Esquiruel

Este pobre animalot estió a punto de denunziar-me per acoso (u bullying u como rayos se diga ixo) de tantas fotos que le fayé e tanto que el encorrié. Gosa deixar-se biyer d'agüerro per es lirolers pa minchar-se ixes lulos royez; per ers compite con altros bichos como una pila paixaricos que i ban a minchar-ne (d'es que no'n sé mica, bel·laún suelto, pero cuan a'l rato me's boi a mirar ta'l libro toz me pareixen el que he bisto). D'antes més la chen se's comeba -a's esquiruels- bel·la bez, pero cal saber que es de pin son malismos (deben de saber a rasina) e es d'es nuquers buenismos. Conque ya el sabez, se nunca querez minchar-ne un, pillaz-lo de nuquer.

Bueno, ixo ye broma, aora que i hai sobrealimentazión (a'l menos en es países oczidentals), deixaz-los que brinquen per es camals.

Como faloria: un zagal madrileño que bibe en·n'a Billa se montó una empresa de deportes d'abenturas e le metió de nombre Esquiruelo, anque er pronunzia ejquiruelo. Cosas de la "dialecolochía" castellana.

Azirons

De siempre m'han feto muto goyo es árbols de fuella caduca. Abe años m'encantaban las fabosas (u fabolars), e encara siento cualque cosa cuan arriba l'agüerro e las beigo con ixas colors tan bonicas. Pero es azirons son altra cosa, cuan bas per pinars u selbas d'altros árbols peren·nes e te sale bel azirón per astí ye una flamarata de royo u amarillo entre tanto berde. E se ademés aprofitas un ziel tan azul como el d'ixe día d'otubre el contraste, a'l menos pa yo, ye pistonuto.

Sol d'ibierno

Per estar el primer día boi a fer una altra entrata. Esta ye una foto que fayé este ibierno a'l canto la presa de Pineta, denzima d'Ixabierre, cuan de berdá feba frío, perque estas temperaturas que i hai aora no son guaire normals. La fayé sobre las 12 d'el medio día, cuan ya prenzipia a ir-se-ne el sol en el cul d'ixa balle, que ye mui pazín. Ya beremos cómo bienen marzo e abril, que talmén nos enronen en nieu, que buena falta faría per la montaña (no pas per la carretera).

Prenzipiamos

Prenzipiamos esta nueba cursa a trabiés d'el rete. No puedo asegurar mica continuidat perque siempre soi estato un poquet galbán pa escribir.Pero bueno, miraremos de fer cualque cosa. No ye un blog espezifico de garra tema, se no que iré metendo ixas cosas que se m'ocurran, me pasen u bel·la foto que baya fendo. Pa prenzipiar tos deixo esta que fayé el berano pasato en la Feixa Tormosa, per denzima de Pineta. Espero que tos faya goyo.