felqueral

Primeras luces en Barrosa

2012-01-07T10:00:00.000-08:00

Mama mía se feba días que no escribibe cosa. La verdat ye que en tot este tiempo no he salito mica, menos pa'l Puent de la Constitución que puyé ta La Estiva pero no i fayé grans cosas. Pero esto maitín per fin m'he decidito. Feba días, en estas vacacions, que querebe ir ta Barrosa a fer qualque foto nocturna, pero entre la galbana e el aire de puerto que no nos abandona, uns días més calient, altros -como hue- més fredo (¿quán nos deixará este puto anticiclón?) no m'animabe a ir-ie. Asinas que ahier decidié que hue farí las primeras luces. Soi salito de casa a la 5:45 d'el maitín (demasiato luego, podrí haber puesto dormir una horeta més) e ta Barrosa que soi marchato. Pro a fes que quan i soi arribato ta'l cul encara yera nuet preta, asinas que a esperar. No i hai nian una lermeta de nieu, ye tot raso e l'unico que pisas, e només en bell trocet, ye chel. Alto sí que n'i hai, pero pa estar a l'altura que somos de l'hibierno, habría a estar tot plen de nieu, e las fotos habrían ganato prou. En he feto bel·launa quan no i heba encara luz, pero como ni i heba luna (yera amagata per la man de Ruego) no han salito bien, asinas que las borraré. Asinas que m'ha tocato d'esperar-me una hora a que arribasen las primeras luces. La temperatura no yera mala, pero l'aire de puerto feba mal estar, creyando una sensación termica prou per debaixo de la que realment n'i heba. El caso ye que ixa luz dura bien poco, asinas que en un quarto d'hora ya yera tot feto e cara abaixo.

U ixo me pensabe yo, perque quan ya yere a'l canto el coche, me miro entazaga e veigo estas preciosas colors, asinas que la proxima vez que i vaya (a veyer se nieva e i puedo ir con las raquetas) habré a tener una miqueta més de paciencia. Podetz veyer es volturnos que i heba con l'aire.
No ye que sía baixato encantato de la vida con las fotos, pero a'l menos m'he sacato el mono que tenebe, dimpués de tantismo tiempo sin fer cosa, ni de montanya ni de fotografía (que no sía a's fillos, prou que sí).

Bueno, deixo d'estraliar ya, espero poder dar-le una miqueta de vida a'l blog, pero como no salgo perque es fillos e el treballo me tienen prou aqueferato, no puedo dar-le la vida que querrí.

Las fotos inaccesibles

2011-11-24T12:31:00.000-08:00

Quánto tiempo feba que no escribibe cosa. Pero ye que no me vaga de salir ta'l mont. Entre el treballo (estianyo tiengo més fayena, a veyer se en uns días se relaixa una miqueta), es críos (sobre tot el borche) e altros compromisos como viaches, bell examen e demés, fa días -talment un mes- que no he feto una sola foto a l'aire libre, e en interiors bien poquetas.
E ye que pa yo aora mismo las fotos son inaccesibles, como esta de Buixaruelo. La veyé dende el camín, e miré de baixar-ie pero i heba un costerizo dreto como un campanal, e me fayó miedo d'ir-ie (¿m'estaré fendo viello? :-D), perque se se me'n iba un piet, astí ya no el contabe. I heba bardo, fuellas banyatas per la plecia de la nuet anterior e mica confianza en no baixar a vueltas u a redolons dica el río. Asinas que habié a aconhortar-me con fer-la dende el camín. E, en tot caso, ye una alegoría de la mía situación actual: querrí ir a fer la foto, pero no puedo.
En fin, dica unaltra.

S'emplirá Mediano?

2011-11-03T13:57:00.000-07:00

No pas tanto, pero hue ha plevito con ganas, e aora torna a fer-lo con tronata. Esta maitinata, quan le dabe el biberón a'l borche a las quatre e media, m'heba pareixito sentir el río. Pero como a ixas horas no sé se soi yo u soi unaltro, el mío cerebro no ha procesato ixa información. Quan m'he levantato a las 7 ya pleveba de firme, cosa que ha feto mientres tot el día dica las 5 de la tarde. A ixa hora se veye que ya heba caito en Pineta 250 l/m2 e el Cinca baixa que fa miedo. Asinas que he pillato la camara e soi baixato a veyer cómo yera la cosa per Las Devotas, e ya veyetz que per Tella tamién ha plevito con ganas, perque ixes churros baixan de la montanya d'ixe lugar:

E el río baixaba tarqual. Aquí ya lleva l'augua d'el Cinca e d'el Cinqueta, dica L'Aínsa encara replegará l'augua de ríos como el Yaga, l'Irués u el Bellos, e de centenars de barrangos e barrangueras:
Quan tornabe enta casa, he cruzato el tunel pa dar vuelta en un apartadero qu ei hai antes d'arribar en La Enfortunada, e chusto antes de tornar a entrar en el tunel, baixa dos barrancos bien pinchos. Este ye A Canal de Rebudet, seguntes m'ha dito un de Badaín que me i he trobato:
E d'unaltra de la que no sabeba el nombre:
E ya el Cinca en Bielsa, antes de chuntar-se con el Barrosa. Ya yera de nuet (las seis e quarto, e ixo que encara no ye hibierno), asinas que le he meso una exposición larga de 30" sin saber se el foco yera bien u no, pero m'ha feto goyo el resultato:
E este cabo de semana estoi que se remata l'agüerro, fotograficament charrando. Dan augua a pozals e nieu a cotas baixas, de 1500-1600. E yo no podré ir a despedir-me d'er :-(
No s'emplirán es pantanos cn esta augua, pero una miqueta amillorará la situación, ¿que no?.

Buxaruelo

2011-10-30T02:59:00.000-07:00

Ahier estié per primer vegata en la mía vida en Buxaruelo. Quasi (bueno, e sin el quasi) me fa vergonya de decir-lo, pero asinas ye. Per suerte ahier podié quitar ixe "debe". Un zagal de Uesca m'heba ninviato unas fotos de Buxaruelo perque le hebe preguntato cómo iba l'agüerro per astí. Me convenció e ahier amaitiné e cara allá que i fue. En linia recta dende Bielsa no i hai guaires kilometros (Treserols en bell medio), pero en auto i hai una kilometrata buena, una miqueta més d'una hora encara que compartimos güega con Torla.
Pero rai, mereixió la pena. El ciel yera nuble, heba plevito la nuet anterior e las colors yeran hipersaturatas. Deixé l'auti en el Puent Nuevo e puyé caminando per lo GR11 dica Sant Nicolás. No me i trobé con dengún, pos totz es dominguers puyaban en auto per la pista. El camín ye practicament plan e vas per una selva d'abetz e faus impresionant. Vas cerqueta d'el río Ara, e yo que voi siempre como es chizartz salié prous vegatas d'el camín pa poder veyer-lo millor e fer bel·la foto. Recomendable 100%, mismo con nin·nos pos menos el cruce de bell barranco se ha plevito no i hai problemas (i hai un troz d'el camín con una pendient enta'l río considerable, pero parando cuenta no ha de pasar cosa; bai que yo me i llevarí a's fillos). Dimpués de veyer ómo ye, quiero fer la travesía que he ito aplazando dende fa anyos d'ir dende Panticosa dica el Puent d'os Navarros, e se puedo fer-la d'agüerro pos millor, pero no sé se tendré prous baterías e tarchetas de memoria :-)
Dimpués torné per la carretera que puya dende Sarvisé dica Fanlo, e l'agüerro yera impresionant en las selvas d'o barranco Xate (u Xalle).
Pos ixo, que se podetz puyar ta's Pirineus estes días de puent, fetz-lo se queretz veyer las selvas d'agüerro.
E aora, como siempre, qualques fotos:
Esta ye la que més goyo me fa de totas, estoi que resume la esencia de l'agüerro :-)

E, ya pa rematar, la selva puyando enta Fanlo, impresionant, tota la puyata ye igual:
Au, me pareix que ya se m'ha rematato salir a fotografiar l'agüerro :-(

Una miqueta de Pineta

2011-10-28T13:38:00.000-07:00

Per fin esta semana ha feto l'orache propio de l'agüerro: plever, fresco e nieu per las puntas. Soi estato embolicato que no'n podebe més, pero el martes m'escapé un ratet ta Pineta, pero no m'ha vagato de meter-me con las fotos dica hue.
Pos ixo, que se fa una semana e uns días fue a fer una gollata ta Pineta con la filla a veyer cómo iba l'agüerro e se me cayó l'alma ta tierra, estes días ha millorato pro, e tos ne deixo bel·la muestra, como siempre.
Es churros de la man pacina mientre i puyabe:
El pico Felquera con nieu, a'l Garién el tapan las boiras:
Quantos churros d'el barranco Lalarri:
La Grota:
E ya en el fabolar tornando enta l'auto:
No podeba faltar el tunel:
E unas venas de fau pa rematar:

Maitín tiengo intención d'ir bien luego ta Buixaruelo, a veyer qué i trobo. Au, salut.

A Garona d'Escuaín

2011-10-22T12:46:00.000-07:00

Fa un par d'anyos, tamién d'agüerro, me'n fue ta Escuaín a recorrer la garona que i hai entre ixe lugar e Revilla. Ye una curseta sin dificultat fisica pero que t'obliga a ir a l'aguait perque no i hai camín e has de fer per trobar es pasos sin foter-te de capeza en el río Yaga. E como estianyo ye de sequera, pos se podeba ir millor, encara que el que ha venito con yo las ha pasatas putas en bel·la ocasión per no estar feto a mover-se en ixas pinganetas :-) De totas trazas no ye un puesto apto pa totz, perque i hai pasos periglosos e quan baixa muta augua te puetz foter en una embarcata de las buenas.
I somos itos a fer fotos, e n'hemos fetos. Pero pa yo ye un puesto, més que fotochenico, pa ir-ie a disfrutar. Posibilidatz fotograficas n'i hai, pero no pas tantas como en Ordesa, Pineta u Anyisclo. Ah!, Anyisclo. Dimpués d'haber-lo visto como el veyé el sabado pasato, creigo que estianyo pocas cosas millors i podré veyer :-(
Pero ixo rai, hemos pasato un rato buen, hemos caminato una miqueta e nos lo hemos pasato bien, que ye d'el que se tracta. Como siempre, tos ne deixo fotos, pero no me convencen guaire (creigo que A Ripareta ha deixato el listón muit alto he he).
Os vivers d'o Campillón:
Una altra d'Os Vivers, enta abaixo:

En las dos l'augua més que cremata ye sucarrata, pero i heba que meter tiempo d'exposición perque no i heba guaire luz.
Quan ya arribanos enta la luz, nos han regalato este inte tant colorito. He prebato una cosa nueva, que m'ha amprato el zagal que veniba con yo, que ye un filtro de densidat neutra de no sé quantismos pasos; bai, que per lo visor no se i veyeba ni pa churar. Pero el resultato no ye mal:
La misma, pero como la exposición yera de 30" m'ha dato per ir movendo el zoom, fateras que se t'ocurren:
E esto tenenos río entalto mientres arribaba el sol:
E ya poca cosa més, menos uns contraluces a's caducifolios. Dimpués la luz ya yera muit plana.
Un fau:
E un acirón destacando sobre es faus:
Au, ya ye prou

He trobato l'agüerro

2011-10-15T13:51:00.000-07:00

Ahier de tardes marché con la filla mayor a mirar cómo yeran es fabolars de Pineta. Quasi se me cayen es collons ta tierra. Nunca no el hebe visto tan malament como estianyo: en la man pacina ya son quasi pasatos e no baixa una lerma d'augua per es barrancos, per lo río baixa mui poqueta augua, no trobas faus amarillencos, quan caminas fas levantar polvo d'el ixuto que ye tot. A'l cabo e a la fin un desastre.
E baixando enta la Villa yere pensando en amaitinar hue e marchar enta Tella a fotografiar Sant Chuan-i-Pablo con la luna plena mientres le daban es primers rayos de sol e dimpués ir ta la Comuna a veyer es chopos. Pero decidié de dar-me una zaguera oportunidat con un puesto t'an que voi totz es agüerros: A Ripareta, en el Canyón d'Anyisclo.
Soi salito de casa a las 5:30 perque querebe tornar luego. He prencipiato a caminar a las 6:15 (pareix que ye cerqueta pero ixa carretera ya sabetz cómo ye), e con el frontal en la frent no veyebe la color de las fuellas. Quan soi arribato ta Selva Plana ya se prencipiaba a veyer, e m'he llevato una gran alefría: es faus astí alto yeran en el suyo punto de colors. No baixaba guaire augua per lo Bellos, a diferiencia d'anyatas anteriors que con tantisma augua te fastidiaba las largas exposicions.
Asinas que aquí tos deixo qualque foto que he feto, pero el millor ye veyer-lo en persona. En meto mutas, pero ye que no sé fer tría...
En 200 metros de río me'l paso de pistón. Una de las mías fantasías humedas como fotografo sería baixar tot el río Bellos con cuerdas e la camara en una carcasa submarina. Només de pensar-ie l'angular se me convierte en tele :-D, pero ye Parque, e ixo ye imposible, ya el sé prou bien.
Siento haber de meter la marca d'augua, pero no me fío de las nuevas condicions de blogger.

Aprendendo a escribir

2011-10-14T02:10:00.000-07:00

La filla mayor ye aprendendo este curso a leyer e a escribir, e totas las tardes nos metemos un ratet en casa a repasar el que han feto en la escuela. Pro a fes que en la escuela le i amuestran en castellano (va tamién a clases d'aragonés, pero bien se vale que practican la oralidat perque el que he visto escrito ye en una grafía que no me fa mica goyo), pero tamién aprofito pa que escriba qualque coseta en aragonés :-)

Fuents e Churro Fornos

2011-10-12T13:51:00.000-07:00

Esto maitín soi marchato, unaltra vegata, ta As Fuents de Fornos e O Churro Fornos, salindo dende Badaín. Ibe a veyer cómo iba l'agüerro per astí, encara que no tenebe guaires esperanzas. Mama mía que ixuto ye tot. Per Bielsa ye ixuto, pero ixe camín que va enta Fornos, que ye solaner, ye en polvo. Pero quan cruzas l'Irués e entras ta la ladera orientata enta el norte, la zona de Fornos que ye pacín, ye quasi tant ixuto como el solán. En o Churro Fornos no baixaba ni una lerma d'augua, ni un sacre, brenca, res, gota. Igual que como quan i estié fa uns anyos ya. Pero bai, he feto la cursa e m'he puesto entretener fendo fotos en las Fuents de Fornos, an que sí que baixa augua, pero menos que altras vegatas. De totas trazas, he pinchato la cursa en wikiloc, perque cuento que bell día se rematará esta sequera, e tos recomiendo que i vayatz, perque ye una zona bien pincha, mismo pa ir-ie con es críos perque i hai bien poca puyata e no i hai pasos periglosos.
La primer parte d'el camín va per pinar con caixixos, sabinas, chinipros, buixos,aliagas... La zona de Fornos, una vez que cruzamos l'Irués, ya entramos en la man pacina, con faus, urmos, freixens, moixeras, acirons, abellaneras, uns buixizos enormes, caixicos tamién... De fauna pues he visto chincharanas, chinchiperas, mitos, agateadors, gais... e rastros de chabalín, fuina e esquiruel. Ya veyetz que ye bien entretenito.
E aora las fotos :-D
Asinas yera O Churro:
E aquí an que per un regular nunca he puesto cruzar per lo mangazo d'augua que gosa baixar:

Bien se me'n ha valito que en As Fuents m'he puesto entretener e no soi tornato sin fotos en la tarcheta. No he trobato l'agüerro, pero en uns poquetz metros quadratos he pasato una horeta entretenito:

Esta la he feta perque querebe integrar ixa felquera que se diz en castellano lengua de ciervo (el nombre scientifico ye Phyllitis scolopendrium, e aora el sé gracias a J.M.N.) en el suyo entorno:

Aquí tenetz el track (se punchatz dencima, tos lleva ta la pachina web de wikiloc con la descripción de la cursa):

Feria ganadera 2011

2011-10-05T14:13:00.001-07:00

Este cabo de semana proximo se fará, per segundo anyo consecutivo dende que se recuperó l'anyata pasata, la feria ganadera de Bielsa. Estianyo amés se combina con las chornatas micolochicas (encara que no sé se en arreplegarán guaires, de potrecons u fongos, per la sequera).
Ya tiengo el programa, que he sacato de sobrarbenses (pachina d'obligata visita pa's intresatos en saber qué se fa per este país).

Arredol

2011-10-03T14:03:00.000-07:00

Ya que tiengo el blog deixato de la man de Dios perque no salgo ta la montanya ni foi fotos que no sían a's fillos (e en zagueras ni an ixo), deixatz-me que faya propaganda d'un medio de comunicación en aragonés que i hai en internet. Se diz Arredol e dende aquí les deseyamos una larga vida, perque iniciativas asinas fan honra a l'aragonés.
Entadebant, Arredol.

Un día d'agüerro, e prou

2011-09-25T13:13:00.000-07:00

El sabado plevió. Per fin. Ya caleba, perque con esta sequera no'n saldremos. Pero ixo, el sabado a'l menos fayó un día tipico d'agüerro: plevió la nuet d'el viernes a'l sabado; bell ruixazo de maitins e de tardes debió de plever (no'l sé perque marchemos ta Monzón, anque feba calor) perque quan tornemos de nuet yera tot banyato, encara que en el ciel luciba milars d'estrels.
De maitins salié un rato cara Pineta a veyer se entre las boiras se veyeba bell árbol con la color ya cambiata:

Cal esperar encara, cuento que pa'l Puent d'el Pilar u una miqueta més, pa que l'agüerro impla las nuestras nin·nas d'es uellos de colors. I hai tantismos puestos a on querrí ir e no me vagará...
De tardes baixemos ta la tierra plana a pasar calor, e quan tornemos no i heba luz en la nuestra carrera, e se viyeba un ciel impresionant. Asinas que cambié de plans. El domingo tenebe pensato puyar ta Rubinyera, pero decidié d'ir ta Espierba a mirar de fotografiar el ciel. Amés, contabe con que i habría boira enn'o fundo de la valle, e asinas estió:

Ahier e hue y a torna a fer calor (encara que esmaitins son bien fresquetz), pareix que a primers d'octubre ya fará l'orache que ha a fer.

Punta de las Solas

2011-09-18T07:40:00.000-07:00

Encara que en la mayoría d'es mapas amaneix como Punta de las Olas, foi caso a'l de PRAMES, que encara que tamién tienen bel·la error (sobre tot per "rearagonesizar" toponimos que no cal, como el Barranco Montiello quan ye Montillo < MONTICULU, en Bielsa), en qüestions toponimicas, son es millors, e ixo que Alpina pareix que ye fendo-se-ie en zagueras. Pos ixo, que astí pocas olas i hai, encara que en es suyos tiempos fues fondo marín (e se veye fosils per tot).
Como querebe decir, aora que ya pareix que fa l'orache que habría a fer a metat setiembre, no querebe despedir las cursas veraniegas sin fer un 3000, e trigué un que ye de fácil puyar se yes una miqueto feto a caminar per la montanya. La ideya orichinal yera de puyar ta'l Pico Anyisclo u Soum de Ramond (¿veyetz? ye més conoixito el nombre inventato que el de tota la vida), pero i heba qualques inconvenients.
El primer ye que llevo una semana con insomnio, como feba anyatas que no'n tenebe. Me desperté a las 2:30 sin rebel per medio e no me torné a dormir.
El segundo ye que me feba mal un dedo d'el piet dreto.
E el tercer ye que me feba mal l'anca izquierda.
Total tot un quadro pa puyar a fer un 3000. Con tot e con ixo, a las 6, farto de cambiar de canal d'el TDT e veyer astrologos per tot arreu, fue a prebar suerte. Ya hebe deixato apuntato l'itinerario e las alternativas dependendo de las fuerzas que tenés.
La puyata ta la Collata Anyisclo me costó una miqueta més que altras vegatas. Me fallaban las garras, no pas es livianos (buen sinyal). Me costó una miqueta menos de 3 horas, quan se soi en forma en 2:15 u 2:30 soi alto. Pa una vegata que no me llevabe el tripode pensando en el desnivel, salió un amaneixer medio nuble que chunto con la boira que i heba en el fundo la valle podrí haber feto buenas fotos con es filtros. Pos jode-te e fe-las a pulso sacrificando u las altas luces d'el ciel u las baixas de las montanyas. Mecagoendiós, siempre llevo el tripode e quasi nunca el emplego, e pa un día que caleba llevar-lo...
Arribo ta la Collata Anyisclo e veigo que prencipian a fer-se las boiras que anunciaban, en principio iba a tronar de tardes, pero nunca no se sabe. Va, que ye la zaguer puyata que faré estianyo (en teoría), imos ta las Solas. Emprendo el camín per la GR-11, la que va per alto, e china chana, pos la horas de suenyo se notan (millor dito, la falta d'eras) puyo ta las Solas. 3009 metros seguntes el mapa e 2999 seguntes el mío GPS, que no va guaire fino pa l'altitut. Se mete la boira, me meto a charrar con uns de Guadalajara que yeran puyatos dende Góriz e que teneban el mismo plan que yo: ir ta'l Pico Anyisclo. Yo les digo que unaltro día será: ye tapato per la boira, fa frío, tiengo una miqueta de prisa e, sobre tot, ya voi una brinquerrina chusto de fuerzas e tiengo que pensar en la baixata. Ers deciden d'ir-se-ne tamién cara abaixo.
Ixo de las Solas ye el reino d'el karst, no m'extranya mica que la Fuent Blanca d'Anyisclo lleve siempre augua.
La baixata la foi per la lera de la cara norte, perque alcurzas una barbaridat (pero no i puyarí ni de conya) e ya cara casa. Per lo camín de la Collata enta abaixo adelanto a tres parellas que debeban de venir de Góriz, entre eras a dos panolis que m'hebe cruzato en la misma Collata quan yo puyabe. U son muit lentos u yo soi més en forma d'el que me pienso.
E aora las fotos correspondients.
Amaneix quan salgo d'el fabolar; enta Suelsa e Fuesa:

Una miqueta més tarde, con l'angular aprofitando las boiras. Abaixo a la izquierda se veyen las montanyas d'antes:
S'iluminan las boiras d'el fundo de la valle:
Mirando enta Anyisclo en la puyata:
E enta Ordesa dende la Punta:
Ya hebe visto esta pintura l'anyo pasato de bell mexicano que las pasó putas puyando ta la Collata Anyisclo dende Pineta. Ya tos hebe dito que ye d'es piors puyatons que conoixco:
Un "paligonero" aragonés habría escrito: "Japuta la costera, co"
No enlazo encara el track perque wikiloc no marcha. Quan el pinche, pratz cuenta perque el GPS se trestucó a'l principio. Cal seguir el GR11 tot el rato dica las segundas cadenas, an que el deixaremos. De totas trazas, estoi que a partir de metat de puyata ta la Collata Anyisclo ya ye bien.
Ya marcha wikiloc, aquí tenetz el track

Cursa Puerto Viello-Barrosa

2011-09-12T07:04:00.000-07:00

L'anyata pasata ya fayé una entrata sobre esta cursa; e estianyo la he tornata a repetir, pero con el GPS (aquí tenetz el track, no ye que sía difícil, pero se nunca se mete la boira...). Asinas que no escribiré gran cosa més. La diferiencia ye que l'anyo pasato la ficié de tardes e el sabado podié ir-ie de buen maitín, perque dimpués tenebe una lifara.Tos ne deixo bel·la foto, podetz veyer la diferiencia en la cantidat de nieu que i heba d'un anyo t'altro (encara que las fotos de hue son d'el 10 de setiembre e las altras son d'el 12 d'agosto). Quan yere almorzando en la punta d'el pico, me pasó un trencauesos a 20 metros, pero entre que deixabe el churizo, el pan, cambiabe l'obchectivo (llevabe l'angular e querebe meter el 100 macro, que tampoco no ye que valga pa ixes menesters), pon-te bien e esta-te quieta, el paixarico ya yera bien leixos...
Una anvista enta Fuesa:
Arribando ta'l Puerto, una anvista enta l'ibonet (en realidat ye una baseta una mica gran) e la sierra que desepara de Barrosa:
L'ibonet e el río d'el Puerto (l'altro día me deciban uns güelos que ixo de la Pinarra no s'heba dito nunca):
Anvista dende el Pico:
E aquí con l'angular:

Ibons de Barroude:
I hai buenas anvistas enta Rubinyera e l'Almunia. Baixcando ya enta Barrosa veyé l'esbarre d'el camín de las Pardas, que fa anyos que quiero fer. No i fue perque m'esperaban a comer... Unaltra vegata será. Esta foto ya ye prou abaixo d'el Puerto, i hai una buena puyata dende la capanna de Barrosa dica el puerto:
En la Ribera Barrosa no fayé garra foto, tenebe prisa e la sequera se nota. En l aparte final no sé qué han feto en la canal que han meso maquinaria e han feto una esferra important, con lo maja que ye la valle Barrosa :-(
E aquí tenetz la cursa sobre foto aerea per se tos anima a fer-la:

Ahier en Anyisclo

2011-08-23T22:50:00.000-07:00

Ahier fayé una cursa que feba meses que tenebe pensata. En realidat habrí a haber marchato hue con un zagal d'aquí de Bielsa a fer el camín de las Pardas, pero como anteahier daban tronatas decidiemos postponer-la pa unaltro día. Asinas que enganché el macuto, me calcé las botas e marché enta el Refuchio de Pineta pa baixar tota la Garona Anyisclo dica Sant Úrbez. Astí en el refuchio emprendié la Puyata (asinas, con mayusclas) ta la Collata Anisclo, que ya la he feta quantas vegatas, e contina pareixendo-me un d'es puyatons més durs que conoixco. Asinas pues, en dos horetas e media me clavé en la Collata, disfrutando de l'anvista enta Pineta, Anyisclo e dellá, pos se viyeba mismo Guara.
Esta foto ye dende l'esbarre de Tormosa, quan las boiras tamizaban la luz d'el sol, enta Fuesa e Suelza:
Lalarri, La Estiva e Pineta a's pietz:
Anvista dende la Collata enta abaixo; a'l fundo se i veye Guara:
Antes d'arribar ta la Collata adelanté a dos franceses que iban ta Góriz e que el puyatón se les yera fendo desmasiato largo. Tornemos a coincidir alto e me preguntoren per án ir-ie. Les dicié las dos opcions que teneban: u marchar per debaixo de Punta las Solas u baixar dica la Fuent Blanca e tornar a puyar. Pa yo la millor opción ye la de la Punta las Solas, perque has de ganar una miqueta més d'altura e dimpués ya vas a piet plan, pero quan les expliqué per án iba ixe camín se les fayó cara de miedo. A la fin se decidioren per baixar, pero me pienso que s'arrepentirían, perque pierdes muta altura pa tener que tornar a ganar-ne.
Prencipié a baixar e ya ascape se veye el naiximiento d'el río Bellos. Ya dende es primers churros promete que va a estar un d'es ríos més pinchos que yo conoixco, se no el que més. Las primers sallents (permititz-me que utilice este termino que creigo que no queda so que en toponimia) ya marcan l'espectaclo que nos amostrará dimpués.

A escape ya arribas ta la Fuent Blanca, que ye impresionant, tanto per lo churro como per lo puesto an que se troba. E ixo que este verano ye estato muit ixuto. No quiero ni pensar cómo será quan viene temporal u en mayenco. No ye el churro d'abaixo, ye en bell medio de la montanya:
E a partir d'aquí ya prencipia a meter-se en el fabolar e quasi no fayé fotos perque m'estimo més d'esperar-me a l'agüerro. Pero aquí e aquí tenetz fotos d'el fabolar d'Anyisclo d'agüerro d'anyatas anteriors.
Flora n'i heba poca a estas alturas, sobre tot tuera, pero en chunio en tiene que haber-ie a punta pala. Ixo sí, i hai uns faus e teixos en Anyisclo que son enormer. E de fauna pos veyé trencauesos, vutres, un primilla encorrendo un paixariquet, una aguadera a 2300 metros, guardafuents, marmotas, chizartz, una pila de paixariquetz , etc.
Una cursa recomendable, perque ye la hostia. No puedo pinchar el track perque a metat de camín me quedé sin pilas en el GPS :-(, pero asinas ya tiego desincusa pa tornar-ie.
Ixo sí, se la fetz cal fer combinación d'autos u quedar con bel·laún pa que tos replegue en Sant Úrbez. A yo me costó 8 horas parando a fer fotos en la parte d'alto, a comer e ixas cosa, pero tos la recomiendo. No soi guaire contento con las fotos, pero la luz yera la que yera. No fan chusticia a'l puesto, asinas que se tos fan goyo, contatz se el veyetz con es vuestros propios uellos.
Salut.

Perseidas 2011

2011-08-15T14:01:00.000-07:00

Estianyo m'he llevato a la filla mayor a veyer Las Perseidas ta La Estiva. Perseidas no'n veyemos garra, perque i heba luna plena e ademés yera prou nuble. De totas trazas estió bien. En prencipio inos a ir-ie es dos solos, pero s'apuntoren dos parellas més con es suyos fillos, e pasemos una buena nuet. Unaltro anyo será el veyer las fugaces, pero fer nocturnas en buena companyía, charrando e con uns vasetz de vin, no ye mica mal, e ademés con ixa anvista.
Antes de fer-se de nuet, quan ya lusquiaba, prometeba buenas luces perque yera nuble enta l'oeste, e no defraudó:
Dimpués, ya quan yera de nuet de tot, se fació el que se podió:

E el rebel sonó bien luego, pero unas boiras enta l'este nos privoren de que las puntas de las montanyas se metesen royas como en altras ocasions :-(
Au, salut
De totas trazas, ye un puesto bien pincho pa ir-ie a pasar una nuet, asinas que a veyer se a l'altro anyo acompanyan una miqueta més las condicions.

El nuevo director cheneral de cultura

2011-08-10T06:10:00.000-07:00

Tenemos la suerte en Aragón que en drento de cada un de nusaltros i hai un filologo. Asinas, totz se permiten tener e chenerar opinión sobre temas que, en altras zonas an que no predomina ixe chen que fa tener una licenciatura en Filolochía Romanica (ers se lo pierden) ipso facto, per un regular habrían a estar reservatos a's especialistas. Per meter un exemplo que goso decir: yo goso fer a'l cabo de l'anyo una pila de kilometros, pero no per ixo puedo meter-me a discutir e muto menos enmendar la plana a un mecanico u a un inchenier que disenya autos. Pero aquí no, como decibe antes, en Aragón la titulación en filolochía la tenemos dende el naiximiento. E asinas podemos leyer opinions como la d'el nuevo Director Cheneral de Cultura d'el Gobierno d'Aragón.
Pero no solo sabe de luengas, opina de tot el que calga. Como veyetz, fa uns analisis politicos mesuratos, en la linia d'el tamién aragonés Jimenez Losantos. Tot un exemplo de respeto, imparcialidat e falta de tendenciosidat.
Ya veyetz qué futuro nos espera estes quatre anyos (como minimo) a's parladors d'unas luengas que seguntes er no existen (¿?), a's "titiriteros" (dito con ixe significato despectivo d'el que feba gala Jiménez Losantos) e, en cheneral, a totz ixes culturetas que forman parte de la "conspiración judeo-masónica" que deciba un hombrichón baixo, con mostaixa e voz de pito (seguntes Humberto-Vadillo, dio a este país 40 anyos de paz. Soi ito ta'l diccionario de la RAE e en garra acepción he visto que paz quivalga a dictadura).
En fin, vae victis
E pareix que ha borrato las perlas literarias que teneba en el suyo twitter. Pero como internet ye como ye, no se puede borrar tot, e siempre i habrá información:

HumbertoZgz Si eres capaz de presentarme un sólo hablante nativo de aragonés (no modalidades) os invito a comer en El Cachirulo.
HumbertoZgz Dicho de otra forma el aragonés existe como el Klingorn. Es un invento (y estoy seguro de que el klingorn lo habla más gente)
HumbertoZgz Me parece bien q la gente se entretenga con el aragonés o el Alto ëlfico, me basta con q no quieran pagarlo con mi dinero
HumbertoZgz En Aragón hay más hablantes de Klingorn que de “lengua aragonesa” q para empezar no existe.
HumbertoZgz Van a enseñar “lengua aragonesa” en la “Facultad” de Huesca. Cada día más tontos.

(sacato de purnas)

Swertia perennis e Euplagia quadripunctata

2011-08-06T13:42:00.000-07:00

Esto maitín he puesto escapar-me un ratet (el precisabe, e prou) e soi ito ta la Vall de Chistau con un amigo que ye per astí de vacaions. Entre mutas altras cosas, hemos puesto fotografiar esta palometa nocturna, la Euplagia quadripunctata (ixe nombre me'l ha dito el mío amigo malas que la ha vista, ye una enciclopedia con patas ixe hombre):
Dimpués somos marchatos a fer una gambateta per un pinar quasi virchen, que yera precioso. E ya antes de tornar ta casa, somos estatos una miqueta con la Swertia perennis, que la hebe vista l'anyo pasato en un fontanal en Canal Roya (Canfranc), e hue he puesto estar més tiempo con era. Creix en las pauls, e ye de la familia de las chonzanas, encara que no'n pareixca. Pero sobre tot, ye una flor bien pincha, con una color preciosa. Tiengo que mirar en bell puesto per aquí per Bielsa a veyer se en trobo (e ya en tiengo un par, de puestos, en·n'a capeza a ón ir):
Au, dica unaltra.
P.S. Quasi m'olvido, caminando per lo pinar m'he trobato una chicota familia de chabalins (la mai e dos crías). Soi estato un ratet fotografiando-la sin que era me guipás, pero quan m'ha visto m'ha fotito un bufito que ha espantato a las crías e han salito a las quatre suelas.
La pena ye que me pensabe que llevabe l'obchectivo con la maxima focal, e el llevabe con la minima, asinas que se m'han quedato pro leixo (e ademés a contraluz e con ISO -no pas ixo- bien alta). Pareix que el mío amigo atraye a esta chabalina con las suyas feromonas, perque ye el segundo día que le sale per la misma zona. Pero rai, tos ne deixo una foto, chusto quan m'ha visto (no sé se per lo ruido de l'obturador, l'ablor que febe u a qué):

Una nuet a'l raso

2011-07-31T12:16:00.000-07:00

La nuet d'el viernes a'l sabado estié dormindo a'l raso. De tardes hebe charrato con un amigo fotografo que ye de vacacions per aquí cerca (tos recomiendo veyer qualques fotos suyas, aquí e aquí) e yenos discutindo se puyar a fer nocturnas u amaitinar pa fer l'amaneixes. Total, que conseguito el permiso de las respectivas chefas, decidiemos de fer-lo tot de vez e dormir en La Estiva.
La nuet, en prencipio, yera propicia pa fer fotos d'estrelas: mica luna, ciel raso e no guaire contaminación luminica (sí, desgraciadament aquí tamién n'i hai). Pero debeba d'haber boiras finas en las napas altas de l'atmosfera, perque no se veyeba tantas estrelas como esperanos. Total, que quasi totas las fotos nocturnas que fayé se'n irán a escape ta la papelera.
Aquí el carro dencima de La Capilla:
Como podretz veyer, quasi no se veye estrels, e més se el contimparatz con esta foto presa d'hibierno tamién sin luna.
Asinas, que como no'n vale la pena de veyer-ne més, paso ta l'amaneixer. Dimpués d'adormir-me sobre las 2:30, me costó de mover a las 6:15. Se i hes habito bel·la boira per la zona de Treserols, el ciel habría ganato, pero con tot e con ixo, estió bien:
Una vegata que ya se yeran pasatas las luces royas de l'amaneixer e que s'homocheneizoren las luces, encara fayemos qualque paisache més, pero decidiemos ir a mirar de fotografiar qualque chizart u marmota. En veyemos prous d'es dos bichos, pero no podemos amanar-nos-ie tot el que querenos, e ixo que inos bien armatos (d'obchectivos, prou que sí); pero qualque cosa se podió fer:
Mientres esperabe a veyer se quereba salir la marmota d'el suyo cado, aprofité p amatar el tiempo afotando paixariquetz que se m'amanaban, como este bisbita alpino:

U esta codirroya:
U esta collalba roya:
E ya pa rematar, que se no me sale desmasiato larga, a ratos bufaba una miqueta de puerto, asinas que la gabacha (asinas se diz per estas montanyas a la boira que pasa per es puertos debiro a l'efecto Föhn) acucutiaba per lo Puerto la Lera e Montaspro:
Au, se encara hetz leito dica aquí... Salut

Parnassius apollo e Epipactis palustris

2011-07-23T13:53:00.000-07:00

Pos ixo, que hue de maitins he puesto escapar-me un ratet con un amigo a dar una vuelteta per la montanya. Caminar no hemos caminato guaire perque hue l'obchectivo yera la Parnassius apollo, una palometa bien pincha d'estas -e altras- montanyas. Asinas que somos itos ta un puesto de la valle an que sabenos que n'i heba, e ya hemos aprofitato pa puyar una miqueta. Como que ye una especie considerata vulnerable, me permitiretz que no dé la suya localización, encara que tampoco no ye garra secreto e yo la he vista a menuto e per mutos puestos.
L'anvista, tot e que no me sosprende perque ixas montanyas las tiengo muit vistas, yera bien maja.
Dimpués d'estar veyendo qualques marmotas e collalbas, somos itos a veyer el nuestro obchectivo principal de hue, esta belleza:

E ya pa rematar el maitín somos baixatos a veyer la Epipactis palustris, una de las zagueras orquidias que podremos veyer per este anyo. No fue mica fácil: l'aire, es repetens, es tabans e una colla de més de 50 críos dando guerra per lo río no nos facilitoren la fayena.
E per aora ye prou, no sé quán podré tornar a salir :-(

Goodyera repens

2011-07-18T14:16:00.000-07:00

Ahier de maitins fue con un amigo a mirar una orquidia con nombre de pneumatico: la Goodyera repens. Nos costó una miqueta de trobar-la, pero a la fin el consiguiemos. E nos costó no pas perque no n'i hes, se no perque son chiquirrinas que no'n pueden més. Ya conoixco un puesto an que ir-ie ta l'anyo que vien, perque ademés que ye cerqueta de casa (encara que nunca no ib'yere estato), ye bien majo ixe lugar. Tos traduzco la información que da Wikipedia d'ixa flor (ya disculparetz perque el mío dominio d'el lexico vechetal ye infame):
Goodyera repens ye una especie d'orquidia d'el chenero Goodyera. Goodyera repens se troba en puestos isolatos en selvas e pauls d'Europa. Ye una planta rara, pero ye la orquidia més común en Escandinavia. Tamién se troba en Canadá e el norte d'Estatos Chunitos. Se trata d'una especie cosirata en la mayor parte d'el suyo habitat.
Caracterisiticas: Se trata d'una planta perenne que alcanza un metro d'altura [no pas aquí, que no arriban ni de conya ta'l plamo] que ninvía ocasionals finos tallos per dencima de la superficie. Floreix de verano, e tiene las flors dispuestas en una espiral. estas flors chiran cara ta'l sol [no sé, pero las que yo veyé yeran totas en una mosquera rodiatas de molsa, asinas que poco pueden chirar enta'l sol, encara que quan les fayé las fotos yera la vispra d'el 18 de chulio]. Igual como altras orquidias, existen en simbiosis con micorrizas, un rizoma cubilla a'l fongo (d'el chenero Rhictozonia, en este caso). Las micorrizas aduyan a la orquidia a absorber e asimilar es nutrients. Esta orquidia ye polinizata per bombolons, el que permite las suya reproducción sexual. Tamién puede reproducir-se vechetativament. Las suyas semillas son probablement las més chicotas de qualsequier planta.
¿Hetz entendito cosa? Yo no pas tot he he. Con tot e con ixo, tos deixo un par de fotetas d'esta chiquirrina orquidia que no hebe visto en las mías guías de flora d'es Pirineus:
Pero no tot son flors en esta vida, perque encara que feba un orache muit malo pa fer macro (muto aire), ancara podiemos fotografiar qualque palometa como esta Zygaena
E una ¿Mellicta deione?
Au, salut

Amaneix

2011-07-18T13:49:00.000-07:00

A la mía filla le ga goyo de tornar la color a las fotos en blanco e negro con Photoshop, asinas que le'n apresto quantas e la deixo que las "pinte", que diz era. Asinas, rechirando en l'archivo, he visto esta que fayé fa un mes se fa u no fa quan ibe a troballar. Las boiras e la orientación este feban un contraluz bien pincho enta la Penya Montanyesa e el macizo de Cotiella. Aora voi a amanar una nueva entrata con fotos d'el domingo, tant e mientres amuestro esta, que me fa prou goyo.

Es Ibons de Barleto

2011-07-11T08:23:00.000-07:00

El sabado podié escapar-me a fer una cursa per un troz de la montanya de Bielsa que no conoixebe: la de Barleto. ye un caso curioso, perque encara que ixes ibons viertan auguas cara Bielsa, perteneix a la Comuna de Traseto (Sin, Senyes e Serveto). Talment ixa montanya entrás en la venta de mont con la que se pagoren la casa la Villa e la ilesia de Bielsa.
Pero rai, la parte baixa perteneix a Bielsa, e l'anvista dende es ibons ye espectacular: Cotiella (se veye án ye la Basa la Mora), Penya la Una, Lierga, parte de la Valle Laspunya, cillo de Bachaco, la man pacina de Pineta, Treserols, Astazus, Rubinyera, L'Almunia, Guara, Santa Marina... Pero clar, son a més de 500 metros d'altaria.
Es Ibons son muit pinchos, encara que a yo el que més goyo me fa de totz es que conoixco ye l'Ibón de Plan. Pero estes tamien tienen bel·la coseta. E la puyata ye dura: en primeras el camín d'el Cau que, encara que ye marcato como PR, ye zarrato de barzas, lirolers, ixordicas, carroneras, buixos... totas las plantas que punchan (asinas llevo yo es brazos e las piernas de rastonazos). Quan prencipias a puyar per la ribereta Barleto ya se i veye abetz, pins, chordoneras a punta pala. Pero quan sales ta la tasca... yo nunca no hebe visto tantismas siemprevivas. Tamién i hai muta més variedat de flora (per eixemplo orquidias). E chizartz, mama mía si n'i heba. En veyé més de 100 en la zona alta (per la selva en espanté un, e dimpués un corzo se vengó fendo-me foter un blinco quan m'escanyutó a 6 u 7 metros).
Una vegata que yes alto en es ibons (plens de guardafuents), bien en vale la pena d'asomar-se ta la crencha que da ta l'Ibón d'el Cau (se no tenetz vertigo), perque las vistas son espectaculars.
Aquí tenetz el track, pero paratz cuenta perque el desnivel ye dur e i hai trozos que cal trepar e destrepar una miqueta. No me foi responsable, yo deixo el camín per lo que puyo e baixo. Qui quiera emplegar-lo, ye responsabilidat suya :-)
E el mapa

Una anvista enta Pineta puyando:

Una foto d'el barranco Barleto, ye quasi tot asinas, una sucesión de chicotz churros:
La capan·na e el corral de Barleto cerca ya d'es Ibons:
L'ibón baixo de Barleto:
Una parte de l'ibón alto, debaixo de Suelsa:
El Cau a's pietz, Fuesa, Treserols, Rubinyera, L'Almunia, etc.:
Enta la Vall de Chistau e Cotiella, con Maristás en segundo termino:
Au, salut.

Primer ruta pa GPS: Pineta-Ibón de Marmorés

2011-07-08T07:28:00.000-07:00

Ya tos dicié fa uns meses que m'hebe comprato un traste nuevo, el GPS. Encara que no tienga guaire tiempo ni oportunidatz d'ir ta la montanya, per fin l'altro día fayé una ruta e me'l llevé. Aquí tenetz el track pa escargar-lo, no sé se soi el primer que puya las descripcions d'es waypoints en aragonés. Pero se tenetz un traste d'ixes e tos queretz baixar el track, podetz fer-lo. Ye una cursa an que no te puetz cacegar a no estar que alto en Marmorés se te meta la boira preta. Asinas que se fetz montanya e tos la queretz escargar per se a un caso, la tenetz a la vuestra disposición :-)

Maitín espero poder fer una cursa menos trillata, se consigo rematar-la (perque ye dura e aora mismo no soi en forma) ya tos meteré l'enlaz e fotos.
Tos deixo unas fotos de fa uns anyos, quan puyé ta's Astazus.
L'ibón encara chelato a primers de chunio:
E una anvista dende el Volant de Marmorés cara abaixo. Enta la izquierda, es pratos d'abaixo ye Lalarri, e es d'alto La Estiva; a man dreta, Feixa Tormosa e tota la Man Pacina:

martagón e més

2011-06-29T12:33:00.000-07:00

Ahier de tardes me'n puyé ta Pineta un par d'horetas, la tarde da pa'l que da (e no te'n queixes que ya ye pro he he). Iy'ibe a veyer se ya heba floreixito el lirio martagón, perque el domingo me'n puye ta Marmorés (mama mía, qué floixo soi, dende que naixió el nin·no no hebe feto montanya en condicions, e ademés d'el puyatón me pesaba la mochila como un buei, total que i puyé tot l'equipo e quasi no fayé fotos de remallato que yere) e quan baixé viyé que no les quedaba guaire. Ya n'i heba en flor, e ixo que estoi que la caloriza que ha feto estes días n'ha cremato quantos, perque se'n veye matas que no van a fer flor. Pos ixo, que bel·laún en trobé, pero siempre en bell medio de lirolers, carroneras e demés maticals punchants que me feban foter uns botes d'el copón mientres mirabe l'enquadre propicio. Pero no me'n baixé guaire contento perque no tenebe guaires opcions pa enquadrar. pero bueno, ya miraré d'escapar-me unaltro rato a veyer se en trobo bell altro que me dé més opcions.
Tos deixo bel·la foto d'el martagón, e de qualque cosa més que me trobé per astí.

E ya quan baixabe me trobé una Cephalantera rubra que nunca no le hebe vista en drento el Parque.
E ahier veyé una orquidia a'l canto el río debaixo de Bielsa, a veyer se maitín deixa de bufar l'aire e le puedo fer bel·la foto en condicions pa poder identificar-la (u que me la identifiquen).
Salut.

Chunio, el mes de las flors

2011-06-21T14:23:00.000-07:00

Esto maitín, camín d'el treballo, he parato un ratet an que trobé la Ophrys apifera, e he trobato més orquidias e altras flors con las que m'he he entretenito perque me vagaba una miqueta. Feba una miqueta d'aire, asinas que no he puesto fer tot el que querebe, pero per poder estar una miqueta concentrando-me en las fotos e olvidando el de demés, ya ye pro pa relaixar-me.
E tamién aprofito e puyo qualque foto que fayé el sabado de maitins per aquí per la valle Bielsa.
De hue ye este gladiolo, que fa días que en veigo per las marguins e hue he trobato buen fondo e buena luz, encara que he tenito que tirar de flash pa contrarrestar el contraluz:
Unaltra Ophrys scolopax que m'he trobato cerqueta de l'anterior:
Una parella d'escarabaixos despedindo-se de la primavera u celebrando l'arribata d'el verano. La foto no ye buena perque feba iare e sale una minqueta trepidata, pero la puyo perque salgo en la foto, ¿me i veyetz?:
Esta cuento que ye una orquidia, u a'l menos en pareix, pero no consigo meter-le nombre perque no i sale (u no la sé trobar) en la mía guía:

Una palometa encara medio durmierta perque no l'heba dato el sol:
E aora unas orquidias de Pineta. prencipio per la Dactyloriza fuchsii:

Esta tamién ye Dactyloriza, pero majalis:
Au, estoi que ya ye prou per hue. Salut.

Unas orquidias

2011-06-15T13:50:00.000-07:00

Ya fa qualque semaneta que puedo fer bel·la foto a las orquidias, pero como encara no tiengo instalato PS en el portátil (no tos pensetz, que toco guaire las fotos, pero tiro en formato RAW, treballo las fotos con DPP e el preciso pa fer-las chicotas pa pinchar-las en internet) no podebe fer cosa. Pero l'estudiet ya no el tiengo "ocupato" per uns días e hue he puesto posar-me-ie. Ademés bien contento, perque ahier trobé una Ophrys , que feba anyos que querebe veyer e no la trobabe per la mía zona. Asinas que hue, indo enta'l treballo, he sacato es trastes d'afotar e aquí la tenetz. Ye preciosa pero muit chiquirrina (no sé per qué, yo me la entrefilabe més gran):
Podría estar un hibrido entre la apifera e la scolopax? Me trestuca ixa punteta verde d'el labelo, perque ye més propia de la scolopax, pero el dibuixo ye de la apifera. No el sé, qui el sepa que el diga. Pero consultata unaltra guía de flors, me decanto per la scolopax.
Tamién ya fa un mes que tenié la mía cita anual con las Cypripedium calceolus, encara que ni an he puesto adedicar-le la mitat de tiempo que l'anyo pasato... Pero rai, ya arribarán tiempos quan me vagará de poder estar més tiempo con eras:
Una d'ixas guías de flors que tiengo ye esta: Guía de flores pirenaicas para niños y niñas. E soi ito bell par de días con la filla a mirar flors e a identificar-las (podetz veyer el blog d'un d'es autors aquí). Esta, estoi que ye una Dactylorhiza maculata, la trobemos en el Cornato (n'i hai una pila) e no fayé una foto cheneral, seno un detallet:
E esta tamién ye d'el Cornato, cuento que ye una Dactylorhiza fuchsii:
Esta altra no sé se ye la Dactyloriza elata u la majalis...
E ya pa rematar, el domingo me podié escapar un par d'horetas a afotar el Lilium pyrenaicum de la entrata anterior, e baixando, ademés de fotografiar la orquidia anterior, m'entretenié con la humedat:
A esta zaguera, le digo el punto e la i :-)

Una rapideta

2011-06-12T13:21:00.000-07:00

Dica que no recupere es míos dominios (l'estudiet con l'ordenador de sobremesa, perque el tiengo ocupato quasi tot este mes), no puedo treballar las poquetas fotos que voi fendo. esto maitín he feto una escapateta rapida a veyer el Lilium pyrenaicum, per si nunca yeran ya floreixitos. E he tenito suerte. Tos deixo la unica foto que he puesto treballar con PS. A veyer se me'l instalan luego en el portátil e puedo amostrar-tos qualque cosa intresant que he feto estes días. Salut.

Dimpués de plever

2011-05-28T16:04:00.000-07:00

Esta semana pasata ye estata de tronar de mediodías e de tardes. Bien se vale que i hai ratos que se'n deixa e que puedo sacar a'l borche chicot (la gran viene quan quiere) a pasiar-lo per Picaruela. L'altro día me i llevé la camara (ya tenebe mono) e mientres el nin·no dormiba, yo ibe fendo qualque foto. Las condicions de luz no yeran las millors (e llevabe el polarizador, que siempre quita bell paso de luz), e ademés habié a fer-las a pulso, asinas que tiré de sensibilidat, per ixo i hai tanto ruido. Ya perdonaretz :-)
El mundo d'es cucos, cuquetz e cuquetas ye desconoixito de tot pa yo, mira que n'i hai, pero me'l paso de pistón veyendo-los.

E tamién bell par de flors de carronera que encara teneban bel·la gota d'augua.

Au, salut.

El pavo

2011-05-19T14:11:00.000-07:00

Dimpués d'ir cruzando diferents informacions (perque dengún no suelta parola) e de patiar-me una zona concreta de la montanya, per fin un día trobé es sinyals d'es pavos (las suyas cagatas, principalment) e ya no quedó soque amaitinar e ir ta'l puesto concreto pa aconseguir una foto d'el pavo montesín (Tetrao urogallus aquitanicus). Espero, per lo bien d'el pavo e d'es que vivimos en la montanya, que el decreto que quiere fer el Gubierno d'Aragón con la FCQ (¿ya se les va a rematar el chollo d'el trencauesos?) no vaya entadebant.
Aquí tos deixo la foto d'este precioso animal, en queda pocos, pero como fayan el que pretenden, cuento que en quedará menos, pero de seguras que meten a la chent de la montanya contra l'animal, que no tiene culpa de cosa (no pas como bell politico e bella fundación).

He d'agradeixer a dos amigos la suya colaboración pa poder fer la foto. Gracias.

Os d'Alquezra, mala cabeza

2011-05-02T13:30:00.000-07:00

Ya perdonaretz per l'abandonato que tiengo el blog, pero ye que no me vaga de cosa: entre el treballo e es zagals ni an puedo salir un ratet ta la montanya. E ya perdonarán es d'Alquezra per haber titulato la entrata asinas, pero recuerdo ixa frase d'el libro de mazadas d'Arnal Cavero, ilustre fillo d'ixa villa (¿en ye, de villa?, quemisió).
Pero hue somos baixatos a pasar el día t'Alquezra. Per cada vegata me fa més goyo ixe lugar, e ademés en estes días la carretera de L'Anínsa enta Alquezra ye impresionant. Tot ye verde e vida mires t'an que mires: es campos de trigo, las fuellas nuevas d'es caixicos, es ababols, las diferents flors, es paixariquetz... Pero no he puesto fer garra foto mientres iy'ibe, perque se no no i serí arribato nunca. Pero como no ibe solo, pues entadebant, e ya vendrá primaveras millors.
A la fin no he feto fotos soque en·no lugar, que el han sabito conservar muit pincho, mismo la obra nueva. I heba una pila de turistas, més que no en·n'a montanya, u a'l menos en la valle Bielsa.
Per cierto, que quan i soi arribato i heba una colla d'hombres mosquiando en un bango debaixo d'una olivera, e un d'ers, el més gran, encara charraba qualque coseta en aragonés.
Bel·la foto d'el conchunto dende la Colechiata:
¿Quál tos fa més goyo de las tres?
E el castiello, orichen d'el nombre d'Alquezra (arabe al qasr, `castiello´):
E ya la zaguera dende la plaza, con la colechiata e el castiello:
Me faría goyo de tornar-ie de nuet e fer una panoramica nocturna. Ya se veyerá. Au, dica la proxima, que quí sabe quán será.

Per lo camín de la Cruz de Guardia

2011-03-31T13:39:00.000-07:00

Esto maitín he puesto salir una miqueta ta la montanya. Ya el precisabe, per desconectar e per fer una brinquerrina d'exercicio, que soi metendo-me como un latón dende que he dexiato de fumar (llevo 3 semanetas, a veyer se aguanto...). Soi puyato per lo camín que va enta la Collata de la Cruz de Guardia e la Comuna, pero no me vagaba de puyar dica la misma collata. Asinas que quan he calculato la hora de tornar, cara abaixo. D'alentar voi bien, pero las piernas las tiengo medio enrobinatas, a veyer se cambio ixa situación :-(
E, pro a fes, he aprofitato a fer qualques fotos, no guaires, ixo sí. De flors no'n i heba guaire variedat, sobre tot hepaticas (a las que he feto mutas fotos) e bel·la primula. Sobre tot m'ha acompanyato la banda sonora d'es paixariquetz, que no feban soque cantar, mismo he sentito un picapuercos a'l leixos.
Pos ixo, sobre tot hepaticas:

Pero tamién bel·la foto a'l barranco:

Luna plena

2011-03-19T14:13:00.001-07:00

Diz que hue ye la luna és cerca que no se veyerá en 18 anyos. Yo hue no puedo salir a fer fotos, pero ahier sí que i fue, que la luna no yera plena pero quasi. I heba una luz que se i veyeba sin frontal. E como en i heba tanta, de luz, no caleba fer exposicions guaire largas, con 15 segundos u 20 ya yera prou, encara que tamién en fayé bel·launa larga zarrando més el diafragma. Asinas que i meto bel·la muestra pa que veigatz las diferiencias.
Las dos primeras son fetas dende la presa.
Esta ye a 15 segundos, con una apertura de diafragma de 2'8 e la sensibilidat a 400:
E el mismo enquadre, a sensibilidat 100, apertura 11 e 5 minutos (se fa u no fa) d'exposición. He tenito que aclarir-la perque se veyeba muit fosca.

¿Qual ye la diferiencia? Mutos d'es que gosatz pasar per aquí sabetz més de fotografía que no yo,e no cal que tos diga cosa. Pero a's neofitos, les diré que paren cuenta de la diferiencia de calidat en·no foco. En la primera, Treserols se veyen desenfocatas, e en la segunda tienen millor foco. Dimpués ya i hai diferiencias en las trazas de las estrelas, pero ixo ya se debe a'l tiempo d'exposición.
Esta ya ye feta dende el cul de Pineta:
E ya, quan baixabe, paré en El Plan perque dende astí se i veye Treserols e es Astazus:
Esta tarde soi estato en Margudgued, an que i heba més flors que per aquí. Encara no he pasato las fotos ta l'ordenador, asinas que no sé se valen pa cosa.

Loira (Lutra lutra)

2011-03-18T08:27:00.000-07:00

Hue, dimpués d'anyos e anyos mirando de veyer-ne una en libertat, he puesto veyer una loira. Dica aora no la hebe vista soque en aquarios, e ya tenebe ganas de veyer-ne en bell río. E astí ib'yera, a'l canto la villa, an que ya m'heban dito que la heban vista (e fotito bell tuscazo, que cal estar subnormal), e m'ha pillato con la camara en la bolsa d'el carro d'el fillo. Llevabe el 100 macro per se veyebe qualque flor, e bien se me'n ha valito, perque encara que no la tenebe a'l canto, no yera guaire leixos, e ixe obchectivo ye muit nitido. Asinas que a falta de 100-400, este m'ha feto el papel. Las fotos tienen un recorte considerable, arredol d'el 50%, pero como documento ya ye prou. Ya me faría goyo de poder fer-le fotos buenas e pinchas, pero con tener la preba documental ya m'aconformo per aora. Ademés, he tenito la suerte de veyer-la pescar e minchar-se una truita.

Hepatica nobilis

2011-03-16T14:24:00.000-07:00

Hue soi ito un ratet ta'l monte, que ya tenebe ganas. Soi puyato per lo camín de l'ibón d'el Cau e quan soi arribato ta'l barranco, el he cruzato e me'n soi baixato per la pista. Ya habe uns días que se van veyendo es primers indicios de la primavera: es paixaricos que van como bucos, bel·la veronica, bel·la flor pareixita a la viola, las flors de l'abellanera (que no pareixen flors e fa días que salioren), las flors d'es salietos, etc. Pero ya arribando enta la Pella, he visto per fin qualques flors d'hepatica, que ye de las primeras en anunciar la primavera. Per fin he puesto fer fotos en condicions, e a esperar dica chunio, que aquí ye el mes de las flors, pa que salga la mayor parte de las especies. pero dica alavez, a'l menos me podré entretener.
N'i hai de diferents colors, pero per aquí no'n he visto soque blancas e azuls. No he caito en fer una foto a las fuellas, que son el motivo de que se digan asinas (que pareixen un figado, u ixo dicen).
La zona interior siempre m'ha recordato a una anemona, no més i falta Nemo :-). El fundo son fuellas ixutas d'abellanera.
Una azulenca:
E una a punto d'ubrir-se, ye la primera que he visto:

Ya ye pasato carnaval

2011-03-10T02:07:00.000-08:00

Unaltro anyo més, ye pasato carnaval. Encara que estianyo ye estato muto tranquilo. Imos, que no me'n he pasato guaire, ni una miquirrina. Mismo el domingo que me vistié de tranga per zaguer vegata (cuelgo es cuernos, como fan es futbolistas con las botas), no zorrié el que gosa zorriar una tranga.
Tampoco no he feto garra foto, bien se vale que un colega fotografo, Javier Salas (pasatz-os per la suya web), me fayó un reportache el domingo, e aquí tos deixo un recorte d'una foto que me fayó.

Luna plena

2011-02-18T17:25:00.000-08:00

Dende que he tenito el segundo cadiello, no puedo escapar-me de días ta'l mont perque encara da muta fayena, e el que le queda de dar guerra. Asinas que se cosa quiero fer, no me queda unaltra que salir de nuet. Hue i hai luna plena, e en principio no ye guaire buena pa fer nocturnas. Manimenos, feba un anyo que tenebe en la capeza una imachen, e precisabe la luz de la luna plena pa que m'iluminás una ermiteta clavata en un puesto muto especial. Ye la ermita de Sant Chuan-i-Pablo, en Tella, de la que se tiene constancia de la suya consagración en el sieglo XI, concretament en l'anyata 1018, asinas que en 7 anyetz fará el suyo primer milenio (pero nunca no arribará a estar tant viella como el dolmen d'el mismo lugar).
Asinas que quan tenebe a's fillos ya dormindo, he pillato es trastes e t'allá que i soi ito (no sin veyer antes la gollata reprobatoria de la duenya, que debe de pensar que me falta un mallazo enn'a capeza). Quasi no m'ha feto falta ni el frontal, perque se i veyeba mui bien, menos quan pasas per un trocet de selva. Bueno, aquí va qualque foto:

Estrels no se'n vei guaires estas nuetz, pero siempre se puede fer altras cosetas. Salut.

Un ratet per Tella

2011-02-08T03:27:00.000-08:00

El domingo de tardes marché enta Tella con la intención de veyer (e fotografiar se podebe) un fenometo astronomico que m'heba comentato l'amigo Frikosal.
No i habió suerte, l'horizont en es Pirineus no ye el més propicio, perque ye tot plen de montanyas e tozals (encara que ixo ya el sabebe yo antes d'ir-ie). Ademés a las horas que se suponeba que s'heba a dar, tenebe la luna chusto dencima (yera chicota, pero ya feba luz) e la contaminación luminica de L'Aínsa, Boltanya e mismo Uesca an que tenebe que enfilar la camara. Total, que i fue quasi per demés, pero ya que ibi yere fayé qualque foto. Dimpués salié a tota vitesa cara casa, pa arribar-ie a hora de chitar a's cadiellos.
Bueno, puyé ta'l tozal an que ye la Virchen de la Penya, la mía intención yera ir ta Sant Chuan i Pablo, pero dende aquí tenebe millor anvista enta abaixo. Ya lusquiaba quan i arribé, pero encara se podeba veyer una brinquerrina d'azul per an s'heba amagato el sol. A la dreta ye Castillo Mayor:
Mientres febe tiempo m'entretenié fendo altras fotos, como esta de la portalada de la ermita con la Onsa Mayor:
E ya quan marchabe, encara le fayé bel·la foto a'l dolmen, antes de salir a las quatre suelas:

E aora dende Espierba

2011-02-04T16:40:00.000-08:00

Hue tenebe previsto fer qualques fotos un rato dimpués de que se metés el sol, pero a la fin se m'han tuerto es plans e he habito de quedar-me a casa cudiando a'l borche. Como m'hebe quedato con las ganas de fer nocturnas, quan he puesto soi salito de casa un par de horetas ta Espierba, e soi tornato fa un ratet (encara soi descargando las fotos). Alto en Es Morés no i feba mica frío, 0ºC, pero en ixa puta ribera Espierba cómo se i nota la inversión termica: -5ºC. Bai, que ye la primer vegata que no paso fredor fendo fotos de nuet d'hibierno. Como i hai luna nueva se i veyeba un ciel espectacular, e ixo que yere bien cerqueta d'el lugar. Astí m'he pegato una hora e media u per astí; cal estar friki :-D
El Mallo Gran:
Una de larga exposición dende el Mallo Gran enta la Sierra de las Zucas:
Una forzando la sensibilidat de la camara, pa que tos fayatz una ideya d'el ciel que i heba:
Un árbol enta el norte, iluminato con el frontal:
El domingo, se puedo e me vaga, miraré d'ir a fotografiar una coseta que m'han contato, pero no sé se veyerá dende la montanya, perque es nuestros horizonts ni son plans ni son baixos. ya tos contaré. Salut.

Ahier de nuet en Pineta

2011-01-31T03:05:00.000-08:00

Ahier, dimpués de chitar a's críos, decidié de puar ta Pineta a fer unas nocturnas aprofitando que no i heba luna e que se i veyerían més estrel·las. Ademés, dimpués d'el nevazo d'el viernes de nuet e d'el sabado de maitins estaría tot bien pincho. E asinas yeras, quan i arribé a las 23:15, i heba -5ºC, e como no tenebe guaire tiempo, perque querebe estar en casa quan le tocás el biberón a'l chicot, me metié a fer fotos con prisas. E encara que sé que las prisas no son buenas companyeras, no me'n quedaba altra, asinas que en las dos horas que i estié fayé el que podié, que no ye guaire. Ademés el frío fa que las pocas neuronas que tiengo no treballen como cal, e per ixo se me podeba haber aplicato el refrán ixe de "atina marido que la noche es corta". Total, que pasé buena cosa frío e no torné con las fotos que querebe. He de comprar-me unas botas con calefacción a veyer se en puesto d'estar pensando en es dedetz chelatos, puedo pensar en las fotos que quiero fer.
Ixo sí, mereixió la pena, perque i heba un ciel espectacular, e no se sentiba soque el río correndo a uns metros d'an que yo yere.
Esta ye la primera que querebe fer. Sabebe que la polar quedaba a la dreta de la Capilla (dende la mía anvista, prou que sí), asinas que miré un enquadre adecuato encara que no se i viyeba ni pa churar. En el que no cayé (las prisas e curto que ye un) ye en meter una apertura de diafragma ubierta perque no i heba luna, e zarré a 10 como se n'i habés, pero no'n i heba. A's vente minutos d'estar la camara en marcha paré cuenta d'ixe chicot pero important detalle, e como querebe fer altras cosas, veyé que no me vagaría de fer las altras fotos que tenebe pensatas, asinas que a aturar la exposición e a asperar que se fes la toma fosca (u dark frame). Me quedó muit escura, pero con es programas he mirato d'aclarir-la, encara que se veye muto ruido.
Dimpués querebe sacar el fundo d'el circo, e fayé una preba forzando la ISO pa veyer se yera bien el foco. Como tenebe la ISO més alta, se i veye muto ruido, pero quiero amostrar-tos el ciel que se viyeba. Una pena la contaminación luminica, cuento que será de Gavarnía. Con una camara que treballe millor l'alta sensibilidat (una 7D u una 5DII, per exemplo), podrí fer millor fotos como esta, pero cal aconortar-se con el que tiengo :-(, que tampoco no ye malo pero no ye buen pa fer nocturnas.
E ya la zaguerá que fayé, con el mismo enquadre que l'anterior pero con 15 menutos d'exposición, antes de salir hopando cara abaixo a dar el biberón:
Au, salut.

Plomazo

2011-01-29T09:31:00.000-08:00

Pareixeba que no iba a tornar a nevar, e el ha feto con ganas, més de 35 cm. entre ahier de tardes e esto maitín. Per el que m'han contato, ahier se feba comedia per la carretera dende Abizanda entalto, i hai qui charra de més de quarenta autos que s'heban salito enta la cuneta.
El muergo e bell altro impedimento m'han impedito salir ta'l monte a fer qualque foto como yera la mía intención, pero si hemos puesto salir quan se'n ha deixato de nevar con l'estirazo a fer un rato l'onso per la nieu.
Sisquiera maitín podés salir un ratet, pero no el tiengo mica clar.
Ixo sí, el ratet que somos salitos, la filla se'l ha pasato de pistón:

E este gato tamién se revulcaba per la nieu:

No invadas mi pueblo

2011-01-29T09:10:00.000-08:00

M'han ninviato un correu dende la Ribagorza pa recabar refirmes en contra de las intencions de Red Electrica de tornar a revivir el prochecto de la línia electrica Aragón-Cazaril, que tanta contestación tenió en el suyo día.
Aquí tenetz información e aquí podetz sinyar. Yo ya el he feto. Que no reblen.

Caza fotografica

2011-01-21T09:18:00.000-08:00

Fa quasi un mes e medio que tenié un borche (fartizo pero ploramicas), e ixa ye la principal razón per la que tiengo el blog olvidato. No puedo salir ta la montanya perque con dos fillos te falta horas a'l cabo el día, como pa ir-te-ne a practicar las tuyas aficions per astí. Asinas que m'he d'aconformar per ir caminando con el carret mientres apaseyo al nin·no per lo camín de Picaruela e me miro l'avifauna, sobre tot la torda d'augua (Cinclus cinclus) que quiero fotografiar bell día con uns amigos. L'altro día, un sabado que ibe con es dos fillos per astí, veyé en una nuquera chunto a'l camín una colla de mitos a's que habrí puesto fotografiar prou bien con el 100 macro, perque es tenebe a'l canto. Asinas que estes días m'he llevato la camara mientres camino per astí e a'l fillo le da una miqueta l'aire. Hue, que feba un frío que se chelaban las parolas a diferiencia d'es días anteriors que tenenos una primavera extra, me pensabe que tornabe enta casa unaltra vegata sin fer una foto quen en ixas veigo que viene enta yo un trencauesos, e no guaire alto. Como llevabe guants (e gato con guants no caza ratons) entre que he sacato la camara, la he enchegata, he meso bien es parametros e demés, ya pasaba el trencauesos La Pella. Con tot e con ixo l'he feto una foto quan s'aleixaba.

Paratz cuenta que llevabe el 100 macro, que tiene muit buena definición pero pa estes menesters se queda pro curto. Tiengo un sigma 70-300 pero ye lentismo d'enfoque e no me convence mica, el tiengo olvidato en l'almario an que guardo totz es trastes fotograficos e habe tiempo que no el saco. Per ixo, totas las fotos de hue las he tallatas considerablement (u sía, muto, arredol d'un 50%).
Malas que se'n ye ito, en la misma nuquera de la que se veye bell camal en la foto d'el trenca, i heba un cuervo u qualque cosa pareixita, e como no se moveba pos tamién le he feto qualque foto, encara que falla l'anvista perque u er yera muit alto u yo muit abaixo. Aquí el tenetz, entre ixe embordiecho de camals de nuquera. No feba soque esgritociar.
E ya quan arribabe enta el puent de la carretera, i heba tres tordas comendo en una carronera (prou que i minchaban carrons, se no qué altra cosa), e a ixas las tenebe una miqueta més cerca que no es altros.
Las tordas d'augua se me quedan muit leixo abaixo en·no río, pero bell día cayerán.
Las fotos no valen pa cosa, pero a'l menos soi tornato ta casa contento per fer qualque cosa en·no monte, perque se no ye per es fillos se m'enrobinaría la camara.
Salut, e quí sabe dica quán.

Un amigo

2011-01-03T12:51:00.000-08:00

Hue sale un amigo en la contraportata de l'Alto Aragón, cal fer-le una brinquerrina de publicidat. E en la web de Gara d'Edizions podetz columbrar quantas fuellas d'ixe troballo sobre Tella.
Fa quasi un mes, u més encara, que no actualizabe el blog; pero ye que voi de cul e cara abaixo :-(
Ya perdonaretz...

Paixariquetz d'hibierno

2010-12-04T11:30:00.000-08:00

Hue soi ito con un amigo a mirar de fer-le fotos a la torda d'augua (u mirlo aquatico), e no hemos puesto fer-le-ne garra. Ixo sí, frío hemos pasato como es pingüins. La maxima de hue estoi que yera -5ºC. Llevamos uns días de frío que quan arribe la factura d'el gas m'acordaré yo de l'orache :-(
La torda se nos ha escapato, pero a'l menos bel altro s'ha acercato pro como pa poder fer-le bel·la foto.
Las fotos llevan un buen tallo, perque s'han meso pro leixos.
Un enganyapastors amarillo (Motacilla cinerea):

E un rei de las barzas (Troglodytes troglodytes), este chodigo sí que yera leixos:
A veyer quán consigo fer-me con un 100-400 como elque m'han amprato (se no puedo con ixe, ya ni i pienso en el 500)

Nieu

2010-12-02T08:37:00.000-08:00

No ye la primer nevata que caye, de feto ye la cinquena. Las tres primeras estioren cinarratas que cubrioren es tellaus una miqueta. La d'el martes yera avisata e no sosprendió a dengún, pero la de hue no la esperanos perque no daban nieu, e n'ha caito més que el martes. El caso ye que a la una, quan me chitabe, el ciel yera raso como el uello d'un paixarico, e quan m'he despierto i heba sobre vente centimetros, talment una miqueta més. E per fin he puesto salir a foniar un ratet, que ya feba días que no podebe salir ta'l mont per diferents circumstancias (bueno, per una, pero important e que encara no "s'ha solucionato"). Hue sí, una minquirrina més d'una hora, pero ya m'ha feto buen prebo ir fendo tranya per la nieu zancera. No he feto so que quatre fotos, e tos ne deixo dos, una anvista cheneral de Bielsa dende el mirador que i hai en el camín que va enta Tella per Portillo, e una carronera chiquirrina que asomaba per dencima de la nieu.
Ya perdonaretz que tienga el blog a l'abandón, pero per ixas circumstancias no me vaga de salir :-(

Per cierto, que la nieu no se'n va ni a la de tres, e ixo no puede significar soque fa un frío que chela. Encara ibi ye en es tellaus e en es arbols, e ya el diz el refrán: La nieu d'el pin espera la de maitín.

Propuesta ortografica

2010-11-17T08:32:00.000-08:00

Per fin una grafía digna pa l'aragonés. Espero que el día de maitín sía un exito.

Dende Espierba

2010-11-04T14:51:00.000-07:00

Ahier, que feba un día primaveral, me'n puyé un ratet ta Espierba. No guaire, perque i puyé tarde e tenebe que tornar luego. Ibe a buscar el contraste entre l'agüerro e l'hibierno, gracias a la nieu que heba caito este puent de totz es santos (Pa totz es santos la nieu en es altos, e pa Sant Andrés en es pietz) e tenié suerte perque encara i heba cereseras royas (e ixo que gosan estar es primers árbols que pierden la fuella). La lastima fue el ciel, que yera raso e només salió bel·la boira quan ya ibe a marchar. Como veretz me boché bien poco, pero no me vagaba de fer altra cosa:
Esta zaguera ye feta con el 100 macro, e las anteriors con l'angular:

Presentación d'Aspectos Lingüísticos de Tella

2010-11-03T14:18:00.000-07:00

M'ha ninviato Chabi la invitación de la presentación d'el suyo libro de Tella, e amés m'ha pedito que en faya difusión. Asinas que aquí la tenetz. No cuento que pueda ir-ie, pero ya me faría goyo.

Impresionant

2010-10-31T03:39:00.000-07:00

Miratz-os que conoixco Pineta, e la he vista mutos anyos d'agüerro... Pero ahier yera impresionant, e més dimpués de l'augua de la nuet anterior. Hue yera nevando, asinas que ya podemos dar per rematato l'agüerro. Ademés pleve e pleve, asinas que hue no se puede ir ta garra cabo.
En primeras yera mui nuble, e i heba muit poqueta luz. Aquí dende la presa, con la boirota bien agarrata ta las montanyas:

Un par de barrancos que baixan de la man pacina: El fabolar indo enta La Grota:
E ya La Grota, antes de que el río Lalarri baixa ta'l plan:
Una pena que las mías fotos no fayan chusticia d'el lugar.

Presentación de la Propuesta Ortografica de l'Academia de l'Aragonés

2010-10-28T03:44:00.000-07:00

Tos deixo la invitación a la prsentación de la Propuesta ortografica de l'Academia de l'Aragonés, que se fará a Zaragoza el día 18 de noviembre:
Caldrá ir-ie

Per fin l'agüerro

2010-10-24T12:04:00.000-07:00

Esto maitín soi puyato ta Pineta, unaltra vegata. Pero per fin es faus de la Selva Pochas ya yeran con las colors de l'agüerro. Bien se vale que i soi ito, perque a partir de maitín dan uns volturnos d'aire que no deixarán ni una fuella. Pa'l martes dan aire a 84 km/h, asinas que a tomar per saco agüerro, aora que se meteba tot majismo :-(
Pero bueno, s'ha feto el que s'ha puesto, que estianyo no soi pa poder ir-me-ne guaire tiempo per la montanya. Ya arribará l'anyo 2011 a veyer se se puede fer més cosas.
A lo que ibe, que soi puyato per lo camín d'es Churros de Lalarri e me'n si baixato per la pista, aquí tos deixo bel·la foto de hue:

Estoi que ya no podré fer més fotos d'agüerro estianyo (se me quedan en es debes la Comuna, Ordesa, Buixaruelo, o Puent d'as Crabas e un largo etcetera). Sisquera m'equivoque.

Agüerro en Anyisclo

2010-10-17T14:19:00.000-07:00

Como l'altro día estié en Sestrals veyendo Anyisclo dende alto, me quedé con las ganas de fer-le una visita con las colors de l'agüerro. E ha mereixito la pena, encara que el madrugón e el sobo tamién son estatos buens (querebe estar luego en casa e no tardar guaire). Soi puyato dica la Ripareta, quasi tot el camín con el frontal enchegato perque yera escur como una lupatera. Ya se nota, e de qué traza, que el día se fa més curto. Dica las ueito largas no se i veyeba.
Pero buen, he conseguito el mío obchectivo, que yera veyer es faus en este tamo d'el río que me fa muto goyo. A la baixata m'he trobato con muta chent con réflex, trípodes e demés, pareix que no soi l'unico barrenato, encara que soi el que més madruga :-)
Las primeras (bueno, totas menos la zaguera) son d'el tramo de río que i hai una vegata que pasas Selva Plana antes d'arribar ta la Ripareta:

E este ye el fau més fotografiato d'Anyisclo, perque ye bien cerqueta de Sant Úrbez e da muto chuego con ixe churro d'augua:

Dos días buens

2010-10-15T09:45:00.000-07:00

Ahier e hue he puesto salir ta la montanya, encara que tampoco no guaire rato (u a yo a'l menos siempre me sabe a poco). Yera per aquí un amigo fotografo con unaltro fotografo (bien majo zagal, per cierto) e he aprofitato pa salir una miqueta, ademés con tot terreno, que te permite d'ir ta puestos menos accesibles pa's pobres que no'n gastamos (de 4x4, prou). Ahier puyemos ta La Estiva (an que no i yere estato dende feba un anyo) a pillar las primeras luces de l'amaneixer sobre Treserols. Ya que ibi yenos, nos ne baixemos enta Lalarri e d'astí enta baixo, ta Pineta. E hue somos tornatos a veyer Treserols pero dende l'altra man: dende Sestrals. No i hebe estato nunca, e i hai una anvista increyible: ademés de Treserols, Anyisclo chusto debaixo (no veigatz qué brinco i hai), Las Zucas, Castillo Mayor, Penya Montanyesa, macizo de Cotiella... e ixo que ye a poco més de 2000 metros. Hue la luz no acompanyaba mica, pero siempre se puede fer qualque cosa.
Ahier, quan arribaban las primers las primers luces ta Treserols, no habría venito mica mal bel·la boira pa trencar la monotonía d'el ciel:
Ya baixando, un detalle d'el río Lalarri que yera en uembra, perque a's altros churros ya les daba el sol de firme (se nos fayó una miqueta tarde):
D'esto maitín, dende Sestrals, ya veyetz que luz tant mala i heba:
E tornando enta'l coche, este caballo no nos ha quiesto posar como cal, mirando-se-nos, qué le imos a fer...
Au, salut.

Nueva publicación sobre l'aragonés de Sobrarbe: Tella

2010-10-11T14:21:00.000-07:00

Hue he visto en una botiga de la villa un nuevo libro de Gara que m'he crompato ascape, sobre tot perque conoixco a l'autor: Aspectos lingüísticos de Tella. Aragonés de Sobrarbe (Huesca). Ye sobre l'aragonés de la Valle de Tella, chusto a'l sur de la de Bielsa. Encara no m'ha vagato de mirar-me-lo guaire, pero una de las cosas que més goyo m'han feto d'el poco que he puesto veyer ye la grafía. Per fin Chabier ha deixato d'emplegar la d'el 87 e mira de fer servir la de l'Academia (encara que ya le he visto bel·la error). Seguntes me dició habió a cambiar-lo tot decamin, asinas que le'n perdono.
Tos deixo l'enlaz con la web de Gara d'Edicions

Se fa de rogar

2010-10-11T12:47:00.001-07:00

L'agüerro ye fendo-se de rogar en es árbols, no pas en l'orache. Ha plevito una miqueta, tampoco no guaire menos el sabado de nuet, e ya ha nevato per dencima d'es 2500 metros. Pero es faus no son encara con la color buena, a veyer se pa la semana venient ya en son. I hai roldes que ya son amarillos, pero es fabolars grans e que dan chuego con es churros d'augua encara son verdes. Con tot e con ixo qualque cosa s'ha puesto fer:

No queda altra que asperar uns dietas. A veyer se el chueves puedo marchar enta Anyisclo.

Feria ganadera de Bielsa

2010-10-10T11:54:00.000-07:00

Ahier se fició enn'a Villa la feria ganadera. Feba més de 45 anyatas (seguntes dicen) que no s'heba feto. Per cada día i hai menos bestiar, no pas como d'antes més que quasi totas las casas s'adedicaban a la ganadería e esta yera la principal actividat economica d'esta valle, e de totas.
Es ganaders el organizoren muit bien: i habió animación tot el día, la comida (vaca rustita mientres 12 horas) buenisma e bien concurrita, pues i heba quasi 200 personas (nos fartemos bien fartos, e encara en sobró), chicolate con torta de tardes e charrazos d'aquí t'allá tot el día. Per lo que cal felicitar-los
Asinas que esperamos que se contine més anyos con la feria, perque se ha d'ir tant bien como la d'esti anyo será un exito. I meto qualque foto d'ahier, encara que a yo no me va guaire la "fotografía social", no podebe deixar pasar la oportunidat de baixar la camara.
Las Escomas, an que se metio a's animals en exposición:
Es cuernos d'un buco. Esta foto la fayó la mía filla, pareix que le fa goyo de fer fotos, encara que la mía camara ye demasiato gran pa era. A'l canto d'este buco en i heba unaltro chiquinín de casa Judías que putiba que infectaba; no sé cómo d'un buquet tant chiquinín puede salir ixa avlor:
Es críos se'l pasoren de pistón. Quan es animals ya no les deciban guaire (perque ademés son fetos a veyer-los a menuto se no a diario), s'adedicoren a baixar a redolons per las costeras e las marguins:
A veyer se l'anyo que viene se torna a fer.

Nueva endrecera

2010-09-25T15:19:00.000-07:00

M'he feto con un GPS. Bueno, en realidat ye el regalo que m'han feto per adelantato per lo mío cumpleanyos (un altro més, zasssss en totz es morros). Encara no tiengo guaire idea d'utilizar-lo, tot arribará, pero esto maitín soi ito ta La Grota dende el Parador pa fer el primer track (u corsa). Malas que prencipeye a trastiar una miqueta con er iré metendo es tracks de las cursas que faya en el blog (per ixo el titol de nueva endrecera). Prou que quan puye fotos d'especies sensibles no i meteré la localización, como comprenderetz ;-)
Pero como encara no sé fer-lo, pues ya arribará. Per aora tos aconhortatz con las fotos.

Alquezra

2010-09-16T13:55:00.000-07:00

Alquezra, lugar a'l que le tenebe mutas ganas e hue per fin i soi ito. Feba muuuuuuuuuto tiempo que ni iy'ibe, e per fin esto maitín que soi tenito que baixar ta Balbastro, he puesto pasar per astí encara que m'ha suposato fer buena cosa de kilometros per carreteras no guaire buenas encara que preciosas. No m'extranya mica que es franceses, belgas, holandeses, etc. sían locos per estas sierras e barranqueras. Ixo sí, a yo de verano no me i veyen se no ye pa ficar el cul en l'augua, perque i fa una calor seria.
La putada ye que la luz yera penible. Yera nuble, esplevizoniaba, el ciel yera fierismo... Pero ya que ibi'ere, pos he feto qualque foto. Habré a tornar-ie bell altro día, encara que tampoco no m'importaría mica fer bel·la nocturna con el castiello e la colechiata iluminata.
Dos anvistas d'Alquezra. Ixa color royisca ye de la piedra, e tamién d'un filtro cokin que da ixa dominant:
Este ye el Puent de l'Albarda. La foto ye feta con prisas perque pleveba, e el ciel una mierda, perque en esta no he sacato el cokin de la mochila:
E ya pa rematar una anvista d'el canyón d'el Vero dende el aparcadero an que se prencipia a fer el descenso d'el Vero, entre Sant Caprás e la comarca de Sobrarbe:

Habré a ir-ie un día con millors condicions luminicas, perque dende Alquezra dica A Torrocilla i hai puestos bien majos ademés de las rapaces e las pinturas rupestres.

Aguardando l'agüerro

2010-09-15T14:25:00.000-07:00

Dende que prencipié con esto de la fotografía, ya fa tres anyadas, septiembre m'ha pareixito un mes mui floixo. Ya yes aguardando l'agüerro con las suyas colors (encara que no dura guaire), i hai mui poqueta flora e, ademés, no tiengo equipo pa adedicar-me a la fauna (tot arribará, espero). Se ademés a ixo le sumamos que las mías circunstancias personals son aora mismo pro embolicatas, pos apenasme vaga de salir ta'l monte, e quan i voi foi poquetas fotos, mismo i ha habito días que no'n he feto garra.
Per ixo, e per no abandonar definitivament el blog, hue m'he obligato a salir ta Pineta e fer bel·la entrata, asinas que aquí van:

No son mica buenas, pero a'l menos no se m'enrobina la camara, ni el dedo indice:-(
La hora no yera la millor pa las fotos de l'augua, cerqueta de la una d'el mediodía, e ademés tenebe que salir a las quatre suelas pa ir a replegar a la filla d'el cole. M'he entretenito quan puyabe a charrar con es míos antigos companyers de troballo e se m'ha feto tarde. Asinas que ya perdonaretz la baixa calidat :-)

Flor de nieu (Leontopodium alpinum)

2010-08-26T14:04:00.000-07:00

Ayer, ya que me salió una canguro de maitins (mi chirmana), decidié de ir-me-ne a veyer las flors de nieu, en un puesto aquí en la valle an que n'i hai una chitarrata. Quan i arribé las condicions no yeran brenca buenas pa fotografiar-las: un sol de chusticia, medio día e las flors blancas como al nieu. Asinas que, encara que les fayé buena cosa de fotos, no'n valen la pena. Asinas que tos ne deixo tres que m'han feto gracia.
A esta me da per decir-le intimidatz, ya que ye una buena aproximación (ye el formato orichinal, e no tiengo tubos d'extensión, encara):
Esta ye la que més goyo me fa, per lo contraste con lo fondo. Aquí aprofité la incidencia d'es rayos d'el sol sobre las flors e que el fundo quedaba escur:
E ya tornando, veyé esta escabiosa que ya heba perdito las floretas:
P. S. Ya perdonarás, Ángel, que no t'avisás, pero ye que me salió d'un día t'altro de nuet e ya no yera qüestión de gritar per telefono, pero sabetz que malas que nos vienga bien, tos i llevo.

Una nuet en es Ibons d'Anayet

2010-08-22T00:06:00.000-07:00

Habe mutos mutos anyos, estié en Canal Roya encara que no arribé ni an t'A Rinconada. Ixe lugar se me quedó en es pendients (n'i hai tantos en la mía vida que ixa caixa ye rebutient, sobreixen es deben). I soi tornato, m'han concedito el permiso -a veyer si n'i hai més- e i fue a pasar un par de días per astí per la montanya.
Esta vegata no le fayé guaire caso a la Canal Roya (finals d'agosto no ye la millor epoca pa viyer-ie flora) e me centré en la puyata enta's Ibons d'Anayet con un mochilón que pesaba més que una vaca en brazos. Arribé t'alto a l'hora de comer e me dediqué a mirar enquadres pa las nocturnas, preveyer luces, fer fotos, etc. Tenié suerte perque de tardes salió quantas boiras que millororen el ciel, que liso e laso no tiene guaire gracia. El puesto ye d'una belleza exultant, bien se vale que Aramon (Gobierno d'Aragón e Ibercaja) contribui a recordar-nos en qué mundo vivimos e se veyen en una collata es remontes d'Espelunciecha.
I fayé una pila de fotos dica que prencipió a fer-se de nuet. Es días anteriors ya hebe visto que la luna me faría una santchuanada: yera quasi plena. Pero saliba per lo sur, e esperabe que s'amagás dezaga de las montanyas e me permitís fer bel·la foto nocturna sin guaire luz. Como viyé que tardaría e yere cansato, me chité a dormir pensando que si me despertabe luego encara podrí fer qualque cosa. E estar medio insomne me venió bien. Ubrié un uello sobre las cinco, la luna ya no se veyeba e tenebe el carro chusto dencima d'el Midi d'Ossau, refleixando-se en l'ibón. Asinas que vencendo la mandria e desafiando el frío me metié a fer fotos dica que salió el sol.
Soi tornato muto contento d'es resultatos, e como siempre tos ne deixo bel·la muestra. Me queda un camatón de fotos en l'archivo, pero no quiero cansar-tos con guaires, asinas que aquí en va bel·launa.
Una anvista dende el camín que puya de Sallent:
Unaltra dende el mismo puesto pero con un enquadre diferent:
Dende la orilla de l'ibón:
Se fa de nuet, el viello volcán que estió el Midi pareix que torna ta la vida:
El que veyé quan me desperté, no ye mica mal ixa anvista:
La Vía Lactea u Carrera Sant Chaime sobre l'Anayet:
E mirando de fer una circumpolar, no podié estar guaire rato, dica que prencipió a veyer-se una miqueta de luz per l'este:
E ya, per fin, quan amaneixeba:

E prou :-)

Perseidas u Glarimas de Sant Lorient

2010-08-13T02:45:00.000-07:00

Ayer yera la nuet con més probabilidatz de poder fotografiar las Perseidas u Glarimas de Sant Lorient. De mediodías pleveba e no tenebe guaires esperanzas de poder salir. Pero de tardes prencipió a bufar el puerto, que aquí significa dos cosas: que no pleve u nieva (d'hibierno) e que baixa la temperatura. Asinas que de nuet el ciel yera raso como el uello d'un paixarico. Pillé la mochila, el tripode, una silleta d'ixas plegable, el mp3 e ropa d'abrigo e ta'l campo que i fue.
En viyé una cinqüentena, pero fotografiar-ne que se veiga bien una. La ley de Murphy actúa tamién de nuet. Quan la camara yera fendo la dark-frame u toma escura saliban las estrel·las més majas, e quan yera pillando luz u no se'n veyeba garra u yeran chiquirrinas de tot. Talment 30" sía un tiempo excesivo perque ya prencipeyan a veyer-se las trazas de las estrel·las, pero como i heba luna nueva habié a tirar d'ISO pa poder captar-las e de tiempo d'exposición pa mirar de tener més probabilidatz.
En fin, que i estié dica las dos, el sensor de la camara se calentaría per las tres horas que estié "afotando", pero no pas las mías mans, perque quan puyé ta'l coche marcaba 10ºC, e ademés feba aire de puerto. Pero ixo sí, un ciel majismo, s'apreciaba la Carrera Sant Chaime (u Vía Lactea) de pistón. Una maravilla ixo d'estar de nuet enn'o monte mirando-te el ciel.
No ye que se veiga gran cosa en la foto, perque ademés tiré d'angular pa pillar més troz de ciel, perque si con un angular ye difícil de pillar-las, con un tele ya has de tener muta suerte u tener més conoiximientos d'astronomía que no yo, que no sabié reconoixer soque Casiopea, y no'n soi mica segur d'ixo.
Astí, abaixo a la izquierda, se i veye una chiqueta estela, ixo ye lo millor que sabié conseguir :-(

P. S. Ya sabebe yo que no el hebe soniato e que bel·launa més hebe pillato. Debe d'estar que encara soi durmierto, perque no hebe caito en que las dos primeras las pillé antes de las 12 de la nuet e a'l descargar-las a l'ordenador me las guarda en carpetas diferents. Asinas que aquí las meto tamién, n'i hai una que se i vei escasament perque yera mui chiquirrina...

A veyer se la sabetz trobar :-)

E se no quiers caldo, dos tazas

2010-08-12T05:51:00.000-07:00

Ya que feba tantismos días que no i febe res, pues hue foi dos entratas. Esta ye de la cursa que fayé ayer de tardes (qué le imos a fer, quan se puede e no quan se quiere). Puyé dende la boca d'el tunel dica Puerto Viello (per an que se retiró la 43 División e la población civil en l'anyata 38), dende astí dica la Punta el Puerto (2745 m., creigo) e me'n baixé per Barrosa. I hai unas anvistas bien majas, tanto enta'l lau aragonés como enta'l francés. Tos de deixo bel·la foto, encara que son fetas con l'obchectivo malo e la luz no yera mica buena. Ademés i podié veyer una pila de fauna: chizartz, marmotas, bel butre, bel trencauesos, collalbas, una rabosa, etc.
Anvista enta'l camín que puya ta'l Puerto, a'l fundo Suelza e Fuesa:Anvista dende la Punta d'el Puerto Viello, se i veye enta la izquiersa el pico de L'Almunia (a veyer se i puyo este verano) e es lagos de Barroude, ya en Francia. Pa baixar enta Barrosa cal ir enta ixa collata:El castiecho que i hai en la Punta d'el Puerto, mirando enta l'este:
No ficié guires fotos més perque se me feba tarde, e la luz no acompanyaba como ya he dito.
Esta nuet, se las boiras el permiten, quiero salir a fotografiar -a'l menos mirar de fer-lo- las Perseidas u Glarimas de Sant Lorient. El veigo difícil, perque ye pro nuble e fa un rato pleveba...

Per fin torno

2010-08-12T05:28:00.001-07:00

Dimpués de mutos días que no he parato (vacions e obras en casa fundamentalment), per fin torno a disponer de una miqueta de tiempo, encara que no sía guaire.
Antes d'ayer estié un ratet de maitins en Barrosa (e ayer me fotié un buen sobo, dimpués veyeretz) a veyer se trobabe qualque siempreviva, pero ya yeran ixutas e m'adediqué a encorrer insectos per astí con el macro.
Bel·la flor tamién me i trobé, sobre tot un ababol amarillo (Meconopsis cambrica), d'es que n'i hai qualcuns per astí a's canto d'es barrancos. Esta foto ye d'el centro d'ixe ababol:

Tamién i heba clavellinas a embute (asinas como tueras, pero ixas ya las tiengo pro vistas e fotografiatas):E ya es bichos (sobre tot tabans, pero a ixes no les foi fotos, ya tiengo pro con mirar que no me ficen):
Au, voi a mirar las fotos de la gambiata d'ayer.

Ibón de Plan

2010-07-26T06:48:00.000-07:00

El sabado estié tota la nuet en el Ibón de Plan, tamién conoixito como Basa la Mora, e encara que no yera la millor nuet pa fer fotografía nocturna perque i heba luna plena, ya que yera charrato pos se fayó el que se podió. Ya perdonaretz ue no escriba més, pero no tiengo ganas :-), asinas que no meto soque las fotos:
De tardes:
De nuet, antes e dimpués de que salís la luna:

Nunca hebe pensato en fer fotografía de flora de nuet, pero antes de chitar-me pensé que per qué no prebar-lo:
E ya una d'el domingo de maitins:
Au, salut.

Martagón e Rosalia alpina

2010-07-20T05:38:00.000-07:00

Esto maitín soi ito con un amigo fotografo (ixe que m'ampra el 100-400 quan imos a fotografiar paixariquetz) a fer fotos a'l lirio martagón. Quan ya n'henos feto pro e nos n'inos enta una altra mata de martagón, de pura suerte nos hemos trobato con un eixmplar de Rosalia alpina, que ye una mena d'esgarabacho que ye catalogato como en periglo d'extinción. He feto las primers prebas (no he puesto fer-le-ne so que quatre), l'he deixato a er que le'n fes, e quan me tornaba a tocar a yo la camara se m'ha bloqueyato e ya no he puesto fer-ne més, de fotos. He churato una miqueta e quan soi tornato enta casa ya heba resucitato, pero m'ha privato de pasar un buen rato. Bien se vale que a'l menos l'amigo ha puesto aprofitar (que me se yo la cantidat de gigas que i habrá gastato). Yo a'l menos ya sé án ye, e podré tornar-ie quan quiera.
E qualques fotos d'el martagón, que yera l'obchectivo de la cursa peroq ue de camin ha pasato a un segundo plan:
Esta ye feta con fondo artificial:
En fin, una pena que no l'haya puesto fer més fotos a la Rosalía, pero estoi que no ye la zaguer vegata que la veigo (u a'l menos ixo espero). Salut.

Salcorz-Tringonier

2010-07-14T02:39:00.000-07:00

Dende el día que puyé enta Tringonier (e habié de dar-me media vuelta a poca distancia de la caseta como comprebé ayer) me rondaba per la capeza fer una ruta circular puyando per lo camín de Salcorz e baixar per Tringonier. Ayer no pensabe so que puyar ta'l Puerto Salcorz (u d'el Burro) pa veyer cómo yera, perque no no i hebe puyato guaire per ixe camín.
Ye dur, mui dur, perque puya como un campanal a'l dreto. Habié d'aturar bel·la vegata a "romper l'aliento", bien se vale que tiengo la desincusa de fer bel·la foto. Ademés prencipié a puyar a las quatre de la tarde, con un sol de chusticia que me fayó sudar como un burro. Dica que no sales de la selva no deixar de puyar a'l dreto, dimpués continas puyando pero ya no i hai tanta pendient. Total, que quan arribé ta'l Barranco de Salcorz veyé la collata Sonque, que da enta Tringonier, e como pareixeba que yera cerqueta pensé: "i voi, me'l miro e seguntes cómo el veiga baixo u puyo enta Salcortz". I arribé -me costó més que no pensabe- e me'n fue enta un sarrato perque seguntes el mapa yera més fácil de baixar per la man izquierda. Quan arribé ta ixe tozal, dimpués d'espantar qualques chizartz, ya veyé el barranco Marcatiecho abaixo e que se podeba baixar medio bien (ye mui costeruto) e decidié d'ir-ie. Ye un tereno apto pa chent con buen sentito de la orientación e fetos a caminar per mals terrenos (no ye que yo sía un especialista, pero una miqueta d'experiencia en tiengo) pa baixar dica la caseta de Tringonier e ya empalmar con el camín que va enta la aduana. Ayer me dició un ganader que per an que baixé se diz Es Clotz.
Tos deixo qualques fotos que fayé, en Tringonier no'n fayé garra perque i yere estato feba uns días e ademés se me feba tarde. Con tot e con ixo a las ueito e media yere en l'aduana.
Una dichital, en el camín de Salcortz en viyé mutas, pero como bufaba l'aire no podié quitar-ne garra que me convencés, con tot e con ixo me sirvió de desincusa pa recuperar l'aliento. A veyer se i torno bel día sin aire e miro de fer-ne una de calidat:

Un par de fotos d'el barranco Salcorz, quan sales de la selva i hai un ambient alpino espectacular, perque ademés ixa montanya ye de granito, no pas calcárea como Pineta, per lo que l'augua no se filtra:

Puyando enta la collata Sonque i hai buena anvista enta L'Almunia, Rubinyera, Puerto Viello, etc. Ye feta mirando enta l'oeste, per tanto la luz ye malisma:

L'anvista dende la collata Sonque enta Ordiceto, precioso. A la izquierde destacan Punta Suelsa e Punta Fuesa, a la dreta Montinier e a'l fundo ibi ye Cotiella. Astí abaixo ibi ye Tringonier, pero yo tiré enta la izquierda perque seguntes las curvas de nivel d'el mapa sería més fácil de baixar:
Quan arribé ta la caseta de Tringonier i heba una ventena de chizartz laminando la poca sal que heban deixato las vacas en la salineras, lástima no tener un buen tele, perque la fayé con el 100 macro:
E ya pa rematar la caseta de Tringonier, un buen puesto pa pasar una nuet e mirar de fer bel·la foto nocturna:

Tringonier

2010-07-08T12:09:00.000-07:00

Encara que me fa una mica de vergüenya decir-lo, nunca no hebe puyato ta Tringonier. Bueno, una miqueta sí; quan yere més choven e m'adedicabe a fer barrancos i fue un par de vegatas dica que te fotebas ta'l barranco, pero no caleba puyar guaire.
Esta tarde -perque de maitins no puedo- he decidito que ibe a puyar per Tringonier tot el que podés, encara que feba una caloriza d'el copón. Total, que entre que he salito a las quatre e media, m'he entretenito fendo macros, que i hai un costerizo d'el copón, la calor que feba e que a la fin s'ha meso de tronar (no ha caito cosa dimpués de fer-me marchar a las quatre suelas cara abaixo, ademés llevando el tripode que ademés d'atrayer es purnazos tamién pesa el suyo), no més soi arribato dica el barranco de Marcatiecho (qué nombre més pincho pa's que nos fa goyo la toponimia).
Caldrá deixar-lo pa un altro día, puestar que bel sabado u domingo me'n puye per Salcortz e me'n baixe per Tringonier, ya veyeré... He decidito de meter-me a'l menos a metat de forma que l'anyo pasato, que yere como un toro. Miraré de fer-me tamién bel 3000, talment L'Almunia, pero a veyer cómo voi este verano.
Bueno, las "afotos", que la mía vida estoi que no m'interesa soque a yo.
I heba palometas per tot, pero mutas-mutas, no sé se nunca n'hebe visto tantismas.
La primera ye una Papilio machaon, tiene truco la foto: me la he trobata muerta e la he clavata dencima de la flor, ye feta con tripode:
Estas dos son la palometa d'el liroler u Aporia crataegi (creigo), son fetas a pulso, per ixo el foco no ye tant bien colocato como m'habría feto goyo. Ademés he tenito que puyar la ISO e fer-las con el diafragma ubierto de tot perque feba aire:

Un escarabacho a'l que tamién le fan goyo las escabiosas:
E ya pa rematar dos fotos d'el barranco Marcatiecho, per an que baixaba una pila d'augua, como en el de Tringonier. I hai mutos churros mientres puyas, pero l'acceso no ye mica buen e baixando tanta cantidat d'augua se crema, como m'ha pasato en éstas. Ya que soi puyato con l'angular a las costiellas (que pesa més de medio kilo) e con el tripode (tres kilos u per astí), he decidito aprofitar-lo, encara que la luz no yera la millor:
El ciel tant machenta d'esta ye perque he feto servir un filtro cokin:

Au, dica una altra.

Flors de Barrosa

2010-07-07T05:42:00.000-07:00

Ayer de tardes me'n fue enta Barrosa, "locus amoenus" como pocos. Feba tiempo que no iy'ibe, talment un anyo u una miqueta menos, pero nunca no i hebe estato a primers de chulio. Yera impresionant, tot plen de flors per totz es puestos: aguilenyas, siemprevivas, orquídias... Me i llevé l'angular, pero el cierto ye que indo tant tarde (prencipié a caminar a las 5 de la tarde) la luz no yera mica buena, per lo que no fayé garra foto que no fues macro. A qui no i sía estato nunca, le recomiendo encareixitament que i vaya, no se'n arrepentirá. Tos deixo qualques fotos de flors que fayé.
Unas siemprevivas que creixeban chunto a'l camín:
Una phyteuma, son preciosas, encara que ye imposible de quitar-las a foco de tot:
Un detalle d'una orquidia:
E una orquidia a contraluz, me pareixió un reto, e con una miqueta de retoque dichital (no guaire, subexponer-la només perque no soi mica amigo de retocar las fotos) m'ha feto goyo el resultato:

E ya, pa rematar, el "Che" de Barrosa, i hai que veyer la molsa qué formas prene:
Dica la victoria siempre!!!

Flor de lis (Lilium pyrenaicum)

2010-07-03T08:39:00.000-07:00

Esto maitín, como habe un mes, me soi despierto a las 06:30 sin que i habés per medio despertador. Asinas que soi ito enta Pineta con la esperanza de fer bel·la foto. Quan ya ibi yere, he decidito de puyar per lo Felqueral a veyer se per una remota casualidat heban floreixito las flors de lis. I yere ito dos semanas antes e yeran a punto d'ubrir-se, e encara me'n he trobato bel·launa que yera bien, mismo n'i heba una ubrindo-se encara.
Asinas que, encara que no fe feto guaires fotos pa'l que ye habitual en yo, he aprofitato. El puesto no ye guaire buen, como diz el tomonimo (e que da nombre tamién a este bloguet), salen en bell medio de las felqueras, el que fa quasi imposible de quitar buens fondos con el diafragma zarrato, asinas que toca d'ubrirlo a tope quan quiers aislar una sola flor, como en este caso:
Quan ya te centras en fer bel·la "abstracción" puetz zarrar-lo més, como en esta:
E, ya baixando enta'l coche, he visto quantas orquidias, e no m'he puesto resistir:
Au, salut.

Pa esmelicar-se

2010-06-24T05:56:00.000-07:00

Es aragoneses tenemos fama de brutos, pero sentindo a chent como esta, ye normal, yo me'n he redito muto. Salut.

No me vaga de fer cosa

2010-06-20T10:38:00.000-07:00

pero ayer me podié escapar un ratet -dos horetas només- de maitins ta Pineta, a veyer se heban floreixito las azucenas pirenaicas u flors de lis. No heban naixito encara, pero viyé quantas orquídias e altras flors que podié fotografiar encara que ya bufaba el puerto (hue bufa més fuerte e fa frío, mismo a nevusquiato per las puntas) e se feba una miqueta difícil. A partir d'el viernes tendré, espero, més tiempo, e asinas podré atender las altras obligacions que tiengo e tamién las aficions.
Una orquídia, estoi que d'el chener Dactylorhiza:
E una aguilenya:
Au, dica la semana que viene (si nunca torno)

Cypripedium calceolus

2010-06-10T14:44:00.000-07:00

Ya se son pasatas, cal esperar un largo anyo per debant pa poder tornar a disfrutar d'estas floretas. M'he esperato q que estasen pasatas pa prencipiar a amostrar fotos, perque prefiero evitar que la chent me pregunte per la localización ya que son en un grau periglo d'extinción.
Contabe que con tanto frío que ha feto saldrían més tardanas, pero estoi que han salito antes que no l'anyata pasata. Aora toca d'esperar 12 meses pa tornar a veyer-las, fotografiar-las e disfrutar d'esta flor tant pincha.
La primer foto ye d'una que trobé a punto d'ubrir-se un día que puyé a cosirar-las:
Éstas tienen per fondo la mía mochila, perque si zarrabe el diafragma saliba un fondo mui fiero:
Estas dos d'un es zaguers día que i fue a veyer-las, ya n'i heba con simptomas de pasar-se:
Una més soleca:
E un matical que en yera plen:
Frent a frent:
E fin d'un, per desgracia, curto ciclo vital de la flor:
Quan tienga una miqueta més de tiempo, aora no me vaga, ya me miraré l'archivo parando més cuenta, per aora me pienso que ya ye pro. Salut.

Charraire festival

2010-06-07T13:26:00.000-07:00

Tos deixo un enlaz con la pachina web de charraire.org, i podretz veyer tot el que han feto pa este sabado 12 de chunio en Pandicosa: una pila d'actividatz, e totas en aragonés.
Yo no podré ir-ie (no me vaga, voi de cul cara abaixo e a tota vitesa), pero es que podiatz, itz-ie.

Limodorum abortivum

2010-05-25T09:37:00.000-07:00

Mientres esperabe a que me cambiasen las ruedas d'el coche (menudo estacazo, las quatre), me'n soi ito a fer una gambata entre el taller e l'embalse de Mediano, en L'Aínsa. M'he trobato con esta orquidia que no la tenebe vista, e resulta que ye la Limodorum abortivum. No sale en el mío libro de flora d'es Pirineus, asinas que he tenito que recurrir a la identificación enn'a web, e me i he trobato esto (obviament, la traducción ye mía):
Floreix entre mayo e chunio. Ye una especie mediterrania que vive per un regular, debaixo de caixigars e carrascals sobre sustratos silicios u clacarios. Entre 1400 e 1700 metros d'altitut en el piso mediterranio. Ye una especie escasa e rara.

Ye evident que L'Aínsa se troba pro més baixa de 1400 metros, asinas que ixa información, no ye guaire exacta. Tamién he leito que ye verenosa, e que la utilizaban las mullers pa abortar como diz el suyo nombre. Igualment, he visto per astí que s'alimenta de restos vechetals.
Bueno, una curiosidat vechetal.

E tamién l'he feto fotos a las flors de la carronera (Rosa canina):

As navatas

2010-05-24T13:21:00.000-07:00

Como totz es anyos, baixemos ta L'Aínsa a veyer "as navatas". Pa un anyo que inos con tiempo (perque siempre hemos baixato una miqueta tarde), entre es capazos que te vas pillando e que nos queriemos prener un trago e a la fin no podiemos, quan arribemos ta la glera ya arribaba la primer navata. Llevabe montato l'angular e me salioren leixismos, e quan metié el tele (que ye malo e lento d'enfoque) ya pasaba la segunda, e no podié puyar la sensibilidat e m'han salito movitas. M'amuela sobre tot perque querrí haber-le feto fotos a "o zagal de molinero l'arco", e le'n fayé, pero han salito mal, ya perdonarás Betato.
Con tot e con ixo, fayó un día buenismo, baixaba augua a embute e baixoren a tota vitesa, en una horeta si fa u no fa. A veyer se a l'altro anyo ya tiengo un tele en condicions u, se no, puedo tener la camara presta pa quan me pasen per es morros.

Una tarde a L'Aínsa

2010-05-22T14:56:00.000-07:00

Esta tarde somos baixatos ta L'Aínsa pa que la cría i veyés una actuación infantil. M'hebe compromeso a fer unas fotos a's actors con que i soi ito con tota la parafernalia. Como se nos ha feto una miqueta tarde, he aprofitato pa fer bel·la foto semi-nocturna d'esta bella plaza.

Maitín "t'as navatas", miraré de no arribar guaire tarde a veyer si puedo fer garra foto pincha.

Sant Mitier

2010-05-18T13:28:00.000-07:00

Hue, aprofitando que salibe luego d'el treballo e no tenebe prisa pa arribar ta casa, me'n soi ito enta Sant Mitier, an que nunca no i hebe estato.
Hebe visto fotos d'el castiello sobre el Entremont e ya me barruntaba per la capeza dende feba días d'ir-ie, e hue per fin he puesto fer-lo.
Ye recomendable pa tot el mundo perque i hai unas anvistas espectaculars, e ixo que hue el sol yera fierot. Ixo sí, no ye tant recomendable pa es que tiengan vertigo, perque i hai una caita de cualques 300 metros dica el Entremont que ye prou vertical.
No te puetz cacegar ni querendo, perque tot el rato puyas per una pista forestal que sale a la fin d'el lugar enta la izquierda. En primer puesto arribas ta la ermita de Santa Valdesca, que ye d'el sieglo XVI con cualques elementos goticos e altros posteriors:
Pro a fes que es que disenyan las linias d'alta tensión no paran guaire cuenta en es aspectos paisachisticos, perque qué cagata han feto colocando ixa pilona dezaga de la ermita.
En drento de la ermita i podemos apreciar es arcos goticos con una medula e es capitels con forma de capeza humana (ya perdonaretz es míos pobres conoiximientos de terminos artisticos, pero ya fa mutos anyos que deixé de veyer-los):
Dimpués de pillar aire mientres febe estas fotos, soi puyato ya dica el conchunto relichioso-militar de Sant Mitier e Sant Celedonio. Como he leito en bel puesto, ye un niedo d'alicas. I hai una caita enta el Entremont que espanta, e més con l'aire que bufaba hue. Ye curioso perque pa arribar dica el Castiello s'heba de rodiar la ermita per el canto preto a'l cillo. Dimpués, en tiempos de paz, ubrioren una puerta en la paret norte que priva de tener que pasar preto a's absides pa poder arribar dica el castiello.
Aquí tenetz el conchunto, la ermita en primer puesto, cal pasar per la dreta, an que ye la cingla:
E la ermita dende el castiello, caleba pasar chunto a's abisdes, e chusto astí ye el cillo que da enta l'Entremont:

Esta foto ye de l'interior enta es tres absides, debaixo (enta el sur) i hai una cripta que sirvió pa aplanar el suel e poder construyir la ilesia, que pareix estar estió prencipiada a primerías d'el sieglo XI e sigue tecnicas lombardas.

El castiello ye ronico, i queda bel troz de paret. Ye pentagonal como altros de la misma epoca como el de Troncedo. Dende astí i hai un dominio visual de Sobrarbe enorme: se i vei Muro de Roda, l'atalaya de L'Abizanda, la Tierra o Buixo, el Pirineo dende Collarada (Chacetania) dica Cotiella eTurbón, l'Entremont, es pantanos de Mediano e Lo Grau, etc. Hue la pena yera el ciel, perque i heba un gallinazo que no deixaba veyer clar de tot.
Esta foto ye mirando enta el norte:
Enta el norte tamién, pero chugando con una sayetera e Treserols. Se paratz cuenta debaixo se vei la punta de la torre de Mediano:

L'Entremont a's nuestros pietz:
Y ya ye pro, p'altro día ya i meteré las fotos de flora que he feto, encara que como ya he dito feba muto aire.
Creigo que m'he de fer con un GPS pa poder pinchar es recorritos (u tracks) que foi...
Salut.

Mal orache

2010-05-12T13:47:00.000-07:00

Este mal orache que fa dimpués d'ixa leixana semana que pasemos calor, fa que no i haiga guaires oportunidatz de quitar la camara. Pleve, truena, fa frío, bufa l'aire... ye primavera en la montanya. Encara que la primavera pareix que viene tardana, es caixicos, albars, es faus que trobamos per abaixo ya han feto fuella e i hai una color verde preciosa, se ademés le anyadimos las boiras que s'agarran ta las montanyas e es ríos que baixan plens d'augua pos fa goyo de veyer l'anvista.
Ademés voi de fayena dica el cuello, e poco me vaga d'adedicar-me a's míos hobbies: entre el treballo per lo que cotizo, es treballos que tiengo per es que no cotizo (ni cobro he he) e estar-me con la nin·na tiengo el blog a l'abandón. Con tot e con ixo ayer podié salir con la filla un ratet, e la camara se'n venió con nusaltros. Era s'empenya en pretar el botón, asinas que foi la compo e dimpués sale como quiere, perque u mueve el tripode, u la camara u que me sé yo.
Estas dos primeras son presas de mediodías en l'Entremont, entre es embalses de Lo Grau e Mediano, pa bien u pa mal, la responabilidat ye mía:
Per la Tierra Baixa, la primavera va més abanzata que per aquí alto, ya se i vei qualque orella d'onso, e ye tot plen de flors:

Aquí tenetz ixas fotos fetas a medias, se son bien el merito ye pa la filla, e se son mal las culpas pa'l pai.
Una margarita:

E l'anvista dende el Plan, i hai un contraste de luces brutismo:
Au, salut.

Taller de fotografía nocturna

2010-05-09T11:28:00.000-07:00

Yo no podré ir-ie, pero recomiendo encareixitament a qui pueda que vaiga ta este curso de fotografía nocturna. Tiengo la suerte de conoixer a un d'es que el fa (e no m'importaría mica de conoixer a l'altro), asinas que a veyer se el puedo embabucar pa que en fayan un per estes ciels pirenaicos pa poder asistir-ie. Buena suerte e buenas fotos.
El cartel el tenetz aquí

Chunquetas (Aphyllantes monspeliensis)

2010-04-27T14:22:00.000-07:00

Estas fotos son fetas cerqueta de Paniello. He aturato l'auto en un apartader an que i heba mutas flors, pero bufaba una miqueta d'aire e he tenito que borrar mutas. Estas dos son salvables, encara que m'habría feto goyo de poder zarrar una miqueta més el diafragma, pero yera imposible, saliban totas trepidatas.

El cul de Pineta de nuet

2010-04-24T01:14:00.001-07:00

Ayer estié fendo bel·la foto nocturna en el cul de Pineta con el chirmán d'un amigo. Este hombre ye fotografo profesional e fa poco que ha adquirito material canon. Jolio, ixo sí que ye una camara, la 5D Mark II. Prencipiemos fendo fotos cada un con la nuestra e a la fin me deixó probar el mío obchectivo en la suya camara. Estié fendo fotos con una sensibilidat mui alta (1600) e una apertura de f/8 a 30"; e fa goyo de veyer cómo apenas fa ruido, se foi ixo con la mía se podría fer paella con es grans que m'habrían salito. Ademés el mío 16-35 con una camara de sensor completo como ye la 5D II fa encara més goyo.
Ixo sí, fa falta un buen ordenador pa manullar ixas pedazo de fotos, perque en JPEG ya le costaba una pila de rato a'l portátil ubrir-las con PS, no me quiero ni pensar quánto le costará con es archivos RAW (que no sé per qué no puedo ubrir-los con DPP).
I heba una miqueta de luna, pero me cuaca el resultato.
Esta ye feta con la mía, con una exposición de 996" a f/2'8, deberí haber zarrato més el diafragma pa tanto tiempo, pero charrind-charrand se me pasó. La he tenita que escureixer pro, perque pareixeba que yera de días, e quasi me sale una circumpolar sin querer fer-la:
Estas altras ya son fetas con la 5D II, quan me toque la lotería me mercaré una full-frame. La primera con un obchectivo manual de 150 mm que no m'acuerdo cómo se deciba:
E estas a 35 mm.:
E a 16 mm., un angular como cal:

A veyer se maitín de maitins me puedo escapara ta Pineta, que i hai una lit que baixó de l'Embudo que pareix un nuevo glaciar. Salut.

Macro

2010-04-18T13:11:00.000-07:00

Me'l paso de pistón con ixe obchectivo, e se ademés yes en un prato plen de flors per tot, pues encara millor. Las he fetas a'l canto Boltanya, perque per Bielsa la primavera viene més tardana, qué diferiencia i hai en 38 kilometros e 400 metros d'altitut...
Yera plen de floretas d'estas, de las que desconoixco el nombre popular (Muscari neglectum; paratz cuenta, que diz que ye afrodisaco):

E chicoinas u escarnaruels (Taraxacum officinalis), ya con es peletz prestos pa salir volando. Con estes he chugato con la compo e es detalles chiquinins:
E tamién i heba una pila de camomiletas, encara que m'he quedato con esta a punto d'ubrir-se:
Au, salut.

Narcisos de prato

2010-04-16T12:04:00.000-07:00

Ya n'i hai uns quantos, encara que per ixemplo esta nuet ha chelato. Esta tarde, que no tenebe guaire tiempo, he feto las primers prebatinas con el macro. Son difícils de fotografiar estas flors, perque salen pretas e no se pueden conseguir buens fondos, pero s'ha feto el que s'ha puesto. Ademés, en estar tant grans no puetz ubrir guaire el diafragma, perque no i sale soque una miqueta a foco, e se el zarras el fondo se'n va a cascar-la. Ademés bufaba una miqueta d'aire, e no s'estaban quietas ni de conya, asinas que hue m'he aconortato con fer bel·la foto e pro.
A veyer se este cabo de semana quito un ratet e miro de fer bel·la cosa millor. Ya tos contaré...

Muscari neglectum

2010-04-13T12:57:00.000-07:00

Poquet a poquet va arribando la primavera. L'altro día estiemos pasando el día en el monte, e encara que en la montanya tarda una miqueta més, ya se van veyendo es primers sinyals: flors, sobre tot chicoina u escarnaruel, las primers voletas volando, es árbols que prencipian a fer fuella, es paixariquetz en celo...
Con el macro fayé esta foto:

Pero encara se nota més per la tierra baixa. Hue he tenito que estar-me un ratet en L'Aínsa mientres cambiaban las ruedas a l'auto, que las tenebe dolentas; e mientres esperabe a que me las cambiasen he aprofitato a fer bel·la foto. Astí abaixo se nota més la primavera, ya se veyen es chitos d'es caixicos e d'es chopos, e bel·la floreta més como es artos que fan flor. He feto bel·launa, como estes Muscari neglectum:
La verdat ye que con el macro me'l paso de pistón, ya tiengo ganas de que prencipie a salir flors per tot, que estianyo es narcisos se son fendo de rogar.

2010-04-09T15:57:00.000-07:00

Quan es nuestros antepasatos trigoren este lugar pa fer-ie un dolmen megalitico, quan es las albors d'el primer milenio i fayoren una preciosa ermita romanica e dimpués, per si nunca i heba poca intervención divina, en fayoren altras dos ermitetas més la ilesia d'el lugar, quan i hai tantisma tradición sobre bruixas e bruixons... en un lugar machico como ye Tella, no les faltaba mica razón.
E de nuet, como diz la canta de la Ronda de Boltanya, "debajo del Dolmen de Tella, se siente girar y girar el planeta".
Espero que esta imachen tos faya sentir una miqueta ixa sensación de que chira el planeta. Un quartet d'hora d'exposición, pro como pa veyer cómo chira este planeta. Salut.

Sant Chuan-i-Pablo

2010-03-31T02:31:00.000-07:00

Ayer dimpués de cenar m'asomé ta la finestra e viyé que yera despasato. Encara que i heba luna plena ya habe meses que tenebe pensato ir ta la ermita de Sant Chuan-i-Pablo a fer unas fotos nocturnas, perque la verdat ye que el puesto tiene mutas posibilidatz, tanto de día como di nuet. En la media hora que cuesta d'ir dende Bielsa dica Tella se metió nuble, pero ya que ibi yere no me'n ibe a tornar sin, a'l menos, mirar de fer bel·la foto. Estié mirando qualques enquadres pa tornar bel día que sía despasato e sin guaire luna, e la verdat ye que el puesto da pa ir-ie més d'una vegata.

El puesto se conoix como Sant Chuan-i-Pablo per la ermita que i hai, encara que popularment (e talment pa atrayer turistas) se le denomine Puntón de las Bruixas. La ermiteta estió consagrata en l'anyo 1019 (quasi 1000 anyos enta zaga), e forma parte de la ruta de las ermitas, camín circular que tos recomiendo, perque l'anvista ye soberbia. Se pasa per la ermita de Faixanillas e la de la Virchen de la Penya. Ademés, Tella ye un lugar majismo, con una cantidat de cursas a fer que enorme per un medio natural inmenso.

Las fotos no valen gran cosa, ya digo que tiengo que tornar-ie en millors circunstancias, pero ya que i fue, a'l menos querié aprofitar el rato que i estié. Quan arribé ta'l coche (i hai 20 minutos) prencipiaba a nevusquiar... y trobé el briquet que me pensabe que hebe tresbatito (el tabaco me fa companyía mientres foi fotografía nocturna, tamién ye opcional llevar-se un arradiet, pero tampoco no ye mal sentir la vida nocturna).
La primera ye forzando el ISO pa mirar el enfoque, tiene un rudio que tira enta zaga, pero a este tamaño no se nota guaire (ISO 3200, f/2'8, 30"), e churo que yera de nuet:
Esta ya ye feta a ISO 100, f/2'8 e 138" d'exposición, i hai diferiencia, ¿verdat?:
Pues con un aduyant amagato entre es buixo e iluminando la ermiteta, estoi que se puede conseguir grans fotos en este puesto.
Mientres ibi yere, pensabe en tota la tradición que i hai en Tella sobre las bruixas que feban las suyas trobatas per estas ermitetas, estoi que una persona miedosa u supersticiosa no podría dedicar-se a este tipo de fotografía, perque la cantidat de cosas que se sienten de nuet en medio d'el mont ye increíble (el craberet, bel chabalín, l'aire que fa mover es camals... bai, que te puetz cagar de miedo como deixes volar la imachinación). I tornaré, pero con briquet.

Ordesa

2010-03-29T23:57:00.001-07:00

No i hai cosa como estar de vacacions. Ademés se te trobas con tiempo libre e sin obligacions pa poder fer el que te pete e poder salir ta la montanya sin prisas ya ye la hostia. Ayer marché enta Ordesa, an que feba anyos que no i ibe. Tot plen de nieu e chel (una lastima que el gore tex de las mías botas hes decidito de pasar a millor vida, baixé como se m'hes banyato con las botas mesas) e de turistas. I heba dominguers e montanyers. Es primers calzaban zapatilletas de deporte, e el camin yera como un pander de chel, no sé cómo farían pa baixar. Es altros iban (inos) bien equipatos: botas, molatieras, raquetas pa se la nieu yera blanda (yo no me las metié, las llevé de cursa).
Bueno, a la fin arribé ta'l churro conoixito popularment como "Cola de caballo". Baixé cansato, tot el hibierno sin mover el cul menos dos vegatas que soi ito con la filla a esquiar e una excursión con raquetas per la val de Chistau a principios d'anyo. Ademés tenendo en cuenta que he tornatoa fumar, pos le metié un buen sobo a'l cuerpo, mereixito se'l teneba.
Entre que el fotografo ye malo e la luz yera una mierda perque i heba gallinazo poqueta cosa podié fer en el tema fotografico (esto se diz captatio benevolentiae); pero tos deixo bel·la foto d'ayer. Salut.
El churro d'O Chordonal (estoi que se diz asinas en aragonés):

Churro de L'Estrecho (con lo pincho que ye estre(i)to):
As Gradas de Suaso:
Cola de Caballo:
Ya baixando me metié a chugar con el macro, encara que ibe banayato como una chopa. Aquí uns detalles de la molsa:E aquí una primula (creigo que se diz asinas), que son las primeras floretas, ademés d'el pan de cullebra, que se veyen salir entre la nieu:

Sinyals

2010-03-24T14:48:00.000-07:00

Ya se prencipeyan a veyer es primers sinyals de la primavera... encara que per la Tierra Baixa. Dica Escalona es érbols frutals (almendreras, manzaneras, cirgollers...) son totz en flor e es pratos ya verdeyan. Manimenos en la montanya las unicas flors que se i veyen son las d'el pan de cullebra e las de las abellanera. Ixo sí, es pratos ya prencipeyan a meter-se verdes, e con l'augua que caye e la temperatura que fa -no fa mica frío- no tardarán guaire a salir es narcisos. Encara que no sería rar que encara cayés bel·la nevata, dica metat d'abril no se sabe el que puede fer.
Estas son fetas a'l canto d'el troballo, en un descampato an que i medra un arbolichón de flors rosas. No tiengo ni ideya de qué árbol puede estar (estoi que ye de la familia prunus), no sé so que per cada día me fa més goyo el macro.
E estas altras son d'ayer, quan tornabe de troballar que, como yera luego, me'n torné per La Fueva. Aora pa días torno a poder fer fotos, s'ha meso a plever e pareix que durará. Asinas ye la primavera.
Una chicoina u escarnaruel (u qualque planta pareixita):
E una veronica persa, aora n'i hai per tot d'éstas:

Un día per la estepa

2010-03-15T13:46:00.001-07:00

Un, que ye feto a la exuberant naturaleza pirenaica, se piensa que per ixas estepas de la valle media de l'Ebro no i debe d'haber guaire vida: espartals, plantas punchutas, tierras de chesos e lagunas salatas, paramos crematos per lo cierzo, per lo frío e per la calor... Manimenos, quan un tiene un guía que conoix como pocos la redolada arredol de Zaragoza (e ademés un gran fotografo) e unaltro acompanyant que te deixa parte d'el suyo equipo fotografico perque a tú no t'arriba con es milimetros ;-), fa goyo de tener amigos como ixes.
El sabado pasato estié en el bel medio d'ixas estepas e pedregals disfrutando como un enano (encara que chelato de frío, sobre tot a primer hora) disfrutando de la vida que rebosa per ixe país (e n'i hai més de la que pareix a simple vista). Tota una revelación de que, encara que sía un comentario pro habitual, la naturaleza arriba ta's rincons més estrimers. Tampoco no ye que fenos guaires fotos, pero aprendié muto, e bel·launa en podiemos fer.
Como siempre tos ne deixo qualque muestra.
Esta ye una alondra de Dupont (Chersofulis duponti), un ave estaparia en periglo d'extinción e que no més vive en las zonas esteparias de la Peninsula Iberica e d'el norte de Marruecos. Corre como un diaple, e quan creyes que la tiens enfocata ya ha desapareixito. Con tot e con ixo, bel·la foto se le podió fer, encara que més leixos d'el que m'habría feto goyo. Manimenos, ixa leixanía sirve pa veyer el suyo habitat.
Dimpués de foter-nos un almuerzo como cal, marchemos a vesitar diferents zonas d'observación d'aves, e a'l canto d'una basa podiemos veyer este chorlitejo (fa un anyo en veyé un chunto a la presa de Pineta, pero no podié afotar-lo con un obchectivo de calidat como el que m'heban deixato):
E ya pa rematar (es primillas no se deixoren afotar) un alicastro, no sé exactament quál ye. No se i vei guaire bien, e ye evident que no ye la millor foto, pero se vei el suyo metodo de caza, sobrevolando es marguinazos e espuenas en busca d'el suyo alimento:
En fin, que las mías baixatas ta Zaragoza tienen aora un alicient, que antes no teneban, e que con ixas amistatz fa goyo d'ir-ie (manimenos, les debo per lo mío país el tordo d'augua, el pintaparetz e mutas altras especies).

Una nuet en Guaso

2010-03-06T16:22:00.001-08:00

En verdat no ye estata una nuet, estoi que i soi estato menos d'una horeta. Somos baixatos a cenar ta casa d'es cunyatos e m'he escapato con el mío cunyato antes de cenar. Ya feba días que tenebe la ideya de fer una foto nocturna con un exconchurader (¿verdat Frikosal?), la pena ye que este de Guaso ye chusto en bel medio de las dos poblacions més grans (ergo con més contaminación luminica) de tot Sobrarbe: L'Aínsa e Boltanya. Asinas que i heba luces per tot, una pena no tener un edifico d'estes per la valle Bielsa, pero con tot e con ixo no me'n ibe sin las mías fotos. Ya diretz se tos fan goyo. Salut.
Ya sabretz que es exconchuraders son ixas construccions tradicionals que serviban pa que es mosens d'es lugars ninviasen las tronatas enta's lugars de la redolada e que no apedregás en el suyo lugar. En Sobrarbe n'i hai bel·laún, yo conoixco que el de Guaso e el de A Torrocilla, pero regular que n'i habrá més, a veyer se trobo documentación e en trobo qualcún que no sía rodiato de contaminación luminica.
L'exconchurader con la torre de la ilesia dezaga:

No més la ilesia, que per era misma ya mereix una visiteta, se vei dende mutos lugars d'el país perque ye en la punta d'un tozal:E aquí una anvista d'es dos edificios, que bel·laún que sepa treballar con photoshop me diga cómo correchir la perspectiva...

IIº Cabodanyo

2010-03-05T23:55:00.000-08:00

Reyalment fa fa uns quantos dias, pero las obligacions y una qüestion personal han feto que no podés atender el blog. Asinas que con una semana de retraso caldrá celebrar el IIº Cabodanyo. Tamién fa días, dende las nocturnas, que no me vaga de salir a fer fotos, asinas que cal tirar d'archivo, e meter una de las zagueras, encara que no ye pa tirar codetes. Gracias a totz es que itz pasando e que fetz posible la continuidat d'este humilde blog. Salut.

Una estreleta que s'amorta (espero que per poco tiempo)

2010-02-20T15:22:00.000-08:00

Torno ta casa dimpués de fer unas fotos de nuet e mientres las soi pasando a l'ordenador me decido a fer una gollateta per es blogs e me trobo con la mala noticia de que chemecos plega per uns meses. Aora que pareixeba que pillaba la marcheta buena unaltra vegata, nos esbota con que el deixa estar. Se vei que ye més responsable que no yo (perque yo habrí de plegar pa fer el mismo que er), pero con tot e con ixo, e respectando la suya decisión, ye una pena.
Per ixo, amigo blogger, permite-me que te dedique estas dos fotografías, ya que altra cosa no sé fer, asinas que no més queda soque desear-te salut e muta suerte, Charrabis. Nos veyemos, ya que no te puedo decir ixo de "nos leyemos".

Dende Baixo a Penya

2010-02-20T11:46:00.000-08:00

Hue soi ito con la familia a comer ta'l restaurant d'O Plano, en a zona de Baixo a Penya. Ye un puesto muit recomendable, ixo sí, con buena cartera, pero de verdat que se i come muit bien. L'anvista ye espectacular enta a Penya Montanyesa, Sant Veturián, Sierra Ferrera...

Contra el mío costumbre, he tenito que tocar es nivels, perque he feto servir un filtro cokin que da una dominant machenta que no me fa guaire goyo.

La filla se'l ha pasato de pistón, perque ademés que i hai columpios e tobogans, i heba una parella comendo que i yeran arribatos a caballo, e l'han deixato dar una vuelteta en un d'ers: ¡qué cara de felicidat que feba!
De tornata, somos ito cara A Espunya, e l'anvista sobre Treserols ye magnifica, como espero podiatz apreciar en las fotos (punchatz dencima pa veyer-las més grans).

La d'alto ye feta con el 16-35, talment demasiato angular, aora entiendo per qué es paisachistas llevan un 100-400.Esta ye feta con el 70-300, pa poder veyer Treserols de més cerqueta

Esta nuet talment me'n vaya a fer nocturnas, pa una vez que ye raso el ciel, se a la fin m'animo ya veyeretz es resultatos. Salut.

P. S. Qué goyo me fa no tener que clonar es "perdigons" que tenebe en el sensor, ixo le'n debo a un amigo que me'l limpió estas navidatz, yo no m'atreverí a foter-ie las zarpotas ni farto vin.

Habemus graphia

2010-02-18T14:25:00.000-08:00

Per fin, dimpués de tantismo tiempo, s'ha feto publica la PROPUESTA grafica enta la sociedat de l'Academia de l'Aragonés. Bienvenita sía.
En esta humide bitacora ye adoptata dende hue, encara que ya fa tiempo que imos fendo servir el que nos iban contando (cosas de tener dos amigos de la valle bien informatos d'estas qüestions).
Pos ixo, bienvenita sía, e que dure muto tiempo.

Tranga e garretas

2010-02-18T00:08:00.000-08:00

Ya ye pasato Carnaval... bueno, remató el domingo, pero yo dica hue encara he tenito las conseqüencias d'es excesos comesos el domingo de tardes: mal en es pietz, en las garras, en el esquinazo, en la capeza per las cuerdas, la frent esnafrata d'es cuernos, bel·la nafra per es brazos... Entre el que recuerdo e el que m'han dito debié de fer l'animal sin conoiximiento. Qué mal que ye perder el costumbre de salir e, sobre tot, pasar d'es 30, que ya no te recuperas como antes.
Asinas yere el lunes, que quan habié d'ir a troballar pensé morir-me, ¡qué día més largo! Bien se vale que hue e maitín i hai fiesta, a veyer se torno a endrezar el suenyo, que encara el tiengo trestucato.
No he feto guaires fotos perque per aora m'estimo més de fer l'onso per astí e salir de marcha, pero en pincho dos que me fició mi pai.
Con dos garretas bien guapas e una madameta tamién muto guapa:
E con la garreta més guapa e pincha de tot el mundo:
Caldrá estar a la tisba hue perque seguntes dicen, hue se fará publica la propuesta grafica de l'Academia.

Amanando carnaval

2010-02-11T07:27:00.000-08:00

Perque ya el tenemos dencima, unaltra anyada ya ye arribato. Tot un anyo esperando-lo pa que quan quieras parar cuenta ya se'n son pasatos. Ya se nota l'ambient en la valle, e no veigatz cómo tiengo el salón de casa de disbraces, pelucas, piels, talacas... La pena ye que maitín e el lunes tiengo que troballar, per lo que me perderé la primer e la zaguera nuet.
Ixo rai, es días que pueda -viernes, sabado e domingo- caldrá aprofitar-los, pa ixo ye carnaval.
M'he permitito de fer un bodegón (estoi que ye el primer que en foi) con es "trastes de tranguiar":

Ixas talarainas ya las quitaré fotendo-le buens trucos a'l batallo.
M'han dito que el cabo-semana i habrá noticias importants pa l'aragonés. Chuntaremos las celebracions alavez.
Tamién estoi que en no guaire tiempo este blog fará, con el vuetro permiso, dos anyetz, asinas que febrer (ixe que mató a su pai en el lenyer e a su mai en el lavader) ye un buen mes ;-)
A veyer se foi totz es posibles pa que no torne a pasar dos semanas sin pinchar cosa en el blog, pero ye que he pasato uns días con muto troballo.

Goluchos

2010-01-24T01:54:00.000-08:00

En pasar Sant Antón, Carnestutas son. Ya somo en carnaval: ya ha pasato Sant Antón, ya hemos feto la mataziya pa la penya e ya salen es goluchos per la carrera.
Es goluchos son uns personaches d'el Carnaval de Bielsa que salen es días antes de Carnaval. Son chent disbrazata con ropas viellas, caretas e pelucas pa que no se les conoixca, asinas como coixins u almadas pa que no se reconoixca per lo volumen. Es chicotz van per las casas pa arreplegar lamins, mientres que es grans van per fer-les miedo a's nin·nos de las casas e beber-se el vin, comer-se el pernil e fer bel·la broma a's adultos. Ye important no charrar pa que no te conoixcan.
L'altro viernes per las carreras de Bielsa igual i heba 20 goluchos e goluchetz. La mía filla cuan salió d'el cole ya iba con la idea de vestir-se de golucho, e s'achuntó con altras crías pa ir per las casas, asinas que, chunto con un altro pai, me tocó ir "pastor". Fayemos una rondeta per qualques casas e bars, e cuan salino d'un bar nos trobemos con altras collas de goluchos e las nuestras quasi se cagan de miedo, las cagosas d'eras.
Este ye el mío goluchet antes de salir de casa:
Aquí uns pocos goluchetz antes de fer la ronda, esperando a que salisen es altros:

Aquí trucando en una casa:
E aquí cuan se chuntoren con altras dos collas de goluchos (uns chicotz, altros medianetz e altros grans), dimpués de que se les pasás el espanto inicial a's chicotz:
Ya no queda soque tres semanetas, tres semanas de cenas, farteras, amanar es disbraces e pasar buens ratos.

Sarra Guara

2010-01-20T12:48:00.000-08:00

Totz es días, quan torno de troballar, paso per lo Puerto de Foradada. Fa días que tornando una tarde viyé cómo se meteba el sol, e i heba una luz buenisma dencima de la Sarra Guara, a la que aduyaba unas boira que refleixaban la luz. Como gosa pasar a menuto, ixe día no llevabe la camara. Hue sí que la llevabe, e i soi pasato a ixa hora machica quan s'amaga el sol. Tos deixo un par de muestras. Son fetas con el tele largo, d'astí que no tiengan guaire calidat (con l'angular buen se me quedaba muto leixos), pero me fa muto goyo ixa luz. No ye la que i heba, pero enganyo a'l fotometro de la camara medindo en o puesto més luminoso, asinas s'oscureix tot el de demés (esto tos lo cuento per si nunca tos interesás a bel un). Salut.
Esta ye tirando de tele:

E esta a 70 mm (equivalent a uns 110 mm, pa que veigatz que queda pro leixos):