional" e foi una colla con cuatre frikies més e le decimos "No charramos castellano".

De viache

Una altra vez, ayer me'n fue de viache sin mica prisa, pero cuasi arribo tarde: salié dende Bielsa a las 10:30 e llegué en Zaragoza a las 16:45. Seis horas e cuarto, cuan per un regular me gosa costar dos e media. En el mío escargo he d'aducir que habié a fer compras, pero con tot e con ixo perdié muto fendo fotos. Beixé enta Balbastro per la carretera d'es fratos (A-138) e dende el Barranquet brinqué per la carretera que va enta Alquezra. Pasé per Adagüesca, Abiego e torné a salir ta la cheneral. Qué majo ye estes días el Semontano: es trigals verdes que no'n pueden més, flors per tot arreu (allagas, alcozons chiquilins, no guaires ababols), el Tozal de Guara con nieu, ... Unas anvistas majismas. E ixo, el que tos decibe, fue parando a fer fotos cuan viyebe cualque cosa que me feba goyo, e tos amuestro cuantas fotos:
Esta primera debe d'estar de la familia de l'alcozón, pero la prima chiquirrina, perque l'alcozón que se cría per aquí fa més d'un metro d'alto. Nunca no hebe visto esta floreta (u no i hebe parato cuenta), pero ayere me fue mirando e en i heba en las marguins de la carretera. Esta ye feta en el esbarre enta Costean.


Un ababol entre las vitz cerqueta d'Abiego:
Dimpués baixando dende Uesca enta Zaragoza paré e meter gasoil en la nueva gasolinera que i hai, e i heba un campo de pimprigallo majismo en ixe secarral.
A'l canto d'el campo anterior, un ababol fendo de contraste con l'amarillo:


Una malveta, pilando como fundo el pimprigallo:E la sospresa d'el día, un garrapescaire nocturno. Ya abe anyos que per cada vez que paso per Angüés veigo, muit a menuto, en ixa basa que i hai salindo cara Balbastro; siempre pensabe que el día que tenés un teleobchetivo una mica potent (e aora en tiengo un encara que no ye, ni muto menos, el millor) e la i veyés pararí a fer-le una foto. E ayer cuan tornabe (sobre la 1:15 de la nuet) la i columbré, e dicié: "conyo, voi a prebar de fer una nocturna con fauna", con que enfilé el coche cara el garrapescaire con las largas e estié fendo prebas. Como yera tardismo no perdié guaire tiempo, e esta ye una de las millors que me salioren, e no ye grand cosa:
Au, que vaya bien e a plantar fuerte.

Prebando con paixaricos a altas velocidatz

Dende la finestra casa, ya veigo yo las errors, no cal que tos cibetz: ISO masiato alta e ruido, e sobre tot el tema d'el enfoque. Pero bueno, como aprendiz que soi son las primeras e seguiré mirando de conseguir cualque cosa decent, tamién me pasó el mismo con las nocturnas e aora mismo bel·launa se puede amostrar. Tamién, pa'l mío descargo he a decir que el obchetivo tampoco no ye que sía una marabilla, pero pa'l que m'ha costato no se puede pedir grand cosa més.
Un enganyapastors e pa la golondrina no cal presentación

Dos panoramicas e bel·la flor

Cualques fotos que he feto hue:

La Penya Montanyesa dende A Buerda:

Sestrals dende L'Aínsa:

E unas flors de ceresera en O Mesón de Puertolás: