domingo, 29 de junio de 2008

Marmotas

Totz es días en el troballo i veigo mutos animals, ayer mismo chizarz, una rabosa, una boleta, una alica cullebrera... e marmotas, mutas marmotas.
En la Estiva i hai una pila marmotas, e podié quitar estas fotos a unas crías que son més confiatas que las mais. Yere chitato a'l canto d'el cado e me i fue acercando poquet a poquet dica que s'atrevioren a salir. De cuatre crías en i heba una que se fiaba més que las altras, e a era le fayé que me sé yo la de fotos. Tos ne meto estas dos:




La Estiva

Ayer me'n puyé ta La Estiva, que como el suyo nombre indica (ye un derivato del latín AESTIVU `verano´) son uns pratos d'alta montanya t'an que se i lleva el bestiar de verano. Toponimos pareixitos n'i a embute per totz estes puertos (ademés d'Estiva bel derivato como Estiviella). Dende la nuestra Estiva i hai una anvista impresionant, e como muestra estas fotos (no llevave la tarcheta que cal pa fer fotos panoramicas, conque habretz a emplegar la imaginación e chuntar-las con la capeza).
El pico la Capilla, Felqueral e Garién:
Es dos zaguers d'antes, el Cilindro e el Perdido (ixe chiquilín punchuto enta la izquierda):
Cilindro, Perdido e Punta las Solas:

viernes, 27 de junio de 2008

Flor de Lis II

Hue soi tornato a veyer las flors de lis perque i heba muit buena luz (un precioso ciel azul), encara que bel·la boira feba que se me cremasen una miqueta, e bufaba un poquet d'aire que feba que altras me salisen movitas. Pero bueno, una chicota selección de cuatre fotos, las que més goyo m'han feto.


jueves, 26 de junio de 2008

Reivindicacions lingüisticas

Buena falta nos fa de redir-nos-ne. Aquí torna el Comando Almogávar dende las Corte d'Oregón
Pero no son tot malas noticias, en la Expo fan clases d'oregonés

Santa Orosia

Ayer estió Santa Orosia, e per segundo anyo consecutivo no he puesto ir ta Yebra a viyer-lo, espero que l'anyo que vien podiamos ir-ie.
Santa Orosia tiene muta tradición más que más en Chaca e en Yebra de Basa. Yo, encara que tiengo pro familia en Chaca no i soi estato nunca en ixe día, soi ito ta la romería que se fa a Yebra de Basa t'an que i va muta chent de tot el Sarrablo, Sobrepuerto e mismo la Galliguera. Ye una romería con sabor mui popular an que se i fa el dance de Santa Orosia antes de la misa e dimpués d'ésta se fa la pastorada en aragonés. I hai un libro pro interesant sobre el tema d'Enrique Satué: Las romerías de Santa Orosia.
Tos meto un troz d'el palotiau que he trobato en youtube (yo en tiengo un feto en O Puerto, pero ye de mala calidat) una vez que el fayoren en Robres. Yo, que soi estato danzant en un par de palotiaus, me pienso que ye el millor que n'i hai en Aragón, ademés el instrumento que tocan (chiflo e chicotén) me pareix que tiene una sonoridat indescriptible.

miércoles, 25 de junio de 2008

Kiss

Son buenismos, yo m'esmelico
P. S.: Letra
De todos estos lugares
Leciñena es el mejor
Porque tiene por patrona
la virgen de Magallón
Ay la virgen de Magallón

Con tot e con ixo

Con tot e con ixo siempre i hai cosas millors que sentir las ocurrencias d'el Senyor Biel e las fateras d'es de la FACAO. Tos meto bel·la foto que he feto hue en el troballo.
Ya han salito las primeras flors de Lis en El Felqueral. Miraz-tos que a yo no me van ni poco ni mica las ulors fuertes e dulces, pero la que fan estas floretas me fa muto goyo, e atrayen insectos arrienda (¡cuán podré tener el macro!). Estas son fetas con el flash perque i heba mui poqueta luz, pero encara ansinas me fan goyo como han quedato:


Aora uns animaletz.
Una gralla de pico amarillo:

Una aranyeta con el sol per dezaga:

Unas crías de marmota, que ya salen a tafaniar per difuera d'el cado:

E un bombolón per el alcozón:


Ya ye pro per hue, se acaso maitín, que tiengo fiesta, en meteré bel·launa més.

martes, 24 de junio de 2008

Me cago en D**s

Piquito de oro, i el Marcel·lí que no diu ni piu
Torno de troballar a las diez de la nuet e voi e me trobo con un correu que me diz esto
www.elperiodicodearagon.com/noticias/noticia.asp?pkid=420037
voi a leyer-lo e me trobo con esto altro
www.elperiodicodearagon.com/noticias/noticia.asp?pkid=420035
Diz que dica dimpués d'el verano e ya veremos, perque yo no me'l creigo. Es que fan la manifestación -altras veces ya n'han feto con Falange e con blavers- son es d'el PAR (Héctor Castro & co.: www.locacaodelafacao.wordpress.com)
Ye que con esta chent no'n saldremos, son ers es que meten es problemas, e ye que con este tema de la lei de luengas d'Aragón ya soi farto, e me cago en Dios.

Actualización: e aora que i pienso, talment sía un pensamiento pro paranoico pero ¿e se ixa manifestación se fa pensando en provocar disturbios e tener una desincusa pa no fer la lei? Perque per altros foros ya ye convocando-se una contramanifestación. Sería perfecto pa decir que como i hai conflictos entre aragoneses que no la fan

domingo, 22 de junio de 2008

Ya feba días...

Ya feba mutos días que no escribibe cosa, pero ye que soi estato pro ocupato. Fa uns días me presenté ta un examen que querebe fer-lo bien, e per ixo no actualizabe el blog. Pero bueno, ya ye feto e ya veremos cómo ye ito.
Pa compensar la espera i meto cualques fotos.
Amaneix en el pico El Felqueral:


Alcozón u allaza, que n'i hai una pila perque es animals no el tocan:
Un par de flors de montanya, no me preguntetz per el nombre perque no el conoixco:

E aora una anvista de la Valle Pineta dende el Cantal:

martes, 17 de junio de 2008

Pinchán


Aora que van salindo es paixariquetz chiquilins, ye fácil de fer-les fotos perque son una minqueta amanyanatos, e hue se m'ha meso debant d'el ochetivo éste, que estoi que ye un pinchán. A veyer maitín que podré fer fotos qué ye el que sale, pero me pienso que dica el sabado no podré fer cosa en·n'o blog.
Salut.

lunes, 16 de junio de 2008

Crietas

Bel·la foto més, sin guaires comentarios.

Crapa con crapito I:


Crapa (una altra) con crapito II:
¿Tos acordatz d'el enganyapastors cobando? Pos aquí tenetz las crietas, mira que son fieras:

Ya sabetz que se i punchatz dencima se i veyen més grands.

La mía bida

Contino tos deixo el relato de Lorena Seijo Garcés, la nieta d'el mío amigo Jesús de Baytico, con el que ganó el premio literario d'el IES Sobrarbe en la modalidat d'aragonés, e estoi que cal dar-de difusión. Me'l ha feto arribar Dani, de www.charrando.com Pa's que teniatz curiosidat sobre l'aragonés, tos recomiendo que tos i pasetz, e se queretz sentir charrar es dialectos d'el aragonés (entre altros el tío Baytico) en ixa misma pachina tenetz es enlaces.
Espero que tos faya goyo e, sobre tot, enhorabuena Lorena.


LA MÍA BIDA

Per Lorena Seijo Garcés (nieta del tío Baytico de Bielsa)

Yera una buena tardata del berano e yo que per bien segur me clamo Tresa e tiengo dieziseis añatas, he bibito de contino en iste majo lugar de la billa de Bielsa. Ya tos he dito que yera una buena tardata de berano e yo yere en el cuarto con la guela, que yenos amanando la lana de las guellas pa cardar-la e dimpués fer el fil (pa fer las pedalas pa es ombres que las llebaban con aqueras abarcas de goma, unas altras tamién que yeran abarcas de cuer que no duraban so que nuebe dias, se deziba tres dias con pel, tres sin pel y tres con el piet per el suel). Ya podeban benir pedalas arrienda, que en fundiban tantas como en fenos. Cuan sentiemos trucar en la puerta e yeran las mozetas que beniban a gritar-me. Eban benito una miqueta antes que altros dias.

Qui sabelo contentas que yeran, y yo no sabebe perque, ya que alabez me dizioren que José (el mozet més majo de tota la balle) yera tornato de la tierra planaba e yera tenito que ir apaixentar las guellas de su pai. Dende l´aguerro d´antes no´l ebe bisto més. Cuan me´l dizioren me dio una tremita al corazón de la l´alegria que que tenié. Fuimos correndo, correndo (tanto, que nos tocaban es talons d´es piez en.no cul), ta casa d´er pa mirar si yera arribato, e nos dizió su mai que eba ito enta el rio, que eba llegato puerco, al labar-se la capeza y es piez .

Le diziemos a su mai que, cuan benís que le dezís que yenos estatas alli e que l´esperanos en la plazeta de la ilesia. Al cabo d´un ratet amanixió José, alabez Carmen (la mia millor amiga) brincó correndo e cote foter-le buens besos e buens abrazos. Yo el saludé tota enpensata.

Al cabo d´uns cuantos dias Carmen me dizió que yera salindo con er en secreto e que no podeba dezir-le-lo a dengún. Yo me´n fue correndo desconsolata ta las eslixaderas (las eslixaderas son unas labazas que i hai chunto al rio barrosa zerca del puen de sorripas, que cuan salinos de la escuela, inos ta allí a chamurquiar en l´augua e a eslixar-nos) de allí a una miqueta amanixió José, con que escomenzipiamos a charrar e al momento cutio cutio benió t´anque yere yo pa besar-me con que yo tenebe qui sabelo las ganas de besar-lo me dizió, que perque me apartabe e yo le dizié que no me parixeba bien fer-le ixo a Carmen. Pero l´amor que sentiba yera tan gran, que con tot e con ixo se declaró, dezindo-me que yera enamorato de yo. Yo le respondié, que el sentimiento yera compartito. E con un intenso beso sellamos el nuestro amor. Pasemos chuntos tot el tiempo que podemos e con Carmen dixemos de charrar-nos, pero con las altras salinos igual que antes.

Un maitín metié la radio, bel.la cosa que febe toz es dias, e sintié la pior notizia de tota la mia bida. La guerra yera estallata. I fui correndo a bier a Jose pa dezir-le-lo, en la entrata de la casa d´er i eba ligato un caballo blanco. Entré en la casa d´er, e cutia cutia me fotié en.no comedor, alli yera charrando con un mesache e su mai yera sentata en la catiera plorando. Yo no podebe pensar con claridat, ansinas que torné a foter-me en.no comedor e les conté la notizia.

Ixe ye estato el pior dia de tota la mia bida. José teneba que marchar obligato ta l´exerzito pa luchar en la guerra. Se´n iba dentro de tres dias, ixes tres dias estié con er tot el que podie. Llegó el momento que se´n teneba que ir, e nos despediemos con glarimas en es guellos. Puyó ta un cambión e se´n fue, e yo me i quedé plorando en medio de la carrera. No´l sabebe si el tornaria a biyer, sin poder fer cosa pa que no is ta la guerra. Al cabo de diez dias me llegó una esqueleta d´er e me deziba que se trobaba bien, e que me trobaba muta falta.

En Bielsa, cada dia sentinos las bombas més zerca de nusaltros perque es abions beniban pa bombardeyar, e toz tenenos muto miedo. No tardoren guaires dias en dezirnos que l´altro dia de maitins nos ne tendriamos que ir ta Franzia. Es abions cargatos de bombas no se farían esperar guaire. La suya misión estrecallar el lugar.

De tota la colla fuemos es zaguers en ir-nos de la billa. Ixo fue la calamidat més gran pa nusaltros, bier como deixanos totas las nuestras cosas, toz es nuestros suenios, sin saber perque nos feban tot ixo, pues no enos feto res a dengún. Fue muto dur. Cuan marché, l´unico que me llebé fue la ropa d´es domingos en un pañuelo farder e una foto de José.

En la memoria tiengo grabata, i encara que sían pasatas tantas añatas, me´n recosiro como si fués güe (millor que mutas de las cosas que he feto gue, ¡ya sabez como son las capezas d´es biellos!) cuan inos caminando cara ta Franzia e biebe como es abions s´azercaban poco a poco enzima de Bielsa, e como una boira negra de fumo saliba del lugar. Yera ardendo. En es guellos mios cada bez i eba més glarimas. El camín ta Franzia yera qui sabe de mal, perque i eba muta nieu, e feba muto frior. En el saco una miqueta de ropa e una miqueta de birolla. De cuan en cuan fenos un bocadet e un trago, e dimpués ta debán.Yo ibe con es mios guelos, que yeran bien biellos. Poquet a poquet nos inos azercando ta Franzia.

Cuan lleguemos ta Franzia, la chen nos fayó buen caso, e nos dioren birolla, alli en la clamata “caseta d´archelas”. Nusaltros tenenos alli una chirmana de la mia guela, e nos replegoren pa casa d´ers. Cuan se remató la guerra, nos dizioren que podenos tornar, dica ixe dia totas las nuez yere pensando en José. Al cabo d´uns dias, ya tornó el dia que toz esperanos, podemos tornar ta Bielsa.

Nos tornemos a trobar toz es bezinos e nos despediemos d´es pariens que tenenos en Franzia, e bels belsetans se estimoren millor quedar-se a troballar en Franzia. Per de maitins yenos toz qui sabelo que contentos de tornar ta casa. Perque no sabenos el que nos inos a trobar. Ista bez el camín no yera como l´altra bez. Ista bez tornemos per Canfrán.

Tal y como nos inos azercando pa la billa, el mío corazón se m´estremeixeba, y en la mia cara i eba una sonrisa que se debuixaba, que se me´n fue al bier que tot yera abrasato. Encara s´alentaba ixa mala ablor a la polbora. Nos deixoren en la plaza. Es mios aguelos se´n fueron a caminar per las carreras del lugar, es demés nos estiemos sentatos en la plaza. Sin saber qué fer, al cabo d´un ratet tornoren plorando desconsolatos. Cuan i pienso el que dizió la guela (filla mia agora t´an inos). Estoi que alabez la chen empezipió poquet a poquet a reazionar.

Aquera nuet amallatemos sentatos en las escaleras d´una de las pocas casas que eba quedato en piet. Nos tapanos con uns cobertors biellos e trencatos. Al altro dia de maitins ya empezipianos a refer tot el que podiemos. De nuet nos inos a dormir ta una borda que tenenos en el campo.Yo i fue con un cazuelo t´anque es melitars, que en yera plen el lugar, a bier si me daban una miqueta de rancho, pa sacarnos la fambre, que la birolla yera muto escasa.

Abe muto tiempo que mirabe enta la entrata de Bielsa pa bier si tornaba José. D´allí a uns dias tornó un ofizial a dezir-nos que ixe dia tornarían es soldatos, y pa dezir-nos que un eba muerto en la guerra. Yo nunca abrí quiesto que es estato José. Cuan l´ofizial me dizió que eba estato er, pensé que me moribe.

Me´n fue plorando e desconsolata ta las eslixaderas, anque nos diemos el primer beso mientris plorabe, me tocoren el guembro per dezaga e me rechiré tota espantata, no podebe ni alentar al biyer que yera José, no me´l podebe criyer. Pero si m´han dito que yeras muerto, le dizié..., el respondió que yera una larga istoria e que ya le bagaría de contar-me la istoria de cómo sobrebibió a la guerra, cuan se casasen, pos era yera la muller de la suya bida, con la que quereba fer-se biello. Le fotié un abrazo més gran que nunca e tornanos chuntos ta´l lugar, su mai cuan el biyó se metió a plorar d´alegria, al bier que el suyo fillo yera ileso. Toz chuntos, poquet a poquet fuemos refendo el lugar, e ir seguindo la nuestra vida , en la casa que naixinos.

Gue tiengo 84 an.natas bibo en iste majo lugar de Bielsa, con el mío marido José, perque al cabo de que tornó de la guerra nos amaridanos. No me´l puedo criyer, cómo ha cambiato tot, que me´n acuerdo del mal que el pasemos, pero le tenemos muto amor al lugar e per ixo queriemos tornar a refer la bida allí en.no lugar en que naixiemos.

Cuento que istes episodios de la mia bida, no caiga en l´olbido, anque fue terrible. Agora soi una muller feliz, con la mía familia e las mias amigas. No querrí rematar de contar-tos es mios recosiros, sin pedir–le a Dios, que es buestros chobens guellos no beigan més guerras, si no ye atrabiés de la mirata d´istes biellos guellos.

viernes, 13 de junio de 2008

Cualques fotos

Encara que estes días voi mui aqueferato -a partir d'el 20 espero tener una miqueta més de tiempo-, tampoco no ye custión de deixar el blog a l'abandón. Per ixo tos meto bel·la foto que he feto estes días en el troballo. No son gran cosa, pero a's que les faya goyo la montanya cuento que las agradeixerán. E se no... ¡qué les voi a fer yo!
Pos aquí las tenetz, un corzo que se fotió ta'l río
Un segallo de chizard en Montaspro:
El barranco Lalarri que baixa bien grand:

E una altra d'el Zueco de Venus, que en va salindo més poquet a poquet:

sábado, 7 de junio de 2008

70 aniversario de la Bolsa de Bielsa


Pos ixo, con la ocasión d'el 70 aniversario de la fin de la Bolsa de Bielsa -feta de la guerra civil cuan la 43 división d'el eixercito republicán quedó aislata en esta valle e en las vecinas (podetz mirar en google se tos interesa) frent a las tropas faixistas- se son fendo este cabo semana unas chornatas pro interesants sobre ixe episodio historico.

Ayer de tardes ya prencipioren con unas charratas sobre aspectos militars e sobre la figura d'el Comandant de la 43 División, Antonio Beltrán "el Esquinazau", e a las 8 de la tarde se fayó el preestrén d'el documental "La Bolsa de Bielsa,. El puerto de Hielo", d'Aragón Televisión, como homenache a la población civil que habió a fuyir ta Francia deixando dezaga las suyas posesions e casas. En ixe documental i participemos buena cosa de chent de Bielsa fendo d'extras, e el pabellón yera plen a rebutir.
Me fayó goyo el documental perque se centraba en es aspeutos de la población civil. Cuan sientes charrar a's goletz que te cuentan tot el que pasoren (el cruce d'el puerto con una pila nieu, es campos de refuchiatos, la tornata ta'l lugar cremato...) veyes que ye preciso que esto no s'olvide, e que se conoixca difuera, perque aquí, como el carnaval, ye un d'es rasgos identitarios (no pas el belsetán, que ye una pena).

Bueno, pos aquí tos deixo el programa, sacato de www.bielsa.com


La Bolsa de Bielsa | Resistencia, éxodo y destrucción | 1938-2008
martes, 13 de mayo de 2008

Organiza: Ayuntamiento de Bielsa, Diputación de Huesca, Departamento de Educación, Cultura y Deporte del Gobierno de Aragón.

Colabora: Comarca de Sobrarbe, Museo de Bielsa, Asociación para la Recuperación de la Memoria Histórica en Aragón y Aragón Televisión.

Fechas: 6, 7 y 8 de junio de 2008.

La Bolsa de Bielsa

PROGRAMA

Día 6, viernes

Salón de Actos de Ayuntamiento de Bielsa, Plaza Mayor.

18:15 h. Inauguración.

18:30 h. La Bolsa de Bielsa. El punto de vista militar. Fernando Martínez de Baños, teniente coronel de Artillería en la Reserva y doctor en Historia por la Universidad de Zaragoza.

19:15 h. Beltrán, El Esquinazau. Desde la Sublevación de Jaca hasta la Bolsa. Antonio Gascón Ricao, investigador.

20:00 h. Presentación del documental La Bolsa de Bielsa. El Puerto de hielo. Lugar: Sala Multiusos de Bielsa, calle Cruz.


Día 7, sábado

12:00 h. Ofrenda floral e inauguración de un monumento en honor a los protagonistas del éxodo de 1938 y a todas las víctimas de la Guerra Civil. Lugar: placeta Curva Colón.

17:30 h. Inauguración de la exposición De Huesca a Francia. Guerra, éxodo y destrucción. Lugar: Casa Julio, plaza de la Iglesia.

Salón de Actos de Ayuntamiento de Bielsa, Plaza Mayor.

18:00 h. La retirada del Alto Aragón y la población civil: de la evacuación al exilio, 1938-1945. Alicia Alted Vigil, profesora titular del Departamento de Historia Contemporánea de la UNED (Madrid).

18:45 h. El frente de Aragón: un tema delicado en la prensa de guerra republicana. Mirta Núñez Díaz-Balart, profesora titular del Departamento de Historia de la Comunicación Social de la Universidad Complutense de Madrid.

19:30 h. De Aragón a Francia: la guerra de exterminio de Franco. Julián Casanova Ruiz, catedrático de Historia Contemporánea de la Universidad de Zaragoza.

20:15. Clausura.

22:00 h. Actuación de la Ronda de Boltaña. Lugar: Sala Multiusos de Bielsa, calle Cruz.

Permanecerá abierta la exposición Bielsa 1900-1930 en casa La Raga, Plaza mayor, en horario de 09:00 a 14:00 horas y de 16:00 a 19:00 horas.

Día 8, domingo

Segunda Travesía Ruta del Exilio Aragón-Francia

Salida a las 08:00 desde el aparcamiento de Bielsa en autobús hacia la boca del túnel Bielsa-Aragnouet por el lado español. El transporte lo facilita la organización.

Ascenso desde la vertiente española del túnel en dirección al puerto Viejo, situado a 2.393 m de altitud. Colocación de una placa de recuerdo y lectura de unas palabras de homenaje. Almuerzo.

Descenso al lado francés del túnel. Lectura de un manifiesto, ofrenda de flores, charla y regreso en autobús a Bielsa.

Tiempo estimado: cuatro horas. Dificultad: media.

IMPORTANTE: llevar calzado adecuado, material y ropa de montaña, agua y comida en la mochila.

Los interesados en participar en esta actividad pueden ponerse en contacto con 686 900 119 / 676 015 948 o bolsadebielsa@gmail.com

miércoles, 4 de junio de 2008

Zueco de Venus II




Fa uns meses tos charrabe d'esta polita orquídea. Pos bien, dimpués de cuantos vuiaches per veyer se ya heba salito, estianyo va con pro retraso, hue per fin he visto las primeras. No'n i heba so que dos, pero en uns días cuento que saldrán las de demés. Mientres alen e no aquí tenetz estas pa ir fendo boca.

Ni paixarico ni paixarica.... gai


No, no tos pensetz que ye un comentario homofobo, dios me'n guarde de fer-ne, ye un chuego de parolas que fa un companyer de troballo con este paixarico, que en aragonés se diz gai (Garrulus glandarius, seguntes el mayestro Coromines proviene d'el latín tardán GAIUS), en catalán gaig e en castellán arrendajo (cosa a veyer con la nuestra forma). Ye un paixarico que diz que va jodendo a's altros paixariquetz. Hue comentaban que en Francia es matan perque fan muto mal. Una persona que conoixco yo se'n comió un e diz que ye durismo, pero ya le vale... como se te minchas un cuervo
Pos ixo, el chuego de parolas e que como s'acerca pro ta la chent, l'he puesto fer esta foto dende cerqueta.