lunes, 3 de noviembre de 2008

Agüerro en La Enfortunada

Continamos de borrasca (aora pareix que se'n ha deixato dende fa unas horas), e per la montanya ha debito de cayer buen paquete nieu (el túnel ta Francia yera hue cerrato per las litz). Aquí a la Villa ha amaneixito nevando pero sin que arribás a plegar, sí que heba plegato uns 100 m. -u menos- per dencima, e dimpués alternaba l'augua con la nieu. Me'n soi baixato a fer uns recaus ta La Enfortunada e ta L'Aínsa e he aprofitato pa llevar-me la camara fotos, pos hebe visto en la portada d'el Heraldo (edición Uesca) el churro de Las Devotas. Cuan i soi pasato baixaba menos augua que en la foto d'el periodico, pero con tot e con ixo encara yera bien majo pa fer-le bel·la foto.
Una vez feto el recau m'he mirato ent'alto e he visto, en un menuto, un trencahuesos, un cormorán, un milano e una pasa de patos, grullas u que me se yo qué bichos yeran, per el que he pensato en baixar un poquet enta el embalse d'A Espunya, que ye chusto debaixo de La Enfortunada, e encara que per la montanya ya pareix hivierno, es árbols nos indican el contrario, que encara somos en agüerro, per muto que nieve. Ixo sí, ni patos, ni grullas, ni cormorans ni cosa. Maitín que iy'iré con més tiempo a veyer se tiengo suerte.
Churro de Las Devotas




Refleixos en l'augua, mezclallo d'es elementos tipicos de l'agüerro: árbols amarillos, ramas ixutas, e gotas de plevia; no i falta so que bel poquet de boira.
Salut.

2 comentarios:

  1. Sí que has tenito buena suerte de biyer toz ixos animals, no has puesto fer garra foto? encara que agora se te chelarán as mans fendo fotos.
    A d'o Churro d'as Devotas ye majiza de tot.

    ResponderEliminar
  2. Si tiengo tiempo colgare as fotos que fize o sabado o dos u tres churros en o cañon d'añisclo.(no tienen punto comparazion con as tuyas...pero por intentalo que no quede). Salu

    ResponderEliminar