sábado, 28 de marzo de 2009

Tierra bucho

Esto maitín que me'n ibe de viache, per primer vez en muto tiempo sin guaire prisa, he decidito de baixar per Guaso, Arcusa e Olsón pa salir a'l canto d'el Mesón de Ligüerre ta la cheneral. No me'n soi baixato per Colungo e Alquezra perque tampoco no me vagaba pa tanto, pero no pas per falta de ganas. He tenito que salir una miqueta tarde, e la luz no yera la millor, ademés i heba un gallín que no deixaba el ciel tant azul como estes días ta zaga (e calor, se maitín ha a nevar ya puede cambiar la cosa). Con tot e con ixo s'ha feto el que s'ha puesto. Las almendreras ya han perdito buena cosa de las flors e ya follan (1); las allagas prencipeyan a floreixer (cuan l'allaga floreix la fambre creix, e cuan bachoca pa totz en toca), pero n'he visto pocas en plenitut e no he aturato l'auto. Es trigals ya verdeyan e son pro majos. Tamién he feto cualque foto per el Somontano, an que es trigos tamién son bien verdes, pero yera de mediodías e i heba una luz muit fuerte, per el que no me convencen. He trobato a faltar es ababols, ya no debe faltar guaire pa que salgan (encara que en Zaragoza ya n'he visto bel·launa), conque a veyer se nunca torno a baixar sin prisa cuan n'i haya, d'ababols, e puedo fer bel·la foto més maja que no las de hue.
Flor ¿d'almendrera? (creigo que este árbol no yera una almendrera, he feto la foto en un mirador debaixo Mipanas)

Pirineus dende cerca d'Olsón

Treserols dende Arcusa (buenoooo, un poquet antes)
(1) Follar < latín FOLIARE, `fer fuella´. Esta nota ye pa's que no conixen l'aragonés, que la primavera la sangre altera, pero no pas tanto como pa fer que es árbols buquixcan.

lunes, 23 de marzo de 2009

Primavera

Encara que per la tierra baixa ya va més adelantata, per aquí prencipeyan a notar-se es primers anuncios. Va floreixendo e follando bel arbolichón (sobre tot artos, pero tamién fréixens, nuqueras), e ya i hai bel·la floreta. Encara que diz que falta un u dos nevazos, per aora imos a disfrutar d'estes días preprimaverals.

jueves, 19 de marzo de 2009

Primeras prebas

Encara tiengo que pillar-le la maranya a este maquinichot nuevo, sobre tot con el tema d'el enfoque (pero con mutas cosas més). Pero ya voi fendo las primeras prebas e la verdat ye que un camarón. La pena ye que el obchetivo que veniba no ye guaire buen, pero el que puede fer este traste con uns obchetivos buens ha a estar la hostia. Caldrá ir cabidando pa pillar, a'l menos, un macro e un tele, e se son buens millor, perque no veigatz la gama que i hai pa Canon (no pas pa Olympus, una de las razons d'el cambio). Fendo un símil con es nin·nos, soi prencipiando a ir a esgalapatons, ya arribará el día en que sepa correr, pero per aora me foi més que contento d'el cambio, no veigatz el que ye tirar a ISOS altas sin que salga mica u poco ruido (una altra razón pa'l cambio). Pos ixo, que cal que aprenda cosas, e mutas, pero per aora ya voi fendo bel·la foto con el foco, si fa u no fa, en el suyo puesto.
Las dos son retallatas e tocatas una miqueta con Photoshop (brillo, contraste e mascara d'enfoque, no guaire perque no sé fer cosa). Salut.

Un clau en·n'a puerta d'una borda en Es Morés
E una flor de salieto a'l canto de Plan d'Escún (se vei bel·la floreta, pero encara falta muto pa la primavera)

martes, 17 de marzo de 2009

Chuguete nuevo

Ya tiengo chuguete nuevo. Feba muto tiempo que decidié que cuan calés cambiar d'aparato me'n pasarí ta Canon, per ixo de la disponinibilidat de complementos (obchetivos sobre tot), perque es d'Olympus son carismos (es de Canon tamién, pero menos, e ademés i hai més mercato de segunda man). Tiengo que agradeixer a la muller que m'haya deixato fer este desembolso important de perras, e ixo que ye estata una verdadera ganga. Aora no queda so que ir cabidando pa dar-le chirmans a'l pISapapels, que ye como se le conoix a'l mío obchetivo per es foros especializatos. Aquí tos deixo una foto d'el mío chuguete nuevo, e el que tenebe dica aora el "heredará" mi pai, espero que disfrute tanto como yo el he feto.

martes, 10 de marzo de 2009

¿Hue ye el día d'es inocents?

Leyendo la versión dichital d'el Diario de l'Alto Aragón me trobo con esta ¿inocentata?
De 7000 habitants que somos en Sobrarbe e van a conseguir 10000 puestos de troballo (yo me pido de cicerone de Fernando Alonso, perque mismo quieren fer un circuito de Formula 1).
Talment sía que la let que he preso pa desayunar estás mala. Seguiremos informando a veyer en qué para tot esto.

sábado, 7 de marzo de 2009

Més nocturnas

Ayer marché, una altra vez, a fer fotos nocturnas perque me pensabe que con la nieu que heba caito estaría tot mui majo, e en yera. La pena ye que i heba desmasiata luna e con es 8 minutos d'exposición no saliban guaire bien. Como no feba orache pa estar fendo prebas de diafragmas e tiempos, en ficié unas poquetas e me'n torné enta casa. Es resultatos no rematan de convencer-me guaire (per no decir mica), pero ya que i fue pos en meto bel·la una. Torné a marchar cara Tella, e bien se me'n valió que dica el Dolmen -u Losa la Campa- encara no yera mal la carretera, ya no puyé per Lo Pinar perque astí i habría més nieu e chel enn'a carretera. Pa ir ta'l Dolmen per el camín i heba en bel cacho an que m'arribaba la nieu dica es collons (literal), e un aire que no me tiró la camara con el tripode perque el metié baixo pa que fes menos resistencia. El resultato estió este:
Ya baixando, dencima de Cortalavinya, e podendo-me estar en drento el coche, torné a fer-le una foto a Penya Montanyesa e Penya Solano, e le la quiero dedicar a O Zagal, va pa tú, per el contacto con el país.

jueves, 5 de marzo de 2009

Auto nuevo

Per cierto, no tos hebe dito que m'hebe crompato un auto nuevo, ¿qué tos pareix?
Qui dobine qué modelo ye le pago un trago en Bielsa.

Vuelta la burra ta las cols

Encara que con l'anticiclón d'estas dos zagueras semanas pareixeba que ya veniba la primavera, marzo nos ha amostrato la suya cara. Nevar la verdat ye que no nieva guaire, pero bufa un aire de puerto que chela, e cuan se'n deixa de bufar la nieu caye con una miqueta més de ganas. Ayer estió nevusquiando pero no plegó gota, e esto maitín tornaba a nevusquiar, pero dende las tres s'ha parato l'aire e ha caito un ratet con ganas, e de camín ha meso tres centimetros, pero ixo no ye cosa se no contina. Encara nos queda pro hivierno per debant (dica mitat d'abril puede fer el que le pete) e puede nevar encara que ya no sía tant jodito como aviento, chiner u febrer; no cal so que pacencia, que bel día, de verdat, arribará la primavera.
Unas muestras de cómo s'ha meso en poquet rato.

miércoles, 4 de marzo de 2009

Hue va de videus

Yo que he troballato en retens de cremas e mismo cualque vez i soi estato en bel·launa, nunca no me'n he visto en una tant buena
video

E éste tamién ye buen, pero pa mayors d'edat.